योहान्ना 7
7
येशुगी पी़नक्याई कोरला
1होदे स्याम्ने, येशु गालील युला फेप्पालाक। हीना युदेया युला फेप्ङी मादो़पालाक घीझ्येरी ॱनाना याहुदापा पो़न्पोक्याई, खोङबाला सेयेगी थापस्यी चाली हो़तालाक। 2धा याहुदापा चील्भुगी धी़छेन#७:२ दे नी याहुदापाक्याई, तो़न्गा घुन्डुमगी श्यीङक्याला च्याङमी याक्काक्या धाङ लोमाक्याई, धेजा च्यीमे रे शो़री ॱरुङदी धेगीन धी़छेन लाक।गो ङ्ये ॱलेप हो़तालाक। 3होझ्येरी खोङबागी पी़नक्याई श्यी़वालाक, “खेराङगी जेगीन क्षाक्लेक्या, खेराङला डागीन मीक्याई थोङयेगी क्षीला, खेराङ दे साजा भोरती युदेया युरु फेप्रो जे। 4मीमाङगी खोकला तो़न्दो़ हो़गीन सी़याः साङवाला लेगा मीझ्यीदालाक। खेराङ देरे क्षाक्ले जेना, राङला जीक्तेनला ॱङो़न्तु जे।” 5घीझ्येरी ॱनाना खोङबागी पी़नक्यागीया खोङबाला धेपा माझ्येवालाक।
6येशुगी खुङक्याला सुङा जेपालाक, “खेक्याला नाम हीना घोकाप हो़तालाक हीना ङी धी़चो़गो भाप मारीङ दुक। 7जीक्तेनगी खेक्याला दाङा झ्यी ॱमीथुक्कीलाक हीना ङी जीक्तेनगी लेगाक्या ङेन्पा हीन्गीनगी पाङपो झ्येरी, ङाला दाङा झ्यीदालाक। 8खेराङक्या धी़छेनला सोङ हीना ङी धी़ धोराङा मारीन्बा, ङा दे धी़छेनला मेडो।” 9दे सुङा जेदी, खोङबा गालीलदु श्युक्पालाक।
10हीना खोङबागी पी़नक्या धी़छेनला सोसारती स्याम्ला, खोङबाः ॱङो़न्सुमदु मेन्दा साङवाला फेप्पालाक। 11धी़छेनला याहुदापा पो़न्पोक्याई खोङबा घारु दुक ॱनेरी, ढीरी चाली हो़तालाक। 12मीछोकक्याई खोक्दु रीङगागी “खोङ मी शाङपो च्यीक लाक।” धेनी रीङगागी “खोङ देरे मेन्दा मी माङपोला गोकोर ताङगीन च्यीक लाक।” ॱनेरी खोङबागी कोरला लाब ढामेढा माङा झ्युवालाक। 13हीना याहुदापा पो़न्पोक्याला जीक्ती, मी सी़या खोङबागी कोरला ॱङो़न्सुमदु स्ये ॱमाथुक्पालाक।
चील्भुगी धी़छेनला येशुगी क्षो़ सुङवा
14धेनी धी़छेनगी फे चो़ला येशु क्षो़खाङ नाङदु फेप्ती, क्षो़ ॱनाङये गो चुक्पालाक। 15याहुदापा पो़न्पोक्या ॱहालेरी ॱनेवालाक, “दे मी दी क्षो़ नामा ॱमालाप्पालाः घाङगी झ्येरी क्षो़ला देरे खेवा झ्युवाले?”
16धेनी येशुगी सुङा जेपालाक, “ङी स्येगीन क्षो़ दे, ङाराङगी मेन हीना ङाला ॱङाक्कीनगी हीन। 17को़न्क्षोकगी थुकोङ डुप्तु च्युक्ङी दो़गीनक्याई, दे क्षो़ दे को़न्क्षोकने झ्युङाले याङना ङी थोक्ने ले ॱनेरी स्येगीलाक। 18राङला तेन्दी स्येगीन दे, राङगी ॱङेन्डाक चालालाक हीना राङला ॱङाक्कीनगी ॱङेन्डाक चागीन, दे धेन्पा लाक धेनी खी़ नाङदु शोक मीयोङालाक। 19मोशेगी खेक्याला क्षो़ठीम दे ॱमानावाले? हीना याङ खेक्या सी़या क्षो़ठीम दे ॱमीरुङालाक। धा खेक्या ङाला सेयेगी थापस्यी घीझ्येरी चालाले?”
20धेनी मीछोकगी ॱनेवालाक, “ख्यो़ला डे जुदुक। सी़ ख्यो़ला सेयेला थापस्यी चालीओ?”
21येशुगी खुङक्याला सुङा जेपालाक, “ङी ङासुगीन ङीमाला लेगा च्यीक झ्येवी धेनी खे घीरी होदेला ॱहालेडी़। 22मोशेगी खेक्याला पाउ चेगीन ॱरो ॱनावालाक धेनी खेक्या ङासुगीन ङीमाला राङगी भुला होदे ॱरो दे झ्यीदालाक। (दे ॱरो दे मोशेने मेन्दा, होरी धाङबी फामाने झ्युवालाक।)#लेवी १२:३; को़पा १७:१० 23मोशेगी क्षो़ठीम ॱरुङयेगी क्षीला ङासुगीन ङीमाला, मी च्यीकगी पाउ चेगीन ॱरोगो ॱरुङ थुप्ना, ङीयाः ङासुगीन ङीमाला मी च्यीकगी ली़ घाङजाङ सो़जुङ#५:९; मेथा १२:२ ॱनेरी, खेक्या घीझ्येरी ङीमुला ठो़लाले? 24ङोला तेरी ठीम ॱमाच्यो़ हीना ढाङतेनला तेन्ती ठीम च्यो़।”
येशुराङ मास्यीका हीन-मेनगी कोरला
25येरुसालेमगी मी रीङगागी ॱनेवालाक, “खुङक्याई सेयेला चागीन मीगो देराङ माले? 26धा तो़दाङ, खोङ नी दुरु ॱङो़न्सुमदु क्षो़ सुङी धेनी खुङक्या खोला घीया ॱमेना। धा याहुदापा पो़न्पोक्याई, खोङराङ मास्यीकागो हीन साम्बाराक। 27हीना मी दे घाने होवाले ॱनेरी होराङ स्येलालाक। धेनी मास्यीका ॱङो़न्तु जेदी घाङला, खोङ घाने फेप्पाले ॱनेरी सी़या स्येगी मालाक।”
28होझ्येरी क्षो़खाङगी नाङदु क्षो़ सुङी घाङला, येशुगी सुङकेक क्षेला सुङा जेपालाक, “ङा सु हीन्गीन धाङ ङा घाने हुङगीनगो, खेक्याला स्येये हो़तालाक। ङा ङाराङ राङश्यीगी होवामेन हीना ङाला ॱङाक्कीनगो धेन्पा हीन। धेनी खेक्याई खोङला ङो ॱमेस्येलालाक। 29ङा नी खोङने होवाहीन धेनी खोङगी ङाला ॱङाक्वाहीन होझ्येरी ङी खोङला ङो स्येलीहो़क।”
30धेनी खुङक्याई खोङबाला शीम्येला थापस्यी चावालाक हीना खोङबागी धी़ मारीन्बा, सी़या खोङबाला लाक्पा ॱमाक्यावालाक। 31घीहीन्ना मी माङक्षेगी खोङबाला धेपा झ्येरी ॱनेवालाक, “मास्यीका फेई घाङला, खोङगी दे मी देले ल्हाक ताकक्या मेजे हो़टु।”
32फारुसीपाक्याई, येशुगी कोरला मीछोकगी लाब फुसु-फुसु ताङगीनगो घोरपालाक धेनी क्षो़पो़न क्षेक्या धाङ फारुसीपाक्याई, खोङबाला शीम्दु क्षो़खाङगी ॱरुङमाकक्या झावालाक।
33धेनी येशुगी सुङा जेपालाक, “ङा खेक्यामुला धोराङा धी़ तीते च्यीक धेये दुक धेनी ङा ङाला ॱङाक्कीनगी डुङदु डोयेलाक। 34खेक्याई ङाला चागीलाक हीना ॱङेगु मालाक। ङा हो़जारु खेक्या ॱलेप ॱमीथुक्कीलाक।”
35धेनी याहुदापा पो़न्पोक्याई खोराङक्या घुङदु देरे ॱनेवालाक, “मी दे होरी ॱङे ॱमीथुप्कीन साजा घारु डोये हीन्ढी़? गीरीकक्या खोक्दु थोरती धेता याहुदापाक्या घुङदु सोरी, खो गीरीकक्याला क्षो़ स्येये सामी हो़ता? 36खी़ होराङला, ‘खेक्याई ङाला चागीलाक हीना ॱङेगु मालाक। धेनी ङा हो़जारु खेक्या ॱलेप ॱमीथुक्कीलाक।’ ॱनागीनगी दो़न्दाकगो घी ले?”
37धी़छेनगी थागी ङीमा क्षेगोला, येशु श्येङदी सुङकेक क्षेला सुङा जेपालाक, “खे कोम्गीनक्या ङी डुङदु होरी थुङास्योक। 38ङाला धेपा झ्यीगीनगो, सुङराप नाङला ढीक्टा च्योक्रे, ‘खी़ नाङने छेसोकगी क्षुगी चाङबु ग्युक्कीलाक।’#ईजीकीएल ४७:१; जेकारीयास १४:८” 39हीना खोङला धेपा झ्यीगीनक्याला थोप्ये हीन्गीन, धाम्पे थुक्ङीगी कोरला येशुगी सुवालाक। घीहीनाः येशु शीजेला ॱमाफाक्पा झ्येरी, धाम्पे थुक्ङीगो धोराङा ॱमानाङ हो़तालाक।
40खोङबागी सुङगीन दे घोरती, मीछोकगी नाङने रीङगागी ॱनेवालाक, “मी दे ॱङोन्नेगी ॱङो़नस्येखेनगो लाक।” 41धेनी श्येम्माक्याई ॱनेवालाक, “दे नी मास्यीकागो लाक।” हीना रीङगागी ॱनेवालाक, “गालील युने मास्यीकागो फेप्कुलाक से? 42मास्यीका नी, ग्यावु दावीदगी दुङग्युने धेनी दावीदगी फायु बेथलेहेमने फेप्कुलाक ॱनेरी, सुङरापगी नाङ ढीक हो़तामाले?” 43धा मीछोकगी घुङदु येशुगी कोरला ताम ॱमाथी़न्पा खाक भेवालाक। 44खुङक्याने रीङगागी, खोङबाला शीम्ङी दो़पालाक हीना सी़या खोङबाला लाक्पा ॱमाक्यावालाक।
याहुदापा पो़न्पोक्याई धेपा मेगीनगी कोर
45धेनी क्षो़खाङगी ॱरुङमाकक्या क्षो़पो़न क्षे धाङ फारुसीपाक्याचारु लोक्ती होवालाक धेनी खुङक्याई, “खीकी घीझ्येरी खोला ठीक्ती मायोवा?” ॱनेरी ढीवालाक।
46धेनी क्षो़खाङगी ॱरुङमाकक्याई ॱनेवालाक, “मी सी़या खी़ च्योक्रे क्षो़ नामा सुङ माङ्युङ।”
47धेनी फारुसीपाक्याई खुङक्याला ॱनेवालाक, “खेक्या गोवा खोरजे? 48पो़न्पोक्या धाङ फारुसीपाक्याने च्यीकगीया खोङला धेपा झ्ये दुक्ये? 49हीना क्षो़ठीम ॱमेस्येगीन दे मीछोकला, को़न्क्षोकगी ॱमेमो फोक हो़तालाक।”
50येशुला एम्मा ज्या ङ्युङगीन फारुसीपाक्याने, नीकोदेम ॱनागीन पो़न्पो च्यीकगी खुङक्याला ॱनेवालाक, 51“मी च्यीकगी लाबला माङेन्दा, खी़ घी झ्यीगीनगो ॱमास्येवाला, खोला होरी क्षो़ठीमगी ठीम ताङाले?”
52खुङक्याई खोला ॱनेवालाक, “ख्यो़याः गालीलपा हीने? सुङरापला चारी तो़, गालीलने ॱङो़नस्येखेन सुवा मीझ्युङगीलाक।”
लोक्येम्पा केमी
[53धेनी मी घीरी राङ-राङगी नाङला लोक्पालाक।
Поточний вибір:
योहान्ना 7: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
