मत्ती 11
11
येशू र बप्तिस्मा याछ युहन्ना
(लुका ७:१८-३५)
1लहो बार्ह जना चेलाकोलाक इसे कुराको डेम भ्यामखीङ येशू होटै गालीलुङ सहर पट्टी शिक्षा याखी र सेछ समाचार प्रचार जाट्की डेम नुङा।
2बप्तिस्मा याछ युहन्ना झ्यालखानाङ लेनाङ मुक्ति याछ ख्रीष्टै जाट्च कामकुङ बारेयाङ आसकै सेया। अनी लहो कोइ-कोइ चेलाकोलाक होसको लेठाङ इसे कुरा गीन्की बीर्न्हका। 3नुङार होखुरीकै येशूकी गीना, “ही राछवाला मुक्ति याछ ख्रीष्ट नाको न हो की कानै अरुकी न लाम ङोसीङ?” 4येशूये होखुरीककी डेया, “नाखुरीकै ही सेमने र डाङ्ङने, नुङार होसे न कुरा युहन्नाकी डेम यान्ही: 5मीमीक माडाङ्चकै डाङ्ङन ले, लङ्गडाको व्हामन ले, कुष्ठरोगीको गेप्मन ले, मेनेकेप मासेचकै सेमन ले, सीचको फेरी जीवाम सोमन ले र गरीबकै सेछ समाचार सेकी डुप्मन ले। 6ङौ बारेयाङ सङ्का माजाट्च भर्मी साँच्ची न आसीस डुप्च हो।”
7युहन्नौ चेलाको नुङ्रखीङ येशूये भर्मीयो भीडकी युहन्नौ बारेयाङ डेया, “नाखुरीक उजाड ठावाङ ही ङोस्की नुङ्ङन्या? ही नाम्सुये होयोक्ङ डाच आर्क्यामकी? 8नभा ही ङोस्की नुङा ट? ही सेछ-सेछ बढीन बील्छ भर्मीकोलाक? सेछ-सेछ बढीन बील्छ भर्मीको च राजौ डरबाराङ टी ङुले। 9होटडेनाङ नाखुरीक ही ङोस्की नुङा ट? ही अगमवक्ताकी? हो, साँच्ची न ङा नाखुरीककी डेले, युहन्ना काट अगमवक्ता डेनाङ बाड्को ले। 10इसे आसको न हो सुओ बारेयाङ परमेश्वरै धर्मशास्त्राङ याङ्च डेमने,
‘ङोस्नी, ङा ङौ दूतकी नाकुङ अघी बीर्न्हकाले,
अनी आसकै न नाकुङ अघी लाम तयार खास्ले।’ #मलाकी ३:१
11“साँच्ची न ङा नाखुरीककी डेले, मास्टो भर्मीको लकीङ डीन्छ मध्याङ बप्तिस्मा याछ युहन्ना डेनाङ बाड्को सुर माले। टर स्वर्गौ राज्याङ पट्ट डेनाङ मार्जा सु ले, होसे युहन्ना डेनाङ बाड्को हो। 12बप्तिस्मा याछ युहन्नै प्रचार जाट्च समयलकीङ चाहाँसम्म भर्मीको चहीँ स्वर्गुङ राज्यौ विरोधाङ जोडखाटा लडाइ जाट्न न ले। 13हीजैडेनाङ पट्ट न अगमवक्ताको र मोसौ व्यवस्थै, बप्तिस्मा याछ युहन्नौ समयसम्म स्वर्गौ राज्यौ बारेयाङ अगमवाणी जाटा। 14ङै डेच कुरा नाखुरीक विश्वास जाट्ले डेनाङ, होखुरीकै डेच राखी पर्च एलीया चहीँ इसे युहन्ना न हो। 15सुओ सेच मेनेकेप ले, होचे सेख्यो।
16“इसे पुस्तुङ भर्मीकोलाक ङा ही खाटा तुलना जाटीङ? होखुरीक बजाराङ ङुवार लाफाकोलाक आर्घाचै इट डेच जजाको ल्याक्च हो,
17‘कानै नाखुरीकुङ लागी बाँसुरी आर्म्हाटा, टर नाखुरीक मास्याहा।
कानै विलापौ ल्हीङ ल्हीङा टर नाखुरीकै विलाप माजाटा।’
18“हीजैडेनाङ बप्तिस्मा याछ युहन्ना अरु भर्मीकै लेखा जाप माजाप ज्याच ठोक माज्यामन र मागामन राहा, अनी होखुरीकै आसकोकी भूत लक्डीस्नने डेले। 19भर्मीयो मीजा ज्याचै र गाचै राहा, अनी होखुरीक डेले, ‘ङोस्नी, घीचुवा, हान रक्सी गार म्होर्चको, कर सोट्चको र पापीकुङ लाफा!’ टर बुद्धि ठीक हो डेच कुरा होच्यो काम लकीङ न प्रमाणित छान्ले।”
पाप माडास्च सहरकुङ भर्मीकोलाक चेतावनी
(लुका १०:१३-१५)
20कुसे-कुसे सहराङ येशूओ वास्टै शक्तिशाली कामको छान्नन्या, अनी होसकै होसे सहरकोलाक धिक्कारीकी ठाला, हीजैडेनाङ होखुरीकै लहो पाप डासार परमेश्वर पट्टी माल्हेसा। 21होसकै डेया, “धिक्कार नाङ्की, ए खोराजीन! धिक्कार नाङ्की, ए बेथसेदा! इडीक नाखुरीक लेठाङ जाट्च शक्तिशाली कामको टुरोस र सीदोनाङ जाट्च लेनाङ होखुरीकै पहीला न भाङ्गरा बील्हार र बाडाप मोल्हार पश्चात्ताप जाट्च लेया। 22ङा नाखुरीककी डेले, न्यायौ डीनाङ नाखुरीकुङ डेनाङ च टुरोस र सीदोनुङ भर्मीकुङ हालत सहडीकी य्होक्च छान्ले।
23“ए कफर्नहुम, ही नाखुरीक स्वर्ग नुङ्ले र? होइन नाङ्की नरकाङ लोम्ह याल्हे। हीजैडेनाङ इडीक नाङलेठाङ जाट्च शक्तिशाली कामको सदोमाङ जाट्च लेनाङ होसे छीनी सम्म र लेमङुच लेया। 24टर ङा नाखुरीककी डेले, न्यायौ डीनाङ नाखुरीकुङ डेनाङ च बरु सदोमुङ भर्मीकोलाक सहडीकी य्होक्च छान्ले।”
म्हुङ्चकै म्हुङ बाट्च
(लुका १०:२१-२२)
25होडीक बेला येशूये डेया, “ए बोइ, स्वर्ग र पृथ्वीयुङ प्रभु, ङा नाकोकी धन्यवाद डेले, हीजैडेनाङ नाकै इसे कुराको बुद्धिमान र समझदारी लकीङ आर्च्युकार डा, टर मार्जा बालखको ल्याक्चकोलाक होसे टान्हाका। 26हो बोइ, नाकै इसे जाटा हीजैडेनाङ नाकोकी इसे न असल सेया।
27“पट्ट न ठोक ङौ बोये ङाकी जीम्मा याम्हने, बोये बाहेक मीजाकी अरु सुयेर माचीन्डीले, र मीजै बाहेक बोइकी सुयेर माचीन्डीले। अनी सु लेठाङ मीजै बोइकी टान्हाक्च इच्छा जाट्ले होचे चहीँ चीन्डीले।
28“ए म्हुङ्चको र लीस्च भारीये फेट्चको, ङा लेठाङ रान्ही, ङा नाखुरीककी शान्तिये म्हुङ बाटाक्ले। 29ङौ जुवा बुनी र ङा लकीङ पान्ही हीजैडेनाङ ङौ मीमन दयालु र नम्र ले अनी नाखुरीकै नाखुरीकुङ आत्माङ आराम डुप्ले। 30हीजैडेनाङ ङौ जुवा सजीलो ले र ङौ भारी ख्याङ्छ ले।”
Поточний вибір:
मत्ती 11: EMGP
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
