Juão 8
8
Kunya puxuwerawa
1Maa Jesus usu iwitera kiti sera Ulivera.
2Asui kuemaite usu yuiri templu kiti, asui panye kuaita miraita aintausu ipiri, asui uwapika umbue ainta.
3Asui kuaita saserdutita farizewita yuiri aintaururi ipiri yepe kunya aintauwasemuwaa umunya puxuwera ipira irumu imena sui, asui aintauxari upuamu aintapiterupi.
4Asui aintaunyee ixupe:
—Inde rembuewaa, aintauwasemu kua kunya umunya puxuwera ipira irumu imena sui.
5Muize nyenga umundu yayuká arama ita irumu kunyaita umunyawaita iyawe, maitaa rembeu sese inde?
6Yawe aintaunyee ixupe aintausaã arama ae nyãse aintauputari aintaumbeu puxi sese. Maa Jesus uyawika umpinima idedu irumu iwi rese.
7Aintaupurandu resewara ae yawewarawate asui upuamu unyee ainta supe:
—Mayewaa pesuiwara tiwa uriku ipuxuwerasawa uyupiru umburi ita sese.
8Asui uyawika yuiri umpinima iwi rese.
9Asui aintausendu irumu umbeuwaa aintauyumutiĩ turusu aintapia upe asui aintausu isui yepeyepesawa rupi, tuyuweita aintauyupiru aintausu isui, asui Jesus upita yepenyu kua kunya irumu.
10Asui Jesus upuamu umaa tiana yamaa ainta anyunte kua kunya asui upurandu ae:
—Maa kitiana kuaita umbeuwaita puxi nerese, maitaa tiserá yepe ukundenari inde?
11Asui kua kunya unyee ixupe:
—Nẽ yepe seruixawa. Asui Jesus unyee ixupe:
—Ixe yuiri tihakundenari inde, resuana kuiri teremunya puxuwera mukuĩsawa.
Jesus kua mundu turi
12Asui Jesus umbeu ainta supe mukuĩsawa unyee ainta supe:
—Ixete kua mundu turi awa uri serakakuera tikuri uwata pitunawasuwaa upe maa uriku kuri kua turi upakawaa.
13Asui kuaita farizewita aintaunyee ixupe:
—Rembeute neresepawate ape timaa supiwa kua rembeuwaa.
14Asui Jesus usuaxara ainta unyee:
—Hambeu rame maa seresepawa supiwa maa hambeuwaa nyãse hakuawate maa suiwarataa ixe hakuawate yuiri maa kititaa hasu, maa penye tipekuawa maa suiwarataa ixe tiyuiri pekuawa maa kititaa hasu.
15Penye pembeu amuita rese pemanduarisawantu, maa ixe timaarese hambeu.
16Maa hambeu rame maa amuita rese supiwa maa kua hambeuwaa nyãse tiyepenyuwaa ixe maa uajudarite ixe kua umunduwaa ixe.
17Penyenga rupi aintaumpinima kuera, supiwa aintaumbeuwaa kuaita mukuĩ apigawaita upurungitawaita yepewasu.
18Hambeu seresewara pawate, asui sepaya kua umunduwaa ixe umbeu yuiri serese.
19Asui aintaupurandu ae:
—Mametaa nepaya? Asui Jesus usuaxara ainta, unyee ainta supe:
—Tipekunyeseri ixe tiyuiri pekunyeseri sepaya, pekunyeseri rame maa ixe pekunyeseri maa yuiri sepaya.
20Umbeu ainta supe:
—Kua umbeuwaa umbue irumu ainta templu upe mame aintaumuatiriwaa upe dinyeru, maa tire awa umprezu ae nyãse tire usika sangawa.
Jesus umbeu sesewara
21Asui Jesus umbeu ainta supe mukuĩsawa:
—Hasu kuri pesui asui pesikari kuri ixe, asui pemanu kuri pepekadu irumu, tikuri pepuderi pesu maa kiti hasuwaa.
22Asui kuaita judewita aintaunyee:
—Maitaa uputari uyuyuká aepawate? Nyãse umbeu:
—Tipepuderi pesu hasuwaa akiti.
23Asui unyee ainta supe:
—Penyete tiipi suiwaraita ixete iwate suiwara, penyete kua mundu puraita ixe timaa kua mundu pura ixe.
24Hambeu penye arama pemanu kuri pepekadu irumu, tirame peruyari ixete Kristu pemanu kuri pepekadu irumu.
25Asui aintaunyee ixupe:
—Awataa inde? Asui Jesus unyee ainta supe:
—Ixete kua hayupiruwaa hambeu penye arama.
26Hariku siya hambeu arama penye arama siya yuiri hambeu arama perese, maa supiwa kua umunduwaa ixe asui hambeu kua mundu upe kua hasenduwaa irumu.
27Maa tiaintaukuawa sã umbeu ainta supe arama yanepaya Deus rese.
28Ape Jesus unyee ainta supe:
—Pesupiri rame kuri kua usemuwaa umaa kua mundu ape kuri pekuawa ixete ae, timaa nungara hamunya serimutara maa hapurungita kuaye sepaya umbuewaa yawe ixe.
29Asui seirumute kua umunduwaa ixe, tiuxari ixenyu nyãse yawewarawate hamunya kua umusuuriwaa ae.
30Upurungita rire kua inyenga siya miraita aintauxari aintapia sese.
31Asui Jesus unyee ainta supe kuaita judewita uxariwaita aintapia sese:
—Peiku rame kuri senyenga rese supiwa hambuewaita kuri penye.
32Asui pekuawa kuri kua supiwa, asui kua supiwa uyurawa kuri penye.
33Asui aintaunyee ixupe:
—Abraão rimiariruita yande nẽ mairame amu ixupe aramawaita yande. Maitaa rembeu, uyurawa kuri penye?
34Asui Jesus usuaxara ainta unyee:
—Supiwa hambeu penye arama: Panye kuaita umunyawaita pekadu, pekadu ixupe aramawaita ainta.
35Kua yepe apigawa ixupe aramawaa timaa uiku suka upe yawewarawate, maa taira uiku yawewarawate.
36Asui taira uyurawa rame penye supiwa uyurawawaita penye.
37Hakuawate Abraão rimiariruita penye, maa peputari peyuká ixe nyãse timaa senyenga uiku pepia upe.
38Hapurungita sese kua hamaawaa sepaya irumu, maa penye pemunya kua pemaawaa pepaya irumu.
39Asui aintausuaxara Jesus, aintaunyee:
—Abraão kua yanepaya. Asui Jesus unyee ainta supe:
—Abraão rimiariruita rame maa penye pemunya maa maye Abraão umunyawaa yawe.
40Maa kuiri peputari peyuká ixe, ixe hambeuwaa penye arama kua inyenga supiwa hasenduwaa Deus irumu, Abraão tiumunya yawe.
41Pemunya kuaye pepaya uputariwaa yawe. Asui aintaunyee ixupe:
—Umbaa ipayaimawaita yande, yarikute yepe yanepaya aete kua Deus.
42Asui Jesus unyee ainta supe:
—Pepaya rame maa Deus supiwa maa pegustari ixe, nyãse hayuiri Deus sui asui kuiri haiku ike, timaa hayuiri serimutara maa aete umundu ixe.
43Marantaa tipekuawa kua hambeuwaa? Nyãse tipepuderi pesendu senyenga.
44Yurupari iyaraita penye aete pepaya, asui peputari pemunya kuaye uputariwaa yawe, uyukáwaa ae kua mundu uyupirungawa rame, tiuputari kua supiwa nyãse tiyamaa supiwa ipia upe. Uganani rame anyunte upurungita inyenga ugananisawa irumu nyãse ugananiwerawaa ae, nyãse aete gananisawa ipaya ae.
45Hambeuwana penye arama inyenga supiwa ape tipexari pepia serese.
46Awataa pesuiwara uwasemu serese sepekadu? Hambeu rame maa penye arama nyenga supiwa marantaa maa tipexari pepia serese?
47Awa Deus supe aramawaa ae usendu Deus nyenga, timaa Deus supe aramawaita penye sesewara timaa pesendu ixe arama.
48Asui kuaita judewita aintausuaxara ae, aintaunyee:
—Maitaa tiserá supiwa yambeu Samaria suiwara inde, reriku demuniu nepia upe?
49Asui Jesus unyee:
—Tihariku demuniu maa harespetari sepaya, asui penye tiperespetari ixe.
50Tihaputari aintaumee ixe arama purangawaa, maa aikue yepe uputari umee ixe arama purangawaa aete yuiri umbeu aintarese.
51Supiwa hambeu penye arama:
—Awa uruyari senyenga tikuri umaa manusawa yawewarawate.
52Asui kuaita judewita aintaunyee ixupe:
—Kuiri yakuawate reriku demuniu. Kuxima umanu kua Abraão, aintaumanu yuiri kuaita utitikawaita, asui inde rembeu, awa uruyari senyenga tikuri umaa manusawa yawewarawate.
53Maitaa puranga piriwaa inde yaneramunya Abraão ambira sui, kuaita yuiri utitikawaita kuxima aintaumanu? Awataa remanduari inde?
54Asui Jesus umbeu:
—Hamee rame maa purangawaa ixe aramapawate timaa arama ae. Sepaya umee ixe arama purangawaa, aete kua pembeuwaa peDeuste ae.
55Maa penye tipekunyeseri ae, ixe hakunyeseri ae. Hambeu rame maa tihakunyeseri ae ugananiwerawaa maa ixe maye peyawe, maa hakunyeseri ae asui haruyari inyenga.
56Peramunya Abraão suuri usaru serangawa, asui umaa ae asui suuri ae.
57Asui kuaita judewita aintaunyee ixupe:
—Tire reriku sinkuenta akayu, maitaa remaawana Abraão?
58Asui Jesus unyee ainta supe:
—Supiwa hambeu penye arama:
—Ixe haiku Abraão rundere.
59Asui aintaupisika ita aintaumburi arama sese maa Jesus uyumimi aintasui, asui usu templu sui.
Поточний вибір:
Juão 8: BBp
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
