JAHJA 17
17
Jesus Sembahjang Tita
1Kei manaido wegajake Jesus epa jato wado dojake eteete mana, „Ei, Naitai, putu muumai kojoka aki Joka kidi ajiipi etijawii, aki Joka kidaa ajiipi katijawi-tita;
2okai me tumaija boko duwajawe-tijake aki menita danite, akija meneetege bagee ajii tai imo to togoo okai boko jaduwatijake.
3Kou dou ajii tai imo to togoo kodo, aki kii ke ena to Ugatame puki kidi okei epi ke-tita, daana akija ebadikumeetege me Jesus Keristus kidi.
4Kii makiida kiija ani ajiipi katijaweetega, daana akija kei tai agijo naimeetege kodo boko duwajaweetega.
5Daana ito ko, ei, Naitai, aki jumaapa ajiipi natijawii; makiida ewaa awii beu gaa kodaa aki jumaapa aneepa tota ka ajiipi agijo kodaa.
6Kii makiida kiija make akija naimeetege bageepa akeeka eti-meneetega; okei ke aki ipuwe, tijake akija naimeetege, daana okei akija mana kodo kaajakimakeetegai.
7Akija naimeetege agijo utoma epauto ko akeepa make to mana kodo okei ito kou gamakai.
8Akija naimeetege mana muto kodo ani meneetega, daana okei jakimakijake ani akeepa make meetega mana kodo epaapa timakai; daana aki kidaa nabadikumeetege me kidi okei maakodo gai.
9Ani sembahjang ejakimakai. Kii makiida maki utoma ani sembahjang ejakimakai ko beu, kodeja akija naimeetege bagee kede, okei ke aki ipuwe kouja.
10Ani ipuwe daniido utoma aki ipuwe maija; daana aki ipuwe dani ani ipuwe maija, daana okei duba ani ajiipi natijawii.
11Ani ki makiida kiija te touta, kodeja okei makiida to-tai, daana ani akeepa jawii. Ei, Naitai, jimubeu me kidi, akija naimeetege bagee kede akeeka duba ejakimakai, okei ena kidi ketita, inai ena kidi danite.
12Ani okei wa enaimo ootoojogo gaa akija naimeetege bagee kede akeeka duba ejakimakeetega; ani emunijake me idaana ma igai beu, kodeja peu kaine me kidi to, ugata kapogeije kodo kobatijake.
13Kodeja ito ko ani akeepa jawii. Ani makiida topa gaa kodaa kei manaido wegai, anija ideide kodo okeija kegepa duba boko duwadoke te-tijake.
14Akija mana kodo ani kaaeti-meneetega. Makiida maki utoma kodaa be egai, okei makiida make ko beu kouja, ani maija makiida make ko beu kodo danite.
15Makiidaapa make ebukigo-tijake ani kadiimai beu, kodeja peu maida make aki emune-tijake.
16Okei kii makiida ipuwe ko beu, ani maija makiida kiija ipuwe ko beu kidi danite.
17Maakodo bokouto duba okeiniinii etijawii. Akija mana kou ko maakodo bokouto kodo.
18Aki makiida nabadikumeetege danite, ani maija okei makiida ebadikumii.
19Daana okei maida make ani akaato aniniinii tijawii, okei maija maakodo bokouto duba okeiniinii ke-tita.
20Ani okei kede to sembahjang ejakimakai ko beu, kodeja okeija wegaitai manaida kouja maakodo nagaitai bageido maija.
21Okei utoma ena kidi ke-tita; aki ki ani duba, ei, Naitai, daana ani maija aki duba kodo danite; okei maija inai duba ena kidi ke-tita; akija nabadikumeetege mana kodo makiida maki utoma maakodo ga-tita.
22Daana akija naimeetege ajiipi agijo kodo ani meneetega, okei ena kidi ke-tita, inai ena kidi danite.
23Ani ki okei duba, daana aki ki ani duba, okei ena kidi manaida boko duwadoke te-tita; aki nabadikumii mana, daana ei egai mana kodo, akija ei nagai danite, makiida maki utoma kodaa ga-tita.
24Ei, Naitai, ani ide akija naimeetege bageido kede ani tojaida okei na tou, akija naimeetege ajiipi agijo kodo okei domaketijake, aki ei nagai kouja, makiida maki utoma ewaa awii beu gaa kodaa.
25Ei, Naitai, maakodo bokouto jago me kidi, makiida maki utoma kodaa aki ki ewo kodeja ani ki aki kidi epi. Daana aki nabadikumeetege mana okei kede epi.
26Akeeka ani kaaeti-meneetega, tijake kaaeti-meniita; akija ei nagai kodo okei duba to-tijake, daana ani maija okei duba to-tijake.”
Поточний вибір:
JAHJA 17: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
