मत्ती 2
2
पूर्व दिशाय किना ज्योतिषिया केरू ऐईंणु
1जेख्णी राजा हेरोदेस यहूदिया प्रदेशा पनि राज काता थ्या, ता यीशुरा जन्म तैस प्रदेशेरै बैतलहम शहरा मझ भुआ, जां पूर्व दिशाय किना कुछ (ज्योतिषि) बुद्धिमान मैहणु जै तारा केरै जाणकार थ्यै यरूशलेम शहरा मझ अईछी करि पुछणा लगै। 2“सै बच्चा कोठि आ जै यहूदिया केरा राजा बंणनेरै तेईनी पेईदा भौरा आ? केईनी कि पूर्व दिशाय मझ तारा जै तेसेरै जन्मेरै बारै मझ शुंणाता सै असै असमांणा मझ लधा, ऐठणीरै तेईनी असै तेसनी प्रणाम कांननी यौउरै अत्तै।”
3यहूदियेरै राजैरै जन्मेरै बारै मझ ऐ शुणि करि राजा हेरोदेस जां तैस सेईतै बड़ै सारै मैहणु जै यरूशलेम शहरा किना थ्यै, सै डरि गियै। 4फिर तेनी यहूदी समाजेरै सारै प्रधानयाजक जां यहूदी शास्त्री किठै करि-करि तैन्हांं किना पुच्छु, कि “मसीहरा जन्म कोठि भूंणा चेहिंथा?” 5तैन्हैं तैस सिंउ बौलु, “यहूदिया प्रदेशेरै बैतलहम नगरा मझ मसीहरा जन्म भूंणा।” केईनी कि परमेश्वरै भविष्यवक्ता मीकाईरै जरियै बड़ै पेहिलै लिखोरू थियु कि 6“हे! यहूदिया प्रदेशेरै बैतलहम नगरेरै मैहणुवो, तु यहूदेरै अधिकारिया मझ राज कांनारा मझियां कुनि बि तरीकै ला हल्का ना, केईनी कि तांउ मझांं अक अगुवा निकूंणा, तैस इस्राएल देशा मझ बेशणारै मिंडै मैहणुवां केरा मार्गदर्शन कांना।”
7फिरी हेरोदेस राजै ज्योतिषि चुपचाप शदाय जां तेंन्हा किना पुच्छु, कि तारा ठीक कोस टैंमा लधौरा, तां सै पता करि सकिया कि बच्चैरी उम्र क्यौति आ। 8फिरी तेनी ज्योतिषि बैतलहमनि भेईजै जां बौलु, “गहा, जां तैस बच्चेरै बारै मझ सही ढंगै सिंउ पता करा, जां जेखणी सै मैई गिया ता मूं किनि वापस ऐईछा जां फिरी जै किछ तुहैं तकाउरू आ तैस मूंनी शुणां, तां कि आंउ बि अईछी करि तेसनी प्रणाम करूं।”
9फिरी सै राजैरी गल शुणि करि चलि गियै, जां जै तारा तैन्हैं पूर्व दिशाय मझ तकाउरा थ्या, सै तेन्हैरै आघै-आघै चला; फिरी जेख्णी सै घर यूँ जेठि सै बच्चा थ्या, ता तारा तैस सांमणै प्रन अईछी करि रुकि ग्या। 10जेख्णी तैन्हैं ऐ तकाउ ता सै बड़ै खुश भुवै। 11सै घरा अंतर गियै जां तैन्हैं तेसैरी मयि मरियमा सेईतै बच्चेरै दर्शन कियै; तैन्हैं बच्चेरू मुहागर गहि करि, भुईयां जेणुवां केरै भारै बेशि करि तेसनी प्रणाम कियु, जां अपड़ा-अपड़ा थेईला खोलि करि तेसनी कीमति तोहफे जिहीं सुन्ना जां लोबान, जां गन्धरसैरी भैंट चढ़ाई। 12पण परमेश्वरै सुपनै मझ सै सावधान करि दित्तै कि, तुवे वापस राजै हेरोदेसा किनि मेईं गांहथै ऐठणीरै तेईनी सैक्यै होरी बत्तै गहि करि अपड़ै देशानि चलि गियै जां तैन्हैं राजैनी ऐठणीरै बारै मझ ना शुणांउ।
यीशु लैई करि मिस्त्र देशानि गांहणु
13जेख्णी ज्योतिषि चलि गियै ता यूसुफनी सुपनै मझ परमेश्वरेरै एकि स्वर्गदूतै दर्शन दी करि बौलु, “उठ! बच्चै जां तेसैरी मयि लै करि चुप-चाप मिस्र देशानि चलि गा; जां जेख्णी तेईनी आंउ ताउ सिंउ ना बौलूं तां तेईनी तैठि ऐ बेशै; केईनी कि राजा हेरोदेस ऐस बच्चै मांनेरै तेईनी तौपता आ।”
14ऐठणीरै तेईनी यूसुफ उठा जां बच्चै जां तेसैरी मयि लै करि तेसै राती मिस्र देशानि चलि पेया। 15जां राजै हेरोदेसेरै मरना तेईनी तेदीयै रुकोरै रिय्है। ऐ ऐठणीरै तेईनी भूं कि परमेश्वरै होशे भविष्यवक्तेरै जरियै जै बोलोरू थियु पूरू भौ गहिया कि “मीं अपड़ा पुत्र मिस्र देशा किना शदा।”
छोकरूवा केरी हत्या
16जेख्णी राजै हेरोदेसा ऐ पता लगा कि ज्योतिष्यै तैस सेईतै धोखा केया तां तैस बड़ा गुस्सा या, जां तेनी अपड़ै सिपाहियनि हुक्म दिता कि बैतलहम जां तैस आस-पास इलाकेरै बच्चै जै दुवां सालैरै या तेत किना हल्का छोकरूवा केरी हत्या करि देया। (ज्योतिशियै केरै शुणाउरै टैंमेरै अनुसार) 17फिरी भविष्यवक्ता यिर्मयाहरै द्वारा बोलोरी गल पूरी भुई;
18“रामाह नगरा मझ दुखै ला भरोरी एकि जनेनिरी आवाज शुणि,
जै रूणां पिटियूंणैरी आवाज थी,
राहेल अपड़ा बच्चा केरै तेईनी रूंती थी,
जां ना चांहथी थी कौ तेन्हांनि होंसला दी करि चुप काराईया,
केईनी कि तेन्हैरै सारै बच्चै मारी छडोरै थ्यै।”
मिस्त्र देशा किना वापस ऐईंणु
19यूसुफ, मरियम जां बालक यीशु हालै तेईनी मिस्र देशा मझ थ्यै, फिरी राजै हेरोदेसेरै मरना किना बाद मिस्र देशा मझ परमेश्वरेरै स्वर्गदूतै यूसुफनी सुपनैं मझ अईछी करि बौलु, 20उठ, “बच्चै जां तेसैरी मयि लै करि इस्राएलेरै देशानि चलि गा, केईनी कि राजा हेरोदेस जां जै बच्चेरै प्रांण लींणा चांहथै थ्यै, सै मरि गियोरै अत्तै।” 21सै मिस्र देशा किना छोकरू जां तेसैरी मयि लै करि इस्राएल देशा मझ चलि या। 22पण जेख्णी यूसुफै ऐ शुणु कि यहूदिया प्रदेशा मझ अपड़ै बाबै राजै हेरोदेसेरी मोउती किना बाद तेसैरी जगाय पन अरखिलाउस राज्य काता आ, ता तैड़ी गांहणा किना डरि गिया। पण सुपनै मझ सै परमेश्वरा किना चेतावनी पा करि गलील प्रदेशानि चलि ग्या। 23जां नासरत नगरा मझ गहि करि बसि ग्या, ताकि सै वचन पूरा भुईया, जै भविष्यवक्तै यीशु मसीहरै बारै मझ बोलौरा थ्या कि “मैहणुवां पता लगणा कि सै नासरत नगरा किना आ।”
Поточний вибір:
मत्ती 2: CDJNT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
