Juão 9
9
Umukaturu yepe sesaimawaa
1Asui usuwaa rupi umaa yepe sesaimawaa, unaseriwaa sesaimawaate ae.
2Asui umbuewaita upurandu ae, aintaunyee:
—Inde rembuewaa, awataa umunya puxi u kua sesaimawaa u ipaya imaya yuiri unaseri arama sesaima?
3Asui Jesus usuaxara ainta, unyee:
—Timaa umunya puxi tiyuiri ipaya nẽ imaya yuiri, maa unaseri sesaimawaa aintaumaa arama mayetaa Deus ukuawasawa umunya ixupe.
4Yarikute yamunya imuraki kua umunduwaa ixe ara pukusaware ae, nyãse pitunana kuri ae asui tiawa upuderi upuraki.
5Ixete kua mundu turi haiku pukusaware kua mundu upe.
6Umbeu irumuwaa ae utumuna iwi upe asui umunani iwi asui uxari ae sesa upe kua sesaimawaa.
7Asui unyee ixupe arama:
—Resu remuyasuka lagu miri upe serawaa Silue, yawesawa sera umunduwaa ae. Asui usu umuyasuka asui uyuiri urikuana sesa.
8Asui kuaita sumuaraita kuaita yuiri kuaita ukuawawaita upuranduwaa ae aintaunyee:
—Maitaa tiserá aete kua apigawa uwapikawaa upurandu esmula?
9Yepeyepe umbeu:
—Aete. Amuita umbeu:
—Timaa ae maa yawewate ae. Maa aepawate umbeu:
—Ixete ae.
10Asui aintaunyee ixupe:
—Maitaa rerikuana neresa inde?
11Asui unyee:
—Yepe apigawa serawaa Jesus umunani iwi asui uxari seresa upe asui unyee ixe arama:
—Resu remuyasuka lagu miri upe serawaa Silue. Asui hasu hamuyasuka asui kuiri purangana seresa.
12Asui aintaunyee ixupe:
—Maa kitiana kuiri ae? Asui unyee ainta supe arama:
—Tihakuawa maa kititaa ae.
Farizewita aintaupurandu kua sesaimawaa
13Asui aintaurasu kua sesaimawaa aintapiri kuaita farizewita.
14Sauru rame Jesus umunani iwi upirari arama sesa.
15Asui kuaita farizewita aintaupurandu ae maitaa umaa arama, asui unyee ainta supe:
—Uxari iwi seresa upe asui kuiri hamaawana.
16Asui yepeyepe farizewita aintaunyee:
—Timaa Deus suiwara kua apigawa nyãse tiumukaturu sauru. Asui amuita unyee:
—Maitaa apigawa puxuwerawa upuderi umunya milagri iyawewaa. Asui mukuĩ aintaumanduariwaa kuaita farizewita.
17Asui aintaupurandu mukuĩsawa kua sesaimawaa kuera:
—Maitaa rembeu sese nyãse upirari neresa ae? Asui unyee:
—Utitikawaa ae.
18Asui kuaita judewita tiaintaukuawa sã sesaimawaa kuera kua urikuanawaa sesa kuiri tipukusaware aintaupurandu ipaya imaya yuiri.
19Asui aintaupurandu ipaya imaya yuiri:
—Maitaa peraira kua pembeuwaa sesaimawaa usemu umaa kua mundu? Maitaa umaa arama kuiri?
20Asui ipaya imaya yuiri aintaumbeu ainta supe:
—Yakuawate yaneraira ae, yakuawate yuiri unaseri umaa kua mundu sesaimawaa.
21Maa tiyakuawa maitaa uriku arama sesa kuiri, tiyuiri yakuawa awataa uxari uyupirari sesa, pepurandu ae nyãse tuyuweana ae, aete kuri umbeu penye arama.
22Yawe aintaunyee ipaya imaya yuiri nyãse aintausikie judewita sui, nyãse kuaita judewita aintaumbeu awa umbeu Kristu kua Jesus aintaumburi ae sinaguga sui.
23Ape ipaya unyee imaya yuiri:
—Tuyuweana ae pepurandu isui.
24Asui aintausenui mukuĩsawa kua sesaimawaa kuera aintaunyee ixupe:
—Kuiri remee purangawaa Deus supe nyãse yakuawate pekaduru kua apigawa.
25Asui unyee ainta supe:
—Tihakuawa sã pekaduru ae, anyunte hakuawa sesaimawaa kuera ixe asui kuiri hamaa puranga.
26Asui aintaunyee ixupe:
—Maataa umunya inde arama, mayetaa upirari neresa?
27Asui usuaxara ainta unyee:
—Hambeuwana penye maa tipeputari pesendu, marantaa peputari pesendu mukuĩsawa? Maitaa peputari será umbuewaita penye yuiri?
28Asui aintauyakawa ae, aintaunyee:
—Indete umbuewaa maa yande Muize umbuewaita yande.
29Yakuawate kuxima Deus upurungita Muize supe, maa aete kua tiyakuawa maa suiwarataa ae.
30Asui kua apigawa usuaxara ainta, unyee:
—Sesewara seakayemu hasendu nyãse tipekuawa maa suiwarataa ae maa uxari hamaa.
31Yakuawate timaa Deus usendu ainta supe kuaita pekaduruita, maa Deus usendu ainta supe kuaita upuranduwaita irumu umunyawaita kuaye uputariwaa yawe.
32Kua mundu uyupiru rire tire yasendu yepe pesua uxariwaa uyupirari sesa yepe unaseriwaa umaa kua mundu sesaimawaa.
33Tirame Deus suiwara kua apigawa timaa upuderi umunya nemaa.
34Asui aintausuaxara ae, aintaunyee:
—Maitaa reputari rembue yande inde renaseriwaa remaa kua mundu nepekadu irumu? Asui aintaumburi ae.
Jesus uxari sesaimawaa ukuawa sese
35Asui Jesus usendu sesewara aintaumburi ae sinaguga sui, asui uwasemu ae, unyee ixupe:
—Maitaa rexari nepia sese kua unaseriwaa umaa kua mundu?
36Asui usuaxara ae, unyee:
—Awataa ae seruixawa, haxari arama sepia sese?
37Asui Jesus unyee ixupe:
—Remaawana ae, aete kua upurungitawaa neirumu kuiri.
38Asui unyee:
—Haxari sepia, inde seruixawa, asui umee ixupe purangawaa.
39Asui Jesus unyee:
—Hayuiri kua mundu kiti hambeu arama aintaresewara, aintaumaa arama yuiri kuaita sesaimawaita tiarama kuri aintaumaa kuaita umaawaita.
40Asui yepeyepe farizewita suakiwaraita usenduwaita ae aintaunyee ixupe:
—Maitaa sesaimawaita yande yuiri?
41Asui Jesus unyee ainta supe:
—Sesaimawaita rame maa penye timaa periku pepekadu, maa kuiri pembeu, yamaate, ape perikute pepekadu.
Поточний вибір:
Juão 9: BBp
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
