Markus 13
13
Tampa Sombayang Pusat nanti ancor
13:1-2
(Matius 24:1-2; Lukas 21:5-6)
1Waktu Yesus kasi tinggal orang Yahudi pung Tampa Sombayang Pusat tu, Antua pung murid satu bilang par Antua kata, “Tuang Guru e, coba lia tu! Katong pung Tampa Sombayang Pusat ni akang paleng bagus to? Batu-batu yang dong pake par biking akang tu paleng basar-basar!”
2Tarus, Antua bilang par dia kata, “Ale su lia bangunang-bangunang yang hebat-hebat ni? Satu waktu nanti, seng ada satu batu lai yang tinggal tasusung di atas batu yang laeng. Samua nanti rata deng tana.”
Hari-hari susa deng sangsara
13:3-13
(Matius 24:3-14; Lukas 21:7-19)
3Abis itu, Yesus deng Antua pung murid-murid pi ka gunung Saitun. Di sana, Antua dudu baku tangada deng orang Yahudi pung Tampa Sombayang Pusat. Tarus Petrus, Yakobis, Yohanis, deng Andarias pi tanya Antua waktu Antua ada sandiri kata, 4“Tuang Guru e, apa tempo samua yang Tuang Guru baru bilang tadi tu jadi? La kalo mau jadi, akang pung tanda apa?”
5La Antua jawab dong kata, “Kamong musti jaga diri bae-bae, jang sampe kamong dapa parlente. 6Barang nanti ada banya orang datang pake Beta pung nama la bilang, ‘Beta ni Orang yang Allah su Angka par Kasi Salamat Manusia!’ La dong nanti parlente banya orang. 7Kalo kamong dengar kata ada prang ka barita-barita soal prang, jang taku. Samua tu musti jadi do, mar dunya balong kiamat lai. 8Nanti bangsa satu baku prang deng bangsa laeng, la karajaang satu baku prang deng karajaang laeng. Nanti jua ada susa makanang deng ada tana goyang di banya tampa. Mar samua tu cuma tanda kalo susa deng sangsara baru mulai, macang deng parampuang yang mulai rasa saki waktu mau kasi lahir ana.
9Mar kamong musti jaga diri bae-bae. Kamong nanti dapa tangkap la dapa bawa ka muka orang Yahudi pung Pamimping-pamimping Sidang. Kamong nanti dapa cambok di orang Yahudi pung tampa-tampa sombayang. Kamong nanti dapa bawa ka muka pamimping-pamimping deng raja-raja tagal iko Beta. Mar, itu tu waktu yang bae par kamong par kasi tau Kabar Bae soal Beta par dong. 10Kabar Bae musti tasiar par bangsa-bangsa samua kamuka do baru dunya kiamat. 11Waktu kamong dapa tangkap la dapa bawa par dapa sidang, jang balisa soal apa yang kamong mau bilang. Jawab sa iko apa yang Allah bilang dalang kamong pung hati waktu itu, tagal kata-kata tu bukang dari kamong sandiri mar dari Allah pung Roh.#Matius 10:17-20; Lukas 12:11-12
12Nanti ada orang kasi dia pung sudara par dapa bunu. Bagitu jua bapa-bapa par dong pung ana. Anana jua nanti malawang dong pung orang tatua deng kasi dong par dapa bunu. 13Kamong nanti dapa binci dari samua orang tagal kamong iko Beta. Mar, sapa yang sampe mati batahang tarus par parcaya Beta, dia nanti salamat.”#Matius 10:22
Orang Yahudi nanti paleng sangsara
13:14-23
(Matius 24:15-28; Lukas 21:20-24)
14Yesus bale bilang par Antua pung murid-murid kata, “Kamong nanti lia apapa satu yang paleng seng bae paskali#Danyel 9:27, 11:31, 12:11 badiri di Tampa Sombayang Pusat, tampa yang dia seng bole ada di situ. La dia nanti biking apa yang Tuhan binci di situ. (Sapa yang baca tulisang ni, dia musti taru kira hal ini bae-bae.)#13:14 Kalimat dalang kurung ni dari Markus, bukang dari Yesus. Kalo sampe itu su jadi, orang-orang di propinsi Yudea musti lari ka gunung-gunung. 15Waktu itu, sapa yang ada di teras ruma,#13:15 Teras ruma: Teks bahasa Yunani bilang “di atas ruma”. Dolo, orang Yahudi pung atap ruma tu, akang rata. Ada tangga yang dong su biking di pinggir ruma par nai ka atas. Dong biasa ambe sanang deng jumur apapa di situ. jang turung la maso ambe apapa lai, mar langsung lari sa. 16La sapa yang ada di kabong jang pulang ambe pakiang lai.#Lukas 17:31 17Sio kasiang! Waktu itu jadi, parampuang-parampuang yang ada deng badang deng mama-mama yang masi kasi susu ana nanti paleng sangsara paskali. 18Kamong musti sombayang biar akang seng jadi waktu musing ujang. 19Tagal waktu itu, nanti ada susa deng sangsara yang paleng hebat paskali. Dari waktu Allah biking dunya ni sampe hari itu jadi, balong parna ada susa deng sangsara macang bagitu deng nanti seng parna ada susa deng sangsara macang bagitu lai.#Danyel 12:1; Yohanis Dapa Tanda 7:14 20Kalo Tuhan seng kasi pende akang pung waktu, seng satu orang lai yang masi hidop. Mar, tagal Antua sayang orang-orang yang Antua su pili, Antua kasi pende akang pung waktu.
21Waktu itu, kalo ada orang bilang par kamong kata, ‘E, Orang yang Allah su Angka par Kasi Salamat Manusia ada di sini!’ ka, ‘E, Orang yang Allah su Angka par Kasi Salamat Manusia ada di sana!’, jang parcaya! 22Tagal nanti ada orang-orang yang mangaku-mangaku kata dong tu Orang yang Allah su Angka par Kasi Salamat Manusia ka dong tu Allah pung juru bicara. Dong nanti biking tanda-tanda herang biar kalo bisa, orang-orang yang Allah pili jua dapa parlente. 23Jadi, kamong musti jaga diri bae-bae! Beta su kasi tau samua ni kamuka sakali par kamong.”
Tanda-tanda kalo Yesus su mau bale ka dunya
13:24-32
(Matius 24:29-36; Lukas 21:25-33)
24Tarus Yesus bale bilang lai, “Abis susa deng sangsara tu, matahari nanti jadi galap deng bulang seng kasi kaluar sinar lai.#Yesaya 13:10; Yeheskel 32:7; Yoel 2:10, 31, 3:15; Yohanis Dapa Tanda 6:12 25Bintang-bintang nanti jatu dari langit la kuasa-kuasa di langit#13:25 Waktu itu, orang-orang Yahudi pikir kalo kuasa-kuasa di langit tu pung arti apa sa yang kasi kaluar sinar di langit ka roh-roh jahat. nanti talamburang.#Yesaya 34:4; Yoel 2:10; Yohanis Dapa Tanda 6:13 26Waktu itu, orang nanti lia Beta Ana Manusia ni datang dalang awang-awang.#Danyel 7:13; Yohanis Dapa Tanda 1:7 Beta datang deng Beta pung kuasa yang hebat dalang sinar yang manyala tarang. 27Tarus waktu itu jua, Beta nanti suru Beta pung malekat-malekat par kumpul orang-orang yang Beta su pili dari antero dunya, dari timur sampe barat, utara sampe salatang.
28Coba balajar dari pohong ara. Waktu akang pung jaga-jaga su mulai batunas, kamong tau kalo musing panas su dekat. 29Bagitu lai kalo kamong lia tanda-tanda yang Beta bilang tadi tu jadi, kamong tau kalo akang pung waktu su dekat. 30Dengar bae-bae tagal apa yang Beta bilang ni batul! Dari samua orang yang hidop jamang sakarang ni, ada yang balong mati waktu samua tu jadi. 31Langit deng dunya nanti ancor, mar Beta pung kata-kata tetap ada tarus-tarus!
32Mar soal apa tempo Beta bale kombali ka dunya ni, seng satu orang lai yang tau akang. Malekat-malekat di sorga seng tau, Beta Allah pung Ana ni jua seng tau, cuma Bapa sa yang tau.”#Matius 24:36
Murid-murid musti salalu siap
13:33-37
(Matius 24:36-44)
33Yesus bilang par Antua pung murid-murid lai kata, “Kamong musti jaga diri bae-bae deng musti salalu siap tagal kamong seng tau apa tempo Beta bale kombali. 34Akang macang deng satu orang yang ada pi ka negri satu. Waktu dia pi, dia bage tugas par dia pung jongos, satu-satu deng dong pung tugas. Dia jua parenta orang yang jaga pintu par salalu siap sampe dia pulang.#Matius 25:14; Lukas 12:36-38 35Jadi kamong musti siap tarus, tagal kamong seng tau apa tempo tuang ruma tu bale. Mangkali dia bale amper malang ka, tenga malang ka, ka amper siang. 36Jang sampe skrek kamari dia datang, dia dapa kamong ada tidor. 37Apa yang Beta bilang par kamong ni, Beta jua bilang akang par samua orang kalo ‘Kamong musti salalu siap!’ ”
Поточний вибір:
Markus 13: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
