Joni 17
17
Sa masuti Tamana ko Jisu me vakarokorokotaki koya, 1-5. Sa masulaki iratou na nona tisaipeli, 6-19. Sa masulaki ira kecega era na vakabauti koya, 20-26.
1SA vosataka na vosa o qo ko Jisu, ka ta cake na matana ki lomalagi, ka kaya, Tamaqu, sa yaco mai na gauna: vakarokorokotaka na Luvemu, me vakarokorokotaki iko talega na Luvemu: 2me vaka ko sa solia vua me veitaliataki ira na tamata kecega, me solia ko koya na bula tawa mudu vei ira yadua ko sa solia vua. 3Ia sai koya o qo na bula tawa mudu, me ra kilai iko na Kalou dina duaduaga, kei Jisu Karisito ko koya ko a tala mai. 4Au sa vakarokorokotaki iko e vuravura: au sa vakaotia na cakacaka ko a solia mai vei au meʼu kitaka. 5Ia o qo, Tamaqu, vakarokorokotaki au me daru tiko vata, e na vakarokoroko sa tu vei au ni daru a tiko vata ni sa sega ni caka ko vuravura.
6Au sa vakatakila na yacamu vei ira na tamata ko sa solia mai vei au mai vuravura: era sa nomu, ia ko sa soli ira mai vei au: a ra sa talairawarawa ki na nomu vosa. 7Era sa qai kila ni sa taka maivei iko na ka kecega ko sa solia mai vei au: 8niʼu sa solia vei ira na vosa ko a solia mai vei au; a ra sa vakabauta, ka kila dina niʼu sa lako maivei iko, ka ra sa vakadinata ni ko a talai au mai. 9Au sa masulaki ira: au sa sega ni masulaki vuravura, o ira ga ko sa solia maivei au; ni ra sa nomu. 10A sa nomu na noqu ka kece, a sa noqu na nomu ka kece; ia kaʼu sa vakarokorokotaki e na vukudra. 11Ia kaʼu na sega ni tiko e vuravura, ia ko ira o qo, era sa tiko e vuravura, ia koi au, kaʼu sa lako yani vei iko. Tamaqu yalododonu, maroroi ira e na yacamu, ko ira ko a solia mai vei au, me ra dua bauga me vakataki kedaru. 12Niʼu a tiko vata kei ira e vuravura, au a daumaroroi ira e na yacamu: o ira ko sa solia mai vei au kaʼu sa maroroya, a sa sega ni yali e dua vei ira, o koya ga sa yaga me rusa; me vakayacori kina nai Vola. 13Au sa qai lako yani vei iko: ia na veika o qo kaʼu sa vosataka e vuravura, me levu sara na nodra marau e na vukuqu.
14Au sa solia vei ira na nomu vosa; a sa cati ira ko vuravura, e na vuku ni ri sa sega ni vakavuravura, me vaka kaʼu sa sega ni vakavuravura. 15Au sa sega ni masu mo kauti ira tani e vuravura, a ya ga mo maroroi ira mai na vu-ni-ca. 16Era sa sega ni vakavuravura, me vaka kaʼu sa sega ni vakavuravura. 17Vakatabui ira e na nomui vakavuvuli dina: sa ka dina na nomu vosa. 18Me vaka ko a talai au ki vuravura, au sa talai ira vaka talega kina ki vuravura. 19Ia kaʼu sa vakatabui au e na vukudra, me ra vakatabui talega e nai vaka-vuli dina.
20Ia kaʼu sa sega ni masu e na vukudra walega o qo, ia e na vukudra talega era na vakabauti au e na vuku ni nodra vosa: 21me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni ko sa talai au mai. 22Ia na vakarokoroko ko a solia mai vei au, kaʼu sa solia vei ira; me ra dua bau, me vaka edaru sa dua bau: 23meʼu tu vei ira, ka mo tu vei au, me ra qisi sara me ra dua bauga; ia me kila kina ko vuravura ni ko sa talai au mai, ka sa lomani ira me vaka ko sa lomani au.
24Tamaqu, au sa vinakata me ra tiko talega kei au e na vanua kaʼu sa tiko kina, o ira ko sa solia mai vei au; me ra raica na noqu serau ko a solia mai vei au: ni ko a lomani au ni sa sega ni tekivu ko vuravura. 25Tamaqu yalododonu, sa sega ni kilai iko ko vuravura: ia kaʼu sa kilai iko, a ra sa kila ko ira o qo ni ko sa talai au mai. 26Ia kaʼu sa vakatakila vei ira na yacamu, ia kaʼu na vakatakila tiko: me tu vei ira na loloma ko a lomani au kina, meʼu tiko talega kei ira.
Поточний вибір:
Joni 17: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
