Markus Kata-Kata Partama
Kata-Kata Partama
Markus pung Kabar Bae soal Yesus ni, akang carita soal Yesus Kristus pung hidop mulai dari Antua dapa baptis, dapa salib, sampe hidop kombali. Markus carita Yesus kasi balajar orang, kasi bae orang saki, user setang dari orang takanal, kasi hidop orang mati, kasi ampong orang pung dosa, deng biking tanda-tanda herang. Abis samua tu, Yesus dapa tangkap, dapa siksa, deng dapa salib, mar Antua hidop kombali pas akang pung hari katiga.
Kitab ni dapa kasi nama par Kabar Bae, tagal akang carita soal bagemana Allah Bapa utus Yesus Kristus par mati deng hidop kombali par tabus manusia pung dosa, biar sapa sa yang parcaya Antua bisa baku bae kombali deng Antua, deng hidop tarus-tarus deng Antua.
Kalo banding Matius, Markus deng Lukas pung Kabar Bae soal Yesus, ada banya carita yang sama. Banya orang yang pintar Alkitab bilang kalo hal itu bisa jadi tagal Markus tulis dia pung Kabar Bae soal Yesus kamuka, la waktu Matius deng Lukas tulis dong pung Kabar Bae, dong ambe carita tu dari Markus pung.
Sapa yang tulis kitab ni: Dalang kitab ni seng bilang sapa yang tulis akang. Kalo iko pamimping-pamimping gareja dolo-dolo, yang tulis kitab ni nama Markus, yang jua jaga dapa panggel par Yohanis (Utusang pung Carita 12:25). Dia tu Petrus pung tamang dekat (1 Petrus 5:13), yang biasa sama-sama deng Petrus bajalang kasi tau Kabar Bae. Apa yang dia dengar dari Petrus soal Yesus, itu yang dia tulis dalang kitab ni. Markus ni jua pi sama-sama deng Paulus deng Barnabas par bantu dong waktu dong bajalang kasi tau Kabar Bae soal Yesus Kristus (Utusang pung Carita 12:25, 15:36-41).
Kitab ni par sapa: Markus tulis kitab ni par orang-orang bukang Yahudi. Dia seng pake banya ayat dari Alkitab Janji Lama, mar kasi jelas budaya Yahudi biar orang bukang Yahudi bisa mangarti akang (7:1-5). Markus tulis kitab ni par orang bukang Yahudi yang tinggal di daera-daera yang Yesus seng parna pi par kasi tau Kabar Bae. Dong seng parna lia langsung bagemana Yesus hidop deng seng parna lia samua hal yang Antua biking.
Mangapa Markus tulis kitab ni: Markus tulis kitab ni par orang bukang Yahudi par jawab “Yesus tu sapa”. Dari waktu buka dia pung kitab lai dia bilang kalo Yesus tu Allah pung Ana yang Allah utus par kasi salamat manusia (1:1, 11). Allah sandiri mangaku kalo Yesus tu Antua pung Ana (1:11, 9:7). Tarus, Yesus pung murid, komandan tantara Roma, mala orang takanal jua mangaku bagitu lai (1:24, 3:11, 5:7-8, 8:29, 15:39). Par kasi bukti soal itu, Markus kasi unju bagemana Yesus pung kuasa par anging, omba, panyaki, setang, dosa, deng kamatiang.
Markus jua kasi jelas Yesus kasi salamat dunya deng cara bagemana. Antua datang kasi Antua pung diri par mati par tabus banya orang dari dong pung dosa (10:45, 14:24).
Kitab ni tabage par babarapa bagiang:
| 1:1-13 | Yohanis Tukang Baptis pung karja deng Yesus dapa baptis |
| 1:14—9:50 | Yesus pung karja di propinsi Galilea |
| 10:1—13:37 | Yesus pung karja di propinsi Yudea deng kota Yerusalem |
| 14:1—16:20 | Yesus dapa tangkap, dapa salib, hidop kombali, deng tarangka ka sorga |
Поточний вибір:
Markus Kata-Kata Partama: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku