JENESI 38
38
1 Oku fakatubu e Juta a Ea, mo Onani, mo Sila. 6 Koe fakamau a Ea mo Tema. 8 Koe hia a Onani. 11 Oku tatali a Tema kia Sila. 13 Oku ne kākā‘i a Juta. 27 Oku ne fanau‘i ae māhaga ko Felesi mo Selaa.
1BEA i he gaahi aho koia, nae hoko o behe, nae alu a Juta mei hono gaahi tokoua, bea afe ia ki ha taha i he kakai Atulama, ko Ila hono higoa. 2Bea mamata ai a Juta ki he ofefine oe Kenani e toko taha, ko Suaa hono higoa: bea ne ma‘u ia, bea alu kiate ia o na mohe. 3Bea feitama ia, mo faele‘i ae tama; bea ne ui hono higoa ho Ea. 4Bea toe feitama ia, bea faele‘i ae tama; bea ne ui hono higoa ko Onani. 5Bea toe feitama foki ia; bea faele‘i ae tama; bea ne ui hono higoa ko Sila: bea nae i Kesibi ia i he ene fanau‘i ia. 6Bea fili e Juta ae unoho kia Ea, ko hono uluaki, bea ko Tema hono higoa. 7Bea nae aga kovi a Ea, koe uluaki foha o Juta, i he ao o Jihova; bea nae tamate‘i ia e Jihova. 8Bea behe e Juta kia Onani, Alu koe ki he unoho o ho taokete, bea ke mali mo ia, mo ke fakatubu ai ae hako ki ho taokete. 9Bea nae ilo e Onani e ikai iate ia ae hako; bea i he ene alu ki he unoho o hono taokete, naa ne hua‘i ia ki he kelekele, telia naa foaki eia ae hako ki hono taokete. 10Bea nae kovi kia Jihova ae mea naa ne fai: koia, naa ne tamate‘i mo ia foki. 11Bea fekau e Juta kia Tema ko hono ofefine i he fono o behe, Ke ke nofo atā be koe, i he fale o hoo tamai, ke oua ke tubu hoku foha ko Sila; he nae behe eia, Telia naa mate foki ia, o hage ko hono ogo taokete. Bea alu a Tema o nofo i he fale o ene tamai.
12Bea fuoloa ai, bea bekia ae taahine a Suaa koe unoho o Juta: bea kuo fiemalie a Juta, bea alu ia ki he ene kau tagata koji sibi ki Timinate, aia mo hono kaiga ko Ila, koe Atulama. 13Bea nae fakaha kia Tema, o behe, Vakai, oku alu a hoo tamai i he fono, ki Timinate ke koji ene faga sibi. 14Bea ne tuku eia hono gaahi kofu butu, bea bulou aki eia ae bulou, o ne takai aki ae kofu, bea nofo ia i he botu ataatā nae i he vee hala ki Timinate; he nae vakai ia, kuo tubu a Sila, ka oku heeki ai atu ia kiate ia, ke na unoho. 15Bea kuo mamata a Juta kiate ia, naa ne mahalo koe fefine agahala ia, he koeuhi kuo bulou hono mata. 16Bea afe ia kiate ia i he hala, o ne behe, Koeni, oku ou kole kiate koe, tuku keu alu atu kiate koe; (he nae ikai te ne ilo ko hono ofefine ia i he fono). Bea beheage eia, Koeha te ke tuku mai kiate au, koeuhi ke ke ha‘u kiate au? 17Bea behe ia, Teu fekau ke omi ha uhiki mei he faga manu, bea behe eia, Bea te ke tuku mai ha fakamooni, kae oua ke ke omi ia? 18Bea behe eia, Koeha teu tuku kiate koe? bea talaage eia, Ko ho mama, mo ho lelu, bea mo ho tokotoko oku i ho nima. Bea ne atu ia kiate ia, bea alu atu ia kiate ia, bea feitama ia kiate ia. 19Bea tuu hake ia o alu mei ai, bea ne tuku ene bulou meiate ia, o toe ai hono gaahi kofu butu. 20Bea fekau e Juta ke ave ae uhiki‘i koji i he nima o hono kaiga koe Atulama, koeuhi ke ne ma‘u ae fakamooni mei he nima oe fefine; ka nae ikai te ne faa ilo ia. 21Bea fehui ia ki he kau tagata oe botu koia, o behe, Koefe ae fefine agahala nae i he botu hala ni? Bea nau behe, Nae ikai ha fefine agahala i he botu ni. 22Bea toe alu ia kia Juta, o ne behe, Oku ikai teu ilo ia; bea oku behe foki e he kau tagata oe botu, nae ikai ha fefine agahala i he botu koia. 23Bea behe e Juta, Tuku ke ne ma‘u, ia maana, telia naa tau ma ai; vakai, naaku fekau ke ave ae uhiki manu ni, bea oku ikai te ke ilo ia.
24Bea hili ae mahina e tolu nai, nae fakaha kia Juta, o behe, Kuo fai agahala e Tema, ko ho ofefine i he fono; bea vakai, oku feitama foki ia i he feauaki. Bea behe e Juta; Taki mai ia, ke tutu ia. 25Bea kuo nau taki mai ia, bea fekau ia ki he ene tamai i he fono, o behe, Kuou feitama ki he tagata oku aana ae mea ni: bea ne behe, Ke ke vakai, be oku ahai ae mama ni moe lelu, moe tokotoko ni? 26Bea fakamooni e Juta, o ne behe, Oku tonuhia lahi ia ia au: koeuhi nae ikai teu foaki ia ki hoku foha ko Sila. Bea nae ikai te ne toe ilo‘i ia.
27Bea nae hoko, o behe, i he ene lagaa, bea vakai, nae ai ae māhaga i hono manāva. 28Bea i he ene lagaa nae tuku kitua e he toko taha hono nima, bea nonoo ki ai e he mauli ae filo kulokula, o ne behe, Nae fuofua ha‘u eni. 29Bea i he ene toe too atu hono nima, bea vakai, nae ha‘u hono tokoua; bea behe e he mauli, Nae fefe‘i hao oho mai koe ke iate koe ae motuhi ni, koia naa ne ui hono higoa ko Felesi. 30Bea toki ha‘u hono tokoua, aia nae i hono nima ae filo kulokula, bea ne ui hono higoa ko Selaa.
Поточний вибір:
JENESI 38: TWB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть