योहान्ना 1
1
का ली़ला ग्युरवा
1थोक्मा का हो़तालाक धेनी का दे को़न्क्षोकमुला श्युक हो़तालाक धेनी का दे को़न्क्षोक लाक। 2का नी, थोक्मा को़न्क्षोकमुला हो़तालाक।
3घीरी खोङगी थोक्ने झ्युवालाक धेनी झ्युजा घीरी, खोङगी थोक्ने माना माझ्युवालाक। 4कागी नाङ छे हो़तालाक धेनी छे दे मीगी हो़गो हीन। 5हो़ दे मी़नाकगी नाङ स्यारालाक धेनी मी़नाकगी होदे खाला वाङदु माधी़वालाक।
6धा को़न्क्षोकगी ॱङाक्ङा मी च्यीक हो़तालाक, खोङगी मीङ योहान्ना लाक। 7खोङगी थोक्ने मी घीरीगी धेपा झ्यीयास्योक ॱनेरी, खोङ होदे हो़गी धेन्पाङ झ्यीयेला पाङपो झ्युरी होवालाक। 8खोङ खोङराङ होदे हो़गो मालाक हीना होदे हो़गी पाङपो झ्यीदु होवालाक। 9मी घीरीला हो़ ॱनाङगीन, धेन्पे हो़गो जीक्तेनदु फेई हो़तालाक।
10कागो जीक्तेनदु श्युक हो़तालाक धेनी जीक्तेन खोङबागी थोक्ने को़वालाक हीना जीक्तेनगी खोङबाला ङो ॱमास्येवालाक। 11खोङबा राङगी मीक्याचारु फेप्पालाक हीना खोङबाराङगी मीक्याई खोङबाला खे मालेम्बालाक। 12हीना खोङबाला खेलेन्दी, खोङबागी छेनला धेपा झ्यीगीन घीरीला, को़न्क्षोकगी से-सेमो झ्युङयेगी आङजा ॱनावालाक। 13धेनी खुङक्यागो फामा धाङ ली़ धाङ ख्योवागी दो़पागी थोक्ने केवा मेन्दा, को़न्क्षोकगी थुकोङने झ्युवालाक।
14धेनी कागो ली़ला ग्युर धेनी होराङमुला श्युक। खोङ नी, थुक्जे धाङ धेन्पागी खाङ हो़तालाक। खोङगी शीजे, याप को़न्क्षोकने हीन्गीन से च्यीक्पोगी शीजे, होरी ज्यावालाक।
15योहान्नागी खोङबागी पाङपो झ्येरी भो़टाक झ्येवालाक, “‘ङी स्याम्ला फेप्कीनगो ङाने खाक्क्षे हीन घीझ्येरी ॱनाना खोङ ङाने एन्ला श्युक हो़तालाक’ ॱनेरी ङी ॱनागीनगो खोङबाराङ हीन।”
16खोङबागी फी़न्सुम छोक्पागी थोक्ने, होराङ घीरीगी थुक्जे च्यीकगी खाला थुक्जे थोप्पालाक। 17घीझ्येरी ॱनाना काठीमगो मोशेगी थोक्ने ॱनावालाक हीना थुक्जे धाङ धेन्पागो, येशु मास्यीका थोक्ने झ्युवालाक। 18सी़ च्यीया को़न्क्षोकला नामा माज्या हो़तालाक। यापगी मुला श्युक्कीन से च्यीक्पो, खोङराङ को़न्क्षोक हीन्गीनगी़ यापला ङो टेवालाक।
ठी़सो़खेन योहान्नागी धेन्पाङ
(मेथा ३:१-१२; मारकु १:१-८; लुका ३:१-१८)
19येरुसालेमने याहुदापा पो़न्पोक्याई क्षो़पो़नक्या धाङ लेवीक्याला “ख्यो़ सु हीनो?” ॱनेरी योहान्नाला ढीरु झाङी घाङला, खी़ धेन्पाङगो दे लाक। 20खी़, “ङा नी मास्यीकागो मेन।” ॱनेरी खेलेन झ्येरी सावो ॱनेवालाक।
21धेनी खुङक्याई खोला, “ॱहाना ख्यो़ सुले? ख्यो़ एलीया#१:२१ एलीया ॱनाना ॱङो़नस्येखेन च्यीक लाक। हीने?” ॱनेरी ढीवालाक।
खी़, “ङा मेन।” ॱनेरी ॱनेवालाक।
“हीकी रेवा झ्येजा ॱङो़नस्येखेनगो ख्यो़ हीने?”
खी़, “ङा मेन।” ॱनेरी लेन ग्याप्पालाक।
22धेनी खुङक्याई खोला ढीवालाक, “ख्यो़ सु हीनो? हेक्याला ताङगीनक्याला, हीकी लेन तेर घोगुलाक। राङगी कोरला ख्यो़ घी ॱनी हो़तो?”
23योहान्नागी ॱनेवालाक, “ॱङो़नस्येखेन यस्यायागी सुङगीन, ‘रीतोङदु भो़गीन च्यीकगी केक, चोवोगी फेप्लाम खाप्ते शो़।’#यस्याया ४०:३; मेथा ३:३ ॱनेरी ॱनागीन केकगो ङा हीन।”
24धा झाजा मीक्याने रीङगा फारुसीपाक्या लाक। 25धेनी खुङक्याई योहान्नाला ढीवालाक, “धा ख्यो़ मास्यीकागोवा मेन, एलीयागोवा मेन धेनी होदे ॱङो़नस्येखेनगोवा मेन्ना, घीझ्येरी ठी़सो़ तेराले?”
26योहान्नागी लेन ग्याप्पालाक, “ङा क्षुगी ठी़सो़ तेराहीन, हीना खीकी खोक्दु खेक्याई ङो ॱमेस्येगीन के-भु च्यीक श्युक हो़तालाक, 27ङी स्याम्ला फेप्कीनगो, खोङबाराङ लाक। धेनी ङा खोङबागी श्याप्हामगी डुतोक टोरीन खाये मेक।”
28देक्या बेथानीरु योहान्नागी ठी़सो़ तेरकीन, योरदान चाङबुगी ॱहाकीनला झ्युवालाक।
को़न्क्षोकगी लुक्टु
29धेनी ङीमा स्याम्मागो योहान्नागी, येशुला राङ स्योकला फेप्कीनगो ज्यारी ॱनेवालाक, “तो़दाङ, जीक्तेनगी धीक्पा ॱनुम्गीन, को़न्क्षोकगी लुक्टुगो फेप्दुक! 30‘ङी स्याम्ला फेप्कीनगो ङाने खाक्क्षे हीन घीझ्येरी ॱनाना खोङ ङाने एन्ला श्युक हो़तालाक।’ ॱनेरी ङी ॱनागीन के-भुगो खोङबाराङ हीन। 31ङाराङगी खोङबाला ङो ॱमास्ये हीना ईस्राएल्पाक्याचारु खोङबा ङो टेयेला, ङी क्षुगी ठी़सो़ तेरी-तेरी होवी।”
32योहान्नागी देरे धेन्पाङ झ्येवालाक, “ङी नाम्खाने थुक्ङीगो फुक्रो़न च्योक्रे भाप्ती, खोङबा खाला श्युक्कीनगो ज्याजुङ। 33ङी ङाराङगी खोङला ङो ॱमास्ये हीना ङाला क्षुगी ठी़सो़ तेरयेला ॱङाक्कीनगी़ ङाला सुजुङ, ‘धाम्पे थुक्ङी सी़ खाला भाप्ती श्युक्कीनगो ख्यी़ ज्याली, खोङबाराङ धाम्पे थुक्ङीगी ठी़सो़ जेगीनगो हीन।’ 34धेनी ङी होदे ज्याजुङ धेनी खोङबाराङ को़न्क्षोकगी से लाक ॱनेरी ङा पाङपो झ्यीदाहीन।”
येशुगी ङेने धाङपोक्या
35ङीमा स्याम्मागो, योहान्ना खोरी ङेने ॱङीमुला लारी धे हो़तालाक, 36धेनी येशु होदेने फेप्कीनगो ज्यारी खी़ ॱनेवालाक, “तो़दाङ, को़न्क्षोकगी लुक्टु फेवी।”
37ङेने दे ॱङीउगी होदे घोरती येशुगी स्याबाला डावालाक। 38येशुगी श्याल लोक्ती, खुङ ॱङीउ स्याबाला डागीनगो शीक्पालाक धेनी खुङ ॱङीउला “खेक्या घी चालाले?” सुरी सुवालाक।
धेनी खुङ ॱङीउगी श्यी़वालाक, “राब्बी, खेराङ घारु श्युक हो़तो?” (राब्बी दो़नगो “ॱलोपो़न” लाक।)
39खोङबागी सुवालाक, “स्योक धेनी तो़।” होझ्येरी खुङ ॱङीउ सोवालाक धेनी खोङबा श्युक्जागो थोवालाक। धेनी होदे घाङला छुची श्यीवा चो़ ॱलेप्सारती, होदे ङीमागो खुङक्या खोङबामुला धेपालाक।
40योहान्नागी ॱनागीनगो ङेन्गीन धाङ येशुगी स्याबाला डागीन ॱङीउने, च्यीक सीमोन पेटोगी नो, आन्डीरीया लाक। 41खी़ खोरी आज्यो सीमोनला एन्ला थुक्ती खोला ॱनेवालाक, “हेक्याई मास्यीकाला ज्याजुङ।” (मास्यीका ॱनाना, को़न्क्षोकगी दाम्दागो लाक) 42धेनी खी़ सीमोनला येशु डुङदु ठीक्ती होवालाक। येशुगी खोला शीक्ती सुवालाक, “ख्यो़ योहान्नागी भीजा सीमोन लाक धेनी ख्यो़ला केफास ॱनेरी भो़गीलाक।” (केफासला पेटो ॱनालाक धेनी होदे मीङ ॱङीगारागी दो़नगो “फोङगीङ” लाक।)
फीलीप धाङ नाथानेल
43धेनी ॱङेटोगो येशु गालील युदु फेप्येला, थुक्सेम जेपालाक। धेनी खोङबागी फीलीपला थुक्ती, “ङी स्याबाला डोङ।” सुरी सुवालाक।
44धा फीलीप धाङ आन्डीरीया धाङ पेटोगी यु बेथसेदाने लाक। 45फीलीपगी नाथानेलला थुक्ती ॱनेवालाक, “मोशेगी क्षो़ठीमगी नाङदु ढीक्टा धाङ ॱङो़नस्येखेनक्यागीया ढीक्टा के-भु, योसेफगी भु नाजारेतगी येशुला हीकी ज्याजुङ।”
46नाथानेलगी खोला ॱनेवालाक, “नाजारेतने शाङपो घीया झ्युङ थुक्कीले?”
फीलीपगी खोला, “ख्यो़राङ राङ होरी तो़।” ॱनेरी ॱनेवालाक।
47येशुगी नाथानेलला राङचारु हुङगीनगो शीक्ती खोला सुवालाक, “तो़दाङ, खो नी ॱयो़क्यु मेगीन ईस्राएल्पा ॱङोन्ने च्यीक लाक।”
48नाथानेलगी खोङबाला श्यी़वालाक, “खेराङगी ङाला घाङगी झ्येरी खेन्नो?”
येशुगी सुवालाक, “फीलीपगी माभो़ एन्लाराङ, ख्यो़ला ङी सेयापगी स्यीङदोङ होकला धेता थोजुङ।”
49नाथानेलगी ॱनेवालाक, “राब्बी, खेराङ को़न्क्षोकगी सेगो लाक। खेराङ ईस्राएलगी ग्यावुगो लाक।”
50येशुगी खोला सुवालाक, “ङी ख्यो़ला सेयापगी दोङबो होकला थोजुङ ॱनेरी ॱनागीनगोला, ख्यो़ धेपा केलाले? ख्यी़ देने ल्हाक लेगा क्षेक्या थोङगीलाक।” 51धेनी खोङबागी खोला सुवालाक, “ङा ख्यो़ला धेन्पा ॱनाहीन, नाम्खे श्यीङखाम भेरी को़न्क्षोकगी भाङछेनक्या मी-भुला तेन्दी, या फेप्कीन धाङ मा फेप्कीनगो ख्यी़ थोङगीलाक।”
Поточний вибір:
योहान्ना 1: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
