मती 1
1
येसु खिरिस्टके पुरखासब
(लुका ३:२३-३८)
1अबराहम आ दाउदके सन्तान येसु खिरिस्टके बंसाबली ऐनङके छै। 2अबराहमके बेटा इसहाक रहै, इसहाकके बेटा याकुब, याकुबके बेटा यहुदा आ ओकर भाइ-भैयारीसब रहै। 3यहुदाके बेटा फारेस आ जेरह रहै। ओकरासबके माँ के नाम तामार रहै। फारेसके बेटा हेसरोन, हेसरोनके बेटा आराम, 4आरामके बेटा अमिनादाब, अमिनादाबके बेटा नहसोन, नहसोनके बेटा सल्मोन, 5सल्मोनके बेटा बोअज आ ओकर माँ के नाम राहाब रहै। बोअजके बेटा ओबेद आ ओकर माँ के नाम रुथ रहै। 6यिसैके बेटा रजा दाउद रहै।
दाउदके बेटा सोलोमन रहै आ ओकर माँ उरियाहके घरबाली रहै। 7सोलोमनके बेटा रहबाम, रहबामके बेटा अबिया, अबियाके बेटा आसा, 8आसाके बेटा यहोसापात, यहोसापातके बेटा यहोराम, यहोरामके बेटा उज्जियाह, 9उज्जियाहके बेटा योताम, योतामके बेटा आहाज, आहाजके बेटा हिजकिया, 10हिजकियाके बेटा मनस्से, मनस्सेके बेटा आमोन आ आमोनके बेटा योसियाह रहै। 11बेबिलोन देससे बन्दी बन्याके लजाइ बखत योसियाहके बेटा यकोनियास आ ओकर भाइसब जलमल रहै।
12बेबिलोनमे ल्यागेलाके बाद यकोनियासके बेटा सालतिएल जलमलै आ सालतिएलके बेटा यरुबाबेल, 13यरुबाबेलके बेटा अबिउद, अबिउदके बेटा एल्याकिम, एल्याकिमके बेटा आजोर, 14आजोरके बेटा सादोक, सादोकके बेटा आखिम, आखिमके बेटा एलिउद, 15एलिउदके बेटा एलाजार, एलाजारके बेटा मतान, मतानके बेटा याकुब, 16आ याकुबके बेटा योसेफ जे मरियमके घरबला रहै, ओही मरियमसे खिरिस्ट कहाइबला येसुके जलम भेलै।
17अहिनङ अबराहमसे ल्याके दाउद तक चौद पुस्ता छेलै। तब दाउदसे ल्याके इजराएलीसबके बन्दी बनाबै तक बेबिलोनोमे लजाइ बखत चौदहे पुस्ता हैछै। तब बेबिलोनसे बन्दी बन्याल समयसे ल्याके येसु खिरिस्ट तक फेनो चौदहे पुस्ता पुगैछै।
येसु खिरिस्टके जलम
(लुका २:१-७)
18येसु खिरिस्टके जलम एहेन परकारसे भेलै- ओकर माँ के मङनी योसेफसङे भेल छेलै, महज ओइसबके बियाह हैसे पैहनैये पबितर आत्माके सक्तिसे मरियमके देहभारी भेलै।#लुका १:२७ 19महज ओकर घरबला योसेफ धारमिक लोक भेलाके कारन मरियमके समाजके अगा कोनो बदनामी नै हेबे कैहके ओकरा चुपे-चाप छोरैके बिचार करल्कै। 20महज जब योसेफ एह्या बातके बिचार करतै रहै, तब सपनामे परमपरभुके स्वरगदुत एलै आ ओकरा अनङ कहल्कै, “हौ दाउदके खानदानके योसेफ, तु मरियमके आपन घरबालीके रुपमे अपनाबैले नै डरा, कथिलेत जे ओकर पेटमे छौ, उ पबितर आत्मासे चियौ। 21उ एकटा बेटा जलमाइतौ आ तु ओकर नाम येसु राखिहे, कथिलेत उ आपन लोकसबके ओकरासबके पापसे बचाइतौ।”#लुका १:३१
22अगमबक्तासे परमेस्वरके कहल बचन पुरा हैकेलेल यीसब भेल छै- 23“देख, कुमाइर छौरीके देहभारी हेतौ आ उ एकटा बेटा जलमाइतौ आ ओकर नाम इम्मानुएल राखल जेतै” जकर अरथ हैछै, “परमेस्वर हमरासबसङे छै।”#यसैया ७:१४
24ततबेहेकमे योसेफके निन टुइटगेलै आ परमपरभुके दुत ओकरा कहल बमौजी योसेफ मरियमके आपन घरबालीके रुपमे अपनाइल्कै। 25मरियमके बेटा नै जल्मै तक योसेफ ओकरसङे नै सुतलै। जब बालकके जलम भेलै तब योसेफ ओकर नाम येसु राखल्कै।#लुका २:२१
Поточний вибір:
मती 1: MTH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
