Matius 14
14
Kinapatajan di Yaya Mamamatis#14:1 Mamamatis: Momomonsu
(Mar. 6:14-29; Luk. 9:7-9)
1Om ontok nopo diri om nokotongkopno dii iri ngaran di Yisus, gosob do nokorongou dii i raja, iIrudis ngaranjo, do isidono momorinta si Vonuvo Golilia. 2Om kadi Raja Irudis di tongosusuuonjo do, “Irino i Yaya Mamamatis#14:2 Mamamatis: Momomonsu do ovijau kavagu kama do mantad si pialatan di tulun napatai, om irino sabap do kisinundu Isido,” kadi raja.
3-4Itino kinoontodon do kinapamatajan di Raja Irudis di Yaya, do kivaro di pogulu iso tongondu, ngaranjo nopo dii nga iOrudia, savo di Pilipus, longuon diIrudis, nga sovoo dii diIrudis. Nga kadi Yaya diIrudis, “Auko apatut daa do manansavo dilo longuonnu do poimvijaupo i Pilipus iadinu,” ka. Karangaai nopo dii di Raja Irudis iri tangar di Yaya om patangkapaino dii disido i Yaya, om patangkangai om pojiilono dii isido. 5Om pokipatai daa diIrudis isido, nga au dii nokopusu i raja do rumosi di tongotulun Joudi, do oguu i tulun aparsaya di Yaya do isidono nabi, i popolombus di tinangaran do Kinoringan.
6Nga ontok diri tadau tagajo iri pongurumatan di kinosusuvan di Raja Irudis kondiri om panarino dii iso raraa, tanak diOrudia laid, do siri tanga do tulun, om aandaian dii marong i Raja Irudis do nokoontong di pananari di raraa. 7Om irino dii kinoontodon diIrudis do sinumumpa#14:7 sinumumpa: minisumpa do minangajanjii do kadisido, “Onu noopo pokionuonnu nga pataakonku dika,” kadisido.
8Nga tudukaino dii diinojo i raraa supaya i tulu di Yaya pokionuon, om kadi raraa, “Pokionuonku nopo maino dikau nga i tulu di Yaya Mamamatis#14:8 Mamamatis: Momomonsu om pokoyonno siri talam,” ka. 9Om oludus#14:9 oludus: olunggui ko osusa marong ginavo i raja do pokionuon di raraa iri tulu di Yaya, nga kukuroyonpo do nakalanduno dii isido sinumumpa do mangajanji di raraa siri gotuvang di tongotulun. Om ponuuno dii i Raja Irudis di tulunjo 10do mongoi momutul di tulu di Yaya siri jiil. 11Om onuojono dii iri tulu di Yaya, om pokooyono siri talam, om ovitono dii muli, om pataakono dii di raraa om pataako kavagu dii di raraa si diinojo.
12Nga nokorongou nopo dii i tongotulun di Yaya do napataino isido, om ongoiono dii diolo iri kojuvanjo, om lobongo diolo om ongoio nogi dii poiloo diolo i Yisus.
Papaakan i Yisus diri Limo Noribu Kusai
(Mar. 6:30-43; Luk. 9:10-17; Yaya 6:1-13)
13Korongou nopo dii i Yisus di abar di tongotulun di Yaya, nga sakono dii Isido om ikoi i tongotulunJo di talud, om rijang ikoi dii di tongotulun siri do mongoi siri pantok do ojongou. Nga korongou nopo dii i tongotulun om ongoino dii iolo sompori-ori sumusuut do mampanau takod mantad si tongobandar. 14Om korikot nopo dii i Yisus siri pantok ongoionJo, tindalno dii Isido om ikoi i tongotulunJo, om kaantangaiJo dii iri tongotulun do oguu marong, om osianan dii marong Isido di tongotulun om ongoiono dii pinlingasai Disido iri tulun au kataru.
15Om di minsosodopno dii i tadau, om ongoino dii ikoi i tongotulun di Yisus si Disido, om kadagai, “Okonko kivaro valai siti pantok diti om minsosodopno dii ilo tadau. Gaam nogi do suuon daa ilo tongotulun toguu poongoi silo tongokampung om pomolijoni iolo do kokorui doisido, supaya kivaro akanon diolo,” kanja dii.
16Om jawapno dii i Yisus dagai, “Adai papanauo muju iolo, paakanon muju nono iolo,” ka.
17Nga kanja dii di Yisus, “Onuu iri ipapaakanja diolo, do limono noinan iti kuui om duvo tinan sada naansak!” ka.
18Nga kadi Yisus, “Ovito muju siti Dogo,” ka. 19Om suuono dii di Yisus i tongotulun mogom-ogom siri sakot, om onuono dii iri limo noinan i kuui om iri duvo tinan i sada, om tingaa nogi dii Isido soi tavan#14:19 tavan: langit do sumambayang mangarajou#14:19 mangarajou: mongompod do Kinoringan. Om poikokib-kokibopo dii Disido i kuui, om popintaako nogi dii Disido dagai di tongotulunJo do manaak potikid di tongotulun toguu. 20Om pangakanno dii iolo kasangkat gosob do nabajakan. Om koopod nopo dii i tongotulun toguu mangakan om pumpungono dii dagai di tongotulun di Yisus iri tongosongkokiban do noolu-olu diolo mangakan, nga kivaropo dii opulu om duvo vakid noponu do noolu. 21Om kinoguuo nopo diolo minangakan om kivaro kama iri do limo noribu tulun, nga kira tongotosukod kusai noopo, au nopo kokira iri tongotongondu om tongotangaanak.
Minampanau i Yisus siri Soribau Vaig
(Mar. 6:45-52; Yaya 6:16-21)
22Koopod nopo dii i Yisus papaakan i tongotulun diri, om logoso ikoino dii Disido sumako si talud do mogulu sumondipau. Om ontok nogi diri do suuoJono dii i tongotulun toguu do pouli. 23Om kouli nopo dii i tongotulun toguu, om i Yisus nopo dii nga tinumakad siri kulud#14:23 kulud: kotud do sinumambayang sosoiso. Otuvongno dii om siripo i Yisus kulud do sosoiso. 24Om ikoi nopo i tongotulunJo nga siri tanga di botung tagajo om apagon marong ikoi porikot si disan do au kotori di sarup do ologod om nosimpukan do umbak tologod iri taludja.
25Nga lobino kama iri do jaam tiga minanavau, om rikotno dii i Yisus siri dagai do minampanau siri soribau do vaig. 26Nga kaantanganja nopo dii Isido do manau-panau siri soribau do vaig, turus do nokotigog ikoi do, “Alo tatod taraat!” kanja, gosob do sonluvapan ikoi do nokorosi marong.
27Nga turus poiloo ikoi di Yisus, do kaDisido, “Ada kou kosusa. Ada kou rumosi. Iokui iti,” kadi Yisus.
28Nga kadi Pitrus, “Tuhan, nong oinomod do i TuhanKo, suuo oku daa mampanau siti soribau do vaig do rumomut Dika,” ka.
29“Na, pampanauno pogi, ongoino siti,” kadi Yisus. Jadi lintuunno dii i Pitrus antad si talud om pampanauno dii mongoi daa siri di Yisus. 30Nga kopurimanai nopo dii di Pitrus do ologod i sarup siri misoliputjo, om korosijaino dii, om losodno daa dii, nga ginumijak dii isido do mokiTuhan-Tuhan do mokiongoi di Yisus.
31Om piogono dii i Yisus monguut di Pitrus om kaDisido, “Ikano tulun au songkuro aparsaya. Nokuro do mipiduvo ino ginavonu?” kadi Yisus.
32Om sako nopo dii iolo siri talud mongiduvo om i sarup nga tinumingkod. 33Om ongoino dii ikoi i tongotulun di Yisus sumamba siri gotuvang Disido om kadagai, “Oinomodno bala, Tuhan, do Ikano Tanak do Kinoringan,” kanja. 34Om lombusno dii i Yisus om ikoi i tongotulunJo sumondipau gosob do nokorikot si disan soi Vonuvo Gonisarit.
Minongolingos i Yisus do Tongotoruol siri Gonisarit
(Mar. 6:53-56)
Kosondipau nopo dii ikoi doi Yisus soi Vonuvo Gonisarit om tindalno dii ikoi. 35Om oguu dii i tongotulun siri kotutun di Yisus. Om ponuuno dii i tongotulun kampung siri di tulun vokon do mongoi popoilo kasangkat di kokokompungan do siri i Yisus. Om ovitono dii di tongotulun kasangkat di tulun au kataru siri di Yisus do pokilingasan. 36Om pokililano dii i tongotulun di Yisus supaya do pokombiton noopo daa di tulun au kataru i soririg di sabungJo. Om pobojoo nopo dii Disido, om isai-isai nopo dii nokokombit di sabungJo nga nolingasan kasangkat.
Поточний вибір:
Matius 14: LabukPKV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1995, Wycliffe Bible Translators, Inc. All rights reserved.
