LUKAS 24
24
Jesus Anigota
1Kou dá putu ka edoga naago kodo, awe digii jagamoudo kodaa epeepi tijawita unu enaa agijoudo dokijake me okaapa mei.
2Mogo kodo me okaapa make begokidoke ti-toojogo dou.
3Okei woujo kijake Tuhan Jesus má jato kodo domakai beu.
4Okai kou mana kodo okei ego takuu-takuu teetigo gaa, okai kou gaa kodo ataati kagaba jago wija okei watija aajoonidaa tai.
5Okei weda gajake ebepeka maki maida mijouga kidaa tijake me wija kedaa aeteete mana, „Magijo ka bokata bagee jupi make ija bagee eubai?
6Jakai beu topi, kodeja anigopi. Okai Galilea tota gaa kitita mana kodo gai:
7Kou ko, ’Beu kai peu me Joka peu bagee ganeida eekegajawijake pija boko maida edajawii, tijake widaago naago anigou,’ kiteetegi,” etii.
8Tijake Jesusja etita mana okei gadoke tai.
9Me okaapa make metaato uwijake kei manaido me ida ena ma gaati kedeepa eti-menii, daana joko kaidoopa maija.
10Jagamoudo kei ke Marjam Magdalena ma, Johana ma, Jakub ukame Marjam kodo ma, daana okei ma enaimo joko ka jagamoudo ma, kou mana kodo eti-awitaidoopa eti-menii.
11Kodeja kei manaido dokina mana to gajake okei jagamoudo maakodo egai beu.
12Kodeja Peterus joonidoke tijake me okaapa tibigi uwii. Okai tudumijake oka duba ogoo tijake tumaana ma dou beu, kodeja kagabaido to. Tijake kawe danite kei tidoke tipa gaa gajake wo uwii.
Emmaus Uweetigo Etope-tai Wija ma Akado Tai
13Okai kou naago kodo me ida wija maki katouda eka ki Emmaus auweetigo. Jerusalim make ko meuka amouwe uwitoojogo uwaataa dakii te-taida.
14Ewaa kidaa tita manaido okejai mana aawegai.
15Okejai mana aawegaate ma akaatido ma aateetigo gaa, Jesus kidi okejaapa kijake okejai ma enaimo uwii.
16Kodeja okejaija ka ko Jesus kidi aagamakai beu.
17Tijake okai egaado teete mana, „Ikai má mana wo aawegateete?” Etijake okejai ebepeka nogimidaa tijake aajoonidaa tai.
18Tijake me idaana eka ki Cleopas wo eteete mana, „Jerusalim ka duwa jawe-tai bagee aki to ewo me, mee? getaamaija ewaa kidaa tita manaido ko,” etii.
19Tijake Jesus wo eteete mana, „Kawe dani mana?” Etijake wo aeteete mana, „Jesus, Nazaret ka me kidi maida ka mana. Ugatame jumaapa ma, me jumaapa ma gokobaki tijawiidaiga wega-teetegi me kidi. Okaija mana ma, kei tai agijo ma bida.
20Iniija imam iboudo ma, nitimake-tai ma wagiine tijake eekegajawijake pija boko maida edajawii.
21Kodeja iniija ka gata kodo okai Israil tuma epipikajawiitagi me egata. Daana kou to ko beu, kodeja uno wido umita naago ka kei tidaa tita mana kodo.
22Daana inii jaida ka jagamo wija wido gootoki neetijawipai. Abata didéé me okaapa uwijake
23má jato edomakai beu. Okei joko mejake jaetigo-tai bagee inii ewaida edope enipai, daana jaetigo-tai bagee ka okai ija topi mana etipai.
24Inii jato ka me ida wija wido me okaapa uwijake jagamoudo ka enipai danite domakai. Kodeja Jesus kidi edou beu,” etii.
25Tijake Jesus eteete mana „Ei, dimi beu bagee, tikauwa ka gokobaki tijawiidaiga wegai tita bagee ka mana ikii maakodo gai ipee.
26Beu mee? Keristus kei manaido didi gaduwai tiga beu kai peu tijake okaija ajiipi maida wadoujo kai,” etii.
27Tijake Musa ma, gokobaki tijawiidaiga wegai tita bagee utoma maida go-motijake ugata kapogeije utoma duba okai akaato maida ka manaido boko peta-menii.
28Okei uweete makiida kapauto kai. Tijake Jesus amokaato kaine dani tai.
29Kodeja okei umina eteete mana, „Ineepa neetou, uwaataa kou no, daana tani te tiki,” etii. Tijake okejai ma enaimo ootou.
30Okei ma enaimo animakijake naine jato, okai goti motijake mobu ediimijake utijake tai. Tijake okejaapa jawudii.
31Okejaija ka dimi aweida kijake Jesus aagamakai. Tijake okai igadoke tai.
32Tijake okejai kede aawegaate mana, „Beu mee? iniija kegepa didi, ita maida make mana neewegaagi gaa, daana ugata kapogeije peta-niimeegi,” wegai.
33Okai kou gaa kodo okejai aajoonidaa tijake Jerusalim metaato auwai. Etope-tai ida ena ma gaati kede kotuu timaki-toojogo edomakai, daana okei ma enaimo bagee maija.
34Tijake okei eteete mana, „Beu maa kou, Tuhan anigopi, daana Simon kidiipa ewaa keegi,” etii.
35Tijake ita maida ka ewaa kipa mana kodo okejai aeti-menai, daana goti outeete mana maida make Jesus aagamakipai mana kodo.
Etope-taido Jesus Ewaida Edou
36Okei kou manaido wegaatigo gaa, okai kou gaa kodo Jesus kidi okei jupi joonidoke tai.
37Kodeja okei gootoki tijake weda umina, enija no gajake.
38Tijake Jesus egaado teete mana, „Magijo ka ikii gootoki keega? Daana magijo ka ikiija kegepa dimi takaida kai?
39Dodowei, ani gane ma bado ma ani kidi ki! Najakidou, daana nadomakai, enija tine na beu, mitoo na beu, ikii ani maida nadooga danite ko,” etii.
40Okai kou dani etijake gane ma bado ma emuwakai.
41Okei ideide ma, ego takuu-takuu ma takaida maakodo gai beu tijake, Jesus egaado teete mana, „Ikii naija agijo topa, mee?”
42Tijake okei odita binei tineena menii.
43Okai motijake okei pekaida nai.
44Tijake eteete mana, „Kou ko ani kiteetega mana kodo ikii wa keetootega gaa, ani maida make ugata manaido utoma, Musaja dijo douja manaida ma, tikauwa ka gokobaki tijawiidaiga wegai tita manaida ma, ugaa manaida ma kobadaa tai beu kai peu,” etii.
45Tijake okeija dimi jakebajawii, ugata mana gamake-tita.
46Tijake eteete mana, „Kou dani ebijamakita, Keristus gaduwai beu kai peu tijake widaago naago bokata bagee jupi make anigou,
47daana tedemijake peu awitaido ipa ejaikai mana okaaka dubaiga utoma bageepa eti-menii, Jerusalim make go-motijake.
48Ikii ke kei manaido naawega-tai bagee.
49Juwidou, Naitaija togijawita mana ikii maida mijouwe kijaawii. Kodeja ikii kii makiida doutou, Monika to-taida make bida bokouto ikii maida makidoke taita gaa to,” etii.
Jesus Epaawado Uwii
50Tijake Baitani makiida Jesus ouwii. Okai gane mapido tijake mobu menii.
51Okai mobu meneetigo gaa, okeepa make okainiinii kijake epaawado wado ebuki-motita.
52Okei migaakobe etijake Jerusalim wo uwii, umina ideideidaiga.
53Okei Ugatameja owaa duba Ugatame muta etuwagoo to.
Поточний вибір:
LUKAS 24: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
