लुका 8
8
साङा ग्याप्कीनगी पे
1धेनी येशु ग्याजाक्या धाङ युक्याला, को़न्क्षोकगी ग्यासीगी ताम्शाङगो स्येदी-स्येदी फेप्पालाक। खोङबामुला ङेने च्युङङीक्या हो़तालाक। 2धेनी ॱनो़पा धाङ नाजाक्याने चो़गा झ्युजा केमीक्याः खोङबामुला हो़तालाक। खुङक्याने डे धी़न थो़न्दा, माक्दालीनी ॱनागीन मीरीयाम 3धेनी हेरोदेगी खीम्जाङगी ॱङेरपा कुजागी केमी योआन्ना धाङ सुसान्ना धाङ श्येम्मा भोमो माङा हो़तालाक। दे केमीक्याई राङगी ग्युनोरने, खोङबाक्याला रोवा झ्यीदालाक।
4धा यु माङाने मीक्या होरी, मीछोक क्षे च्यीक खोङबागी डुङदु जोम्दी, खोङबागी खुङक्याला पे दे सुवालाक, 5“साङा ग्याप्कीन च्यीक साङा ग्याप्तु थो़न्बालाक। साङा तोरी घाङला, रीङगा लाम्गागी थामाला थोरपालाक धेनी होदेक्या मीगी काङबागी ॱलेबालाक धेनी झ्याक्याई शेवालाक। 6रीङगा साङाक्या धोरुक खोकला थोरपालाक धेनी होदेक्या केरी श्या मेता लाम्साङ काम्बालाक। 7धेनी रीङगा छेम्मागी साङला थोरपालाक धेनी होदेक्यामुला छेम्मागो छारती होवालाक धेनी होदेक्याला ॱनेम्बालाक। 8धेनी रीङगा सा शाङाला थोरपालाक धेनी होदेक्या छारती ढेबु दाप ग्या केवालाक।”
दे सुङसारती खोङबागी सुङकेक क्षेला सुवालाक, “आमच्योक हो़गीनक्याई ङेन्दी ॱहाघोरास्योक।”
9धेनी खोङबागी ङेनेक्याई दे पेगी दो़न्दाकगो घी ले ॱनेरी खोङबाला श्यी़री, 10खोङबागी सुवालाक, “खेक्याला को़न्क्षोकगी ग्यासीगी साङवागी स्येराप ॱनाङ हो़तालाक हीना श्येम्माक्याला ङा पेने ॱनालाक। होझ्येरी सुङरापला हो़गीन दे डुप्पालाक
‘देक्याई तेरीयाः ॱमेथोङगीलाक,
धेनी ङेन्दीयाः मेघोरकीलाक।’#यस्याया ६:९
11“धा पेगी दो़न्दाकगो नी दे लाक, साङागो को़न्क्षोकगी का लाक। 12लाम्गाला थोरकीन साङाक्या, का घोरसागीनक्या लाक। धेनी धेपा मीझ्यीदास्योक धेनी ॱमाक्योबास्योक ॱनेरी, धी़क होरी खुङक्याई सेमने कागो ठोक्ती डोवालाक। 13धोरुकला थोरकीनक्या काला ङेन्दी ङ्यामो घेरी, लाम्साङ खेलेन्गीनक्या लाक। हीना होदेगी चावा मेगीन झ्येरी, धी़चो़ तीते थुक्पे धेपा झ्यीदालाक धेनी छो़तागी धी़ला धेपाने लोक्वालाक। 14छेम्मागी साङला थोरकीनगोक्या, काला ङेन्येगो ङेन्दी हीना मीछेगी दुङा धाङ ग्युनोर धाङ दो़पा ॱनाछोकगी खुङक्याला ॱनेमालाक धेनी देक्याई ढेबु के ॱमीथुक्वालाक। 15धेनी सा शाङपोला थोरकीनक्या, काला ङेन्दी सेम ढाङपो धाङ शाङपो नाङदु तेन्पो शीमालाक। धेनी शो़पागी थोक्ने ढेबु तेरालाक।
क्युङगी पे
(मारकु ४:२१-२५)
16“सी़या क्युङ पारती, ॱनो़गी ॱमेकावालाक याङना ङ्याठी होकला मेश्यालाक हीना नाङदु हुङगीनक्याला, क्याथाई हुङवास्योक ॱनेरी सा थोवाला श्यालाक। 17घीझ्येरी ॱनाना बेरी श्याक्सा घीरी थोङदु च्युक्कीलाक धेनी सारी श्याक्सा घीरी ॱहाघोरतु च्युक्कीलाक। 18होझ्येरी खेक्याई घी ङेन्गीनगोला, शाप-शाप झ्यी घीझ्येरी ॱनाना हो़गीनगोला ॱयोल्ले माङा तेरकीलाक धेनी मेगीनगोला, खोला घी हो़क ॱनेरी साम्गीनगोवा, खोने ठोक्कीलाक।”
येशुगी युम धाङ कुछेक्या
(मेथा १२:४६-५०; मारकु ३:३१-३५)
19येशुगी युम धाङ कुछेक्या खोङबाचारु च्यारपालाक हीना मीछोकगी झ्येरी, खोङबागी डुङदु ॱमाथारपालाक। 20धेनी खोङबाला मी च्यीकगी ॱनेवालाक, “खेराङगी युम धाङ कुछेक्या खेराङला ज्यारु होरी फीला श्युक्दुक।”
21हीना खोङबागी होदेक्याला सुवालाक, “ङी आमा धाङ नोक्या, को़न्क्षोकगी का ङेन्गीन धाङ होदे चीगीनक्या लाक।”
येशुगी ॱलुङछुप ल्हेवी जेपा
(मेथा ८:२३-२७; मारकु ४:३५-४१)
22ङीमा च्यीक येशु खोरी ङेनेक्याई मुला, डुला श्योन जेपालाक धेनी खोङबागी खुङक्याला सुवालाक, “होराङ छोगी ॱहाकीन स्योकला डोउ।” धेनी खोङबाक्या फेप्पालाक। 23डुला फेई घाङला, खोङबा शीमा जेपालाक। धेनी छोला ॱलुङछुप ग्युक्पालाक। डुगो क्षुगी खाङये झ्येरी खुङक्याला जीक्टा झ्युवालाक।
24धेनी खुङक्या खोङबा भोलोक्तु होरी, देरे ॱनेरी ॱलावालाक, “ॱलोपो़न ला, ॱलोपो़न ला, होराङ भीप्ये झ्यीदी।” खोङबा श्याङा जेदी ॱलुङछुप धाङ भालापला काको़न ताङा जेपालाक धेनी होदेगो छेदी ल्हेवी झ्युवालाक।
25खोङबागी खुङक्याला सुवालाक, “खेक्याई धेपा घारु हो़ता?”
धेनी खुङक्या जीक्पालाक धेनी ॱहालेरी च्यीकगी च्यीकला ॱनेवालाक, “खोङबा सुले? ॱलुङ धाङ भालापला का ॱनाङी, धेनी होदेक्याई खोङबागी का ङेन्दी।”
डे जुजुवा मी
(मेथा ८:२८-३४; मारकु ५:१-२०)
26धा खोङबाक्या गालील छोगी ॱहाकीनला हो़गीन, गेरासेने युला फेप्पालाक। 27धेनी छोगी थामारु येशु डुने थो़न जेदी, ग्याजागी डे जुजुवा मी च्यीक थुक्पालाक। होदे घोलाक माघो़न्पा नाङदु माधेपा, धुरखाङदु धेदी युन रीङा झ्युवालाक। 28होदेगी येशुला थोरी फेरा ग्याप्ती, खोङबागी दोङदु छाक छावालाक धेनी केक ग्याप्ती ॱनेवालाक, “ॱलानामेपे को़न्क्षोकगी से येशु, ङीमुला खेराङगी ढेवा घी हेतो? ङाला दुक्पु ताङा माजे ॱनेरी, ङा खेराङला श्योवा पुलाहीन।” 29घीझ्येरी ॱनाना खोङबागी डे गोला, होदे मीने थो़न्दी डोयेला का ॱनाङा जेपालाक। खोला थेङमा ॱमीच्यीकी माङा डे देगी शीम हो़तालाक। खोला च्याक्थाक धाङ च्याक्डोकगी दाम्दी, ॱरुरी श्याक हो़तालाक हीना खी़ होदेक्या च्याक्ती धेनी डेगी़, खोला रीतोङ स्योकला ठीक्ती डोवालाक।
30येशुगी होदेला ढीवा जेपालाक, “ख्यी़ मीङ घी ले?”
धेनी होदेगी ॱनेवालाक, “ॱमाक्पुङ।” घीझ्येरी ॱनाना ॱमीच्यीकी माङा डेक्या खी़ नाङदु जु हो़तालाक। 31देक्या सातीङदु#८:३१ ॱनो़पा धाङ धी़कक्या श्याक्जा सागी खोक-खोक्दु हो़गीन दोङ-दोङ क्षेगो लाक। दी नाङदु होदेक्याला ठीम चेदालाक। डोयेला का ॱनाङा माजे ॱनेरी, खोङबाला श्योवा पुवालाक। 32होदुरु री डामदु फाकख्यु क्षे च्यीक छी़ हो़तालाक। धेनी देक्याई फाक नाङदु जुरु च्युक्रोजे ॱनेरी, खोङबाला श्योवा पुवालाक धेनी खोङबागी घोङपा ॱनावालाक। 33धेनी डेक्या होदे मीने थो़न्दी, फाकक्याई नाङदु जुवालाक धेनी फाकख्युगो री शारपोने भाङ तारी सोरी, छोला ल्हीम्बालाक धेनी भीप्ती स्यीवालाक।
34धा फाक-झीक्याई घी झ्युङगीनगो थोरी डो़री सोवालाक धेनी ग्याजा धाङ युक्याला होदे लाब स्येपालाक। 35धेनी मीक्या होदुरु घी झ्युङगीनगो तायेला, येशुचारु होवालाक। धेनी डे थो़न्दा मीगो, येशुगी श्यापगी दोङला घोलाक घो़न्दी, रीक्पा तेन्पो झ्युरी धेगीनगो थोरी, होदे मीक्या जीक्पालाक। 36धा होदे थोथाक्याई डे जुजा मीगो, घाङगी झ्येरी ढाक्कीनगो देक्याला स्येपालाक। 37धेनी गेरासेनेगी ॱये-ॱयो़नगी यु घीरीगी मीक्याई, येशुला खोराङक्याई युने लोक्ती फेवा जे ॱनेरी श्योवा पुवालाक घीझ्येरी ॱनाना खुङक्या ॱमीच्यीकी जीक्पालाक। होझ्येरी येशु डुला श्यो़न्दी लोक्ती फेप्पालाक। 38हीना डे थो़न्दा मीगी़ खोङबामुला डोयेला श्योवा पुवालाक। हीना येशुगी होदेला दे सुरी ॱलोक जेपालाक, 39“ख्यो़ ख्यो़री नाङला लोक्ती सोङ, धेनी को़न्क्षोकगी ख्यी़ क्षीला क्षाक्ले क्षे जेगीनगो स्यो़क।”
धेनी खो सोरी येशुगी खी़ क्षीला जेगीन क्षाक्ले क्षेगी कोरला, यु घीरीदु स्येपालाक।
याईरोसगी भोमो धाङ केमी नेपा च्यीक
(मेथा ९:१८-२६; मारकु ५:२१-४३)
40येशु लोक्ती फेई घाङला, मीछोकगी खोङबाला फेप्सु श्यी़वालाक घीझ्येरी ॱनाना देक्या घीरी खोङबाला घुक्ती धे हो़तालाक। 41धेनी याईरोस ॱनागीन छोक्खाङगी पो़न्पो च्यीकगी येशुला क्षाक छारी, खोरी नाङदु फेप्येला श्यी़वालाक 42घीझ्येरी ॱनाना खी़ लो च्युङङी ॱलेप्ला, भोमो च्यीगारागो स्यीगु झ्यीदी हो़तालाक। येशु फेई घाङला मीछोकगी खोङबाला छाङगा ग्याप्पालाक।
43धेनी होदुरु लो च्युङङीने, ठाक्जा नाजागी केमी च्यीक हो़तालाक। मी़ मोराङला हो़गीन घीरी, आम्चीक्याला पुरीयाः मोला सी़या चो़ ॱमाथुक्पालाक। 44धेनी मो खोङबागी ग्याप स्योकने होरी, खोङबागी घो़गी ॱनेमो च्यीकला जुवालाक धेनी लाम्साङ मी़ ठाकगो क्षेपालाक।
45धेनी येशुगी सुवालाक, “ङाला जुगीनगो सुले?”
धेनी मी घीरीगी खेमेलेन्दी घाङला पेटोगी श्यी़वालाक, “ॱलोपो़न ला, मीछोकक्या खेराङला थाकोरती छाङगा ग्याई।”
46हीना येशुगी सुवालाक, “मी च्यीकगी ङाला जी़जुङ घीझ्येरी ॱनाना ङाने स्युक थो़न्दी डुगीन ङी छोरजुङ।” 47धा मोराङ हीप ॱमीथुक्कीनगो थोरी, मो दारी-दारी होवालाक धेनी खोङबागी डुङदु क्षाक छारी, मीमाङ घीरीगी दोङदु खोङबाला मी़ जुगीनगी दो़न्दाकगो धाङ मो लाम्साङ चो़गा झ्युङगीनगी कोरला स्येपालाक।
48धेनी खोङबागी मोला सुवालाक, “भोमो, ख्यी़ धेपागी ख्यो़ला चो़गा झ्येवालाक। धा श्यीदेला सोङ।”
49खोङबा कामो़न सुङी घाङला छोक्खाङगी पो़न्पोगी़ नाङने मी च्यीक होरी ॱनेवालाक, “खेराङगी भोमो ढोजुङ। धा ॱलोपो़नला काल्ले ताङा माजे।”
50हीना येशुगी दे सेन्दी याईरोसला सुवालाक, “माजीक, धेपा च्यीगा झ्यी धेनी मो ढाक्कुलाक।” 51धेनी खोङबा याईरोसगी नाङला फेप्ती, पेटो धाङ योहान्ना धाङ याकोब धाङ भोमोगी़ फामाला माना श्येम्मा सुला नाङदु जुरु ॱमाच्युक्पालाक।
52मी घीरी ङुता ग्याप्ती मी़ क्षीला दुक ॱरुङी हो़तालाक हीना खोङबागी सुवालाक, “माङु, मो ॱमास्यी हो़तालाक हीना मो ङ्यारी धे हो़तालाक।” 53होदे भोमो स्यीगीनगो स्येरी, खुङक्या खोङबाला घो़ स्योरपालाक।
54हीना खोङबागी मी़ लाक्पाने शीम्दी सुवालाक, “भोमो, लोङ।” 55धेनी मो सो़न्पो झ्युरी, मो थेङ च्यीकला लावालाक धेनी खोङबागी मोला शाये रे तेर ॱनेरी सुवालाक। 56मी़ फामाक्या ॱहाङसावालाक हीना घी झ्युङगीनगो सुला ॱमास्ये ॱनेरी खोङबागी देक्याला का ॱनावालाक।
Поточний вибір:
लुका 8: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
