मेथा 3
3
ठी़सो़खेन योहान्नागी लाम डाढीक जेपा
(मारकु १:१-८; लुका ३:१-१८; योहान्ना १:१९-२८)
1लो घाजीङ स्याम्ला, ठी़सो़ ॱनाङगीन योहान्ना युदेया युगी रीतोङला होरी, देरे क्षो़ स्येपालाक, 2“धीक्पा पारी सेम ग्युरवा तोङ घीझ्येरी ॱनाना नाम्खे ग्यासी ङ्ये ॱलेप्सादुक।” 3ॱङो़नस्येखेन यस्यायागी देरे सुङगीन, दे नी योहान्नागी कोरला लाक,
“रीतोङदु भो़गीन केक च्यीक,
‘चोवोगी फेप्लाम डाढीक झ्यी।
खोङबागी फेप्लाम दे खाप्ते शो़।’”#यस्याया ४०:३
4धा योहान्ना सेम्चेन ॱनाउगी पुगी घो़ घो़न्दालाक धेनी केपाला कोवागी केराक रेलालाक। धेनी खी़ शामागो ईली च्याक-च्याक धाङ रीगी ढाङची लाक। 5धेनी येरुसालेम धाङ युदेया घीरीने धेनी योरदान चाङबुगी थाकोरला हो़गीन यु घीरीने, मीक्या खी़चारु सोवालाक। 6धेनी खुङक्या राङगी धीक्पाक्या खेलेन्दी, खोने योरदान चाङबुरु ठी़सो़ लेन्बालाक।
7हीना फारुसीपाक्या धाङ सादुकीपाक्याने, मी माङक्षे ठी़सो़ लेन्दु हुङगीनगो शीक्ती, खी़ खुङक्याला ॱनेवालाक, “दुक्डुगी ग्युपा खेक्या, माउपारगी थुक्ठो़ने, खेक्या डो़येला सी़ ङेन्ता ताजो? 8धीक्पा पारी सेम ग्युरवाला थी़न्गीन ढेबु के। 9‘हेक्या आब्राहामगी ग्युपा हीन।’ ॱनेरी राङ-राङला ॱनाये ॱमासाम घीझ्येरी ॱनाना ङा खेक्याला ॱनाहीन, को़न्क्षोकगी दे धोगोङक्याने, आब्राहामगी क्षीला भुग्यु को़ जे थुक्कीलाक। 10धान्दाराङ, दोङबोक्याई चावाला तीरी श्याक्सादुक। धेनी ढेबु शाङपो ॱमेकेगीन, दोङबो घीरी चेदी मेला ॱयुक्कीलाक।”
11“खेक्या धीक्पाने ग्युरास्योक ॱनेरी, ङा खेक्याला क्षुगी ठी़सो़ तेराहीन हीना ङी स्याम्ला फेप्गीनगो, ङाने वाङक्षे हो़तालाक। ङा खोङबागी श्याप्हाम खेरीन खाये मेक। खोङबागी खेक्याला धाम्पे थुक्ङी धाङ मेगी थोक्ने, ठी़सो़ ॱनाङगीलाक। 12खोङबागी क्षाकला ठोमा ॱनुम्दुक धेनी खोङबागी होरा चाङमा जेगीलाक धेनी डोक्या दुरी, डुखाङला श्याक जेगीलाक हीना फुप्माक्या नामा ॱमीस्यीगीन, मेगी ॱराक जेगीलाक।”
येशुगी ठी़सो़
(मारकु १:९-११; लुका ३:२१-२२; योहान्ना १:३२-३४)
13धेनी येशु गालीलने, योहान्नाचारु खोने ठी़सो़ श्येयेला, योरदान चाङबुरु फेप्पालाक। 14योहान्नागी खोङला काक्ये दो़दी, देरे ॱनेवालाक, “ङाकाः खेराङने ठी़सो़ लेन्घोगुलाक हीना खेराङ ङीचारु फेयाले?”
15हीना येशुगी खोला लेन जेपालाक, “होराङक्या को़न्क्षोकगी थुकोङ घीरी डुप्तु च्युक्येला, धान्दा देरेराङ हुङदु च्युक।” धेनी खी़ देरेराङ झ्येवालाक।
16येशु ठी़सो़ श्येसारती, लाम्साङ खोङबा क्षुने याला श्याङी घाङला, नाम्खा बेरी, को़न्क्षोकगी थुक्ङी फुक्रो़नगी स्यीकाला भाप्कीन धाङ खोङबा थोकला श्युक्कीनगो शीक्पालाक। 17धेनी नाम्खाने सुङकेक च्यीकगी, “दे ङी चेवे से हीन। ङा खी़मुला ॱमीच्यीकी ङ्यामो घा हो़क।” सुरी सुवालाक।
Поточний вибір:
मेथा 3: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
