Yohanes 1
1
Yesus nam Pandir Allah ongko Torakng Dunia
(1:1-18)
1Mulonyo, sobolupm la'apo pan dipulah, ado Sio inyo disobut ‘Pandir Allah’.#1:1: Dalapm teks asli, baso Yunani, kato ‘Logos’ dipakai. Kato ni'in ado roti inyo kotakng dalapm pakai' urakng Yahudi huatan urakng Yunani. Rotinyo, pomandiran huatan pikiran Allah inyo monjadi hidup, caronyo Allah monyatoan diri-Nyo ko monsio. Nantai oca' moingant'an urakng mongona'i caro Allah mombulah alapm semesta, ia'an agatn pomandiran-Nyo mo.
Pandir nantai bosamo agatn Allah.
Pandir nantai jam samo agatn Allah.
2Doi' somulonyo, Sio bosamo Allah.
3 Allah mombulah somuo la'apo pan molalu'i Sio. Conyiant Sio, conyiant ado la'apo pan inyo ulih dipulah.
4Sio nam sumber kohidupan. Kohidupan inyo Sio onju' nantai am Torakng pakai' monsio.
5Torakng nantai bocohayo di dalapm kogolapan.#1:5: Torakng di si'itn monggambaran caro hidup inyo monyonangan Allah. Yesus datakng pakai' monoraki caro hidup inyo bondar. Potakng kinyo ulih monutupinyo.
6 Watu inyo udah ditotapan Allah, Allah moutus sikuꞌ urakng inyo bodamoan Yohanes.#1:6: Buku ni'in ditulis Rasul Yohanes, bobeda doi' Yohanes inyo dimasud di si'itn, ia'an Yohanes Pombaptis.
7Yohanes datakng pakai' momboritoan mongona'i Torakng nantai. Oca' obai io somuo urakng monjadi pocayo ko Torakng nantai.
8Yohanes siku' bukatnnyo Torakng nantai, apo bayo momboritoan mongona'i Torakng nantai.
9Torakng inyo bondar, Torakng inyo tongahan datakng ko dunia huatan monoraki somuo urakng.
10Sio ado di dunia. Dunia dipulah molalu'i Sio. Apo, boko urakng di dunia kinyo mongonal Sio.
11Sio datakng ko banso-Nyo siku', ia'an banso Yahudi. Apo sia' kinyo pocayo agatn Sio.
12Apo ko somuo urakng inyo monorima'-Nyo, ia'an somuo urakng inyo pocayo ko Sio, Sio moonji'i hak ko sia' pakai' monjadi boko poana'an Allah.
13Nantai kinyo tojadi socaro duniawi, samo sama'an boko urakng inyo dilahiran obai kohonda' damo hajat monsio. Sia' monjadi poana'an Allah obai Allah bulah somuo nantai memang tojadi.
14Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.
15Yohanes momboritoan mongona'i Sio. Yohanes mondongkakng-mondorah, “Ninam Sio kujiku nantai, ‘Ado Urakng inyo paca'an datakng lopas aku nantai. Sio lobih pontikng doi' aku obai Sio udah ado ija' tangga'i mulonyo, jouh sobolupm aku dilahiran.’ ”
16Obai Sio kotakng mongasihi kito, jadi kito hala monorima' borokat doi' Sio.
17Allah moonju' porintah ongko poraturan-Nyo di buku Hukupm Torat molalu'i Musa. Apo Allah moonju' koboi'an-Nyo ongko kobondaran-Nyo molalu'i Yesus Kristus.
18Co nyiant ado siku' urakng pan inyo kalo moniant Allah, kocuali Yesus, Ana' Tunggal-Nyo. Sio inyo ado hubukan kotakng dampikng agatn Allah Bopai.#1:18: Teks asli, Baso Yunani, momakai kiasan ‘inyo ado di pangkuan Bopai’. Sio inyo monyatoan Allah ko kito.
Yohanes Pombaptis momadahan mongona'i dirinyo siku'
(1:19-28)
(Mat. 3:1-12; Mrk. 1:1-8; Luk. 3:3-6, 15-17)
19Watu nantai urakng Yahudi doi' Yerusalem mongiripm boboropo imam ongko boko urakng doi' suku Lewi. Sia' disiuh botula' ko Yohanes pakai' botakutn, “Sopo kironyo duatn ni'in?” Huatan ni'in inyo dipadahan Yohanes ko sia'.
20Agatn torus torakng, Yohanes bopandir, “Aku bukainyo Rajo Inyo Dijanjian Allah inyo kito sobut Kristus!”
21“Aman ubo nian,” sia' botakutn ko io, “Duatn sopo? Kata'an duatn Nabi Elia doi' joman komai inyo datakng agi'?”#1:21: 2 Boko rajo 2 mongisahan Nabi Elia kinyo kalo mati. Allah mombaba' io ko sorugo agatn koreta kuda boapi. Jadi urakng Yahudi pocayo nononyo io paca'an datakng agi' di dunia. Timbas Yohanes, “Bukai! Kata'an duatn Nabi nantaiam#1:21: Di buku Ulangan 18:15-19, Musa boposatn obai nononyo Allah paca'an moangkat siku' Nabi inyo samo sama'an Musa. Jadi, somuo urakng Israel monantian Nabi nantaiam. Sobondarnyo, Nabi nantaiam Yesus, biar pan banya' urakng Yahudi kinyo honda' pocayo. Tiat catatan di buku Kisah 3:22. nabi inyo koi tantian?” Timbas io, “Bukai!”
22Jadi, sia' bopandir ko io, “Padahan ko koi sopo duatn oca' koi ulih momadahannyo ko sia' inyo monyiuh koi. La'apo kato duatn mongona'i diri duatn siku'?”
23Katonyo, “Watu joman komai Nabi Yesaya bopandir mongona'i urakng inyo tajahan datakng sobolupm Rajo Inyo Dijanjian Allah. Aku ninam urakng inyo mondorah di padakng pasir, ‘Bujurancam jalatn pakai' Tuhatn!’ ”#1:23: Doi' buku Yesaya 40:3.
24(Huatan di antaro boko urakng inyo disiuh nantai ado boboropo doi' pomimpitn agama Yahudi doi' kolompok urakng Farisi). 25Sia' botakutn ko io, “Duatn momadahan duatn bukainyo Kristus, bukainyo Nabi Elia, bukainyo Nabi inyo koi tantian. Amannyo ubo nian, mapo duatn mombaptis boko urakng?”.
26Timbas Yohanes ko sia', “Aku ongkah mombaptis urakng agatn ara'i. Apo ado Urakng di tongah-tongah kaitn inyo kinyo kaitn konal sopo Sio sobondarnyo. 27Ia'an, Sio inyo datakng lopas aku. Aku sikuꞌ kinyo cucu' pakai' mombuka' tali sandal-Nyo.”
28(Kisah antaro Yohanes agatn sia' nantai tojadi di Betania di soborakng Sungai Yordan, tompat Yohanes mombaptis boko urakng.)
Yohanes Pombaptis mongisahan mongona'i Yesus
(1:29-34)
29Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia. 30Ninam Sio ujiku inyo ku pandiran watu, ‘Ado Urakng inyo paca'an datakng lopas aku nantai. Sio lobih pontikng doi' aku obai Sio udah ado doi' mulonyo, jouh sobolupm aku dilahiran.’ 31Sobolupmnyo, aku co tohu sopo Sio nantai.#1:31: Masud Yohanes obai sobolupm Allah moonju' tando ko io, io co tohu sopo Urakng Inyo Dipilih Allah nantai. Tiat ayat 32-34 nononyo. Padohal aku datakng mombaptis agatn ara'i oca' urakng Israel mongonal Sio.”
32Yohanes pan mongisahan, katonyo, “Aku udah moniant Roh Allah turutn doi' langit samo sama'an burukng daro. Roh Allah nantai mohinggap di pucu' Yesus. 33Watu nantai, aku co tohu sopo Sio. Apo Allah inyo moutus aku pakai' mombaptis agatn ara'i, udah bopandir ko aku, ‘Aman kolai moniant Roh Allah turutn ko pucu' siku' urakng, lalu mohinggap di pucu'-Nyo, jadi urakng nantaiam Urakng inyo paca'an mombaptis agatn Roh Allah.’ 34Huatan watu ni'in, aku udah moniant nantai tojadi. Aku moonji'i kosasian, ‘Urakng ninam Ana' Allah!’ ”
Boko murid Yesus inyo potamo
(1:35-51)
35Kohobu'annyo, Yohanes bodiritn agi' di tompat nantai. Bosamo agatn duo muridnyo. 36Pas io moniant Yesus lalu, io bopandir, “Tiat! Nantaiam Sio, Ana' Domba Allah!” 37Koduo murid nantai mondinga' pandir Yohanes. Lalu, sia' tuyut Yesus.
38Yesus mongilikng ko bolikat, moniant sia' tuyut Sio.
Kato-Nyo ko sia', “Kaitn bogoyap la'apo?” Kato sia' ko Sio, “Rabi, Duatn diapm di mono?” ‘Rabi’ rotinyo ‘Guru’.
39Kato-Nyo ko sia', “Hincapm, lalu kaitn paca'an moniant!” Jadi, sia' botula', lalu moniant tompat Sio bodiapm. Nantai tojadi kiro-kiro japm ompat babahari. Ari nantai, sia' diapm bosamo-samo agatn Sio.
40Andreas ia'an salah siku' doi' koduo murid nantai inyo mondinga' pandir Yohanes lalu io tuyut Yesus. Andreas nam somadikan bondar Simon Petrus. 41Jadi, watu nantai, Andreas kotakng hagar monomu'i Simon. Katonyo ko somadikannyo nantai, “Udah kotomuan koi am Mesias!” (‘Mesias’ rotinyo ‘Kristus’, ia'an Rajo Inyo Dijanjian Allah.)
42Andreas mombaba' Simon ko Yesus. Yesus moncorona'i ko arah Simon. Kato-Nyo, “Kolai ninam Simon, ana' Yohanes.#1:42: Yohanes ni'in beda doi' Rasul Yohanes huatan beda jam doi' Yohanes Pombaptis. Apo kolai paca'an ditingkau Kefas!” (damo ‘Kefas’ samo agatn ‘Petrus’. Rotinyo, ‘batu ndampar’.)
43Kohobu'annyo, Yesus momutusan pakai' botula' ko doerah Galilea. Sio botomu agatn Filipus. Kato-Nyo ko Filipus, “Hincapm monjadi murid-Ku!” 44(Filipus nantai boasal doi' kota Betsaida, samo sama'an Andreas agatn Petrus.)
45Filipus botomu agatn Natanael. Katonyo ko io, “Koi udah monomuan Sio inyo doi' joman komai udah Musa sobut di dalapm Buku Torat, Sio inyo udah boko nabi sobut'an dalapm boko buku sia' jam. Ia'an, Yesus ana' Yusuf. Sio doi' laman Nazaret.”
46Kato Natanael ko io, “Ah! co mungkitn lou' inyo boi' boasal doi' laman Nazaret.”
47Kato Filipus ko io, “Hincapm! Tiatcam numbo!” Watu Yesus moniant Natanael datakng, Sio bopandir mongona'i Natanael. Kato-Nyo, “Tiat! urakng ni'in asli urakng Israel! Kinyo ado kopalsuan dalapm dirinyo.”
48Natanael botakutn, “Sama'an apo Duatn tohu agatn aku?”
Timbas Yesus, “Sobolupm Filipus moningkau kolai, Aku udah moniant kolai di babah kayu ara nantai.”
49Kato Natanael ko Sio, “Wah, Guru! Pasti, Duatn ninam Ana' Allah! Duatn ninam Rajo urakng Israel!”
50Yesus bopandir, “Kolai mondinga' Aku bopandir obai Aku moniant kolai di babah kayu ara nantai. Kata'an obai nantaiam kolai monjadi pocayo ko aku ni'in? Kolai paca'an moniant boko hal inyo lobih bosar doi' boko nantai!”
51Lalu Yesus bopandir, “Bondar-bondar pocayo cam! Kaitn paca'an moniant langit tobuka', lalu boko molekat Allah turutn noi' ko ‘Ana' Monsio.’ ”#1:51: Gambaran ni'in doi' buku Kojadian 28:12. Masudnyo, Yesus nam Pohubukng antaro Allah agatn monsio. Gambaran ni'in jam rotinyo Yesus ado kuaso doi' Allah. Sio ‘turutn’ ko dunia ni'in watu Sio monjadi monsio. Sio ‘noi' agi' lopas Sio hidup agi'.’ Sio paca'an ‘turutn’ agi' watu Sio bobali' koduo kalinyo.
Поточний вибір:
Yohanes 1: TBDS
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
