Matius 22
22
Yesus kasi ande-ande soal pesta kaweng
22:1-14
(Lukas 14:15-24)
1Tarus, Yesus bilang ande-ande satu par dong lai kata, 2“Waktu Allah pegang parenta jadi Raja, akang macang carita satu ni. Satu kali bagini, ada raja satu yang biking pesta kaweng par dia pung ana laki-laki. 3Jadi, dia suru dia pung jongos-jongos panggel orang-orang yang su dapa undang ka pesta tu, mar orang-orang tu seng mau datang.
4Dia bale suru jongos-jongos laeng deng pasáng, ‘Pi bilang par orang-orang yang su dapa undang tu: Makanang su siap. Beta pung sapi laki-laki deng sapi muda yang gamu su dapa bunu deng samua su siap di meja. Jadi mari datang ka pesta kaweng ni jua!’
5Mar orang-orang yang dapa undang tu seng pusing deng dia pung pasáng tu. Ada yang pi ka dong pung kabong, ada jua yang pi urus dong pung usaha. 6Mar yang laeng tangkap dia pung jongos-jongos tu la siksa deng bunu dong. 7Jadi raja tu morka paskali. Dia suru dia pung tantara pi bunu orang-orang yang bunu dia pung jongos-jongos tu deng bakar dong pung kota.
8Abis itu, dia bilang par dia pung jongos-jongos kata, ‘Pesta kaweng ni su siap, mar orang-orang yang su dapa undang tu seng pantas par datang di pesta ni. 9Tagal itu, pi ka jalang-jalang basar la undang sapa sa yang kamong dapa par datang ka pesta ni.’ 10Jadi dia pung jongos-jongos tu pi ka jalang-jalang la kumpul samua orang yang dong dapa, yang bae deng yang jahat. Akang pung laste, tampa pesta tu pono.
11Waktu raja tu maso baku dapa deng tamu-tamu, dia lia ada satu orang yang seng pake baju pesta. 12La raja tu bilang par dia, ‘Sudara e, masa ale maso kamari mar seng pake baju pesta tu bagemana?’ Mar dia tado sa. 13Tarus, raja tu bilang par dia pung jongos-jongos kata, ‘Ika dia pung kaki tangang la buang dia kaluar, ka tampa yang paleng galap. Di sana, dia nanti sangsara paskali deng marata.’ ”#Matius 8:12, 25:30; Lukas 13:28
14Tarus, Yesus bilang, “Banya orang yang Allah panggel par jadi Antua pung orang, mar sadiki sa yang Antua pili.”
Yesus kasi balajar orang banya soal pajak
22:15-22
(Markus 12:13-17; Lukas 20:20-26)
15Abis itu, orang-orang Farisi pi dari situ la biking rencana par ika Yesus deng Antua pung kata-kata sandiri. 16Dong suru dong pung murid-murid sama-sama deng orang-orang yang iko Herodes par pi tanya Antua kata, “Tuang Guru e, katong tau Tuang Guru ni jujur. Tuang Guru jua kasi tau Allah pung mau deng batul deng seng ambe pusing deng apa yang orang bilang soal Tuang Guru, tagal Tuang Guru seng lia-lia muka. 17Jadi tolong bilang par katong, kalo iko katong pung atorang agama, katong bisa bayar pajak par Raja Basar Roma ka seng?”
18Mar, Yesus tau dong pung maksud jahat tu la bilang par dong kata, “He orang-orang munafik e! Mangapa kong kamong coba Beta? 19Coba kasi unju kepeng gobang perak par bayar pajak tu kamari!” La dong bawa satu dinar par Antua. 20Antua tanya par dong kata, “Sapa pung gambar deng nama di kepeng ni?”
21Dong jawab Antua kata, “Raja Basar Roma pung gambar deng nama.”
La Antua bilang par dong kata, “Kalo bagitu, apa yang jadi Raja Basar Roma pung hak, kasi akang par dia. La apa yang jadi Allah pung hak, kasi akang par Antua.”
22Waktu dong dengar bagitu, dong taherang-herang la pi kasi tinggal Antua.
Yesus kasi balajar kalo orang mati nanti hidop kombali
22:23-33
(Markus 12:18-27; Lukas 20:27-40)
23Hari itu jua, babarapa orang dari kalompok Saduki datang par Yesus. Kalompok Saduki seng parcaya kalo orang mati nanti hidop kombali. Dong tanya Antua kata,#Utusang pung Carita 23:8 24“Tuang Guru e, Allah pung Juru Bicara Musa su bilang par katong: Kalo ada laki-laki satu kaweng la mati mar seng ada pung ana, dia pung sudara laki-laki musti kaweng deng dia yang su mati tu pung bini, biar dia pung sudara tu pung ana bisa jadi dia yang su mati tu pung ana.#Carita Ulang 25:5 25Satu kali bagini, ada laki-laki tuju ade-kaka di katong pung tampa. Dari dong tuju tu, yang nomor satu kaweng, mar dia mati. Tagal dia seng ada pung ana, jadi dia pung bini musti kaweng deng dia pung ade. 26Tarus, yang nomor dua kaweng deng dia pung konyadu tu. Mar dia jua mati deng seng ada pung ana lai. Akang jadi bagitu tarus dari yang nomor tiga sampe yang bongso. 27Akang pung laste, janda tu mati lai. 28Jadi waktu Allah kasi hidop samua orang yang su mati kombali, kira-kira dari dong tuju tu, sapa yang jadi parampuang tu pung laki? Barang dong samua su kaweng deng dia.”
29Tarus, Yesus bilang par dong kata, “Kamong su ilang jalang tagal kamong seng mangarti Allah pung Tulisang deng seng mangarti Antua pung kuasa. 30Barang, waktu Allah su kasi hidop orang-orang mati kombali, dong seng kaweng lai, mar hidop macang deng malekat di sorga yang jua seng kaweng. 31La soal orang-orang mati nanti hidop kombali, kamong pasti su parna baca Allah pung Tulisang yang bilang kata, 32‘Beta ni Allah yang Abraham, Isak, deng Yakub ada somba.’ Memang dong su mati, mar dong pung roh tetap hidop deng ada somba Allah. Jadi, Antua bukang Allah dari orang mati, mar orang hidop.”#Kaluar dari Mesir 3:6
33Orang banya yang dengar Antua pung ajarang tu taherang-herang.
Yesus kasi balajar orang soal parenta yang paleng panting
22:34-40
(Markus 12:28-34; Lukas 10:25-28)
34Waktu orang-orang Farisi dengar kalo Yesus tutu orang-orang Saduki pung mulu, dong bakumpul 35la satu dari dong coba Antua. Dia tu guru Torat. Dia tanya Antua kata, 36“Tuang Guru e! Dari Allah pung parenta samua dalang Kitab Torat, parenta mana yang paleng panting?”
37La Yesus jawab dia kata, “ ‘Sayang Tuhan Allah yang kamong somba tu deng kamong pung hati antero-antero, deng kamong pung jiwa antero-antero, deng kamong pung pikirang antero-antero.’#Carita Ulang 6:5 38Itu tu parenta yang paleng panting deng yang partama. 39La parenta kadua yang sama panting deng yang partama tu, ‘Sayang orang laeng macang deng kamong sayang kamong pung diri sandiri.’#Imam-Imam pung Atorang 19:18 40Dua parenta tu jadi dasar par samua parenta dalang Kitab Torat deng Allah pung juru-juru bicara pung tulisang.”
Yesus tu Raja Daud pung Tuhan deng turunang
22:41-46
(Markus 12:35-37; Lukas 20:41-44)
41Waktu orang-orang Farisi masi bakumpul di situ, Yesus tanya dong kata, 42“Kalo iko kamong, Orang yang Allah su Angka par Kasi Salamat Manusia tu sapa? Antua tu sapa pung turunang?”
La dong jawab Antua kata, “Antua tu Raja Daud pung Turunang.”
43Tarus Antua bilang par dong kata, “Kalo bagitu, mangapa kong Daud panggel Antua par dia pung Tuhan waktu dia dapa pimping dari Antua pung Roh? Daud bilang kata,
44‘Tuhan Allah su bilang par beta pung Tuhan kata:
Mari dudu di Beta pung sabala kanang, tampa paleng panting, sampe Beta kasi kala Ale pung musu-musu la biking dong tundu par Ale.’#Lagu-Lagu 110:1
45Jadi, kalo Daud sandiri panggel Orang yang Allah su Angka par Kasi Salamat Manusia tu par ‘beta pung Tuhan’, Antua mau jadi Raja Daud pung turunang tu bagemana lai?”
46Seng satu orang lai yang bisa jawab Antua. La mulai dari hari itu, seng ada satu orang lai yang barani tanya apapa dari Antua.
Поточний вибір:
Matius 22: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
