JAHJA 6
6
Me Ida Lima Ribu Naija Agijo Jawudita
1Kou wadoutouga Jesus Galilea peku aa adii, Tiberias peku kidi.
2Me umina wedaba eepei, didi bageido maida okaija dou beu agijoudo jakei tijawita edojake kouja.
3Jesus dimi katouda wado patikijake kouda kodaa okaija etope-taido ma enaimo animakai.
4Wadouga etigajake petii tita ga-tou naago kodo kapauto kai, Jahudi ka ibo naago kodo.
5Jesus peka wado doumigijake me wedaba okaapa meete edojake Pilipuspa eteete mana, „Kaija goti jaedaipage kou meido kou no-tita ko?” etii.
6Jesus kou dani etita kou ko egaado taine tijake, okaija kei taine agijo okai ki epi kouja.
7Tijake Pilipus wo eteete mana, „Goti mege muto wido age keetigo maija te tiki, meena tineena, meena tineena ki-toojogo maija,” etii.
8Tijake etope-tai jupi ka me idaana, Simon Peterus kenekame Andereas kidaa Jesuspa eteete mana,
9„Jakai kiija joka idaana daba goti kemo idibi ma, mijo binei wija ma makipi, kodeja magijo taine kei ke, kou me wedaba kou ko?” etii.
10Tijake Jesus eteete mana, „Meido animake-tai etei,” etii. Kouda kodaa bopu umina, tijake meido utoma animake-tai, jameido to muto muto to ko muto, kou wado maija #6:10 lima ribu
11Tijake Jesus goti motijake sembahjang nagajaweege etii, tijake animakita bageidoopa jawudii. Tijake binei kede maija, okeija ide gata danite.
12Okei utoma mobu kidaa tijake etope-taidoopa eteete mana, „Abu kitaija kotuu timakai, ena ma te iga-tita,” etii.
13Okei kotuu timakijake edu tapuja wija ma gaati awimakai, goti puugee kede nopai bagee ka abu kitaija kodo.
14Jesusja dou beu agijo kei tita kodo meido kede edojake wegaate mana, „Beu maa kou, okai ki gokobaki tijawiidaiga wega-tai me makiida meitagi wegaigai kidi,” etii.
Jesus Uwo Wadouga Ita Uwii
15Okei bida peu dimi gajake Jesus ejakimakaine mei; maki jakimake-tai me eewiine gaate dimi kodo Jesus epi kijake wo godoke tai. Okai to dimiida wado uwii.
16Uwaataa kijake etope-taido iteida jamo uwii.
17Tijake okei koma matakai, Kapernaum doodouga peku adiine. Okai kou gaa kodaa wanee ki-toojogo, kodeja Jesus ki okeepa mei beu toojogo.
18Pekuuda kodaa ukija dokogaa umina tai, ukija bida peu pupugu tijake.
19Okei gita ukeete epouda dani awiine gaa, kou gaa kodaa Jesus peku wadouga meete edou; okai koma kapauto kai, tijake okei weda gai.
20Kodeja Jesus eteete mana, „Ani kijoka weda te gai,” etii.
21Okei ideide ma komaageida ebukijake, kou gaa kodo koma iteida dakii tai, okeija ka uwiine titaida kodaa.
Gei Tai Goti
22Aweetaa naago kijake iteida joonidaa tita bageido kede kouda kodaa koma maana ma beu gajake, kodeja ena to, daana kii komaida Jesus etope-taido ma enaimo matakai beu, kodeja etope-taido to peku amo adii.
23Kou ko kou kodeja joko ka koma maija Tiberias makijoopa make mei, Tuhanja Enatobapa nagajaweege etijake goti notaida kapauto kodaa.
24Meido kouda kodaa dojake Jesus beu toojogo, daana etope-taido maija beu, tijake okei maija koma matakijake Kapernaum makijo Jesus euba-uwii.
25Peku amouwaato Jesus ma akado tijake eteete mana, „Ei, Kuduu, menoka mepe?” etii.
26Tijake Jesus wo eteete mana, „Beu maa kou ani kitiine, ikii ani naubaate kou, dou beu agijo dootega kouja ko beu, kodeja ikii goti nojake mobu keetega kouja.
27Ikii peu kija naija agijo maida make ko te kei tai, kodeja imo to tou to naija agijo maida make, kou ko Me Joka ka kiniitagi didee kodo, Nakame Ugatame kidaa boko jaduwajawita me kiija.
28Tijake okei joko eteete mana, „Inii magijo kei tai, Ugatameja kei tai agijo kei taine ko?” etii.
29Tijake Jesus wo eteete mana, „Kii ke Ugatameja kei tai agijo kodo, ikii Ugatameja ebadikumita me kidi maakodo egai.”
30Tijake okeija ka eteete mana, „Kawi ka dou beu agijo nimuwakaipage? inii dojake maakodo kagaine no! Aki magijo kei tai?
31Iniija aijaane muumaane gei tapa Manna nota, kapogeije ebijamakita danite: Okai goti epaawado make okei no-tijake mijo menita.”
32Tijake Jesus eteete mana, „Beu maa kou ani kitiine, Musaja epaawado make goti mijo kinita ko beu, kodeja Naitaija maakodo Goti epaawado make kineete.
33Ugatameja Goti wegaigai kou ko, epaawadoopa make mijo mejake makiida maki utoma ajii bokouto jaduwajawe-tai me kidi,” etii.
34Tijake okei eteete mana, „Ei, Tuani, kou Goti kodo inii niime-ti te,” etii.
35Tijake Jesus eteete mana, „Ani ki Gei Tijawija Goti kodo. Meija aneepa mepi ko, okai naidi te tai, daana meija maakodo nagapi okai jowee te kai.
36Anija kiteega kodo ko, ikii nadou kodeja ikii maakodo nagai beu.
37Utoma bagee utoma Naitaija naimitaido, kou kodo aneepa meitai. Daana meija aneepa mepi ko, ani maa kou te ekonaita.
38Ani epaawado make mijo mei kou ko, anija dimi kei tijawiine ko beu, kodeja nabadikumita me kidaa dimi to.
39Kou ko nabadikumita Naitaija dimi kodo, utoma agijo utoma ani naimitaido kodo ena ma te igaita, kodeja wiwitiida naago kodaa ani ija eewiita.
40Kii ke Naitaija dimi ki, Jokame kidi edomakijake maakodo egai bagee kede ajii tai imo to togoo, daana wiwitiida naago kodaa ani ija eewiita,” etii.
41Tijake Jahudi bagee kitigi motigi etai, „Ani ki Goti epaawadoopa make mijo meta” mana eteegi kouja.
42Tijake okei kede kei teete mana, „Beu, mee? kii ke Jesus kidi, Jusuf jokame, nakame ma ukame ma inii epi kodo. Kawe dani tijake ’Ani ki epaawadoopa make mijo meta’ eneegi kou ko,” wegai.
43Tijake Jesus wo eteete mana, „Ikii kede kitigi motigi akaate te tai.
44Me idaana ma aneepa te meja, kou danite nabadikumita Naitai kidaa okaija kegepa gokobaki te etijawi-toojogo ko. Wiwitiida naago kodaa ani ija eewiita.
45Tikauwa ka gokobaki tijawiidaiga wegai tita bagee ka kapogeije duba kii dani ebijamakita: Okei utoma Ugatameja etopai. Meija Naitaipa make juwijake topipi aneepa mei.
46Me idaana Naitai edota ko beu, kodeja Ugatameepa make meta me kidi to. Okai to Naitai edota.
47Beu maa kou ani kitiine, meija maakodo gapi ko, okai ajii tai imo to togoo.
48Ani ki Gei Tijawija Goti kodo.
49Ikiija aijaane muumaane gei tapa make Manna nota, daana bokata.
50Kou ko epaawadoopa make mijo meta Goti kodo, naija bagee kede te boka-tita no te.
51Ani ki Gei Tai Goti kodo, epaawadoopa make mijo meta. Kou danite meija Goti kodo nopi, ajii tai imo to togoo, daana anija menija Goti kodo ko anija má kou; makiida maki utomaapa meniine, ajii te-tijake.”
52Etijake Jahudi bagee okei kede akaije teete mana, „Kawe dani tijake kii me kiija okaija má jato kodo no-tijake niimija?” wegai.
53Tijake Jesus eteete mana, „Beu maa kou ani kitiine, kou danite ikii Me Joka kidaa má kodo ma, emo kodo ma, te nopa ko, ajii bokouto ikii duba beu.
54Meija anija má kodo ma, emo kodo ma, nopi ko, ajii tai imo to togoo, daana wiwitiida naago kodaa ani ija eewiita.
55Anija má kou ko maakodo naija agijo kouja, daana anija emo kou maija maakodo naija agijo.
56Meija anija má kodo ma, emo kodo ma, nopi ko, okai ani duba tou, daana ani maija okai duba tou.
57Naitai ajii bokouto jago me kidaa nabadikumita danite, daana ani ki ajii bokouto jago me Naitai kidi maida, okai kou danite meija ani nanopi ko, ani maida make ajii tai.
58Kou ko epaawadoopa make mijo meta Goti kodo. Ikiija aijaane muumaane ka nojake wadoutouga bokata dani ko beu. Meija kou Goti ko nopi ko, okai ajii tai imo to togoo,” etii.
59Kou manaido ko Jahudi ka sembahjang owaa duba make wegata, okai Kapernaum make etopeetigo gaa.
60Etope-taido wedaba kii mana ki juwijake wegaate mana, „Kii mana juwii peu. Meija jakimakija?” wegai.
61Kodeja Jesus okeija kitigi motigi teete mana epi kouja, eteete mana, „Kii mana kii ko ikii ego gaaga, mee?
62Kawe dani tijake Me Joka okai kidaa totaida wado uweete ikii edopa ko?
63Roh kodaa ajii boko duwajawija. Má jato ko epa beu. Anija ikeepa kiteega mana muto kou ko Roh ma, ajii bokouto kodo ma.
64Kodeja ikii jupi me ino maakodo gai beu,” etii. Maakodo egai beu bagee Jesus edoga kodaa make epi kouja, daana eekegajawita me kidi maija.
65Tijake okai eteete mana, „Okai kou maida make ani kiteega, me idaana ma aneepa te meja, kou danite Naitaija te menitoojogo ko,” etii.
66Okai kouja etope-taido wedaba ejaikidokii, daana okai ma enaimo uwina beu.
Peterus Jawegata Mana
67Tijake Jesus kidaa etope-tai wija ma gaati kedeepa eteete mana, „Ikii maija uwiine, mee?”
68Etijake Simon Peterus eteete mana, „Ei, Tuhan, inii meimeepa uwii? Akeepa to ajii tai imo to togoo mana muto topa no.
69Daana inii maakodo kagajake umina epaapa timakai, aki ki jimubeu me kidi Ugatameepa make meta kidi,” etii.
70Tijake Jesus wo eteete mana, „Beu, mee? ikii me ida wija ma gaati ani kiwitokeetega? Kodeja ikii jupi me idaana kidi enija,” etii.
71Okai kou mana kodo Judas maida make etita, Simon Iskariot jokame kidi; okai ekegajawita me kiija. Okai etope-tai wija ma gaati kede idaana kidi.
Поточний вибір:
JAHJA 6: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
