मत्ती 8

कोल़्हे बमारी आल़अ ठीक करनअ

(मरकुस 1:40-45; लुका 5:12-16)

1ज़ांऊं सह तेसा धारा का उंधै होथअ, ता लोगो लागअ तेऊ पिछ़ू दल्ह हांढदअ। 2तिन्नां मांझ़ा का आअ एक कोल़्हे बमारी आल़अ मणछ, और तेऊ टेक्कअ ईशू सेटा माथअ और बोलअ, “हे प्रभू, ज़ै तूह च़ाहे, ता तूह सका मुंह एसा बमारी का ठीक करी।”

3ईशू छ़ुंअ सह आपणैं हाथा करै और बोलअ, “कोल़्हे बमारी का हअ ठीक” और सह हुअ तेभी ठीक। 4ईशू बोलअ तेऊ लै, “हेरे, एसा गल्ला निं होरी कोही का खोज़ी। हाँ, परोहिता सेटा डेऊई एछ आप्पू रहैऊई और कोल़्हे बमारी का शुचै हणें बारै ज़ुंण बधान परमेशरे गूर मुसा आसा खोज़अ द तेऊ साबै दै भैंट। ताकि तिंयां भाल़े कि तूह गअ कोल़्हे बमारी का शुचअ हई।” (लेबी बधान 14:2-32)

एकी सुबैदारो बिश्वास

(लुका 7:1-10)

5तेखअ ज़ांऊं ईशू कफरनहूम नगरी आऐ, तिधी आअ एक सुबैदार तेऊ सेटा लै संघा लागअ एही अरज़ करदअ, 6“हे प्रभू, मेरै आसा घरै एक टैहलू च़ैन्नै सुत्तअ द बडअ भारी दुखी तेऊ आसा दरंग हुअ द।”

7ईशू बोलअ तेऊ लै इहअ, “हुंह आअ तेरै घरा लै और तेऊ दैंऊं ठीक करी।”

8सुबैदारै बोलअ ईशू लै, “हे प्रभू, हुंह निं एता जोगी आथी कि तूह मेरै घरै एछी सके। पर आपणीं खाखा का बोल एक बैण, मुंह आसा विश्वास कि सह जाणअ तेरै बोल़णैं करै ठीक हई।

9“किल्हैकि हुंह आसा आप्पू बी सरकारी टैहलू और मुंह आसा आप्पू उंधै काम करनै आल़ै सपाही लै ढेऊआ करनैओ हक। ज़ांऊं हुंह कसा लै पोर्ही डेऊणा लै बोला, सह डेओआ पोर्ही और ज़हा लै ओर्ही एछणा लै बोला, सह एछा ओर्ही और आपणैं टैहलू लै बोला हुंह कि इहअ कर, सह करा तिहअ ई।”

10ईशू बी हुअ तेऊए गल्ला शूणीं रहैन। तेऊ बोलअ तिन्नां लै ज़ुंण तेऊ पिछ़ू हांढदै तै लागै दै, “हुंह खोज़ा तम्हां का सत्त कि मंऐं निं एऊ होरी ज़ातीए मणछा ज़िहअ विश्वास पूरै इस्राएला दी भाल़अ। 11हुंह बोला तम्हां लै इहअ कि च़ऊ दिशा का एछी बेशणै लोग आबराम, याकूब और इसहाका संघै स्वर्गै राज़ा दी।

12 “पर ज़हा यहूदी लै परमेशरै राज़ किअ त दैणअ, तिंयां काढणैं बागै नरकै न्हैरी ज़ैगा लै। तिधी हणैं तिंयां दाह खिज़ा करै लैल़ा-पकारा लांदै और तिंयां हणैं तिधी दांदा किल्लदै किल्हैकि तिन्नां हणीं झोशा उझ़ुई दी।”

13तेखअ बोलअ ईशू तेऊ सुबैदारा लै, “घरा लै डेऊ, ज़िहअ तेरअ विश्वास आसा तिहअ ई लोल़ी ताल्है हुअ” और तेऊओ टैहलू हुअ तेभी राम्बल़अ।

कई बमारी आल़ै ठीक करनै

(मरकुस 1:29-34; लुका 4:38-41)

14तेखअ आअ ईशू पतरसे घरै और तिधी त पतरसे शाशुई ज़ौर आअ द। 15ईशू छ़ुंअ तेसो हाथ, ता सह उझ़ुई तेभी खल़ी और सह लागी तिन्नें सेऊआ टैहली करदी।

16ज़ांऊं सान्ह पल़ी ता तेऊ सेटा लै आऐ बडै भारी बमार लोग, तिन्नां दी तै भूत, और कई रंगे बमारी, और ईशू किऐ तिंयां सोभ ठीक और बमार लोग बी हुऐ राम्बल़ै। 17इहअ करै हुअ याशायाह परमेशरे गूरै बोलअ द बैण बी पूरअ, (1 पतरस 2:24)

“तेऊ च़की म्हारी कमज़ोरी आप्पू दी,

और तेऊ की म्हारी दाह दूर।”

ईशूए च़ेल्लै हणैंओ मोल

(लुका 9:57-62)

18ईशू भाल़ै आप्पू फेर बडै भारी लोगो छ़ुंड, और तेऊ बोलअ आपणैं च़ेल्लै लै कि समुंदरा पारा लै च़ाल्ला।

19ता तिधी आअ एक शास्त्री। तेऊ ईशू सेटा एछी करै बोलअ, “हे गूरू, ज़िधा लै बी तूह डेओए मुंबी लागणअ ताह पिछ़ू हांढदै।”

20ईशू दैनअ तेऊ लै इहअ ज़बाब, “शैल़ीए हआ जुहल़ी और सरगै डैऊंदै पंछ़ीए हआ बसेरै। पर हुंह मणछो शोहरू ज़ुंण स्वर्गा का आसा आअ द मुल्है निं कोऐ घर आथी ज़िधी हुंह सुत्ती सकूं!”

21तेखअ बोलअ एकी होरी च़ेल्लै तेऊ लै, “हे प्रभू, मेरै आसा घरै प्रोढै हुंह लऊं तिन्नें क्रिया कर्म हणैं तैणीं न्हैल़ी तेखअ एछणअ मुंह ताह संघै।” (1 राज़ा 19:20-21)

22ईशू बोलअ तेऊ लै, “ज़ुंण आत्मां दी मुल्दै आसा तिन्नां दै मुल्दै दाबणै, तूह लाग मुंह पिछ़ू हांढदअ।”

ढिश बागर शांत करनअ

(मरकुस 4:35-41; लुका 8:22-25)

23ज़ांऊं ईशू किश्ती दी बेठअ, तेऊए च़ेल्लै बी लागै तेऊ पिछ़ू हांढदै, 24और समुंदरा दी आई बडी भारी ढिश बागर, और किश्ती लै उझ़ुई बडी-बडी छ़ाली ता तेखअ तिंयां च़ाल्लै किश्ती संघी पाणीं दी डुबी; और ईशू त पिछ़ू सुत्तअ द। 25तेखअ आऐ तिंयां ईशू सेटा लै और लैल़ा-पकारा पाई करै बोलअ, “हे प्रभू, हाम्हां बच़ाऊ हाम्हैं च़ाल्लै खतम हई, किश्ती च़ाल्ली डुबी।”

26ईशू बोलअ तिन्नां लै, “तम्हैं विश्वास किल्है निं करदै, तम्हैं किल्है डरा?” इहअ बोली ईशू उझ़ुअ और ढिश बागर और समुंदरे छ़ाली लै काढी झ़ाहल़ “शांत हअ”, और सह हुअ तेभी शांत। 27ता च़ेल्लै हुऐ रहैन, “अह किहअ मणछ आसा कि एऊए गल्ला शूणां ढिश बागर और समुंदरे छ़ाली बी!”

भूत शाचै दै मणछ ठीक करनै

(मरकुस 5:1-20; लुका 8:26-39)

28तिंयां पुजै समुंदरा पार गरासेनी लाक्कै दी ता तिधी आऐ दूई मणछ मल्थाना का, तिंयां तै भूता करे भर्हुऐ दै और ईशू सेटा पुजै, तिंयां तै एतरै बूरै कि तिन्नां डरै निं तेसा बाता कोहै डेऊई सकदअ त।

29ज़ांऊं तिन्नां का ईशू शुझुअ, ता तिन्नैं बडी-बडी लैल़ा करै ईशू लै बोलअ, “हे परमेशरे शोहरूआ, म्हारअ ताह संघै किज़ै मेल़-ज़ोल़? तूह कै हाम्हां लै म्हारै बगता का पैहलै दुखा दैंदअ आअ?” (लुका 4:34)

30तिन्नां का दूर ज़िहअ त तिधी धारठी लागअ द एक सुंगरो बडअ छ़ुंड च़रदअ। 31तिन्नैं भूतै की ईशू का एही अरज़ “ज़ै तंऐं हाम्हैं इना मणछा का पोर्ही लाई काढी, तै दै हाम्हां इना सुंगरे छ़ुंडा दी डेऊणे ज़ाज़त।”

32ईशू बोलअ तिन्नां लै, “डेओआ”, और तिंयां पेठी सुंगरे छ़ुंडा दी। सह सुंगरो छ़ुंड हुअ बेगरअ और तिन्नैं दैनी समुंदरा लै छ़ाहल़ा। इहअ करै सारअ सुंगरो छ़ुंड हुअ पाणीं मांझ़ै मरी करै खतम।

33तिंयां सुंगरा गुआल़ै तिधा का ठुर्है और घरै डेऊई खोज़ी तिन्नैं सारी नगरी तिन्नां भूता आल़ै मणछो हाल कि किहअ-किहअ हुअ। 34इना गल्ला शूणीं आऐ सारी नगरीए लोग ईशू सेटा और तिंयां सोभ लोग लागै ईशू का एही अरज़ करदै “म्हारै एऊ लाक्कै का डेऊ बागै।”

Поточний вибір:

मत्ती 8: OSJNT

Позначайте

Поділитись

Копіювати