मत्ती 5
5
काःङ्ला तेर्क्योक उपदेश
(लुका ६:२०-२६)
1मीःक्याइ पोर्चोमला थोङ्दी येशु काःङला काःल्दी साला तेःसी#५:१ साला तेःसी ओः तीःनामलादी सुइयाङ मीःक्याला लोप्कोःसी लाःना, खुङ साला तेःकुके ओःले लोप्कुके। ओःले योबाक्याङ ओःङ्दी खुङगीइ सुःरसाःरला जोम्सी। 2ओःले येशुइ खुङक्याला लोप्तेर एःन्डु लाःसी,
3“राःङगीइ सेमला तुःक्सी टेःम्बा साल्गेनक्या ओःले राःङला कोन्ज्यो कोःउए लाःकेनक्याइ काःजे मोलाम ज्योर्ती एः,
चीलेलाःना नाःम्खालीङगीइ क्याःल्खाप खुङक्याइदीरा इःङे।
4तुःङाल पेःगेनक्याइ काःजे मोलाम ज्योर्ती एः,
चीला लाःना कोन्ज्योइ खुङक्याइ सेमला खाम्साङ्बु तेर्केन एः।
5याङ्छाबु एःकेःनक्याइ काःजे मोलाम ज्योर्ती एः,
चीलेलाःना खुङक्याइ थाम्जेर साजाम्बुलीङ ज्योर्केन एः।
6कोन्ज्योइ थाम्जेर आज्ञा रा खुङला सेम थेकेन ताम छाङ्ज्युक लाःती सेम मीःजीकरा तोःपा तोगेनक्याइ ओःले कोम्जे पेःगेनक्याइ काःजे मोलाम ज्योर्ती एः,
चीलेलाःना खुङक्या डाङेन एः।
7राःङ्साला नीङ च्योःगेनक्याइ काःजे मोलाम ज्योर्ती एः,
चीलेलाःना कोन्ज्योइयाङ खुङक्याला नीङ च्योःगेन एः।
8चाङ्मा सेम एःकेनक्याइ काःजे मोलाम ज्योर्ती एः,
चीलेलाःना खुङक्याइ कोन्ज्योला थोङेन एः।
9डीक्ती तेःकेनक्याइ काःजे मोलाम ज्योर्ती एः,
चीलेलाःना खुङक्याला कोन्ज्योइ छार्क्युफुर्क्युक्या लाःती केक्याःप्केन एः।
10कोन्ज्योइ आज्ञाक्या ङीःन्गासुःना सताइतीक्योक मीःक्याइ काःजे मोलाम ज्योर्ती एः,
चीलेलाःना नाःम्खालीङगीइ क्याःल्खाप खुङक्याइदीरा इःङे।
11ख्योक्याइ ङाःला सेमल्हुक लुक्योक सोङ्गारा मीःक्याइ ख्याक्याला ङ्याप्च्युक पेःसी लाःना, सताइतीसी लाःना ओःले ख्याक्याइ बारेला थाम्जेर खालगीइ माःरीक्पा ताम लाःसी लाःना ख्याक्याइ मोलाम ज्योर्केन एः। 12ओः तेःकासु ख्याक्या केःदाङ पेःदो ओःले खाम्साङ्बु पेःदो चीलेलाःना ख्याक्याइ लागी नाःम्खालीङला छ्योम्बो इनाम ज्यादी एः। एःन्डुलेरा कोन्ज्योइ लेःङ्गो तेर्केन्दी ताःङ्बुइ मीःक्यालाङ सताइतीदी एःके।
छा ओःले साङ्बु
(मर्कुस ९:५०; लुका १४:३४-३५; ११:३३)
13ख्याक्या नी जाम्बुलीङगीइ लागी छा च्योःङ्रा इःङे। इःनाङ छाइ प्व्राः तोर्सी लाःना ओःखोला फीर्च्या चीइ छालोक जोगेन्दी? ओःखो नी चीङ लेःगाइदी मेःयुङेन एः, ओः सोङ्गारा, ओःखोला क्युर्तेर्केन एः ओःले मीःक्याइ नेम्ङेन एः।
14ख्याक्यादी जाम्बुलीङगीइ लागी साङ्बु च्योःङ्रा इःङे। काःङ्ला जोक्योक क्याःसा इःप्चे मीःखुए। 15ओःले छेमी थेप्ती सुइयाङ पतीइ मीउप एः। बरु खीम नाःङ्ला ओःङेन मीःक्याला साङ्बु काःल्ज्युक लाःती थोम्बो साला ज्यातेर्कुए। 16ओःन्डुलेरा ख्याक्याइ साङ्बु मीःक्याइ तोःङ्ला बार्च्युक, ओःले खुङक्याइ ख्याक्याइ पेःक्योक याःबु लेःगाक्या थोङेन एः ओःले नाःम्खालीङला एःक्योक ख्योक्याइ आबा कोन्ज्योला महीमा पेःगेन एः।
छ्येइ ठीमगीइ बारेला लोप्क्योक
(लुका १६:१७)
17मोशाइ तेर्क्योक छ्येइ ठीम ओःले कोन्ज्योइ लेःङ्गो तेर्केनक्याइ लाःक्योक ताम नोङ्जेला ङाः ओःङ्क्योक इःङे लाःती टेःम्बा मासाल। ङाः ओःक्याला नोङ्जेला मीःङे, इःनाङ छाङ्च्युजेला ओःङ्क्योक इःङे। 18तेःन्दामरा ङाः ख्याक्याला लाःके, नाःम्खालीङ रा साजाम्बुलीङ तोर्ती डोजेतोःङ्ला छ्येइ ठीमला प्रुःक्योक थाम्जेर ताम पुरा माःकालथुप ओःलाइ छीमी भन्दा छीमी ताम चीगकाङ मेतोर्केन एः। 19छेला प्रुःक्योक छीमी भन्दा छीमी आज्ञाला माःङीःन लाःना ओःले राःङ्सालाङ ओःन्डुरा पेःजे लोप्सी लाःना ओः मीः नाःम्खालीङगीइ क्याःल्खापला थाम्जेर भन्दा छीमी ओःङेन एः। इःनाङ छेला प्रुःक्योक तामक्या राःङगीइ ङीःन्सी लाःना ओःले राःङ्सालाङ ओःन्डुरा पेःजे लोप्सी लाःना ओःखो नाःम्खालीङगीइ क्याःल्खापला छ्योम्बो ओःङेन एः। 20ओः सोङ्गारा, ङाः ख्याक्याला लाःके, छेइ आज्ञाला छ्येइ ठीमगीइ लोबेनक्याइ रा फारीसीक्याइ भन्दा याःबु पेःदी माःङीःन लाःना ख्याक्या नाःम्खालीङगीइ क्याःल्खापला स्युःजे मेःज्योर्केन एः।
सीःताङगीइ बारेला येशुइ लोप्क्योक
21ख्योक्याइ कोःदीरा एः ताःङ्बुइ मीःक्याला एःन्डु लाःकुके, ‘मीः मासे, सेसी लाःना दण्ड ज्योर्केन एः।’#प्रस्थान २०:१३ 22इःनाङ ङाः ख्याक्याला लाःके, ख्योक्याइ राःङ्सा मीः ङीमु सीःताङ पेःसी लाःना ख्योक्याइ दण्ड ज्योर्केन एः। ख्योक्या सुइयाङ राःङ्सा मीःला चीङ लेःगा म्याःक्योक लाःसी लाःना ख्योक्याइ महासभाला लेःन तेर्कोन्दी एः। ख्योक्याइ राःङ्सा मीःला आक्याक्पा लाःसी लाःना नी ताःरुङ ङ्याल्वाइ मेःलारा लेप्केन एः।
23ओ सोङ्गारा कोन्ज्योला भेटी फुल्जे तोःङ्ला राःङ्सा मीः ख्यो ङीमु सीःताङ पेःक्योक छोर्सी लाःना, 24राःङगीइ भेटी वेदीइ तोःङ्ला पोःर्ती गेबुरा काःल्दी ओः मीः ङीमु डीक्तो। ओः तीङ्ला चीग्रा ओःङ्दी राःङगीइ भेटी कोन्ज्योला फुल्दो।
25ख्योला माःताक्पा च्याःङेन्दीइ ख्योला अदालतला खेर्सी लाःना, मौका एःसुनारा अदालतला लेप्चो तोःङ्लारा राःङगीइ टाःलाङ ङीमु डीक्तो। मीङे लाःना खुङगीइ ख्याला ठीम पेःगेन्दीइ लाःक्पाला तेर्केन एः ओःले खोइ ख्योला थेक्याइ लाःक्पाला तेर्केन एः, ओःले ख्योला चेङाङला लुगेन एः। 26तेःन्दामरा ङाः ख्योला लाःके, ख्योइ च्याल्कोन डेबाक्या थाम्जेर माच्यालथुप ख्यो ओःलाःम्ले स्योर्चे मीःखुगेन एः।
व्यभीचारकीइ बारेला लोप्क्योक
27ख्याक्याइ कोःदीरा एः, ‘व्यभीचार पेःजे मेःयोङे।’#प्रस्थान २०:१४ 28इःनाङ ङाः ख्याक्याला लाःके, सुइयाङ काःन्दीङ पेःन्पीःजाला माःरीक्पा सेमगीइ तासी लाःनाङ ओःखोइ सेमला व्यभीचार पेःसीःङ्क्योक ओःङ्गुए। 29ख्योइ च्याःबु मीइ ख्योला लाःयो पेःच्युए लाःना ओःखोला तेङ्दी क्युर्तेर। चीलेलाःना ख्योइ थाम्जेर जुबु ङ्याल्वाला डोजे भन्दा बरु ख्योइ अङ्गा चीग गुमाइतीजे ख्याइ लागी याःबु इःङे। 30ओःन्डुलेरा ख्योइ च्याःबु लाःक्पाइ ख्योला लाःयो पेःच्युए लाःना ओःखोला तुप्ती क्युर्तेर। चीलेलाःना ख्योइ थाम्जेर जुबु ङ्याल्वाला डोजे भन्दा बरु ख्योइ लाःक्पा चीग गुमाइतीजे ख्याइ लागी याःबु इःङे।
ख्योबो छ्युङ्मा खाफ्यागेन बारेला लोप्क्योक
(मत्ती १९:९; मर्कुस १०:११-१२; लुका १६:१८)
31एःन्डुबाङ लाःती एः, ‘काःखोइ राःङगीइ पेःमेला पोःर्पा, ओःखोइ राःङगीइ पेःमेला राःङगीइ पोःर्क्योक इःङे लाःती इःगी प्रुःदी तेर्कोःउए।’#व्यवस्था २४:१ 32इःनाङ ङाः ख्योक्याला लाःके, व्यभीचारकीइ कारणबाहेक राःङ्सा कारणला काःखोइ राःङगीइ पेःमेला पोःर्पा, ओःखोइ खुङगीइ पेःमेइ फीर्च्या राःङ्सा ङीमु याःर्का क्याःप्सी लाःना ओः पेःन्पीःजाला व्यभीचार पेःगेन्दी जोउए। ओःले काँःदीइ ओः पेःन्पीःजा ङीमु याःर्का क्याःप्पा ओःखोइयाङ व्यभीचार पेःउए।
येशुइ ना लुगेनगीइ बारेला लोप्क्योक
33ताःङ्बुइ मीःक्याला लाःक्योक ख्योक्याइ कोःदीरा एः, ‘ख्योइ स्योप क्युःर्ती ना मालु, इःनाङ प्रभु ङीमु पेःगे लाःती ना लुक्योक ताम छाङ्च्युदो।’#गन्ती ३०:२ 34इःनाङ ङाः ख्योक्याला लाःके, ना लुरा मालु। नाःम्खालीङगीइ मीःन लेःङ्दी ना मालु, चीलेलाःना ओःखो कोन्ज्योइ छेसा इःङे। 35साजाम्बुलीङगीइ मीःन लेःङ्दीङ ना मालु, चीलेलाःना ओःखो नी कोन्ज्योइ काङ्बा चुसा इःङे। ओःले यरुशलेमगीइ मीःन लेङ्दीङ ना मालु, चीलेलाःना ओःखो छ्योम्बो क्याःल्बुइ क्याःसा इःङे। 36राःङगीइ गो देदीङ ना लुजे मेःयुङे चीलेलाःना ख्योक्या राःङगीइ गोइ टा चीगकाङ कार्मु की नाःक्पु जोजे मीःखुए। 37ख्योक्याइ लाःक्योक तामदी इःङे लाःना ‘इःङे,’ मीःङे लाःना ‘मीःङे’ लोःप। ओः भन्दा माःङ्बु तामदी हेन्डीलाःम्ले ओःङ्गुए।
कीम्बा मेःलेङेन बारेला येशुइ लोप्क्योक
(लुका ६:२९-३०)
38ख्योक्याइ एःन्डु लाःक्योक कोःदीरा एः, ‘मीइ कीम्बा मी, ओःले सोइ कीम्बा सो।’#प्रस्थान २१:२४; लेबी २४:२०; व्यवस्था १९:२१ 39इःनाङ ङाः ख्योक्याला लाःके, ख्योक्याला सुइयाङ माःताक्पा ताम लाःसी लाःना खुङक्याला वीरोध माःबे। सुइयाङ ख्योइ च्याःबु डाम्बाला रोप्सीलाःला योमा डाम्बाङ सेःतेर। 40सुइयाङ मुद्दा लुदी ख्योइ दौरा खेर्चे छोल्सी लाःना ओःखोला ख्योइ फोँस्योककाङ खेर्चे तेर। 41थेक्याइ ख्योला ग्याक पेःदी खुङगीइ खुर्पु कीलोमीटर चीगथुप खेर्च्युसी लाःना ओः खुर्पु कीलोमीटर ङीथुपरा खुर्तेर। 42ओःले सुइयाङ ख्योला चीङ लाःङ्सी लाःना ओःखोला तेर ओःले सुइयाङ ख्योला पेःलेन लाङ्सी लाःना ओःखोला तेर।
टाःलाङलाङ च्याःम्बु पेःदो
(लुका ६:२७-२८,३२-३६)
43ख्योक्याइ एःन्डु लाःक्योक कोःदीरा एः, ‘टोःङ्रीक्याला च्याःम्बु पेःदो ओःले टाःलाङक्यालादी ङ्याप्च्युक पेःदो।’ 44इःनाङ ङाः ख्योक्याला लाःके, टाःलाङक्यालाङ च्याःम्बु पेःदो। ख्योक्याला तुःक्पु तेर्केन्दीक्याइ लागी रेःम्दो। 45ओःन्डु पेःसी लाःना ख्योक्या नाःम्खालीङला तेःकेन ख्योक्याइ आबा कोन्ज्योइ पुःपोःमोक्या ओःङेन एः। चीलेलाःना खुङगीइ माःताक्पा रा ताःक्पा ङीक्कारला ङीःमा स्यार्च्युदी एः, ओःले खुङगीइ ताःक्पा रा माःताक्पा ङीक्कारकीइ लागी नाम क्याःप्च्युदी एः। 46राःङला च्याःम्बु पेःगेन्दीला चीग्रा च्याःम्बु पेःसी लाःना ख्योक्याइ ची इनाम ज्योर्चे खुउबा रा? एःन्डुबा च्याःम्बु नी च्याल्गो तुःगेनक्याइयाङ नी पेःउए! 47ख्योक्याइ राःङगीइ मीःक्याला चीग्रा तोःङ्ज्याङ पेःउए लाःना ख्योक्याइ राःङ्साक्याइ भन्दा माःङ्बु ची याःबु पेःबा रा? एःन्डुबा लेःगा नी कोन्ज्योला ङोःमेसेगेनक्याइयाङ पेःउए! 48ओः सोङ्गारा, नाःम्खालीङला तेःकेन आबा कोन्ज्यो ङीमु चीङ माःताक्पा म्याःक्योक च्योःङ्रारा ख्योक्याङ ओःन्डुबारा ओःङ्कोउए।”
Поточний вибір:
मत्ती 5: SYW
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
