Markus 15
15
Yesus di muka Pilatus
15:1-15
(Matius 27:1-2, 11-26; Lukas 23:1-5, 13-25; Yohanis 18:28—19:16)
1Pagi-pagi paskali, orang Yahudi pung imam-imam kapala, pamimping-pamimping, guru-guru Torat, deng Pamimping-pamimping Sidang yang laeng su ambe satu putusang. Tarus, dong ika Yesus la bawa Antua par Gubernur Pilatus. 2Pilatus tanya Antua kata, “Ale ni orang Yahudi pung raja ka?”
La Antua jawab, “Bapa sandiri su bilang akang.” 3Tarus, imam-imam kapala tudu banya hal par Antua. 4La Pilatus tanya Antua kombali kata, “E, Ale su dengar dong tudu Ale banya macang bagitu to? Masa Ale seng jawab dong?” 5Mar, Antua seng jawab apapa lai sampe Pilatus herang.
6Sabang kali orang Yahudi pung hari basar Paska, gubernur biasa kasi bebas satu orang dari bui iko orang banya pung mau. 7Waktu itu, ada satu orang yang nama Barabas yang dapa bui sama-sama deng dia pung tamang-tamang tagal malawang pemerinta Roma. Dong bunu orang waktu prang deng pemerinta Roma. 8La orang Yahudi banya datang minta Pilatus par biking apa yang dia biasa biking waktu hari basar Paska. 9La Pilatus bilang par dong kata, “Kamong mau beta kasi lapas orang Yahudi pung raja ni par kamong?” 10Pilatus su tau kalo imam-imam kapala bawa Yesus par dia tagal dong mangiri Antua.
11Mar, imam-imam kapala tusu mulu par orang banya tu par minta kasi bebas Barabas par dong, bukang Antua. 12La Pilatus bale tanya dong satu kali lai kata, “Kalo bagitu, beta musti biking apa orang yang kamong panggel par orang Yahudi pung raja ni?”
13La dong bataria kata, “Salib Dia!”
14La Pilatus tanya dong kata, “Barang Dia su biking kajahatang apa?” Mar, dong bataria labe tamba basar lai kata, “Salib Dia!”
15Tarus tagal Pilatus mau kasi sanang orang banya tu pung hati, dia kasi bebas Barabas par dong. La dia suru tantara-tantara cambok Yesus la kasi Antua par dapa salib.
Tantara-tantara Roma hina-hina Yesus
15:16-20
(Matius 27:27-31; Yohanis 19:2-3)
16Abis itu, tantara-tantara Roma bawa Yesus ka dong pung tampa yang ada di Pilatus pung kintal istana. Tarus dong panggel tantara-tantara samua yang ada di situ par bakumpul. 17Dong kasi pake Antua deng baju panjang luar warna biji gandaria macang deng apa yang raja biasa pake. Dong jua biking makota satu dari jaga pohong baduri, baru taru akang di Antua pung kapala. 18Tarus, dong hormat Antua la bilang kata, “Hormat, orang Yahudi pung raja!” 19Abis itu, dong pukul Antua pung kapala ulang-ulang deng buluh deng luda Antua. La dong jua tikang lutu somba Antua. 20Abis hina-hina Antua, dong kasi lapas baju panjang luar warna biji gandaria tadi dari Antua la kasi pake Antua deng Antua pung pakiang kombali. Abis itu, dong bawa Antua kaluar dari situ par pi salib Antua.
Yesus dapa salib
15:21-32
(Matius 27:32-44; Lukas 23:26-43; Yohanis 19:17-27)
21Waktu itu, ada laki-laki satu lewat. Dia nama Simon. Dia asal dari kota Kirene. Dia tu Aleksander deng Rufus pung bapa. Dia ada baru sampe dari luar kota la mau bajalang maso ka kota Yerusalem. Tantara-tantara paksa dia pikol Yesus pung kayo salib tu. 22Dong bawa Antua ka tampa satu yang nama Golgota, yang pung arti ‘Tampa Tangkorak’. 23Sampe di sana, dong kasi anggor yang su tacampor deng obat yang nama mur par Antua, par kasi ilang rasa saki. Mar Antua seng mau. 24Abis itu dong salib Antua. Tarus, dong buang undi par Antua pung pakiang-pakiang kata sapa dapa yang mana.#Lagu-Lagu 22:19
25Dong salib Antua tu jam sambilang pagi. 26Dong pasang papang sapanggal deng tulisang yang jadi alasang mangapa kong Antua dapa salib. Tulisang tu bilang: Orang Yahudi pung Raja.
27Ada dua orang jahat yang dapa salib sama-sama deng Antua lai, satu di Antua pung sabala kanang la satu lai di Antua pung sabala kiri. [28Samua tu jadi macang deng apa yang Allah pung Tulisang bilang kata, “Orang-orang nanti anggap Dia sama deng orang jahat.”#Yesaya 53:12]
29Orang-orang yang langgar di situ hojat Antua la goyang kapala la bilang kata, “Hui! Se ni yang bilang kata Se mau kasi rubu Tampa Sombayang Pusat la mau biking akang kombali dalang tiga hari sa to?#Lagu-Lagu 22:8, 109:25; Markus 14:58; Yohanis 2:19 30Coba turung dari salib tu la kasi salamat Se pung diri!”
31Imam-imam kapala deng guru Torat jua hina-hina Antua. Dong laeng bilang par laeng kata, “Dia bisa kasi salamat orang laeng, mar Dia sandiri seng bisa kasi salamat Dia pung diri. 32Kalo memang Dia tu Orang yang Allah su Angka par Kasi Salamat Manusia, orang Israel pung Raja, kasi tinggal Dia turung dari salib tu biar katong bisa lia la parcaya Dia!” Dua orang yang dapa salib sama-sama deng Antua jua hina-hina Antua macang bagitu lai.
Yesus mati
15:33-41
(Matius 27:45-56; Lukas 23:44-49; Yohanis 19:28-30)
33Pas jam sapulu dua siang, skrek bagini daera tu samua jadi galap sampe jam tiga sore. 34Pas jam tiga sore, Yesus bataria kuat-kuat kata, “Eloi, Eloi, lama sabaktani?” Akang pung arti, ‘Sio Beta pung Allah, Beta pung Allah e! Mangapa kong kasi tinggal Beta?’#Lagu-Lagu 22:2
35Waktu satu dua orang dari samua yang badiri di situ dengar apa yang Antua bilang tu, dong bilang kata, “He, dengar tu! Dia panggel Allah pung Juru Bicara Elia!” 36La satu orang paparipi colo spons dalang anggor asang la cucu akang di buluh sapanggal, la dia kasi akang di Antua pung bibir biar Antua bisa isap akang. La dia bilang kata, “He, mari katong tunggu la lia kata Elia datang kasi turung Dia ka seng.”#Lagu-Lagu 69:22
37Tarus, Yesus bataria kuat-kuat la Antua putus napas. 38Skrek bagini, kaeng pampele basar dalang orang Yahudi pung Tampa Sombayang Pusat tarobe jadi dua dari atas sampe bawa.#15:38 Kaeng pampele basar ni kasi pisa Ruang Paleng Kudus deng Ruang Kudus di Tenda Sombayang deng di Tampa Sombayang Pusat (Kaluar dari Mesir 26:31-33).
39Waktu itu, komandan kompi ada badiri baku tangada Antua. Pas dia lia Antua pung cara mati, dia bilang kata, “Memang batul, Dia ni Allah pung Ana!”
40Ada jua parampuang satu dua orang yang lia Antua mati dari jau. Dari dong tu ada Maria Makdalena,#15:40 Maria Makdalena tu pung arti, ‘Maria dari kota Makdala’. Salome, deng Maria. Maria ni Yakobis muda deng Yoses pung mama. 41Dong tiga tu su iko Antua deng jaga kasi siap apa yang Antua parlu waktu Antua masi ada di propinsi Galilea. Ada parampuang-parampuang laeng lai di situ yang datang ka kota Yerusalem sama-sama deng Antua.#Lukas 8:2-3
Yesus dapa kubur
15:42-47
(Matius 27:57-61; Lukas 23:50-56; Yohanis 19:38-42)
42Hari itu tu hari Jumat, hari yang orang Yahudi pake par kasi siap samua hal par tunggu dong pung hari Barenti Karja eso. Jadi pas sore-sore, 43Yusuf yang asal dari kota Arimatea biking barani diri datang par Pilatus par minta Yesus pung mayat. Yusuf tu satu dari orang Yahudi pung Pamimping-pamimping Sidang yang paleng dapa hormat. Dia jua ada tunggu-tunggu Allah datang pegang parenta jadi Raja. 44Pilatus herang waktu dia dengar kalo Yesus su mati capat bagitu paskali. Jadi, dia panggel komandan kompi la tanya kata, “Batul, Yesus su mati?” 45Pas abis dengar komandan kompi lapor kata Antua su mati, dia kasi ijin Yusuf ambe Antua pung mayat.
46Tagal itu, Yusuf bali kaeng lenan la pi kasi turung Antua pung mayat dari kayo salib la bungkus Antua deng kaeng tu. Abis itu, dia pi bakubur Antua dalang kubur yang dapa pahat di badang batu. Dia guling batu basar par tutu mulu kubur. 47Maria Makdalena deng Yoses pung mama Maria jua lia Yusuf dong taru Antua pung mayat di mana.
Поточний вибір:
Markus 15: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
