Like 8
8
Antuma a kuumi na vwele bɨla akaasi ma lwoniŋi Jesu
1Emana Jesu oyeni nca ampuhu na enguundu mo otooso Ncya e Mve Onkani o Njyami. Antuma a kuumi na vwele aki bɨla nde. 2Eki se na akaasi ma atusihi edidima me ebi o bo, emana asalihi angaa a bo. Eki Mariya macwolo o Mariya a Madala matusihi edidima ncaami. 3Jaane okari a Suja ojanji Erode, Sijaane bɨla akɨma kuna ma ampihi Jesu biibi e bo mo oyamaha nde bɨla alwoni a nde.
Ncincami okuni
4Lemvuuru lewi ma enguundu eso mo oje mpili e Jesu, nde oti bo ncincami ndi: 5«Mvuuru omo oyeni akuna mburu. Ntini e nde akunihi, mburu e ncomi evi osyese a njila, baari ajarihi, anywi a yulu aji eso. 6Mburu e mo evi o yula akele. Biila ekuli, ekayi mo kaama anja. 7Mburu nkɨma evi nca ancyene, jo eso ekuli, emana ancyene abumi biila. 8Mburu e mbɨsa evi o ncye eve, ekuli empi mburu kuna kuna.#8.8 Like ateendi ekuumi e mburu kuumi.» Ŋa Jesu owobi na ankala ndi: «Ali na acwi ma oyuha, oyuhi!»
9Alwoni a Jesu apɨsi ndi ncincami jya mo oduha ndi nki. 10Nde okaali ndi: «Be lemabasaha puha mo oyaa maami ama ajisihi ama Onkani o Njyami, ŋa o baari akɨma, me owobo na bo ma ancincami. Bo ma akeese okoroho bo i mono ni, bo mata cwi okoroho bo i yuha yemiŋi ni.»
Jesu apasa bo ncincami jya
11Ŋa ncincami jya mo oduha ndi: mburu oma kaha mbari e Njyami. 12Eli osyese a njila omakaha baari mayuha mbari e Njyami omana Jabɨri ocyesi mbari nca etima e bo, mo oduma bo amayalaha Njyami bo se amavuuha. 13Mburu evi o yula akele omakaha baari ma yuha mbari e Njyami, ayalihi yo bɨla oswere, mbari e Njyami ekini obaha ekaŋa nkara nca etima e bo ni. Bo oyalaha ma antini ake. Ŋa ntini ampasi bo asubi. 14Mburu evi nca ancyene, oma kaha baari ma yuha mbari e Njyami omana ampasi, bɨla osolo na eve ma lebihi, elihi bo kula. Bo i ma yele ni. 15Mburu evi o ncye e mve, omakaha baari mayuha mbari e Njyami, aya tele na otima ove. Bo makyele yo, omana bo asi maami ma ave, mo nkomoho e bo.
Ncincami e baami e mbaa
16Mvuuru i buuna onaasa baami e mbaa owuhi yo o njuu si kali olehi ncina ntari ni. Nde ocuusa yo o biri eli baari onyunuŋa, amoni oyalala. 17Maami aso ma amadibiha madɨla ocuuha cuhu mo. Ma ali ma ajisihi aso ma dɨla oyaa, acuuha o nji. 18Lesa ayiba mo osuumbu a be leyuha, obila mvuuru ali na kiila maselehe oluusa nde, mvuuru ali kiila onyaŋa, macyese na okyehe se o biibi e nde acimiŋa oka na jo.
Jesu alaha nkwono e nde e jaa jaa
19Nguhu a Jesu bɨla nkwono e nde, ayi na basaha nde. Bo aki i buuna oto mpili e nde ni, obila ma lemvuuru. 20Baari na Jesu ndi: «Nguhu a we bɨla baana ma anguhu a we ali o nji, bo ma saha omono we.» 21Jesu okaali na bo ndi: «Nguhu a me bɨla baana ma anguhu a me, omakaha baari mayuha mbari e Njyami ŋa masyaha maami a nde.»
Jesu abye na okʉru
22Cuhu mo, Jesu bɨla alwoni a nde akumi nca mbuungu, nde na bo ndi: «Lecwe levuula ngula jaanga.#8.22 Jaanga jya eki e Galili, ma atwolo se o Ngenesarete. Ngʉla kwa mpili e baari ma ali ka a Ajife ni.Bo se ayeni.» 23Ntini e bo ma vuulihi, tolo lebiri Jesu, okʉru oyi, anja aluuli o mbuungu, bo aya o mbimbi. 24Alwoni aciini na e Jesu, anyuusi nde ndi: «E Nkʉmu, e Nkʉmu saabe lobi lekwa.» Nde onyusihi, obye na okʉru, na pyebi, na epuhi elomi. jo eso eya kami. 25Emana nde opɨsi bo ndi: «Oyalihi o be oli kuni?» Bo amoni vwoho na lekimi. Aya mawobo o mpaniŋi e bo ndi: «Saabe yu mvuuru na, eli na anja na okʉru manyiima nde.»
Jesu osalihi balaha eki na edidima me ebi
26Jesu bɨla alwoni a nde ato osyese osi o Seresani, eli ngula jaanga e tele na Ngalili. 27Ntini e Jesu acuuhi nca mbuungu, balaha mo e mo onguundu kya, aki na edidima me ebi oyi na avunuha bɨla nde. Nde aki aya ojyeŋe otaba. Aki ayiha i ka o njo ni, okaha nca ancwo. 28Nde omono Jesu owʉli nkɨma, ovi o miisi a nde. Owobi na ankala ndi: «We na me oma Jesu? We mwana a Njyami a Nkara Yulu, Kolo kolo e we nyila me oswesehe!» 29Jesu obye na odidima ŋa ebi ndi: «Cuuha o nde!» Co oki omabiha nde o nyuru, akuri nde endi o jyala ankoso o nyiili, nde ocebi. Odidima kya obiri nde nca ebiri e kayi. 30Jesu opɨsi nde ndi: «Nkuumi e we na?» Nde okaali ndi: «Lenkɨndi la aworo.» Obila edidima kuna eki emanyuniŋa o nde. 31Edidima epɨsi kolo kolo na Jesu, mo oduma nde omatina jo nca mbye leku#8.31 Mpili e Njyami ama lehe edidima me ebi ongenege.. 32Ŋa jiimi le enguu, leki o paani e bo, leja o yula okuri. Edidima me ebi na Jesu ndi: «Nyila bisi leje nca enguu.» Nde se oyalihi. 33Edidima me ebi ecuuhi o balaha jya, enyunihi nca enguu, jiimi lya se lesurihi nca ongulu, lekwi. 34Akyeli me enguu amono le eyiri, adimi ma anciini na aduha baari a mo onguundu na ampuhu. 35Baari acuuhi na amono maami mayiri, bo abasihi balaha matusihi edidima me ebi. Oya o nci o paani e Jesu, amalaasa amfa, oya yemiŋi. Bo amoni vwoho. 36Baari ma amoni maami mayiri aso, ayeni na aduha abuha osuumbu a Jesu avusihi balaha eki na edidima me ebi. 37Baari ama osi o Seresani aso na Jesu ndi: «Cyehe bisi o mpuhu.» Obila bo aki na vwoho yo mɨni. Jesu okumi nca mbuungu ovurihi. 38Balaha matusihi edidima me ebi na Jesu ndi: «Kolo kolo e we, bira me bɨla we!» Jesu ovuuri nde ndi: 39«Vuruha njo e we, we oduha maami a Njyami asi o we.» Nde ovurihi na aduha nca onguundu oso maami a Jesu asi o nde.
Jesu onyuusi mwana a Jayirise okaasi. Osalihi okaasi aki na ngaa esibi kuumi na jyele.
40Ewihi e Jesu ngula ongulu, baari ayambi nde. Mo oma, bo aso adilihi nde. 41Balaha mo e nkuumi Jayirise, nkʉmu a njo mavwonoho, owasihi na e Jesu, ovi o nyiili e Jesu. Ovwoni nde ma oya njo e nde. 42Obila nde aki na mwana okaasi, nde aki mwana a kya. Mwana esibi kuumi na jyele. Oli na ngaa e nkala. Jesu o njila, lemvuuru leki lepya nde. 43O ŋa eki na okaasi omo na ngaa ovuvuhu. Esibi eki emiyira kuumi na jyele. Nde aki amakaba adoro kuna mpuhu asalihi a baari. Ŋa mvuuru se omo aka buuna osalaha nde ni. 44Nde oyiri ngula Jesu, otiili poho e mfa e nde, ovuvuhu owi. 45Jesu opɨsi ndi: «Atiili na me na?» Baari aso abɨsi. Ŋa Pyere ndi: «Nkʉmu, lemvuuru lejenehe we, lepya we!» 46Jesu okaali ndi: «Mvuuru ama tiila me. Me emoni mpari emacuuha o me.» 47Okaasi jwa omono ndi ami yiimba nde, oya atiriha, oyi na awura avwo o nyiili e Jesu mwa baari aso. Nde se oduhi obila o nde anaami na Jesu, na osuumbu a nde awuumi o nci na nci. 48Jesu na nde ndi: «Kaasi, oyalihi o we omi vusuha we. Jyehe nca oduusu». 49Jesu aki okini awobo, balaha mo ntu ewi njo e Jayirise a nkʉmu a njo mavwonoho, na nde ndi: «Mwana a we omi kwa nyila oma weele Nkʉmu.» 50Jesu oyuha vwa nde na Jayirise ndi: «Kaa monoho vwoho ni, lehe oyalihi, mwana a we avuuha.» 51Nde oto njo, aka yalaha ndi baari aso anyuniha ni. Ongula Pyere, Jan, Jake na nguhu bɨla taara a mwana. 52Baari aso aki ma olili, bo ali o nkwono obila o nde. Jesu ndi: «Lenyila olili, nde okini okwa ni, nde oli tolo!» 53Ŋa bo aya masebe Jesu, mo oma bo aki ayaa ndi mwana amakwa. 54Jesu okwari nde o kwoho, owobi na ankala ndi: «Mwana me, nyusuha!» 55Oduduma a mwana okaasi se oyi na vriha, nde otemihi o nci na nci. Jesu na bo ndi: «Lempa nde biila.» 56Nguhu bɨla taara a mwana aya nca lekimi. Jesu na bo ndi: «Be lekaa duha mvuuru maami ma ayiri ni.»
Поточний вибір:
Like 8: MDT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
