Máà 14

O o wũ dũ Zízɛ̀ mɔ́ɔ̀ wɔ̃̀ ká

(Máfìù 26.1-5; Lúù 22.1-2; Zɔ̃̀ɔ̃́ 11.45-53)

1E tó lúó pèèlɛ ká kɛɛ Dìè-mia-là Kpílì, ɛ̃́ɛ̃́ belè lɛ́ belè-fɔ̀ɔ-pɛ̀ wá à bàa, mɔ́ɔ̀ kpílì lúó é ɓɔ. Sálà-ɓò-Wálà-mɔ̀-mìà kpànazɛ̀, wà Wálà kii-dɔ-mìà o kɛ zi naapìà Zízɛ̀ mɔ̀ kɛ ó à kṹ mìàà le, ó zɛ. 2Wa gèe, “Yékɛ̀ kɔ́á kɛ kpílìa lúó ká. À gbú lɛ yía, míáa óò lo nìɛ̀ kɔa mɔ̀.”

Lee doó e nyɔ́nɔ́ káá Zízɛ̀ wĩĩ́ Bɛ́fénì

(Máfìù 26.6-13; Zɔ̃̀ɔ̃́ 12.1-8)

3Zízɛ̀ e kɛ Sáímɔ̀, lɛ́ gbéè e kɛ à mɔ̀ɔ, píé kɛ́ì Bɛ́fénì. Lɛ̀ Zízɛ̀ e kɛ pɛ ɓèlèpìàa, lee doó e wàà kɛ́ì. E nu kpòóò lɛ́ à kɛɛ̀ e kɛá álàbásà-gɛ̀lɛ̀ káa ká. À paà e kɛá tààlà nyɔ́nɔ́, lɛ́ ò si náàa ká. Nyɔ́nɔ́ e kília e kɛ náà dòló ká. E kɛ nyɔ́nɔ́ sɔ̃̀ɔ̃́ gbùò zɛ̀ ká. Lééa e kpòóòa lé kã́, áà nyɔ́nɔ́ɔ kàà Zízɛ̀ wĩĩ́. 4Yé e kɛ kília, wɔ̃́ e mia dò lɛ́ o kɛ yía wàa. Wáà gèè o kíe lɛ̀ɛ, “Mɛ́ e kɛ lɛ́ ò nyɔ́nɔ́ɔ yí sìè ké? 5Ƃii nyɔ́nɔ́ e kéa, wáá lɔ̀ɔ̀ nì dɔɔ̀, tó e pɛlèe kṹ, e dieá lúó wũ yààka yɛ̀ɓo-pɛ̀lèe là. Tó wa sí, wa nɔ mia lɛ́ pɛ wá o kɛ̀lɛ̀ɛ lɛ̀ɛ.” O kɛ gbaa wéépìà à lɛ̀ɛ.

6Kɛɛ Zízɛ̀ a gèe, “Kà kã́ à lɛ̀ɛ. Mɛ́ e kɛ lɛ́ kà à wèĩ́ nàà ɓe? Wɔ̃́ lɛ́ lééa aà kɛ m lɛ̀ɛ, lɛ sɛ̀ kpó-kpó ɓo. 7Ƃii kà mia lɛ́ pɛ wá o kɛ̀lɛ̀ɛ nì káà lo kɛɛ̀ tĩã́ zèe. Lúó nɔ́ kà nàà ká gbũá o mɔ̀ɔ, káà bɛ̀i à mɔ̀ ká kɛ. Kɛɛ m̀ḿ ló kɛɛ̀ ka píé zèe teele. 8Pɛ́ lééa è bɛ̀i à mɔ̀ á kɛɛ, lɛ́ e à kɛ ɓɛ. Aà m gbĩ-kpàla pɛ̀ kɛ nyɔ́nɔ́ ká líé, kɛ m bĩ̀ĩ̀-lùò é tĩã́ ɓɔɔ̀. 9Wánà-wɔ̃̀ lɛ́ m̀ gèe ka lɛ̀ɛ ɓɛ. Lɛ̀ nɔ́ɔ fé lɛ́ ò lo wɔ̃́ làṹ yièa gèeè yi lòũ̀ ká kpóṹ là zèe lɛ̀ɛ tɛ̃̀ɛ̃́ɛ mɔ̀ɔ, óò lo wɔ̃́ lɛ́ a kɛɛ gèeè, kɛ é mia zò vùò à mɔ́ɔ̀ wɔ̃̀ ká.”

Zúdà e wéé à mɔ̀ é Zízɛ̀ nɔ mia lɛ̀ɛ

(Máfìù 26.14-16; Lúù 22.3-6)

10Lɛ̀ e kɛ kília, Zúdà Ɛ̀sɛ̀kélìà, lɛ́ e kɛ Zízɛ̀ là tòà-píé-mìà vũ̀ doó wɛ́lɛ́ pèèlɛɛ doó-mì káa, e ló sálà-ɓò-Wálà-mɔ̀-mìà kpànazɛ̀ píé, kɛɛ é Zízɛ̀ lé gó o lɛ̀ɛ. 11Lɛ̀ wa maa, o gé kpó-kpó e kɛ lipìà. O o wè ɓèlè ó pɛlèe nɔ Zúdà lɛ̀ɛ. Zúdà e gbɛ̃̀ gbaa, áà kɛ-zì nàà kɛ é Zízɛ̀ lé gó o lɛ̀ɛ.

Zízɛ̀ wà là tòà-píé-mìà o kpílìa pɛ̀ ɓèlè

(Máfìù 26.17-25; Lúù 22.7-14, 21-23; Zɔ̃̀ɔ̃́ 13.21-30)

12Belè lɛ́ belè-fɔ̀ɔ-pɛ̀ wá à bàa, zì kpílì lúó bèĩzɛ̀, lɛ̀ lɛ́ o kɛ ɓáá nyɔ̀nɔ́ vɔ̀ zɛpìà Dìè-mia-là Kpílì wɛ̃́ĩ̀a káa, Zízɛ̀ là tòà-píé-mìàa wa wɛ̃́ĩ́-lɔ̀ɔ kɛ weeá kélɛ̀, “Mɛ́ɛ lɛ́ ɓà nàà kó ló, kó léɓèlè pɛ̀ kɛ i lɛ̀ɛ yí, kɛ ɓá ɓèlè Dìè-mia-là Kpílìa wɛ̃́ĩ̀?”

13Zízɛ̀ e là tòà-píé-mìàa pèèlɛ vɔ, áà gèè o lɛ̀ɛ kélɛ̀, “Kà lo pɛlɛí. Gɔ̃ doó lɛ́ɛ̀ lo gbɛ̃̀ɛ̃̀ ka mɔ̀. Múnú pà yíí ká zɛ̀ lɛ́ɛ̀ lo kɛɛ̀ à kɛ̀lɛ̀, áà lò à ká. Kà tó à píé. 14Ká lɛ́ gɔ̃́ e kília è lo wàà wìa, kà gèe à dàa-mì lɛ̀ɛ, ‘Tísɛ̀ a gèe kéèé, À zì lɔ̀ɔ̀-mi-kà lɛ́ wà là tòà-píé-mìà ò lo Dìè-mia-là Kpílìa mɔ́ɔ̀ pɛ ɓèlè yia, lɛ mɛ́?’ 15Lɛ́ɛ̀ lo lɛ̀ gbùò dò zɔ̃̀ɔ̃̀ ka lɛ̀ɛ lɛ̀í-kàa yí. Kɛ́ì-pɔ̀ɔ̀ lɛ à lɛ̀ mɔ̀, e pɛ̀ kɛɛ̀ɛ zɛ̀ ká. Á zɔ̃̀ɔ̃̀á ka lɛ̀ɛ, kà kɔ̀à léɓèlè pɛ̀ kɛ yí.”

16Là tòà-píé-mìàa o wɛ̀lɛ̀ gbaa, wáà lò pɛlɛí. O pɛ séĩ́ gɛ̃̀ nɔ́ lɛ̀ zí Zízɛ̀ a gèe à ká o lɛ̀ɛ lɛ́ ɓe. Yé e kɛ kília, o Dìè-mia-là Kpílì mɔ́ɔ̀ léɓèlè ò lo à ɓèlèa, pɛ̀ kɛ à lɛ̀ mɔ̀.

17Lɛ̀ nyɛ́ŋɛ̀ĩpíé e kɛɛ, Zízɛ̀ wà là tòà-píé-mìà vũ̀ doó wɛ́lɛ́ pèèlɛɛ o nu. 18Lɛ̀ o kɛ o lé ɓèlèpìà gbaa téɓò mɔ̀ɔ, Zízɛ̀ a gèe, “Wánà-wɔ̃̀ lɛ́ m̀ gèe ka lɛ̀ɛ ɓɛ. Ka doó-mì lɛ́ɛ̀ lo m lé góò. Míá nɔ́ kɔ̀à pɛ ɓèlè e kéa, doó-mì lɛ.”

19Là tòà-píé-mìàa o zò e dɔ gbaa e gã̀ mɔ̀, wáà wɛ̃́ĩ́-lɔ̀ɔ kɛ̀ Zízɛ̀ kɛ̀lɛ̀ doó doó weeá kélɛ̀, “Ḿ gɔ̃̀, ma wáá ká?”

20Zízɛ̀ a yí ɓo weeá kélɛ̀, “Lɛ mia vũ̀ doó wɛ́lɛ́ pèèlɛ lɛ́ kɔ̀à ɓi nì kɔ̀à belè wàà kɔ̀ɛ̀ doó yía, ka doó-mì ká nɔ́. 21Mi Gbe lɛ́ɛ̀ lo gaà, lɛ̀ zí nɔ́ à bɛ̃̀ɛ̃ɛ̃̀ lɛ à ká Wálà-kii yía lɛ́ ɓe. Kɛɛ gɔ̃ lɛ́ è lo à lé góòa, é ké nìé, gɔ̃́ e kília mɔ́ɔ̀ wɔ̃̀ lɛ́ɛ̀ lo kɛɛ̀ yéĩ̀zɛ̀ò. Áá kɛɛ̀ sɛ̀ gɔ̃́ e kília lɛ̀ɛ, è kɛ̀á òó gbaa à yea ká.”

Óò belè ɓèlè

(Máfìù 26.26-30; Lúù 22.15-20; 1 Kɔ̀léĩ́tĩ̀ã̀ 11.23-25)

22Lɛ̀ o kɛ pɛ ɓèlèpìàa, Zízɛ̀ e belè sí, e Wálà zúo ɓo, a kpuú yɛ́ kélé kélé, áà nɔ̀ là tòà-píé-mìàa lɛ̀ɛ, áà gèè, “Kà à sí. M gbĩ-kpàla lɛ́ ɓɛ.”

23Zeĩ́a, e kɔ̀ɛ̀ɛ sí, e Wálà zúo ɓo, a sí, a dɔ̀ kɛ o kɛ̀lɛ̀. O séĩ́-séĩ́ o pɛ dò mi à yí. 24Zízɛ̀ a gèe o lɛ̀ɛ, “M léà lɛ́ e ké ɓɛ. Lɛ́ɛ̀ lo káà tã́ã̀ mia búnùzɛ̀ wɛ̃́ĩ̀. Ye lɛ́ e Wálà zì wè-dɔ-wèa wɛ́lɛ́ káa. 25Wánà-wɔ̃̀ lɛ́ m̀ gèe ka lɛ̀ɛ ɓɛ. M̀ḿ ló gbaa ɓɛ̀lɛ̀-wɛ́lɛ́ ɓɛɛ yíí e kéa miì, é tóá kíli lúó lɛ́ m̀ lo à yíí dɛɛ miì à ká, lɛ̀ lɛ́ Wálà tóò lɛ mia là yia mɔ̀ɔ é ɓɔ.”

26Yé e kɛ kília, o tã́ doó ɓo, o ló gbaa tɔ̃̀ũ̀ lɛ́ ò si Ɔ́lèa mɔ̀.

Zízɛ̀ a gèe Pílɛ̀ lɛ́ɛ̀ lo à gèeè làá dɔ

(Máfìù 26.31-35; Lúù 22.31-34; Zɔ̃̀ɔ̃́ 13.36-38)

27Zízɛ̀ a gèe o lɛ̀ɛ, “Ka séĩ́ káà lo kã́ã̀ m mɔ̀, m tó m doó ká. Ƃii à bɛ̃̀ɛ̃ɛ̃̀ lɛ Wálà kii yí kélɛ̀, ‘Wálà lɛ́ɛ̀ lo ɓáá vɔ̀ líé-sí-mì zɛɛ̀, tó ɓáá vɔ̀ɔ bɛ̃̀ɛ̃ o wɛ̃̀ĩ gbaa.’ 28Kɛɛ yé maà wɛ̀lɛ̀ ga kɛ̀lɛ̀ɛ, ḿm̀ lo dɔɔ̀ ka mɔ̀ líé m ló Gálàlíì.”

29Pílɛ̀ a gèe à lɛ̀ɛ, “Mia yé o tóa, o séĩ́ óò kã̀ã́ i mɔ̀ɔ, ma ye m̀ḿ ló kã́ã̀ i mɔ̀.”

30Zízɛ̀ a gèe à lɛ̀ɛ, “Wánà-wɔ̃̀ lɛ́ m̀ gèe i lɛ̀ɛ ɓɛ. Bĩ́míà téé-tèè e ké ɓɛ, kɛɛ tɔ̀ɔ̀ é tĩã́ wéè pèèlɛɛ, ɓi kpó-kpó íì lo à gèeè e kíe yí yààka kélɛ̀ ìí m dɔ.”

31Pílɛ̀ e kɛ tĩã́ gèepìà dóo gágà kélɛ̀, “Ó kɛ̀á ó kò ɓi ko zɛ bɛ̃̀ɛ̃, m̀ḿ ló à gèeè m̀ḿ i dɔ.”

O séĩ́-séĩ́ o wɔ̃́ nɔ́ doó e kília gèe.

Zízɛ̀ e sɛ̀nɛ ɓo Gɛ̀sɛ́mɛ́nì

(Máfìù 26.36-46; Lúù 22.39-46)

32O ɓɔ lɛ̀ lɛ́ ò si Gɛ̀sɛ́mɛ́nìa mɔ̀. Zízɛ̀ a gèe là tòà-píé-mìàa lɛ̀ɛ, “Kà yà nɔ̀ɔɔ̀ ké yé maà kɛ sɛ̀nɛ ɓopìàa ká.”

33Yé e kɛ kília, e Pílɛ̀, Zĩ́ĩ̀ wà Zɔ̃̀ɔ̃́ o sí, e ló o ká. Lɛ̀ e ló o káa, gbíní-gbíní e gbɛ̃̀ áà nù Zízɛ̀ là, ɛ̃́ɛ̃́ à zò áà mɛ̀ à mɔ̀. 34Zízɛ̀ a gèe o lɛ̀ɛ, “Zò-dà-zízàá nì lɛ́ lɛ m mɔ̀ɔ, lɛ ɓúópìà m zɛɛ̀. Kà tó nɔ̀ɔɔ̀ ké, ká yà ka nyìɛ́.”

35E ló líé e ɓéĩ́ ká. E e dìè dà tã́ã̀, áà sɛ̀nɛ ɓò weeá kélɛ̀, “É kɛ̀á à kɛ-zì lɛ ɓea, yékɛ̀ wɔ̃́ nyɔ́ɔ̀ɔ lúóa é ɓɔ m mɔ̀.” 36E sɛ̀nɛ ɓo zeĩ́, áà gèè, “M Dàa, m Dàa, íì bɛ̀i wɔ̃́ nɔ́ɔ fé kɛɛ̀. Ì wɔ̃́ nyɔ́ɔ̀ɔ kɔ̀ɛ̀ e kéa ɓo m là. Kɛɛ ì i dìè nàà-ká-wɔ̃̀ kɛ, kɛɛ yékɛ̀ í m nàà-ká-wɔ̃̀ kɛ.”

37Yé e kɛ kília, Zízɛ̀ e yɛ́ e zí, e nu là tòà-píé-mìà yààkaa gɛ̃̀ɛ̃̀ yi bà. A gèe Pílɛ̀ lɛ̀ɛ, “Sáímɔ̀, yi lɛ́ ɓà zɛ ɓɛ? Ìí bɛ̀i yàà i nyìɛ́ áwà doó fèle yee mɔ̀? 38Kà ka yɛ́lɛ́ kɛ ka dìè mɔ̀, káà sɛ̀nɛ ɓò, yékɛ̀ yí-dã́-wɔ̃̀ é ɓɔ ka mɔ̀. Ka zò yɛɛ̀ lɛ ka lɛ̀ɛ, kɛɛ ka gbĩ-kpàla yí lɛ́ɛ̀ ga.”

39E ló zeĩ́ lɛ̀ dò mɔ̀, áà sɛ̀nɛ ɓò, áà wɔ̃́ nɔ́ doóa gèè zeĩ́. 40E yɛ́ zeĩ́ e zí, e nu là tòà-píé-mìàa gɛ̃̀ɛ̃̀ yi bà, ɓii o nyìɛ-kèlè e kɛ gbíínia mɔ́ɔ̀ wɔ̃̀ mɔ̀. Òó gbaa wɔ̃́ e kɛ o mɔ̀ ó gèe Zízɛ̀ lɛ̀ɛ dɔ.

41Zízɛ̀ e nu o píé kpolà yààka zɛ̀, áà gèè o lɛ̀ɛ, “Ka tĩã́ ka fĩ́ĩ́ dɔpìà, ɛ̃́ɛ̃́ ka tĩã́ yi zɛpìà? Aà bɛ̀i. Lúó aà ɓɔ gbaa à mɔ̀. Kà lɛ̀ gɛ̃̀. Waà Mi Gbe dɔ̀ kɛ kɛ-wɔ̃̀ yɔɔ kɛ-mìà kɛ̀lɛ̀ gbaa. 42Kà wɛ̀lɛ̀, kɔ́á ló. Kà lɛ̀ gɛ̃̀. M lé-gó-mìa gɛ̃̀ e ké.”

O Zízɛ̀ kṹ

(Máfìù 26.47-56; Lúù 22.47-53; Zɔ̃̀ɔ̃́ 18.3-12)

43Zízɛ̀ e kɛ tĩã́ wéépìà lɛ̀ Zúdà lɛ́ e kɛ là tòà-píé-mìà vũ̀ doó wɛ́lɛ́ pèèlɛɛ o doó-mì káa, e ɓɔ à mɔ̀ɔ ká. Mia kù lɛ́ gèlè-gɔ̃-làà, ɛ̃́ɛ̃́ mia mɛ̀-yìlì-kpuú nì e kɛ o kɛ̀lɛ̀ɛ, Zúdà e kɛ o bà, wáà nù. Míá o kília, sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Wálà kii-dɔ-mìà, e bɛ̀i, mia dìè-dìè vɔ̀ lɛ́ o o vɔɔ. 44Mí è lo Zízɛ̀ nɔɔ̀ mia lɛ̀ɛ, aà gèe míáa lɛ̀ɛ líé kélɛ̀ lɛ́ɛ̀ lo Zízɛ̀ zɔ̃̀ɔ̃̀ o lɛ̀ɛ. A gèe, “Gɔ̃ lɛ́ m̀ lo lóò ḿ m bè gbɛ̃̀ à kpéĩ́ mɔ̀ɔ, kɛɛ à ye lɛ. Kà kṹ, ká ka nyìɛ kɛ à mɔ̀ káà lò à ká.”

45Lɛ̀ Zúdà e ɓɔ nɔ́ɔ, e ló Zízɛ̀ píé, áà gèè à lɛ̀ɛ, “Tísɛ̀,” áà e bè gbɛ̃̀ à kpéĩ́ mɔ̀. 46O wí Zízɛ̀ mɔ̀, wa kṹ gbaa. 47Mia lɛ́ o kɛ dɔ̀á yia, o doó-mì e là gèlè-gɔ̃-làà gã́ã́ e kéĩ́, e sálà-ɓò-Wálà-mɔ̀-mìà wũ-là-mì là lùò yà à ká e tóó mɔ̀. A tóó kã́ pɛ̃ĩ le. 48Zízɛ̀ a gèe o lɛ̀ɛ, “Káà nu gèlè-gɔ̃-làà wà mia mɛ̀-yìlì-kpuú nì ká, káà nù m kṹũ̀ à ká, lɛ̀ mi lɛ́ è nu mi dà-luú-là zɛ̀ kṹũ̀? 49Lúó búnù-búnùzɛ̀ káa, m kɛ ka píé sálà-ɓò-Wálà-lɛ̀ɛ-kà wì, máà pɛ zɔ̃̀ɔ̃̀ ka lɛ̀ɛ. Kɛɛ kàá gbaa m kṹ. Kɛɛ wɔ̃́ lɛ́ à bɛ̃̀ɛ̃ɛ̃̀ lɛ Wálà kii yía, lɛ à mɔ̀ é kɛ.”

50Yé e kɛ kília, là tòà-píé-mìàa séĩ́ o kã́ à mɔ̀, wáà wà ló ɓò.

51Gɔ̃-nɛ̀fú doó e kɛ yí, sɔ púlú lɛ́ nɔ́ à kpɛ́nɛ̀ e kɛá à ká, áà tòá Zízɛ̀ píéa. O wí à mɔ̀. 52Kɛɛ e sɔ́ɔ tó o kɛ̀lɛ̀, áà lò bàlá e kpã́ã́ ká.

Zízɛ̀ lɛ dɔ̀á mɛ̀ĩ́-sà ɓo-mìà wɛlɛ líé

(Máfìù 26.57-68; Lúù 22.54-55, 63-71; Zɔ̃̀ɔ̃́ 18.13-14, 19-24)

53O ló Zízɛ̀ ká sálà-ɓò-Wálà-mɔ̀-mìà wũ-là-mì píé kɛ́ì. Sálà-ɓò-Wálà-mɔ̀-mìà kpànazɛ̀, e bɛ̀i, mia dìè-dìè vɔ̀, ɛ̃́ɛ̃́ Wálà kii dɔ-mìà séĩ́ o kɛ pápìà o kíe mɔ̀ yi. 54Pílɛ̀ e kɛ Zízɛ̀ ká gbèkèni, áà tò à píé. Pílɛ̀ e ló sálà-ɓò-Wálà-mɔ̀-mìà wũ-là-mìa píé-dɔ-gàlà yí. Pílɛ̀ wà gɔ̃́ e kília zì nyìɛ-kɛ̀à-mɔ̀-mìà o kɛ yàá yi. Pílɛ̀ e kɛ e nɛ́nɛ́ ɓopìà tíéa mɔ̀. 55Sálà-ɓò-Wálà-mɔ̀-mìà kpànazɛ̀, wà mɛ̀ĩ́-sà ɓo-mìà séĩ́ o mi naa é kélá-wè ɓo Zízɛ̀ gbĩ mɔ̀, kɛɛ ó Zízɛ̀ zɛ. Kɛɛ òó gbaa mi gbɛɛ gɛ̃̀. 56Mia búnùzɛ̀ o nɛ̀ kpɔ́ Zízɛ̀ mɔ̀, kɛɛ o wúú e kɛ gbɛɛ̀ gbɛɛ.

57Yé e kɛ kília, mia dò o wɛ̀lɛ̀, o nɛ̀ kpɔ́ Zízɛ̀ mɔ̀ weeá kélɛ̀, 58“Ko kɛ yí, áà gèè kéèé, ‘Ḿm̀ lo sálà-ɓò-Wálà-lɛ̀ɛ-kà e ké lɛ́ mia wa dɔɔ wíì tã́ã̀, tó yé lúó yààka aà diea, tó ma à yé lɛ́ mia òó ló à dɔɔ̀ɔ dɔ.’ ” 59Kɛɛ é kɛ bɛ̃̀ɛ̃ kília, míáa o wúú e kɛ tĩã́ nɔ́ gbɛɛ̀ gbɛɛ.

60Sálà-ɓò-Wálà-mɔ̀-mìà wũ-là-mìa e wɛ̀lɛ̀ e dɔ míáa wɛlɛ mɔ̀, áà Zízɛ̀ wɛ̃́ĩ́-lɔ̀ɔ kɛ̀ weeá kélɛ̀, “Wɔ̃́ gbɛɛ wá i lé, kɛ ɓá gèe wɔ̃́ ò gèe i gbĩ mɔ̀ɔ yí?”

61Kɛɛ Zízɛ̀ lɛ̀à gaà e kɛá, lɛ̀ɛ́ gbaa wɔ̃́ gbɛɛ gèe. Zeĩ́a, sálà-ɓò-Wálà-mɔ̀-mìà wũ-là-mìa a wɛ̃́ĩ́-lɔ̀ɔ kɛ kélɛ̀, “Ƃi lɛ́ i Kɛ́lɛ̀ì, lɛ́ e Wálà lɛ́ kò à tɛ̀nɛɛ Gbe káa?”

62Zízɛ̀ a gèe à lɛ̀ɛ, “Ma lɛ́ m à káa. Ɛ́ɛ̃́ káà lo Mi Gbe gɛ̃̀ɛ̃̀ yàá Wálà lɛ́ yíkɛ̀ gáàa laa kɛ̀lɛ̀ɛ kɔ̀ yiè yí. Ɛ́ɛ̃́ káà lo à gɛ̃̀ɛ̃̀, áà nù lɛ̀í-kii yí.”

63Sálà-ɓò-Wálà-mɔ̀-mìà wũ-là-mìa e e mɔ̀-sɔ̀ pɛ́ɛ́, áà gèè, “Mɛ́ kɔa tĩã́ mɔ́ɔ̀ kélá vɔ̀ naapìà ɓɛ? 64Ƃii kaà zi lɛ́ e wɔ̃́ yɔɔ gèe à ká, é gbɛ̃̀á Wálà gbĩ mɔ̀ɔ ma. Ka zì yɛ́lɛ́-táá láà zɔ̃̀ɔ̃̀ ka lɛ̀ɛ kpɛ?”

O séĩ́-séĩ́ o mɛ̀ĩ́-sà káá à wĩĩ́, wáà gèè ó à zɛ.

65O dò o gbɛ̃̀ gbaa, wáà o leí sùò Zízɛ̀ là, ɛ̃́ɛ̃́ o pɛ kpaa à wɛlɛ yí, wáà à mɛ̀, wáà gèè à lɛ̀ɛ, “Mí e i mɛ̀ɛ tɔ́ gèe.” Nyìɛ-kɛ̀-mia-mɔ̀-mìàa o Zízɛ̀ kṹ, wáà mɛ̀.

Pílɛ̀ a gèe lɛ̀ɛ́ Zízɛ̀ dɔ

(Máfìù 26.69-75; Lúù 22.56-62; Zɔ̃̀ɔ̃́ 18.15-18, 25-27)

66Lɛ̀ Pílɛ̀ e kɛ tã́ã̀ sálà-ɓò-Wálà-mɔ̀-mìà wũ-là-mìa píé-dɔ-gàlà yía, gɔ̃́ɛɛ là yɛɓo-kɛ-loàa doó-mì e nu yí. 67Lɛ̀ e Pílɛ̀ gɛ̃̀ áà e nɛ́nɛ́ ɓòa, a gɛ̃̀ sĩ́ĩ́ le, áà gèè, “Ƃi vɔ̀ɔ i kɛ gɔ̃ lɛ́ è go Názàlɛ̀, lɛ́ ò si Zízɛ̀ɛ píé.”

68Kɛɛ Pílɛ̀ a tèé ɓo weeá kélɛ̀, “M̀ḿ dɔ. Ɛ́ɛ̃́ wɔ̃́ ɓà gèea, m̀ḿ à yí ma.” Pílɛ̀ e tó gbaa gàlà-lé-mɔ̀-zì píé. Yé e kɛ nɔ́ kília, tɔ̀ɔ̀ áà wèè.

69Lee-nɛ̀fú doó nɔ́ zeĩ́a, e Pílɛ̀ gɛ̃̀. Lɛ̀ a gɛ̃̀ɛ, e gbɛ̃̀ gbaa áà gèè zeĩ́ mia lɛ́ o kɛ dɔ̀á yi píéa lɛ̀ɛ, “Míáa doó-mì lɛ́ e kéa.” 70Pílɛ̀ e bɛ̀i a tèé ɓo zeĩ́.

Yé à lɛ̀ ɓéĩ́ e túóa, míá o kɛ dɔ̀á yia, wa gèe zeĩ́ Pílɛ̀ lɛ̀ɛ, “I o doó-mì ká wánà kpó-kpó ká. Ƃii íì go Gálàlíì.”

71Pílɛ̀ e gbɛ̃̀ gbaa, áà e dìè náá kpɔ̀ dóo gágà, áà gèè, “Gɔ̃ lɛ́ kà wɔ̃̀ gèe e ké ɓaa, m̀ḿ à dɔ.”

72Yé e kɛ nɔ́ kíli zeĩ́a, tɔ̀ɔ̀ áà wéé kpolà pèèlɛ zɛ̀ ɓò. Lɛ̀ e kɛ kília, Pílɛ̀ zò e vùò gbaa wɔ̃́ lɛ́ Zízɛ̀ a gèe à lɛ̀ɛ ká. Wɔ̃́ e kília, lɛ́ e kélɛ̀, “Kɛ tɔ̀ɔ̀ é tĩã́ wéè pèèlɛɛ, íì lo à gèeè e kíe yí yààka kélɛ̀ ìí m dɔ.” Yé e kɛ kília, à zò e dà e mɛ̀ĩ́, áà gbóó ɓò.

Поточний вибір:

Máà 14: MNT

Позначайте

Поділитись

Копіювати