Mattayo 2
2
1Leka apa Yesu akahogoliki pa Bethlehemu wa Yudaya pa magono ga Herode mutwa, lolaye, wa malango kuhuma ku mpungu wakachiti ku Yerusalem, 2kujowa, Ayii kuu uyu ahogoliki Mutwa wa waYehudi? pakuya tikaluweni lutondwa lwake ku mpungu, na tachiti kungwilakimbo. 3Leka Herode mutwa pakayufwini iki akayambaniki mwoyo, nu Yerusalem woha pamonga nuyombe. 4Na pakakokanisi pamonga makasisi woha wakulungu na wakulembela wa nsafi, akawakotiti kukita Kristo yula ngahogoliki kuliku? 5Leka wakajowiti kwa yombe, Pa Bethlehemu wa Yudaya: pakuya wiwila yilembiki na wakulweta,
6Nu wenga Bethlehemu, ndima wa Yuda,
Nukuya wanchoko napachokope pa wanduna wa Yuda:
Pakuya kuhuma pa wenga yapite Mpausi,
Nuyombe yadime nsafi wangu Israel.
7Bahalapala Herode akawakemili wa malango awa ku mweya, na akakotalakisi kwawe lukumbi lwake lwa kuwoneka lutondwa. 8Na akawatumiti ku Bethlehemu, nakajowiti, Mubitaye, mukote‐kote ya kamwana aka; leka wona munkolili, munitolele malowe nausi nifike na nenga kungwilakimbo. 9Nawombe, pala wakanjufwini mutwa, wakabiti mwanja; na lolaye, lutondwa lula wakaluweni ku mpungu, lukawalongolili mpaka lukachiti ni kuyima panani apa kakayili kamwana. 10Leka apa wakaluweni lutondwa, wakahekalili nu luheko lukulungu. 11Leka wakayingili mu nyumba, na wakakaweni kamwana pamonga nu Mariamu nyongolo; na wakagwili pasi ni kungwilakimbo; leka apa wakandindulili fibani fyawe, wakandekalili fiyetulo, zahabu ni lubani ni muro. 12Leka apa wakakiliwi pa kulota nausi wasinkilawukila Herode, wakawukiti pa ndila yingi kubita ku ndima wawe.
13Leka apa wakawukiti, lolaye malaika wa Bambo ambonakela Yosefu pa kulota, kujowa, Uyimuke na utole kamwana nu nyongolo, kukimbilila ku Egupto, na uye kukulakula mpaka apa yanikujowele: pakuya Herode yaalonde‐londe kamwana kukayananga. 14Leka akayimwiki na akawatolili kamwana ni nyongolo kilo, na akawukiti baho mwanja ku Egupto; 15na akayili kuku mpaka kufwa kwake Herode: nausi limemasike lila likajowiki nu Bambo pa wakulweta, kujowa, Kuhuma pa Egupto nankemili mwanangu. 16Bahalapala Herode, pakaloliti kukita wankitili mihenje wa malango wala, akawiniti mwoyo nyamhope, na akatumiti nakawakomiti wana wagosi woha awa wakayili pa Bethlehemu, ni pa mipaka yake yoha, wa miaka yiwili ni wa kulemuka, kwa ndingo wa lukumbi lula akawakotalakisi wa malango wala. 17Bahalapala likamemasiki lila likajowiki nu Yeremia wakulweta, kujowa,
18Njowelo yikayufwaniki pa Rama,
Malilo ni kuniongoneka kukulungu,
Rahel kulilila wana mundu;
Leka nukulonda lepa kunyamasika, ndawa awa wayilepe.
19Leka pakafwili Herode, lolaye malaika wa Bambo ambonakela Yosefu pa kulota pa Egupto, 20kujowa, Uyimuke na utole kamwana nu nyongolo, ubite ku ndima wa Israel: pakuya wafwili wala wakalonditi wumi wa kamwana aka. 21Leka akayimwiki, nakapinditi kamwana nu nyongolo, na akayingili mu ndima wa Israel. 22Leka pakayufwini kukita Arkelao ayii mutwa wa Yudaya pandu pa Herode dadi mundu, akayogwipi kubita kukulakula; na pakakiliwi pa kulota, akawukiti kubita ku malundu ga Galilaya, 23nakachiti nakahweliti pa likaya lihina lyake Nazareti: nausi limemasike lila likajowiki na wakulweta, kukita yakemeleke mNazarayo.
Поточний вибір:
Mattayo 2: MGS1937
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First published by the British and Foreign Bible Society in 1937.
