Máà 3
3
Gɔ̃ kɔ̀ zùaàa zɛ̀
(Máfìù 12.9-14; Lúù 6.6-11)
1Zízɛ̀ e ló e mɛ̀ĩ́ Zúù-mìà zì Wálà-kàa wì. Gɔ̃ doó e kɛ yía, à kɔ̀ doó zùaà e kɛ à ká. 2O nyìɛ kɛɛ̀ e kɛá Zízɛ̀ mɔ̀, kɛ é kɛ̀á lɛ́ɛ̀ lo à laà fĩ́ĩ́-dɔ-lùòa káa, kɛ ó gèe aà wɔ̃́ yɔɔ kɛ. 3Zízɛ̀ a gèe gɔ̃ lɛ́ à kɔ̀ zùaà e kɛáa lɛ̀ɛ, “Nu líé zèe.” 4Lɛ́ Zízɛ̀ a gèe o lɛ̀ɛ, “Wɔ̃́ yiè kɛ̀ fĩ́ĩ́-dɔ-lùò káò, wà à yɔɔ kɛ̀ à káò, ɛ̃́ɛ̃́ mi là fĩ́ĩ́-dɔ-lùò ká, wà mi zɛ̀ à káò, à ye kpɛɛ̀ zɛ̀ lɛ́ e sɛ̀?”
Kɛɛ o dò lɛ̀ɛ́ gbaa wéé. 5Zízɛ̀ e o là gɛ̃̀ déĩ́ le, wɔ̃́ áà wàà gbaa. À zò e kɛ wàapìà à gé, ɓii o tóó e kɛ gágà. A gèe gɔ̃́ɛɛ lɛ̀ɛ, “Ì i kɔ̀ɔ fóló.” Gɔ̃́ e kília e à fóló. Lɛ́ à kɔ̀ɔ e kɛ e yiè ká gbaa. 6Fálásíì vɔ̀ o ɓɔ pɛlɛí. Yé e kɛ nɔ́ kília, wà Hɛ́lɔ̀ là mia nì o ló, o o wũ dũ Zízɛ̀ mɔ́ɔ̀ wɔ̃̀ mɔ̀. O kɛ o yɛ́lɛ́ táápìà zí ò lo à zɛɛ̀áa wɛ̃́ĩ̀.
Mia búnùzɛ̀ o Gálàlíì Yíí-pṹã́ sɔ́nɔ́
7Zízɛ̀ wà là tòà-píé-mìà o wɛ̀lɛ̀, o ló Gálàlíì Yíí-pṹã́ sɔ́nɔ́. Mia kù búnù-búnùzɛ̀ o tó o píé. Míá o kília, o gó Gálàlíì, Zùdíà, 8ɛ̃́ɛ̃́ Zùlúsàlɛ̀, e bɛ̀i Édòmíà, wà Zɔ́dã̀-yìì mɛ̀ĩ́, e bɛ̀i, o gó Táyà wà Sádã̀ o mɛ̀ĩ́ píé. Míá o kília, o nu Zízɛ̀ píé, ɓii wɔ̃́ nì e kɛ o kɛpìàa, wa làṹ ma. 9Zízɛ̀ a gèe là tòà-píé-mìà lɛ̀ɛ ó gɔɔ pɛ̀ kɛ à lɛ̀ɛ, ɓii mia gbũa e kɛ gbùò, yékɛ̀ ó kpũṹ-kpũṹ kṹ à mɔ̀. 10Aà mia kɔ̃́ṹ-kɔ̃̀ũ̀ búnùzɛ̀ la. Ye lɛ́ mia yé òó la nɛ́ɛ, ò nu zì nàà, kɛ ó pá à mɔ̀ɔ. 11Yé mia lɛ́ pɛ yɔɔ lɛ o píéa, waà Zízɛ̀ gɛ̃̀ɛ, óò gbìnì à gã̀ dṹɔ̃̀, wáà gbɛ̀ɛ̀ weeá kélɛ̀, “Wálà Gbe lɛ́ i ká.”
12Zízɛ̀ e mɛ́ĩ́ kpó-kpó ɓo pɛ yɔɔ vɔ̀ɔ lɛ̀ɛ weeá kélɛ̀, “Yékɛ̀ ká m tɔ́ gèe mi gbɛɛ lɛ̀ɛ.”
Zízɛ̀ e mia vũ̀ doó wɛ́lɛ́ pèèlɛ sí
(Máfìù 10.1-4; Lúù 6.12-16)
13Yé e kɛ kília, Zízɛ̀ e ló tɔ̃̀ũ̀ dò wĩĩ́, áà mia yé à nàà o káa o súo kɛ̀ e píé, wáà wɛ̀lɛ̀, wáà lò à píé. 14E o vũ̀ doó wɛ́lɛ́ pèèlɛ sí o bà, ó kɛ à píé, kɛ áà o vɔ̀, wáà lò Wálà lé-wè gèeá sí lòũ̀ ká, 15ɛ̃́ɛ̃́ yíkɛ̀ gáàa é kɛ o kɛ̀lɛ̀, wáà pɛ yɔɔ ɓòá mia píé.
16Mia vũ̀ doó wɛ́lɛ́ pèèlɛ lɛ́ e o sía, o tɔ́ lɛ́ e kéa. Sáímɔ̀, lɛ́ Zízɛ̀ e à tɔ́ kpɔ́ zeĩ́ Pílɛ̀, 17e bɛ̀i, Zĩ́ĩ̀ wà e lèe-gé Zɔ̃̀ɔ̃́, lɛ́ o kɛ Zɛ́bɛ́dìì gbe nì káa, Zízɛ̀ e o tɔ́ kpɔ́ zeĩ́ kélɛ̀ Bòánázì. Tɔ́ɔ yí lɛ́ e kélɛ̀, mia lɛ́ o lɛ̀ gbánà lɛ́ ɓea, 18e bɛ̀i, Áã́dùlù, wà Félè, wà Bàtólómì wà Máfìù, e bɛ̀i, Tɔ́mɔ̀, ɛ̃́ɛ̃́ Zĩ́ĩ̀, lɛ́ e kɛ Áfìà gbe káa, wà Táádìà, wà Sáímɔ̀, lɛ́ e kɛ mia lɛ́ o tò-o-dìè-là wɔ̃̀ e kɛ o zò píéa doó-mì káa, 19wà Zúdà Ɛ̀sɛ̀kélìà, lɛ́ è lo à lé góòa káa.
Zízɛ̀ wà Bìɔ́sébà
(Máfìù 12.22-32; Lúù 11.14-23; 12.10)
Lɛ̀ e kɛ kília, Zízɛ̀ e ló e píé kɛ́ì. 20Mia kù gbùò zɛ̀ o pá o kíe mɔ̀ zeĩ́. A kɛ, Zízɛ̀ wà là tòà-píé-mìà òó gbaa bɛ̀i à mɔ̀ ó o lé fèle ɓèlè. 21Lɛ̀ à mìà nì wa maa, o wɛ̀lɛ̀ wáà lò à ɓeíì yi, ɓii mia o kɛ à gèepìà kélɛ̀ à yí wúúà lɛ.
22Wálà kii-dɔ-mìà lɛ́ o gó Zùlúsàlɛ̀ɛ, wa gèe, “Bìɔ́sébà lɛ à píé,” ɛ̃́ɛ̃́ “Pɛ yɔɔ vɔ̀ zì dɔ-mì lɛ́ è yíkɛ̀ gáàa nɔ à lɛ̀ɛ, lɛ́ è pɛ yɔɔ ɓoá mia píéa.”
23Lɛ̀ e kɛ kília, Zízɛ̀ e míáa súo kɛ e píé, áà pĩ̀ã̀ vɔ̀ o lɛ̀ɛ weeá kélɛ̀, “Zi sùu kpɛɛ̀ lɛ́ Sétɔ̃̀ è bɛ̀i à mɔ̀ é Sétɔ̃̀ ɓoá mia píé? 24È kɛ̀á sɛ́lɛ́ doó lɛ́ɛ̀ e dìè yí gìnì, wáà gèlè gɔ̃̀ o kíe káa, sɛ́lɛ́ e kília lɛ̀ɛ́ gɔ̃̀ dɔ gɛ̃̀ɛ̃̀ á ɓo. 25E bɛ̀i, è kɛ̀á ká doó wì-mìà óò o kíe yí gìnì, wáà gèlè gɔ̃̀ o kíe káa, ká e kília, lɛ̀ɛ́ gɔ̃̀ dɔ gɛ̃̀ɛ̃̀ á ɓo. 26Kɛɛ è kɛ̀á Sétɔ̃̀ lɛ́ɛ̀ gèlè gɔ̃ e dìè ká, ɛ̃́ɛ̃́ là mia nì yí gìniì lɛɛ, lɛ̀ɛ́ gɔ̃̀ dɔ gɛ̃̀ɛ̃̀ á ɓo, ɛ̃́ɛ̃́ áá kɛɛ̀ à zì dɔ léĩ́ tópìà ká.
27“Kɛɛ mi gbɛɛ lɛ̀ɛ́ bɛ̀i à mɔ̀ é wàà gɔ̃ yí gágà zɛ̀ píé kɛ́ì, é là pɔɔ̀ sí, yé lɛ̀ɛ́ gɔ̃ yí gágà zɛ̀ e kília yèlè nɛ́ɛ ká. Lɛ à mɔ̀ á yèlè nɛ́ bèĩzɛ̀. Yé aà kɛ gbaa kília, lɛ́ɛ̀ bɛ̀i à mɔ̀ é à píé kɛ́ì pɔɔ̀ sí gbaa.
28“Wánà-wɔ̃̀ lɛ́ m̀ gèe ka lɛ̀ɛ ɓɛ. Kɛ-wɔ̃̀ yɔɔ séĩ́ lɛ́ mia ò kɛ̀ɛ, ɛ̃́ɛ̃́ wɔ̃́ yɔɔ nɔ́ɔ fé lɛ́ ò gèea, lɛ́ɛ̀ bɛ̀i à mɔ̀ é ɓo mia wũ mɔ̀. 29Kɛɛ mi lɛ́ è wɔ̃́ yɔɔ gèe Gɛ̀ɛ̀ Púlúa gbĩ mɔ̀ɔ, à zì kɛ-wɔ̃̀ yɔɔ ɓɛ, ɓòà-wũ-mɔ̀-pɛ̀ wáá ká kpɛ-kpɛ le. Ƃii kɛ-wɔ̃̀ yɔɔ a kɛ kília, lɛ́ɛ̀ lo tóò à wũ mɔ̀ kpɔ̃́ṹ-kpɔ̃́ṹ ká.” 30Zízɛ̀ e wɔ̃́ e kéa gèe kíli, ɓii wa gèe pɛ yɔɔ lɛ à píé.
Zízɛ̀ lòóò wà lèe-gé gɔ̃à zɛ̀
(Máfìù 12.46-50; Lúù 8.19-21)
31Yé e kɛ kília, Zízɛ̀ lòóò wà à lèe-gé gɔ̃à zɛ̀ nì o nu yí. O tó dɔ̀á pɛ́lɛ̀ zèí, o wè-vɔ dɔ yí kélɛ̀ Zízɛ̀ é nu. 32Mia búnùzɛ̀ o kɛ yàá Zízɛ̀ sɔ́nɔ́ɔ, wa gèe à lɛ̀ɛ, “Lɛ̀ gɛ̃̀, i lòóò wà i lèe-gé nì o pɛ́lɛ̀ zèí, wáà i nàà.”
33Zízɛ̀ a là nìɛ̀ weeá kélɛ̀, “Dé e m lòóò wà m lèe-gé nì ká?” 34E mia lɛ́ o kɛ yàá à sɔ́nɔ́ píéa, e o là gɛ̃̀ déĩ́ le, áà gèè, “Yéa, m lòóò wà m lèe-gé nì gɛ̃̀ o ké. 35Ƃii mi lɛ́ è wɔ̃́ lɛ́ Wálà à nàà á kɛɛ kɛ̀ɛ, lɛ́ e m lèe-gé gɔ̃ zɛ̀, wà m lèe-gé lee zɛ̀, ɛ̃́ɛ̃́ m lòóò káa.”
Поточний вибір:
Máà 3: MNT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Mann New Testament © Bible Society in Liberia, 1978.
