Luka 8
8
1Neke lino dzifudika, dze agendagendaga umwene mumakâja namakomi namadebe neke adzidalikage indzanga, adalikage nilyevangeli lya vutwa vwa Nguluvi. Neke avańikyumi navavili, avo fyavedzaga pamwi ndesi. 4, 43.
2Neke vali povali navakiṅinavo vamwi, ve avahosidze kumibepo imihaluka na kufitamwa hela, va-Malija, je vatigilaga va mu-Magadala, je alosidze umwakwe avademono vali mufúṅàti, Mal. 15, 40; 16, 9.
3na Johana, uva kwa Kusa, j’ali mundzagila va Helodo, na Susana navangi avolofu. Ava vavalimilaga neke vavapelage ifya kuponela ifyanavo vavo na ju mwene na vańigendwa vakwe.
4-15: Mat. 13, 1-23; Mal. 4, 1-20.
4Neke lino, vavye valundine avanu ikipuga hela ikyolofu, vahangile na vakunikye ukwakwe, avahuma-mumakâja, avamu-gulumaga ju mwene, neke baho umwene avavulage ikimańagidzo atigilage:
5Umuńa-kumidza imbeju akivuka mukumidza imbeju jakwe. Neke lino, pe imidza, neke baho ijingi imbeju neke jigwidzage paṅasi neke jibadangwage neke na dzi ndege dza kukyâńa neke dziholelage ṅani.
6Neke ijingi jigwilage palutālâvwe. Neke jivye jimelile, neke jijongodo-kage, pakuva si pe vwali uvwigu.
7Neke ijingi jigwidzage pagati pamifwa. Nekelino imifwa, givye gimelanye, neke gijitovage imbeju.
8Neke lino ijingi jigwi-dzage pa-ńi inofu neke jimelage neke jivelekage ligana (100). Avye alongile idzi, neke baho atigilage: je ali nago amasikidza ga kupulika, apulikage.
9Neke baho vamuvudzage avańigendwa vakwe neke vatigilage: ikimańagihidzo iki kye kiki?
10Neke umwene atigilage: uńeńe mupelilwe nulwa kudzimańa idza kukińele, idza vutwa vwa Nguluvi, neke avangi avo vilongelwaga fi fimańagihi-dzo „na pe vilola, ukuta napo vatane ukuluvona, na pe vipulika, ukuta napo vatane ukudzifika.“
11Neke lino ikimańagihidzo iki kye iki: imbeju lye lidzwi lya Nguluvi. 1. Pet. 1, 23.
12Ijagwaga pikasi, ve vene, avipulika, neke kangi umuhēsi adzage alińagage ilidzwi munumbula dzanavo, pakuva itigila vatane ukufuvwa neke vanane.
13Ijagwaga palutālâvwe, ve vene, avivona vapulike ilidzwi, neke baho vakelage pakulyanukila. Neke avene imidela vasili nagyo, ulufuvo lwanavo luli pafigon, o nde filingi. Vivona pe yigemwa neke valekesage.
14Ijadzigwilaga pamifwa, ve vene, avivona vapulike neke pamigendele gyanavo valetage nukwi-ganya nuvusafi nuvudobofu vwa mīkalile, avene ava vitītwa neke imeke dzitane ukukangala.
15Neke lino ijene, ija-gwidzaga pa-ńi inofu, ve vene, avivona vapulike ilidzwi neke valivikage munumbula indele inofu neke vigugumidzage pakuveleka. Apos. 16, 14; Heb. 10, 36.
16-18: Mal. 4, 21-25.
16Umunu, ngana akungile uluṅali, apo asigubikila nambi nakalilo, nambi jumwi asivika kwifungu lyavuhaga. Ha nda, vivika pakyâńa pakibatilo kya lumuli, avikwingila muńumba ukuta valuvonage ulumuli. Mat. 5, 15.
17Ndivwene ngana lusiku fyonda ifya kukińele filivonesa pavudondya, neke tonda utwigubikye, ngana lusiku, tulagubutulilwa, tulavonekela pavuvalafu. Mat. 10, 26.
18Apo humbi mugimbage vunofu imipulikile gyeńo; ndivwene je ali nafyo fimwi, ujo alongeledzwa nifingi, neke je asili nakyo kinu, kilańagwa na kye itigila ndi nakyo. 19, 26.
19-21: Mat. 12, 46-50; Mal. 9, 31-35.
19Neke baho uṅina navanuṅuve neke vahegēlelage ukwakwe neke valemwage ukufika, kwe ali, kyatanye ikipuga.
20Neke baho vamulongelage vatigilage: uńoko navanuṅuvo ahava vimile pivala, vatigye vakulole juve.
21Neke umwene apilusage atigilage: unene ujûva navanuṅuvangu ve vene, avipulika ilidzwi lya Nguluvi neke valigendelage.
22-25: Mat. 8, 18. 23-27; Mal. 4, 35-41.
22Neke ikigono ikingi neke vingilage mukyômbo na jujo na vańigendwa vakwe. Neke umwene avalongelage atigila ge: ińandza iji tulovokelage imwambu jila. Neke baho avene neke vasuṅilage kugati.
23Neke lino pe kigenda ikyômbo, neke umwene agonelelage itulo. Neke baho pańandza neke lilamukage ilivelo neke nululenga lumemage mukyômbo, neke patalame mbandu.
24Neke baho vahelelage vamulamusage vatigilage: mulugw’ave, mulugw’ave, twifwa. Neke baho umwene alamukage neke akabusage kumuvelo na kumavingo ga lulenga, neke baho palitamage, neke pavedzage dzidzidzi hela.
25Neke avavudzage atigilage: ulufuvo lweńo lulikwi? Neke avene vahandzage nuvogofi nuku-dzuma neke vivudzage vatigilage: je nani umwene uju? Pakuva idzova kwivelo na kululenga.
26-39: Mat. 8, 28-34; Mal. 5, 1-20.
26Neke baho valovoṅasage neke vakafikage pa-ńi ja va-Gelasene, ijiloleṅine nija mu-Galilaja.
27Neke lino avye idzabukila pakidunda, neke baho ataṅanikilage numunu uva mukâja jijo, je ali navademono, ahumile katali ukugenda vufula, asagonaga na muńumba, ahwedzaga ku kumilungu.
28Neke akōlage ingōlo, avye amuvwene Jesu, neke agwilage mumagulu neke akutage atigilage: tuli vuki nani na veve, ve Jesu, ve muswamuve va Nguluvi, j’alutye? Ndidedeva ukwako nditigila: utane ukumumusa.
29Pakuva umwene agudzovile umubepo umukali atigye: ulokage kwa munu uju; avwene gwavwi-dzińasaga ukumukuluvulila kondakonda. Neke āvikwaga nimińololo nifińololo fya kumagulu neke vamuvikilaga numuminga. Neke umwene ingilage akufidumuliṅasa fyonda, fye vamukungilaga, neke baho umwene umudemono amuladuhidzage kwikungu.
30Neke baho u-Jesu neke amuvudzage atigilage: ilitavwa lyako vwi nani? Neke atigilage: june Lilugu. Pakuva umwene vamugwilye avademono avolofu.
31Neke lino baho vadedevage ukwakwe neke vatigilage: utane ukulagila ulwa kuta twisopage mwikolongo.
32Neke lino baho pali pokili nikipinga kya ngubi, dzalyaga ilisoli pakidunda. Neke baho avade-mono vadedevage ukwakwe neke vatigilage: utwidikilage ukwingila mungubi dzila. Neke umwene avidikage.
33Neke baho avademono valokage kwa munu jujo neke vakingilage mungubi. Neke baho ingubi ikipinga kyonda hela neke dziladukilage pigema neke dzitagage muńandza neke dzifwilage mululenga.
34Neke avene, avakwa-milaga, pe valuvwene ulu, neke baho vakimbilage neke vadzigotolage na muvutengule na mufikâja.
35Neke baho vahegage neke vahelelage mukulola idzivonike. Neke vakafikage kwa Jesu neke vakavonage umunu jujo, je valokile avademono, ikalile vunofu palubali pamagulu ga Jesu, afwete nimyênda, atengamine vunofu hela. Neke baho vogopage.
36Neke lino avene, avamuvwene, neke vavalongelage, mwe lwagendye, pe akumunanya, je agwililwe avademono.
37Neke baho avanu avamu-ńi ja mu-Gelasene ililugu lyonda vadedevage vatigilage: ungatwepela mu-ńi jesu muno. Pakuva uvogofi vwavagwilye uvolofu. Neke baho umwene Jesu neke kangi ingilage mukyômbo neke agomokage.
38Neke umwene umunu, je gyalokile imidemono, neke adedevage neke atigilage: twihelelasaga nave. Neke lino umwene amutavulage neke atigilage:
39uvujilage kuńumba jako, ukadzipulisage dzonda, dze akulimye Nguluvi. Neke baho avujilage kukâja neke akadzipulisage dzonda, dze amulimye Jesu.
40-56: Mat. 9, 18-26: Mal. 5, 21-43.
40Neke lino Jesu, avye apilukye imwambu jila, neke vamwanukilage avanu ikipuga, pakuva vonda vamudzindilaga.
41Neke baho vavonage umugosi jumwi ikwadza, ilitavwa lyakwe ali je Jajili, ali mundzagila uva luholanilo lwanavo. Neke je agwilage mumagulu ga Jesu neke adedevage kwa mwene atigilage: tuhelelage kuńumba jangu.
42Pakuva ali numwalive umuńa-kimwinga, ali mu-ńa-myâka mińikyumi na givili, neke umwene ali asamba afwa. Neke lino umwene pe itigila ńelelage, neke avanu givedzage mińanilo hela.
43Neke lino baho ali pwali umukiṅina vo jumwi, je atabatye imyâka mińikyumi na givili, neke avalemile vonda pakumunanya.
44Neke je ahegēlelage kumbele neke abasage umwênda gwakwe kumudzivo. Neke baho na mulomo gula neke vukamu-kilage baho uvutabadafu vwakwe.
45Neke baho Jesu atigilage: je andzabasidze je nani? Neke Petele, avwene vikana vonda, neke atigilage: mulugw’ave, fye fipuga, ifikukumińilidza, ifikukukulundza.
46Neke umwene Jesu atigilage: pwali je andza-basidze; ndivwene june, pe dzihega ingufu apangu.
47Neke lino umukiṅinavo, avye avwene ukuta sindifihamika, neke baho ahegēlelage nuvogofi ṅani neke agwilage pasi neke amugotolelage dzonda, idzamuhulye ukumwabasa neke adzilongage hela, pe vipulika avanu vonda. Neke amuvulage na lwe ananye bahobaho hela.
48Neke umwene atigilage: ve mwalivangu uveve, lukunanidze ulufuvo lwako, uhelelage, ve kuvalye. 7, 50.
49Neke lino avye ali mukulonga ulu, neke baho afikage jumwi uva mundzagila va luholanilo neke amulongelage atigilage: afwe umwalivo, utane ukumufwahidza umwiganidzi va vêne.
50Neke umwene Jesu, pe apulike, neke atigilage: uveve utane ukogopa, ufuvwage hela, apo ipona.
51Neke lino, avye adzifike muńumba, neke abihile ukwidika vingilage avangi, neke avinulage vene ava-Petele na Johana na Jakovo nudadye va muhindza nuṅina, neke avo ingilage navo.
52Neke vonda vavemba-ga vamulŏgōtĕlelaga umwâna. Neke umwene atigilage: mutane ukuvemba, asifwe nda, agonelye tulo. 7, 13.
53Neke baho avene neke vamuhekage, pakuva vamuvwene ukuta afwe.
54Neke baho umwene amwibatage ilivoko umuhindza neke amukemelage atigilage: ve mwân’ave, ulamukage.
55Neke baho umupololo gwakwe gugomokage neke baho alamukage baho-baho. Neke umwene avalongelage atigilage: mumupelage ifilyo, ililage.
56Neke baho avavaha vakwe neke vakuvilage. Neke umwene avadzidzage mbandu ukuta mutane ukulonga kwe munu uluvonike ulu. 5, 14 Mal. 7, 36.
Поточний вибір:
Luka 8: II
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
New Testament in Bena © Bible Society of Tanzania, 1958.
