Fuɗɗoode 11
11
Suudu Baabiila toowndu
1Wakkati oon, adunaaru fuu wo ɗemngal gootal haalannoo. 2Nde tagaaɓe eggirnoo faro lettugal ndeen, tawi njaayri ley leydi Sinar de koɗi toon.
3Ɓe mbi'ondiri:
— Ngaree piyen pereeje, nduppen ɗe faa ɗe cemmbiɗa, ɗe laatoo kaaƴe nyiɓirɗe.
Ɓe ngaɗi pereeje, ɓe keɓi katin loofe ɗaatuɗe hono taari, ɓe ngaɗi loofal nyimreteengal.
4Ɓe mbi'i:
— Ngaree mahanen ko'e men huɓeere e suudu toowndu faa na hewta kammu. Ngaɗanen ko'e men innde taa caakoɗen ley adunaaru fuu.
5Joomiraaɗo jippii faa ndaara huɓeere e suudu toowndu ndu ɓiɓɓe-Aadama ngonnoo na nyiɓa nduun.
6Joomiraaɗo wi'i:
— Ndaar, ɓe fuu wo ɓe lenyol gootol e ɗemngal gootal. Ɗuum wo fuɗɗoode golleeji maɓɓe tan. Joonin ko ɓe anniyii waɗude fuu, walaa ko waawi haɗude ɓe yottinde ɗum. 7Ngaree njippoɗen, njiiɓen ɗemngal maɓɓe ngaal, taa ɓe keɓa ɓe paamra katin.
8Noon Joomiraaɗo sankitiri ɓe ley adunaaru fuu. Ɓe celi nyiɓude huɓeere ndeen. 9Ɗuum waɗi nde inndiraa Baabiila,#11:9 E Ibraninkoore innde Baabiila ina nanndi e «jiiɓude». sabo toon Joomiraaɗo jiiɓi ɗemngal tagaaɓe fuu, toon du o sankiti ɓe ley adunaaru ndu fuu.
Ƴuwdi Saam
10Inan ƴuuruɓe e Saam: Nde Saam heɓunoo duuɓi 100 ndeen, rimi Arfasad. Ɗuum waɗii duuɓi ɗiɗi caggal ilam tuufaanu. 11Saam wuuri duuɓi 500 caggal rimeede Arfasad. O rimi katin ɓiɓɓe worɓe e rewɓe. 12Arfasad waɗi duuɓi capanɗe tati e joy de rimi Seela. 13Caggal rimeede Seela, o wuuri duuɓi 403. O rimi ɓiɓɓe worɓe e rewɓe.
14Seela waɗi duuɓi 30 de rimi Eber. 15Caggal rimeede Eber, Seela wuuri duuɓi 403. O rimi ɓiɓɓe worɓe e rewɓe.
16Eber waɗi duuɓi 34 de rimi Peleg. 17Caggal rimeede Peleg, Eber wuuri duuɓi 430. O rimi ɓiɓɓe worɓe e rewɓe.
18Peleg waɗi duuɓi 30 de rimi Rewu. 19Caggal rimeede Rewu, Peleg wuuri duuɓi 209. O rimi ɓiɓɓe worɓe e rewɓe.
20Rewu waɗi duuɓi 32 de rimi Seruk. 21Caggal rimeede Seruk, Rewu wuuri duuɓi 207. O rimi ɓiɓɓe worɓe e rewɓe.
22Seruk waɗi duuɓi 30 de rimi Nahor. 23Caggal rimeede Nahor, Seruk wuuri duuɓi 200. O rimi ɓiɓɓe worɓe e rewɓe. 24Nahor waɗi duuɓi 29 de rimi Teera. 25Caggal rimeede Teera, Nahor wuuri duuɓi 119. O rimi ɓiɓɓe worɓe e rewɓe.
26Teera waɗi duuɓi 70 de rimi Abram e Nahor e Haran.
Ƴuwdi Teera
27Inan ɓiɓɓe Teera: Teera rimi Abram e Nahor e Haran. Haran rimi Luudu. 28Haran artii bammum Teera maayde. O maayi ley leydi ndi o rimaa e muuɗum ndiin, ley ngenndi Kaldiyankooɓe mbi'eteendi Uur. 29Abram e Nahor ɓaŋani ko'e muɓɓen rewɓe. Jom suudu Abram ina wi'ee Saaray. Jom suudu Nahor ina wi'ee Milka ɓii Haran. Haran woni baaba Milka e Yiska. 30Saaray wo debbo dimaro. O walaano ɓiɗɗo.
31Teera yaadi e ɓiyum Abram e taanum Luudu ɓii Haran e dee ɓiyum Saaray, jom suudu Abram oon. Ɓe fuu, ɓe ƴuwi galluure Uur ɓe ponndii galluure Kanaana. Ɓe njehi faa ɓe njottii wuro Haran, ɓe koɗi toon. 32Duuɓi Teera wo 205 de maayi ley Haran.
Поточний вибір:
Fuɗɗoode 11: FBF
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© SIM International 2012, 2022