लुका 21
21
युक्जामागी टाङगा पुगीन
(मारकु १२:४१-४४)
1धेनी येशुगी या शीई घाङला मी क्षुक्पुक्याई ॱङुगामदु, खोरी ॱङु पुगीनगो खोङबागी शीक्पालाक। 2धेनी खोङबागी युक्जामा उटे च्यीकगी शाङगी टाङगा ॱङी पुगीनगोवाः शीक्पालाक। 3धेनी खोङबागी सुवालाक, “धेन्पाराङ ङा खेक्याला ॱनाहीन, दे उटे युक्जामागी़ घीरीने माङा पु दुक। 4घीझ्येरी ॱनाना मी देक्या घीरीगी खोरी ग्युनोर माङाने पुवालाक हीना मी़ मोरी को़न्दागी नाङने, मोरी मीछे क्यायेला हो़गीन घीरी पुवालाक।”
क्षो़खाङ मेताला डुगीनगी कोरला ॱङो़नस्ये
(मेथा २४:१-१४; मारकु १३:१-१३)
5धा मी रीङगागी धोगोङ खाक्क्षेक्या धाङ क्षो़पाला पुपाक्याई, क्षो़खाङ ॱमीच्यीकी जेवा थोङगीनगी कोरला लाब ताङी घाङला येशुगी सुवालाक, 6“खीकी धान्दा थोङगीनने धोगोङ च्यीकगी खाला श्येम्मा च्यीया मालेवा, घीरी तीप्कीनगी धी़चो़गो ॱलेप्कीलाक।”
7खुङक्याई खोङबाला श्यी़वालाक, “ॱलोपो़न ला, दे घीरी नाम झ्युङगीले? धेनी दे घीरी झ्युङयेगी एन्ला ताकगो घी हुङगीले?”
8धेनी खोङबागी सुवालाक, “च्याङजे झ्यी, खेक्याला सी़या ॱमाली़वास्योक। घीझ्येरी ॱनाना मी माङागी ङी मीङ खेरती ‘ङा खोराङ हीन।’ ॱनेरी हुङगीलाक धेनी ‘धी़चो़ ङ्येरु ॱलेप्सादुक’ ॱनेरी ॱनागीलाक। खेक्या खुङक्याई स्याबाला माडाङ। 9धेनी खेक्याई ॱमाक्ठुक धाङ शीङठुकगी लाबक्या घोरकीलाक। होदे घाङला जीक्टा माझ्यी। दे घीरी एन्ला झ्युङघोगीलाक हीना थागो लाम्साङ झ्युङगीमालाक।”
10खोङबागी सुवालाक, “मीरीक धाङ मीरीक ठुक्कीलाक धेनी ग्याखाप धाङ ग्याखाप ठुक्कीलाक। 11सायोम क्षेक्या ग्याप्कीलाक धेनी साजा माङक्षेला मुगे धाङ नाजाक्या झ्युङगीलाक। धेनी जीक्नाङ धाङ ॱनामने ॱहाङसागीन ताकक्या थोङगीलाक। 12हीना दे घीरी झ्युङये एन्ला, ङी मीङगी केनगी खुङक्याई खेक्याला शीम्दी दुक्पु ताङगीलाक धेनी खेक्याला छोक्खाङक्या धाङ चो़न्खाङक्याला ची ग्याप्कीलाक। धेनी ग्यावुक्या धाङ चीख्यापक्याई दोङदु ठीक्कीलाक। 13दे नी खेक्याला पाङपो झ्यीयेगी घोकाप झ्युङगीलाक। 14होझ्येरी होदे घाङला, लेन घी तेरये ॱनेरी एन्दुरु दुङा मीझ्यीयेला, राङगी सेम डाढीक झ्यी। 15घीझ्येरी ॱनाना ङा खेक्याला देरे छीकक्या धाङ स्येराप तेरयेहीन, धेनी खेरी डाक्याने सी़या ख्यो़ला लेन ॱलोक थुक्कीमालाक धेनी गाक्पा ग्याप ॱमीथुक्कीलाक। 16खीकी फामा धाङ आज्यो-नो धाङ पी़नक्या धाङ रोवाक्यागीयाः, खेक्याला डागी लाक्पाला ची ग्याप्कीलाक धेनी खे रीङगाला खुङक्याई सेदु च्युक्कीलाक। 17ङी मीङगी झ्येरी घीरीगी, खेक्याला दाङा झ्यीगीलाक। 18हीना खीकी गोगी ॱरा काङ च्यीयाः मेताला डोगीमालाक। 19धेनी खीकी शो़पागी झ्येरी खेरी मीछे क्योप्कीलाक।”
येरुसालेम मेताला ताङगीनगी कोरला
(मेथा २४:१५-२१; मारकु १३:१४-१९)
20“येरुसालेम ग्याजाला ॱमाक्मीक्याई कोरती धेगीन खेक्याई थोङी घाङला, धा दे मेताला ताङगीनगी धी़चो़गो ॱलेप्जुङ ॱनेरी स्येलाझ्यी। 21होदे घाङला युदेयाला हो़गीनक्या, रीक्या स्योकला डो़री डोवास्योक। धेनी ग्याजा नाङदु हो़गीनक्या, फीला थो़न्दास्योक धेनी यु फीला हो़गीनक्या ग्याजा नाङदु माजुवास्योक। 22घीझ्येरी ॱनाना सुङरापला ढीक हो़गीन घीरी डुप्येगी क्षीला, दे ङीमाक्या क्षेपा कागीन ङीमाक्या लाक। 23होदे घाङला टु फोवारु हो़गीन केमी धाङ होमा तेरकीन आमाक्या ॱङ्यावाली! घीझ्येरी ॱनाना जाम्बुलीङदु दुक्पु क्षे झ्युङगीलाक धेनी दे मीक्याई खाला को़न्क्षोकगी थुक्ठो़ भाप्कीलाक। 24खुङक्या राल्डीगी सेगीलाक धेनी चो़न्पा शो़री मीरीक घीरीगी नाङने ठीक्कीलाक। धेनी याहुदापा मेन्गीन मीरीकगी धी़चो़ माजोक्कीन थुक्पे, येरुसालेम दे याहुदापा मेन्गीन मीरीकगी काङबे होकला ॱलेदी श्याक्कीलाक।”
मी-भु फेप्कीनगी कोरला
(मेथा २४:२९-३१; मारकु १३:२४-२७)
25“ङीमा, दावा धाङ कारमाक्याला ताकक्या थोङगीलाक। ग्याछो धाङ भालापगी हुर क्षेक्याई झ्येरी, दे जाम्बुलीङगी मीरीकक्या ॱमीच्यीकी जीक्ती ॱङाङडा केगीलाक। 26नाम्खे वाङक्या ठुक्ती जीक्तेनदु घी हुङये हीन्गीनगो थोरी, जीक्टागी ग्यारी धेगीलाक। 27धेनी खुङक्याई ॱरीङगी खाला मी-भु, वाङ धाङ शीजेक्षेगी थोक्ने फेप्कीनगो ज्यागीलाक। 28धेनी देक्या झ्युङये गो च्युक्ई घाङला, टोङ झ्येरी लारी गो ताक झ्यी घीझ्येरी ॱनाना खीकी थारपा ङ्येरु ॱलेवालाक।”
सेयापगी दोङबोगी पे
(मेथा २४:३२-३५; मारकु १३:२८-३१)
29धेनी येशुगी खुङक्याला पे दे सुवालाक, “सेयापगी दोङबो धाङ श्येम्मा दोङबो घीरीला तो़। 30होदेक्याला लोमा केगीनगो थोङना, ॱयारका स्यारजुङ ॱनेरी खेक्याई स्येलालाक। 31होदेरेराङ झ्येरी दे लाब घीरी झ्युङगीनगो थोङी घाङला, को़न्क्षोकगी ग्यासी ङ्येरु दुक ॱनेरी खेक्या स्येलाझ्यी। 32धेन्पाराङ ङा खेक्याला ॱनाहीन, दे घीरी माडुप्कीन थुक्पे दे मीराप येगीमालाक। 33ॱनाम-सा ॱङी येगीलाक हीना ङी काक्या नामा येरी डुगीमालाक।”
च्याङजे झ्यी
34“हीना खेक्या च्याङजे झ्येरी धो़क। मेन्ना खीकी सेम ङ्याम ताङये धाङ शीरी धेये धाङ मीछेगी दुङागी ॱनेम्गीलाक। धेनी होदे ङीमागो ॱहाताक्पाला, ॱङीपला थेम्गीन च्योक्रे हुङगीलाक। 35घीझ्येरी ॱनाना होदे ङीमा दे जाम्बुलीङ खाला ॱनेगीन घीरीला भाप्कीलाक। 36हीना हुङये झ्यीगीन दे घीरीने थारये धाङ मी-भुगी डुङदु लारी धे थुप्येगी क्षीला, च्योई सोवा ग्याप्ती च्याङजे झ्येरी धो़क।”
37धेनी ङीमा तेनग्याङ येशुगी क्षो़खाङदु क्षो़ तो़न जेपालाक हीना घोमुगो खोङबा होदेने थो़न्दी क्युरुस्यीङगी रीला छेन क्यालालाक। 38धेनी ॱङारोक ॱङात्ती, मी घीरी खोङबागी का ङेन्येला क्षो़खाङदु हुङालाक।
Поточний вибір:
लुका 21: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
