योहान्ना 13
13
येशुगी ङेनेक्याई काङबा ठी़वा
1पेसाकगी धी़छेन एन्ला, येशु जीक्तेन दीने यापगी डुङदु फेप घोये धी़ भाप्कीनगो खोङबागी खेन्बालाक। धेनी जीक्तेनदु हो़गीन राङगी स्याम्ला डागीनक्याला, खोङबागी झाम्पा जेदी थामे धी़ थुक्पे, खोङगी झाम्पा जेपालाक।
2घोमो श्येलाक श्येयेगी धी़ला, सीमोनगी भीजा युदा ईस्कारीयोतगी सेमला धी़कगी, येशुला डा लाकला ची ग्याप्येगी साम्लो श्याक्छारालाक। 3येशुगी यापगी दो़न घीरी, खोङगी लाकला ॱनाङ हो़गीन धाङ को़न्क्षोकने होवा धाङ को़न्क्षोकगी डुङदु लोकग्यु हीन्गीनगो खेन्बालाक। 4होझ्येरी खोङबा घोमो श्येलाक श्येसाने श्येङदी, फीगी नाशा दे पी़दी छीरे च्यीक केपाला टी जेपालाक। 5धेनी श्योङपा नाङदु क्षु ॱलुक्ती, ङेनेक्याई काङबा ठी़ये गो चुक्पालाक। धेनी राङगी केपाला टीटा छीरेगी होदेक्या क्षी जेपालाक। 6खोङबा सीमोन पेटोचारु फेई घाङला, खी़ खोङबाला श्यी़वालाक, “चोवो, खेराङ ङी काङबा ठी़ये जेदाले?”
7येशुगी खोला लेन ॱनावालाक, “ङी झ्यीगीनगी दो़न्दाक, ख्यी़ धान्दा ॱमेस्येलालाक हीना स्याम्ला स्येगीलाक।”
8पेटोगी येशुला श्यी़वालाक, “खेराङगी ङी काङबा नामा ठी़ये मेतालाक।”
येशुगी खोला लेन ॱनावालाक, “ङी ख्यो़ला ॱमाठी़ना, ख्यो़ ङीमुला ढेवा मेतालाक।”
9सीमोन पेटोगी खोङला श्यी़वालाक, “चोवो, ङी काङबा च्यीगा मेन्दा, ङी लाक्पा धाङ गोवा ठी़रोक जे।”
10येशुगी खोला सुवालाक, “ठी़ ग्याप्सागीनगी़ काङबा माना, घीया ठी़ मेघोगीलाक। खो चाङमा हुङालाक। धेनी खेक्या चाङमा हीन हीना घीरी मालाक।” 11घीझ्येरी ॱनाना खोङला डागी लाकला ची ग्याप्कीनगोला, खोङबागी खेन्बालाक। धेनी “खेक्या घीरी चाङमा मेन” सुरी सुङ ॱनावालाक।
12धेनी येशुगी ङेनेक्याई काङबा ठी़ सारती, राङगी फीगी नाशा घो़न्दी, राङ श्युक्सारु श्युक्वा जेपालाक। खोङबागी खुङक्याला सुवालाक, “ङी खेक्याला झ्यीगीनगी दो़न खेक्याई ॱहाघोरे? 13खेक्या ङाला ॱलोपो़न धाङ चोवो ॱनेरी ॱनालाक। होदे खेक्या धेन्पा ॱनालाक। घीझ्येरी ॱनाना ङा होगोराङ हीन। 14ङा खेक्याई ॱलोपो़न धाङ चोवो झ्युरीया, खेक्याई काङबा ठी़हो़ना, खेक्याः च्यीकगी काङबा च्यीकगी ठी़घो़। 15घीझ्येरी ॱनाना ङी खेक्याला झ्यीगीन च्योक्रे, खेक्या होदेरेराङ झ्यीघोयेगी क्षीला ङी खेक्याला पे च्यीक तो़न हो़क। 16ङा खेक्याला धेन्पा धेनक्याङ ॱनाहीन, ॱयोक्पो नी दाक्पोने खाक्क्षे मेयोङगीलाक धेनी भाङछेन नी, खोला ॱङाक्कीनने खाक्क्षे मेयोङगीलाक। 17खेक्याई देक्याई दो़न ॱहाघोरती, होदे च्योक्रे झ्यीना खेक्याला झ्यीलाप थोप्कीलाक।”
राङला शीम्येगी कोरला येशुगी ॱङो़नस्ये
(मेथा २६:२०-२५; मारकु १४:१७-२१; लुका २२:२१-२३)
18“ङा खे घीरीगी कोरला स्येदामेन। ङी दाम्दाक्याला ङा स्येलीहो़क। हीना सुङरापला ढीक्टा ‘ङी ग्याङगा शागीनगी़राङ ङाला दोक ग्याप्जुङ।’#सुङगुर ४१:९ ॱनागीन दे डुप घो़गीलाक। 19दे झ्युङी घाङला, ङा होगोराङ हीन ॱनेरी, खेक्याई धेपा झ्यीयेगी क्षीला, होदे झ्युङये एन्लाराङ ङा खेक्याला दे धान्दा ॱनाहीन। 20ङा खेक्याला धेन्पा धेनक्याङ ॱनाहीन, ङी झाङगीनगोला खेलेन झ्यीगीनगी़ ङाला खेलेन झ्यीदालाक धेनी ङाला खेलेन झ्यीगीनगी़ ङाला ॱङाक्कीनगोला खेलेन झ्यीदालाक।”
21देक्या सुङसारती येशु थुक ठुक्ती सुङा जेपालाक, “ङा खेक्याला धेन्पा धेनक्याङ ॱनाहीन, खेक्या नाङने च्यीकगी ङाला डागी लाकला ची ग्याप्कीलाक।” 22खोङबागी सी़ कोरला सुङगीनगो, ॱहामाघोवा ङेनेक्याई च्यीकगी च्यीकला तेवालाक। 23येशुगी झाम्पा झ्यीगीन ङेनेगो, खोङबागी कुडामदु ॱङेरी धे हो़तालाक।
24धेनी सीमोन पेटोगी ज्युक्ते झ्येरी खोला ढीवालाक, “खोङगी सुला ॱमीक्ती सुङाले ॱनेरी श्यी़दाङ।”
25होझ्येरी येशुगी कुडामला ॱङेरी धेता, ङेनेगी़ खोङला श्यी़वालाक, “चोवो, होगो सुले?”
26येशुगी कालेन ॱनावालाक, “ङी ग्याङगागी दुबु दे खुवाला बारी सुला तेरी, होगोराङ लाक।” धेनी खोङबागी ग्याङगागी दुबु बारी, सीमोन ईस्कारीयोतगी भीजा युदाला ॱनावालाक। 27ग्याङगागी दुबुगो लेन्लुङ मेताला युदागी नाङदु धी़क जुवालाक।
धेनी येशुगी खोला सुवालाक, “ख्यी़ घी झ्यीये हीन्गीनगो ग्योक्जे झ्यी।” 28हीना होदुरु हो़गीन सी़या, खोङबागी खोला दे घीझ्येरी सुङगीनगी दो़नगो ॱहामाघोवालाक। 29घीझ्येरी ॱनाना युदाला ॱङुगी खुमाकगो झ्येरी, येशुगी खोला धी़छेनगी क्षीला खुङक्याला घो़गीनगो ङ्योये याङना उटेक्याला झ्यीम्बा ताङयेला, देरे सुङा हीन्ढु ॱनेरी खुङक्याने रीङगागी साम्बालाक। 30धा ग्याङगागी दुबुगो जोरती, युदा लाम्साङ फीला थो़न्दी सोवालाक। होदे घाङला छेन्मु झ्युसालाक।
काठीम साबा च्यीक
31धा युदा फीला सोसारती, येशुगी सुवालाक, “धा मी-भु शीजेला ॱङो़न दुक धेनी को़न्क्षोक खी़ थोक्ने शीजेला ॱङो़न दुक। 32को़न्क्षोक खी़ थोक्ने शीजेला ॱङो़न जेहो़ना, को़न्क्षोकगीयाः राङगी थोक्ने, खोला शीजेला ॱङो़न जेगीलाक धेनी लाम्साङ खोला शीजेला ॱङो़न जेगीलाक। 33टुवाक्याओ, धोराङा धी़ तुङ-तुङ च्यीक, ङा खीकीमुला हो़क। खेक्याई ङाला चागीलाक हीना ङी एन्ला याहुदापा पो़न्पोक्याला स्येगीनगो धान्दा ङा खेक्याला ॱनाहीन, ‘ङा डोजारु खेक्या हुङ ॱमीथुक्कीलाक।’
34“ङा खेक्याला काठीम साबा च्यीक तेराहीन, च्यीकगी च्यीकला झाम्पा झ्यी। ङी खेक्याला झाम्पा झ्यीगीन च्योक्रे, खेक्यागीया च्यीकगी च्यीकला झाम्पा झ्यी। 35खेक्याई च्यीकगी च्यीकला झाम्पा झ्यीना, देनेराङ खेक्या ङी ङेने हीन्गीनगो मी घीरीगी ॱहाघोरकीलाक।”
पेटोगी ङोलोकगी कोरला येशुगी ॱङो़नस्ये
(मेथा २६:३१-३५; मारकु १४:२७-३१; लुका २२:३१-३४)
36सीमोन पेटोगी येशुला श्यी़वालाक, “चोवो, खेराङ घारु फेप्ये हीनो?”
येशुगी खोला कालेन ॱनावालाक, “ङा डोजारु धान्दा, ख्यो़ ङी स्याबाला डाङ ॱमीथुक्कीलाक हीना स्याम्ला ख्यो़ डागीलाक।”
37पेटोगी खोङबाला श्यी़वालाक, “चोवो, धान्दा ङा घीझ्येरी खेराङगी स्याम्ला डा ॱमीथुक्कीले? खेराङगी दो़न्दु ङी ङारी ॱरोक ॱलो़ ताङ थुक्वा।”
38येशुगी कालेन ॱनावालाक, “ख्यो़ ख्यो़री ॱरोक ङी क्षीला ॱलो़ ताङये हीने? ङा ख्यो़ला धेन्पा धेनक्याङ ॱनाहीन, झ्याफो केक माग्याप्कीन एन्ला ख्यी़ ङाला ङो ॱमेस्येहो़क ॱनेरी, थेङमा सुम ॱनागीलाक।”
Поточний вибір:
योहान्ना 13: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
