एहुन्ना 8
8
ईसु छिनाड़ी कोड़ीहोनिय माफ तेडा
1लेकिन ईसु जयतून काठ इदान हेना बुरू रेय सेनेना। 2हेना ञींदावा हेंय ञींदात्ते फेर मँडिल रेय मेजेना; अवुर होड़कू मेजेना, तहाँ हेंय दुड़ूब केनतेय चेडकू दोहो एनु। 3तहाँ एहूदी नियम चेचेडकू अवुर फरीसिकू मियाँहोड़ कोड़ीहोन लंद फँदुः तोलोग कू पकड़ो तेडिया, हेंय होड़कू मझँर रे इदी केडिय ते ईसु कू होंबोर तेडा, 4“ए गुरू, नेय कोड़ीहोन लंद फँदुः तोलोग ले पकड़ो केडिया। 5धरम नियम रे मूसा अबू नियामिय ओवड बुआ, हेना रेय कहनी केडा, न घियाःकू कोड़िकू दिरी तेपे तिकी गोज गोत्तेकू मेनते। अम नेय कोड़ीहोन राः बारे ते ची मेनतेम कहनी यडा?” 6हेंकू कनर न कनर टेबोः रेकू फसोविय लगड नआँ टेबोः अजमोविय लगड कू कहनी तेडा। लेकिन ईसु कुबूंग केनते अंगरित ते ओतेत रेय लिखोवे दोहो एनु। 7हेंकू होंनोबोरेय दोहो एनु, तहाँ सोझ केनते हेंकू थरेय कहनी तेडा, “अपे मेंडे जे बेगारिय पापा हें-नी पहील ते तिकी मड़ाँगियू।” 8तहाँ हेंय फेर कुबूंग केनते अंगरित ते ओतेत रेय लिखोवे दोहो एनु। 9तहाँ हेंकू नआँ अँजोम केते, बड बडे कुहो होड होडिंञकू हो मियाँड होड़ मियाँड होड़ तेकू चलो यनु, अवुर ईसु हें-डेय दोहो यनु, अवुर कोड़ीहोन हो हें-डेय चड़ाँ तना। 10हेना वरी ईसु चड़ाँ केनते हेंय कोड़ीहोन थरेय कहनी तेडा, “ए कोड़ीहोन, करा हनतेकू चलो यना? कनय सजा मेने कू एमगड मिआँ किदो?” 11तहाँ हेंय कोड़ीहोन कहनी तेडा, “ए परभु, कनय मेने।” तहाँ ईसु कहनी तेडा, “इंञ हो सजा एरोंञ ओवड मिआँ; जू चलोःमी, लेकिन फेर अलोम पापे।”]
ईसु दुनिया रेनिय इंजोत हवे
12 #
मत्ती 5:14; एहुन्ना 9:5 तहाँ ईसु फेर होड़कू थरेय कहनी तेडा, “दुनिया रेनिय इंजोत इंञ हवे, जे इंञ तयोम तेय मेजुआ, हेंय अंधरा ओत ते एरोय सेनतेडा, लेकिन हेंय जीवन एम हेना इंजोतिय ञाँमा।” 13#एहुन्ना 5:31हेना वरी फरीसिकू कहनी तेडा, “अम अनामाः गोवाहिम एमियाडा, अम गतर रे कनय कोवाआ, हेनाते अमाः गोवाही सही कोवाआ?” 14तहाँ ईसु हेंकुय जबाब वडा, “भले न, ईञाः गोवाही ईनिंञ एमियाडू, हेंडे रेहो इंञ एमियड हेना गोवाही सही गिआ, कहेकि इंञ पपाड़ी तनाञूँ, इंञ करा वरिंञ मेजकेना, अवुर करा हनतेंञ चलोआ, लेकिन अपे करा हनतेंञ चलोः तन हेना, अवुर करा वरिंञ मेजकेन हेना मेने पे पपाड़ी तना। 15अपे दुनिया रेनकू होड़कू घयतेपे न्याय यडा; इंञ कनय राः मेनेंञ न्याय यडा। 16हे, अगारिंञ न्याये मेंडे रेहो, इंञ न्यायेः हेना सही गिआ; कहेकि इंञ मियाँहोड़ ते मेनेंञ न्यायेआ, लेकिन ईञिय कुलकेडा अपुंञ इंञ सुदाया। 17बा होड़ राः गोवाही सही गिआ मेनाआँ, अपे राः धरम नियम रेहो लिखल इदाना; 18एक दो ईञाः गोवाही ईनिंञ एमियाडा, अवुर मियाँहोड़ ईंञिय कुलकेडा अपुंञ हो ईञाः गोवाहिय एमियाडा।” 19तहाँ हेंकू होंबोर तेडिया, “अपुम करेया?” हेना वरी ईसु लाय वडकुआ, “अपे न दो इंञ पे पपाड़िआ, अवुर न दो अपुंञ पे पपाड़िआ, अगर अपे इंञ पे पपाड़ी एन रेदो, अपुंञ होपे पपाड़ी एन मेनू।” 20नआँ टेबोः ईसु मँडिल रेय चेडकू तोलोग दान पेटी चिली कू दोहोआ, हेना ओड़ाः रेय कहनी तेडा, अवुर हेंय राः समय अनायिन पुरोः दोहो एनु, हेनाते कनय मेने सबगाडिय दोहो एनु।
ईसु अनेज राः बारे तेय लाय तेडा
21हेना वरी फेर ईसु हेंकू थरेय कहनी तेडा, “इंञ चलोः तनाञूँ, अवुर अपे इंञ पे छपाञाँ, अवुर अपे पाप राः माफी बेगर ञँम तेपे गोजुआ; जे जघा रे इंञ चलोः तना, हेना रे अपे एरो पे सेन सको एना।” 22हेना वरी नआँ अँजोम केते एहूदिकू कहनी तेडा, “अनानेज ससीत गोजुआ किदो, नेय दोय कहनी यडा, ‘जे जघा रे इंञ चलोः तना, हेना रे अपे एरो पे मेज सको एना’?” 23हेना वरी हेंय हेंकू थरेय कहनी तेडा, “अपे पेंदी रेनकू हवे, इंञ अगस रेनिय हवे, अपे चँवदीस रेनकू हवे, इंञ चँवदीस रेनिय न लगे। 24हेनाते इंञ अपे थरेंञ कहनी तेडा, कि अपे पाप राः माफी बेगर ञँम तेपे गोजुआ, अगर अपे इंञ हें-नी #8:24 भगवान राः कागद जे इंञ हवे मेनते कहनी केडा, हें-नी हवे ईंञूँ। हवे मेनते मेने पे बिसवासे रेदो, अपे पाप राः माफी बेगर ञँम तेपे गोजुआ।” 25हेना वरी हेंकू होंबोर तेडिया, “अम ईया हवे?” तहाँ ईसु हेंकू थरेय कहनी तेडा, “सुनुरू वरिंञ कहनी दरवर यडा हें-नी हवे। 26इंञ अपे राः बारे ते अखीर टेबोः ककहनी अवुर अपे राः न्याय करेक हो इदाना, लेकिन जे ईञिय कुलकेड हेंय सत गिआयू, अवुर जे इंञ हेंय वरिंञ अँजोम केडा, हे-ना टेबोः दुनिया रेनकू थरेंञ कहनी यडा।” 27लेकिन हेंकू अपत मतलोब भगवान राः बारे तेय कहनिय दोहो एनु, हेना मेने कू जेर गडा। 28हेनाते ईसु कहनी तेडा, “अपे इंञ मनवाँ होपोन कुरूस रेपे रकाबिंञ रे हेंडेपे पपाड़िआ कि इंञ हें-नी हवे; इंञ ईंनिञाः मन ते कनर मेनेंञ करोआ, लेकिन जेयसे अपुंञ चेड केडिञाँ हेन घयते नआँ टेबोईंञ टेबोः यडा। 29ईञिय कुलकेड हेनी इंञ सुदाया; हेंय इंञ मियाँहोड़ ते बेगारिय एनेम गोडवाञाँ, कहेकि इंञ हमेसा हेंय बेसवाः हेनांञ करोआ।” 30नआँ टेबोः अँजोम केते अखीर होड़कू हेंय थरे कू बिसवास तेडा।
पाप वरी छडोः लगड ईसु लाय तेडा
31ईसु अनेज थरे कू बिसवास तेडा, हेंकू एहूदिकू थरेय कहनी तेडा, “ईञाः टेबोःपे मनो रेदो, अपे सही मेते ईञाःकू चेला कुपे बनोआँ। 32हेंडे अपे सत पे पपाड़िआ, अवुर हेना सत अपे आजाद पेआ।” 33#मत्ती 3:9; लूका 3:8हेना वरी हेंकू जबाब वडिया, “अले अबराहम खुटी खनदान रेनकू हवे, अवुर अले कबोह कनय राः गुलामी रे मेने ले दोहो गना। फेर अम काःतेम कहनी यडा, अपे गुलामी वरी पे आजादुआ मेनते?” 34हेना वरी ईसु जबाब वडकू, “इंञ अपे थरे सही मेतेंञ कहनी यडा, कनय हो पापेः हेंय, पाप राः गुलामी रेय दोहोना। 35ओड़ाः रे हरवाह हमेसा मेनेय दोहोना; लेकिन होपोन तू हमेसा ओड़ाः रेय दोहोना। 36हेनाते होपोन तू अपे गुलामी वरिय आजाद पे रेदो, अपे सही मेते गुलामी वरी पे आजादुआ। 37इंञ पपाड़ी तना, अपे अबराहम खुटी खनदान रेनकू हवे, हेंडे रेहो अपे ईञाः टेबोः मेने पे मनो यडा, हेनातेपे ञेंड गोजेंञ मेनते; 38इंञ अपुंञ एचे रे जे-नंञ ञेंलकेडा, हे-ना अपे थरेंञ कहनी यडा। अवुर अपे हो जे-ना अपापे वरी पे अँजोम केडा, हेन घयतेपे करो यडा।”
39हेना वरी हेंकू जबाब वडिया, “अले अपाले#8:39 एहूदिकू खुटियारा कू अपा कू कहनी वकुआ। दो अबराहम हवे।” तहाँ ईसु कहनी तेडा, “अगर अपे अबराहम रेनकू चोंडिज कुपे दोहोएन रेदो, जे काम अबराहम करो तेडा हेन घयते अपे होपे काम तेड मेनू। 40जे सत टेबोः भगवान वरिंञ अँजोम केडा, हे-नांञ लाय वपे तना। लेकिन अपे ञेंड गोजेंञ मेनते पे सँबाहुः तना। अबराहम दो न घयते मेनेय काम गडा। 41अपे अपापे घयतेपे काम यडा।” तहाँ हेंकू कहनी तेडा, “अले बेगर अपा ते बेगर ले जलमोआ, अले रेनिय मिनियेंटंग अपाले इदाना, हेंय हवे भगवान।”
42हेना वरी ईसु हेंकुय कहनी वडा, “अगर अपे रेनिय अपापे भगवान दोहोएन रेदो, इंञ पे परेम तेडिंञ मेनू; कहेकि इंञ भगवान हनवरिंञ मेजकेना। इंञ हें-नी कुलकेडिञाँः ईंनिञाः मन ते बेगारिंञ मे-जा। 43अपे ईञाः टेबोः मेने अँजोम गिसन यडपेआ, हेनाते अपे ईञाः टेबोः मेने पे जेर यडा। 44अपे अपापे सयतान हवे, अवुर अपे हेंय रेनकू चोंडिजकू हवे, अवुर अपे हेंय बेस वआ हेना पूराय मेनते पे चहोः तना। हेंय दो सुनुरू वरी जनमरवा इदानिया, अवुर भगवान राः सत टेबोः रेनिय बिरोधी हवे। कहेकि हेंय थरे सत कोनो वआ, हेंय जलिया तेय टेबोआ, कहेकि हेंय राः स्वाभाव हे-ना हवे, हेंय जनालिया तेय टेबोआ, अवुर गोटा जलिया टेबोः रेनिय अपत हवे। 45अवुर इंञ जे टेबोईंञ कहनी यडा हेना सही गिआ, हें-नते अपे इंञ थरे मेने पे बिसवास यडा। 46अपे मेंडे इंञ पापी हवे मेनते ईया टिपो सकोआ? अवुर इंञ सही टेबोईंञ टेबोः यडा दो ची लगड मेने पे बिसवास यडा? 47जे भगवान रेनकू हवे, हेंकू भगवान राः टेबोः अँजोम केतेकू मनोवेआ। लेकिन अपे भगवान राः टेबोः अँजोम केते मेने पे मनो यडा, कहेकि अपे भगवान रेनकू होड़कू न लगे।”
ईसु अबराहम वरी होय बडे गिआ
48नआँ अँजोम केते एहूदिकू ईसु थरे कू कहनी तेडा, “अले ठिके ले कहनी यडा, अम सामरी हवे अले जात न लगे, अवुर अम थरे भूतकू लगो केना।” 49हेना वरी ईसु जबाब तेडा, “इंञ थरे भूतकू बेगर कू लगोआ; लेकिन इंञ अपुञिंञ मान मरजाद यडा, अवुर अपे इंञ मेने पे मान मरजाद यडिञाँ। 50लेकिन इंञ ईनिञाँः मान मरजाद मेनेंञ ञँम बेड़ा यडा, हे, लेकिन मियाँहोड़ इदाना, हेंय राः मन इदाना कि ईञाः मान मरजाद होयाऊ, अवुर हेंय सींड़ कुराआ न्यायेअय हवे। 51इंञ अपे थरे सही सही तेंञ कहनी यडा, अगर कनय होड़ ईञाः टेबोईय मनो रेदो, हेंय जुग जुग एरोय गोजेना#8:51 पवितर आत्मा राः मिरतू लाय यडा।” 52हेना वरी एहूदिकू कहनी तेडा, “अबराहम अवुर भविस्यवक्ताकू दोकू गोजियाना, अम काःतेम कहनी यडा कि ईञाः टेबोःपे मनो रेदो जुग जुग एरो पे गोजेना मेनते? निहो अले पपाड़ी यनाले अम थरे भूतकू लगो केना। 53अले रेनिय खुटियारा अबराहम दोय गोजियाना, अम हेंय वरी होम बडे गिआ किदो? अवुर भविस्यवक्ताकू होकू गोजियाना। अम अनाम ईया मेनतेम बुझोः तना?” 54हेना वरी ईसु जबाब तेडा, “अगर इंञ खुद ईनिञाअंञ महिमा रेदो, ईञाः महिमा कनर कोवाआ, लेकिन ईञाः महिमा करोअय अपुंञ हवे, हेंय अपे अले रेनिय भगवान मेनते पे कहनी वया। 55हेंय अपे मेने पे पपाड़िआ, लेकिन इंञ हेंयिंञ पपाड़िआ। अगर इंञ मेनेंञ पपाड़िआ मेनतेंञ कहनिय रेदो, अपे घयते जलिया होड़ हवे; लेकिन इंञ हेंयिंञ पपाड़िआ, अवुर हेंय राः टेबोईंञ मनोआँ। 56अपे रेनिय खुटियारा अबराहम इंञ धरती रे मेजुः दिन ञेंल राः असरा ते अखीरिय खुसी एना; अवुर हेंय ञेंल तेडायू, अवुरिय बहल एना।” 57हेना वरी एहूदिकू हेंय थरे कू कहनी तेडा, “पचास बरिस रेनिय घली अनायिन मिआँ, दो अबराहम अम काःतेम ञेंलवाडिया?” 58हेना वरी ईसु हेंकू थरेय कहनी तेडा, “इंञ अपे थरे सही सही तेंञ कहनी यडा, अबराहम राः जनम वरी पहील ते इंञ इदानिञाँ।” 59तहाँ हेंकू ञेंड गोजेय लगड दिरी कू हलंग तेडा#8:59 अनानेज भगवान हवे मेनतेय कहनी एना ते, ञेंड गोजेय लगड दिरी कू हलंग तेडा, कहेकि एहूदिकू अपन आप भगवान राः बरोबर बनोः अखीर बडेआ पाप हवे मेनते कू मनोवेआ।, लेकिन ईसु दलंग दलंग ते मँडिल वरिय उडूंग यनु।
Поточний вибір:
एहुन्ना 8: ksz
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Wycliffe India. All rights reserved.
