एहुन्‍ना 9

जनम वरी अंद्हा तनयहोड़ीय चिकन तेडा

1हेना वरी ईसु होर तेय चलोः तोलोग मियाँहोड़ जनम वरी अंद्हा तनायिय ञेंल ञँमतेडा। 2तहाँ चेला कुतय होंबोर तेडिया, “ए गुरू, ईया पाप तेडा ते नेय जनानम वरिय अंद्हा यना, इंगत अपत किदो अनेजू?” 3हेना वरी ईसु लाय तेडा, “नेय बेगारिय पापा, न दो इंगत अपत पाप केडा, लेकिन नेय अंद्हा केन हेना भगवान राः काम हेंय थरे ञेंलुः लगड हवे। 4जे ईञिय कुलकेडा हेंय राः काम अबू बेर दोहोन भर्रे करेक इदाना, अब अंधराः बंचोः तना, कहेकि ञींदुः रे कनय एरो कू बुता एना। 5#मत्ती 5:14; एहुन्‍ना 8:12इंञ दुनिया रे इदानिंञ मेन दिन दुनिया रेनिय इंजोत हवे।”

6नेन घयते कहनी केते ओतेत रेय बेजतेडा, अवुर हेना बुभूरिय सुवेड केते अंद्हा मेड रेय लगो तेडा,

7तहाँ हेंय थरेय कहनी तेडा, “जू, सिलोह तलवा रे सेनकोः तेम अबुऊ,” (सिलोह राः मतलोब हवे कुलकेडिया)। तहाँ हेंय सेनकेन तेय अबेना अवुर ञेंञेंल तींग तेय मिड़ाः मेजेना। 8तहाँ परोसिकू अवुर पहील पहील ते हेंय अआसी तोलोग कू ञेंलवाडिया हेंकू कहनी तेडा, “मेय दुड़ूब केनतेय अआसी दोहो एनु, हेंय न लगे किदो?”

9अवुराःकू कहनी तेडा, “हें-नी हवे,” अवुराःकू कहनी तेडा, “कनय हें-नी घियाअय हवे मा,” हेना वरी अंद्हा कहनी तेडा, “इंञ हें-नी हवे।”

10हेना वरी होड़कू होंबोर तेडिया, “मेड मी काःते जिजकेना?”

11हेना वरी हेंय हेंकुय लाय वडा, “ईसु मेनते कू कहनी वया मियाँहोड़ होड़ ओतेत रे बेजकेड ते, बुभूरिय सुवेड केते मेडिंञ रेय लगो वडिञाँ, अवुरिय कहनी तेडा, ‘जू, सिलोह तलवा रे सेनकोः तेम अबुऊ’ मेनते, अवुर इंञ सेनकेन तेंञ अबेना, अवुरिंञ ञेंञेंल तना।” 12तहाँ होड़कू होंबोर तेडिया, “हेंय करेया?” हेना वरी हेंय कहनी वडकू, “इंञ मेनेंञ पपाड़िआ।”

अंद्हा चिकन एन हेना राः बारे ते फरीसिकू पता कू लगो तेडा

13हेना वरी होड़कू अंद्हा तनय हेनी, फरीसिकू थरे कू इदी तेडिया। 14जे देवह ईसु बुभूर सुवेड केते अंद्हा मे-डिय जिज तेडा, हेना चेका सब्द राः दिन दोहो एना। 15तहाँ फरीसिकू हो अवुर मियाँ एस काःते मेड मी जिज यना मेनते कू होंबोर तेडिया। हेना वरी हेंय लाय वडकू, “हेंय बुभूर सुवेड केते मेडिंञ रेय लगो तेडा, अवुर इंञ अब मेजेना, इंञ हेन वरिंञ ञेंञेंल तना।”

16नआँ अँजोम केते कुछ फरीसिकू कहनिय दोहो एनु, “नेय होड़ भगवान हनवरी बेगारिय मे-जा, कहेकि नेय सब्द राः दिन मेनेय मनो यडा।” अवुराःकू कहनी तेडा, “पापी होड़ न घियाआ चिन्ह चमत्कार काःतेय देखो सकोआ?” तहाँ हेंकू अलग तलग यनकू। 17तहाँ फेर हेंकू अंद्हाकू होंबोर तेडा, “अम मेडमिय जिजकेडा हेंय राः बारे ते ची मेनतेम कहनी यडा?” हेना वरी हेंय कहनी तेडा, “हेंय भविस्यवक्ता हवे।”

18लेकिन एहूदिकू अंद्हा तनय मेनाआँ, अवुर निहोय ञेंञेंल तन मेनाआँ, मेने कू बिसवास गडा। हेनाते इंगत अपत एडकींञ कू राः अगतेडा। 19तहाँ राः अगकेड कींञ तेकू होंबोर तेडकिञाँ, “नेय अबा कोड़ा होपोन हवे किदो? अबा कहनिया जनानम वरी अंद्हाय दोहो एना मेनते, फेर अब काःतेय ञेंञेंल तना?” 20हेना वरी इंगत अपत एडकींञ लाय तेडा, “अलिंञ पपाड़ी तना लिञूँ, नेय कोड़ा होपोन लिंञ हवे, अवुर जनानम वरी अंद्हाय दोहो एना। 21लेकिन अलिंञ मेने लिंञ पपाड़ी तना काःतेय ञेंञेंल तना, अवुर मेडतू ईया जिजकेडा हेना हो मेने लिंञ पपाड़ी तना। बडे केनायू, अनानेज पे होंबोरू; अनेज राः बारे तेय पपाड़ी तना, अनेज लायेआ।” 22नआँ टेबोः इंगत अपत एडकींञ एहूदिकू राः बोर तेकींञ कहनी तेडा। कहेकि एहूदिकू पहील तेकू गुट तन दोहो एनु कि कनय हेंय मसीहा हवे मेनते कू कहनिय रेदो, आराधना ओड़ाः वरी हेंय बू उडूंग गोत्तेयू मेनते। 23ने-ना राः चलते ते इंगत अपत एडकींञ कहनी तेडा, “बडे केनायू, अनानेज पे होंबोरू” मेनते।

24तहाँ हेंकू अंद्हा तनय हेनी, फेरेच राःकेडिय ते हेंय थरे कू कहनी तेडा, “भगवान राः स्तुतिम करो। अले दोले पपाड़िआ हेंय पापी होड़ हवे।” 25हेना वरी हेंय जबाब तेडा, “इंञ मेनेंञ पपाड़िआ पापी हवे किदो ईया हवे, इंञ अंद्हा तनाञूँ अवुर आबिंञ ञेंञेंल तना।” 26हेना वरी हेंकू फेरेच कू होंबोर तेडिया, “ची तेडमिआयू? अवुर काःते मेडमिय जिज तेडा?” 27तहाँ हेंय हेंकू थरेय कहनी तेडा, “इंञ लायवड पेअञूँ, अपे मेने पे अँजोम गडा, निहो दो फेर ची लगड अँजोम गिसन यडपेआ? अपे हो हेंय रेनकू चेलाकू बनो गिसन यडपेआ किदो?” 28तहाँ हेंकू अनाप सनाप ते दाबेट केडिय तेकू कहनी वडियू, “अनाम हवे हेंय रेनिय चेला दो, अले दो मूसा रेनकू चेलाकू हवे। 29मूसा सुदा भगवान टेबोः दोहो एनु, हेना दोले पपाड़िआ, लेकिन नेय होड़ करेनिय हवे, अले मेने ले पपाड़िआ।” 30हेना वरी हेंय हेंकू थरेय कहनी तेडा, “नआँ दो अहचरज राः टेबोः हवे, हेंय मेडीञिंय जिजकेडा, अवुर अपे करेनिय हवे मेनाआँ मेने पे पपाड़िआ। 31अबू पपाड़िआ कि भगवान पापी होड़कू राः मेनेय अँजोमेआँ। लेकिन कनय भगवान रेनिय सेवेखियाय दोहोनू। अवुर हेंय राः टेबोईय मनो रेदो, हेंय रअय अँजोमेआँ। 32दुनिया राः सुरू वरी नआँ कबोह बेगर बू अँजोमा कि कनय जनम वरी अंद्हा केनय मे-डिय जिजकेडा मेनते। 33अगर नेय होड़ भगवान हनवरी मेनेय दोहोगन रेदो, कनर एरोय बनो सकोएन मेनू।” 34हेना वरी हेंकू हेंय थरे कू कहनी तेडा, “अम दो इंगम अपुम राः पाप राः चलते तेम जनम केना, निहों दो अनालेम चेडियाडा।” अवुर हेंकू आराधना ओड़ाः वरी कू उडूंग गोत्तेडियू।

आत्मिक अंद्हा

35तहाँ फरीसिकू आराधना ओड़ाः वरी कू उडूंग तेडिया, हेना ईसु अँजोम तेडा। अवुर हेंय अंद्हा तनय सुदाय जुमो एना, तहाँ हेंय थरेय कहनी तेडा, “अम भगवान होपोन थरेम बिसवास यडा किदो?”

36हेना वरी हेंय होंबोर तेडियायू, “ए परभु, लाय वंञ मी, हेंय काय हवे? इंञ हेंय थरेंञ बिसवासेआ।”

37हेना वरी ईसु हेंय थरेय कहनी तेडा, “अम हेंय ञेंलकेडियामू, निहों हेंय अम सुदाय टेबोः तना।”

38तहाँ हेंय कहनी तेडा, “ए परभु, इंञ बिसवास यडाञूँ।” अवुर हेंय उकड़ुम केनते हेंयिय आराधना तेडा।

39तहाँ ईसु कहनी तेडा, “इंञ नआँ दुनिया रे न्याये#9:39 दुनिया रेनकू अकू राः पाप बारे तेकू पपाड़ी लगड लगाडिंञ मेजकेना, ताकि जे जे मेने ञेंलियाडकू ञें-ले अवुर जे जे ञेंलियाडकू अंद्हाऊ।”#एसा 6:9; मत्ती 13:14-15; मरकुस 4:12; लूका 8:10 40नआँ अँजोम केते अंद्हा तनय सुदा दोहो एनकू फरीसिकू कहनी तेडा, “अले होले अंद्हा गिआ किदो?” 41हेना वरी ईसु हेंकू थरेय कहनी तेडा, “अगर अपे अंद्हा पे दोहोएन रेदो, अपे थरे पाप राः दोस एरो लगोएन मेनू, लेकिन अपे कहनिया, अले ञेंञेंल तना ले, नेन याःते अपे राः पाप बनो बगी कोआ।”

Поточний вибір:

एहुन्‍ना 9: ksz

Позначайте

Поділитись

Копіювати