Kejadian Uram 12
12
Er Iya Erebdobnyi biryi Abram bisi nabmou deyok
12:1-9
1Er Iya Erebdobnyi biryi Abram bisi ato ebmou, “Kan mutuk ab, kan ai ninyi ab, kan nai ab takloboka, Ni nukwankin mutuk asi birum.#Kis. 7:2-3; Ibr. 11:8 2Ura, Niryi kansi mabwe odei-odei yaldakde ban dinyi ilinto karebkwankin. Ba, kan deibdoba aryi yaldakoka ninyi ilinto kubkwaming. Ani, kansi kisal dangna dinyi karebkinyi ba, kan si bikoka erebdeibkwanking. Ba, kan deici aryi yuk-yuk mutuk nang kisal dangna dinyi dobdobkwaming. 3Ani, yuk nang aryi kansi kisal dangnangkingnyi nang asi, Niryi sunsi kisal dakwan. Ba, sunci, kansi sumdankingnyi nang ara sunbabyi subkwan. Ani, kan deyok aryi tukwetam kunung ninyi yala nirya asi kisal dakeibnin yibinkwan,” ebmou.
4-5Ura, Abram bira er mutuk Haran dam takloboka, Er Iya Erebdobnyi biryi arukmou to kunuboka Kanaan dam binmou. A talak ara er kam kuramwe talak kwalina yubwa 75 baryi kibmou. Abram ab, er ner Sarai ab, Abram er weit Haran mi Lot ab tonkwa anaboka binmai. Ani, sun bisam yabwe ab, sun bona nirya ab, sun wa irmilin nang ab mutuk Haran dam yandoka kurandei uca, sun dinyi kiande dinyi nirya ababyi bobinmarei. 6Kanaan dam sirya binmarei ura, Abram mutuk ingkirikde yibanmou ani, Sikhem atei dam mutuk si More dam asi co si tarbantin tikamwa dam binmou. A talak ara Kanaan mutuk yoka nang ara a tuba kuramnyi.
7Ura, Er Iya Erebdobnyi biryi kunumna deici aryi Abram dam lak kibdanmouci, ato ebmou, “A mutuk ara kan yaldangna ati aminda karebkwan mutuk ara atiba,” ebmou. Ba, Er Iya Erebdobnyi biryi Abram bisi lak kibmou dikum asi Abram biryi, “Luba kibnyei,” tenen, Er Iya Erebdobnyi, a lak kibdanmounyi biti dama deirin keil dungna labmou. 8Ura, Abram a dikum aryi anabmouci, Betel mutuk kon dam asi yaletam kuboka binmou. Ura, Betel ara kitingbantam kibdonokmou. Ba, mutuk si Ai ara yaletam kibdonokmou. Ura, noutumang mutuk asi bindoka ai doboka kuramwe. A kuramiryi Er Iya Erebdobnyi biti er dama deiboka molon keil dungna laboka si weik ebmou. 9Ura, a bindoka ai dobde kunmou ani, tubto yuk dikum bindoka kunman ani, kibde baramwe. Ani, Kanaan mutuk me youkwetam kuboka asi bindoka yini mutuk si Negeb dam kuramwe.
Abram Mesir binmou deyok
12:10-20
10Ura, Abram Kanaan dam a bindoka kunmou mutuk ara kwaning utan li dobmou. Ura, Abram a mutuk takloboka, me youkwetam kuboka Mesir mutuk tingdorbinmou. 11-12Abram banmou ani, Mesir mutuk wiliba bau ura, er ner Sarai bisi ato ebmou, “A ner, kanda urasin telebto ner ati, Mesir mutuk nang aryi asing eibkingnyi ura, ‘Anyi bisi obibiyi ura, a ner ara nun dobdobkwayeb,’ eboka nisi obkaboka dobdobkwamakingca. 13Ati, sangkuna asibkingnyi ura, ‘Ni malnyi bica,’ ebokwandum. Ba, sunci kansi sun kanya kilkil kubci ura, nisi teleb-teleb kibkwanununga,” ebmou. 14Ura, Abram Mesir mutuk sirya wengbinmou ura, minob ebmou to kunuboka Mesir nang aryi er ner Sarai urasin telebto ner deyok aryi sun kanya teleb kubmou. 15Ura, Mesir mutuk sienyi Firaun wa irmilin nang aryi Sarai urasin iya telebto ner asing eibmai. Ura, a nang aryi Sara urasin teleb ati, sienyi dam bindoka nukmai ba, Firaun er kanya takeibmai. Ba, a ner ara a mutuk sienyi Firaun dam bobinmai. 16Ba, Sarai er urasin teleb deyok aryi Firaun biryi Abram biti wa irmilinkwamnyi nang toto, bisam domba toto, kambing toto, sapi toto, keledai toto, bisam unta toto teleb-teleb kiboka karebmou. 17Ura, a sienyi biryi Abram ner Sarai dobdobmou. A deyok aryi Er Iya Erebdobnyi biryi Firaun kuramwe atei dam ninyi nirya asi ninyi din youn karebmou. 18Ura, a sienyi biryi Abram bisi nabmou ura, ato ebmou, “Minob uca, ‘Ara, ni ner aca,’ ena kum kubmoumwe ba, ni dobse aryi mambul dinyi ilinto kusurur. Ati, kanci unato ati kubsumwe do? 19Kanda unati, ‘Ni malner aca,’ ebmoumwe ba, ni donmase do? Ukura kan ner kanbiramnyi dobde birum!” ebmou. 20Ura, Firaun, Mesir mutuk sienyi biryi ninyi arukmou ba, Abram ab, er ner ab, er bisam yabwe ab, er bona ab boboka binmai.
Поточний вибір:
Kejadian Uram 12: MTG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
@LAI 2007 (New Testament), @LAI2022 (Old and New Testament)