luka 18

asa 18

gaḏi ŋun ŋate gɩḏuḏɩnu ga no

1nuluməḏɩjo ŋuɽuna ŋete ŋun ŋɩlɩbo arram aṯɩluməḏɩjo eloŋu bubruṯ na lo laṯɩnirtonyɩḏe. 2nuleicɩno, gaḏi gijo gete kamɩrɩgen ŋate gaṯɩḏonye eloŋu no, na ŋate ganino gwiji no. 3na kamɩrɩgen yeno gwa gwijo gwun gwiro gwinino naṯuwila lugwun nueicɩno, akɩmiji gwun gwɩkiḏiḏianagwe. 4nujiga gɩttən nate nuwɩrlijo ŋuɽuna no, na gɩdo nuar kwulo gwuŋun no, nyi gwiro gwun gwate gwaṯidonye eloŋu no ninɩnəḏo gwiji no, 5namɩni kalo geḏi gwinino kweno gwate gwouwɩriciŋi no, nyilərrɩjo ŋun ŋɩbunyulo, kani nuate aṯuwila bubruṯ galo no. 6na gwele gwun gwiro elo arno, ḏiŋɩnɩllo ŋun ŋal gaḏi umə ŋun ŋate gɩḏuḏɩnu ga no. 7late lal elo akɩmi lun lɩkiḏiḏɩl liji le luŋun lun lɩməṯɩnu lun gwaṯɩlərɩjo gwula anyine na gilio na gwate laṯɩlŋelejo uwə cou na? 8nyi gweiceijɩno, ŋu lulakɩmi cou. namɩni ḏa ŋaɽe ŋeḏi liji ŋɩmaɽuwa ŋabuje ḏɩməṯo ga kɩḏɩlio a?

gwubarɩsi na gwiji gwun gwaṯɩmeje ṯulba

9nuluməḏɩjo ŋuɽuna ŋeno ŋun ŋɩlɩbo lun laṯar gi lulo lagin no liŋir, naṯilɩnmɩni ŋələḏəṯɩni ganu lun liro kaja. 10ləmɩnyo lɩttən labuḏi kwu dunu gweḏi elo gwun gwubuḏo gi ḏuməḏɩjo eloŋu, gwete gwiro gwubərɩsi na gwiro kaja gwun gwaṯɩmeje ṯulba. 11na gwubarɩsi ḏuḏɩni ga gi ḏuməḏɩjo eloŋu kwulo gwuŋun nuar dino, elo, nyi gweicaŋa sukran, nyi gwate gwiro gi liji lun liro kaja no, lun laṯapa liji ŋɩdio gəbu, na lun late lɩḏuḏɩnu ga no, i leḏor i gi kweno gwun gwaṯɩmeje ṯulba. 12nyi gwaṯɩməṯo əbuṯo ŋwamon ganu ŋwɩttən ŋwamon ŋwun ŋwiro kwoɽoṯəɽɩl, naṯɩlḏəḏə eloŋu wei ŋun ŋiro lɽa gi loro lun liro di ŋun ŋəṯilo. 13namɩni gwun gwaṯɩmeje ṯulba nuḏuḏɩni uro kaja, gwate gwəmɩnyu gwabuje jei juŋun elo kanyin no, naṯumɩni pini gi jabba ganu, nuarno, elo, inəḏi nyi gwun gwɩki. 14nyi gweiceijɩno, kweno gi gwune gwulune dunu lugwun gwiŋirano gi jei ganu jeḏi elo kworo gwun gwuwiḏɩlgwe; gi gwune wei gwun gwaṯɩbuḏi gwula gwuŋun gwadujini gwɩti, namɩni gwun ŋwaṯɩtiene gwula gwuŋun gwabuḏane elo.

yecu gwugelo di gi nyaɽe elo nyun nyitinyiti

mṯ. 19:13-15, mks. 10:13-16

15nalapijo nyaɽe nyun nyoga dino, nalarno nyulḏɩmumi nanu; na gwune na calɩmis aŋu nalillo, 16nalmɩni yecu əmɩḏe nuleicɩno, ouwɩricil nyaɽe alwila lugwi, nyo nyanyalakajo, gi gwune lun liro gi luŋa ŋele ŋeḏi elo ŋagin ŋiro. 17gwerkwe ganu nyi gweiceijɩno, gwun gwate gwaməṯo ŋelɩnya ŋeḏi elo gi ŋaɽe ŋun ŋoga no gwate gwəḏi ḏuṯ no.

ḏɩmiḏa gi gɩḏilio na ḏobɩlkəḏɩno ḏe ḏɩbona

mṯ. 19:16-30, mks. 10:17-31

18na gwele gwete uməḏɩjo galo nueicɩno, mualɩm gwun gwiŋir, nyi gwarre galakwe nyiməṯo ḏɩmiḏa gi gɩḏilio? 19na yecu eicɩno, gwudaro gəko nieico nyi gwiŋir? gwatɩn gwetɩdo gwun gwiŋir no, namɩni elo gwiro gwetɩdo. 20ŋa gwilɩŋiḏi ŋuɽuna ŋun ŋigelijɩlo elo musaŋ ŋarno: aṯaura no, naṯaɽinyɩḏa no, naṯapa ŋuɽama no, naṯougɩḏio no, na aṯəniji babaŋ gwuŋa na nanaŋ gwuŋa. 21nuarno, ŋeno wei ŋidɩmiḏɩlo mɩmmi nyi gwoga. 22na gwune na yecu diŋɩni ŋuɽuna ŋeno nueicɩno, ŋɩbɩɽəṯɩjoŋa ŋetɩḏo; iḏɩlo wei ŋun ŋəṯəlo ŋaliwɩrəḏijelo lun late ləṯi ŋɩdio no, na ŋa gwəṯi ḏɩbona kanyin; ki ŋəḏila ŋigwujane. 23namɩni ŋu, gwune nudiŋɩni ŋuɽuna ŋeno nurone gworki, gi gwune gwəṯi ŋɩdio ŋutu gworki. 24gwune na yecu aŋu ŋumarone gworki nueicɩno, ŋɩbɩɽe lagin lun ləṯi ŋɩdio ŋutu gi ḏədio ŋele ŋeḏi elo. 25ŋouwɩrəne ganu kamɩla gəḏi gi lubɩɽo leḏi ibra aŋan gwuji əḏi ŋele ŋeḏi elo gwun gwəṯi ŋɩdio ŋutu. 26na lar lun lidiŋɩnu no, na əḏi gwiro gwəṯi ŋɩma gwəkədəḏɩni ga? 27nuarno, ŋun ŋate ŋandro gi liji no ŋandro ḏi elo. 28na buṯrus eicɩno, eʼe, anmawalane ŋɩdi wei naŋalgwujane. 29nuleicɩno, gwerkwe ganu nyi gweiceijɩno, gwiji gwate gwun manwalane kwu dunu, i gwa, i lɩmegin, i nanaŋa baba gwe, i nyaɽe gwan ŋele ŋeḏi elo no, 30ŋun ŋate ŋulape kaja keno no ŋwamon ganu ŋwutəno, na jɩḏilio jun jila ḏɩmiḏa gi gɩḏilio.

yecu gwuwəɽeico ŋuɽuna ga mɩna ŋan ḏaiya ḏuŋun

mṯ. 20:17-19, mks. 10:32-34

31nuape calɩmis jun jiro di na gwuttən nuleicɩno, eʼe, ilo labuḏi urucəlim, na ŋɩdi wei ŋun ŋulinu ḏi nebɩŋa ŋan ŋaɽe ŋeḏi liji ŋaṯɩmini. 32gi gwune ŋəḏəḏini liji lun liro ga dino, naŋalaki jumo, naŋalḏene naŋalgwoginya nanu; 33naŋalpi naŋalɽinye na gi lamon lun ləduji loro ṯəɽɩl ŋədiɽi. 34namɩni luŋa nate nalɩlɩŋe ŋuɽuna ŋetɩdo ŋeno no, na ŋeno ŋɩlɩbo lagin; nate nallɩŋe ŋun ŋuməḏɩnu no.

yecu mauɽi gwiji jei ganu

mṯ. 20:29-34, mks. 10:46-52

35na gwune nuwele gɩṯo uriya gwiji gwete gwun gwɩrimə gi jei gwijiga ṯaṯ kɩḏɩriḏ naṯugegilejo liji di. 36na gwune nudiŋɩni liji lun lutu laṯɩdadɩre nulɽoṯəḏɩjo ŋuɽun ŋɩrṯa ŋeno. 37naluməḏɩjo yecu gweḏi nasɩra gwiro gwar gwadare. 38nuərəjo gwula nueicɩno, yecu gwun gwiro ŋaɽe ŋeḏi ḏauud, inəḏi. 39nallo lun lɩdaro gwaje nyɩkwom, namɩni ŋu nuərine gwula gworki, ŋaɽe ŋeḏi ḏauuḏ, inəḏi. 40na yecu ḏuḏɩni nugele ŋuɽuna gwalapaḏa lugwun, na gwune nudɩrkaḏa nuɽoṯəḏɩjo 41nueicɩno, ŋa gwarno nyi gwaŋərrɩjo au? nueicɩno, gwele gwi, nyi gwar gwauɽe jei ganu. 42na yecu eicɩno, dəŋəḏi ga. ḏɩməṯo ḏuŋa ḏɩmaŋaŋele muma. 43na cou nuuɽe jei ganu nugwujane, nubuḏi eloŋu. na liji wei gwune nalaŋu dino nalorṯeḏa eloŋu.

Поточний вибір:

luka 18: OTR1966

Позначайте

Поділитись

Копіювати