Máfìù 24
24
Zízɛ̀ a gèe Wálà‐kà lɛ́ɛ̀ lo wíì tã́ã̀
(Máà 13.1-2; Lúù 21.5-6)
1Zízɛ̀ e gó gbaa yí. Lɛ̀ e kɛ gbaa gópìà sálà‐ɓò‐Wálà‐lɛ̀ɛ‐kàa wìa, là tòà‐píé‐mìà o nu à píé, kɛ ó ká nì lɛ́ à dɔɔ̀ e kɛá yia zɔ̃̀ɔ̃̀ à lɛ̀ɛ. 2Zízɛ̀ a gèe o lɛ̀ɛ, “Káà pɔɔ̀ nì e kéa séĩ́ gɛ̃̀? Wánà‐wɔ̃̀ lɛ́ m̀ gèe ka lɛ̀ɛ ɓɛ. Gɛ̀lɛ̀ doó fèle wá lɛ̀ e kéa mɔ̀, kɛ ó gèe lɛ́ɛ̀ lo tóò wɔ̀ɔ̀á e wɔ̀lɔ̀ mɔ̀. Óò lo o séĩ́‐séĩ́ o wíì tã́ã̀.”
Wɔ̃́ nyɔ́ɔ̀ɔ gɛ̃̀ɛ̃ɛ̃̀ wà sã̀‐dɔ
(Máà 13.3-13; Lúù 21.7-19)
3Lɛ̀ Zízɛ̀ e kɛ yàá tɔ̃̀ũ̀ lɛ́ ò si Ɔ́lèa mɔ̀ɔ, là tòà‐píé‐mìà o nu à píé o doó lɛ̀ píà. Wa gèe à lɛ̀ɛ, “Lúó lɛ́ wɔ̃́ e kéa è lo kɛɛ̀ à káa, gèe ko lɛ̀ɛ. Mɛ́ è lo à zɔ̃̀ɔ̃̀ kélɛ̀ i nu‐lùò ɛ̃́ɛ̃́ lúó ko yàáa líé‐nyɛ‐lùò aà ɓɔ kɔ̀ɛ́?”
4Zízɛ̀ a gèe kélɛ̀, “Kà ka yɛ́lɛ́ kɛ ka dìè píé, yékɛ̀ ká tó mi nɔ́ɔ fé é ka bèkɛ̀ ɓo. 5Ƃii mia búnùzɛ̀ óò lo nuù m tɔ́ yí, wáà gèè, ‘Ma lɛ́ m Kɛ́lɛ̀ìa káa.’ Ɛ́ɛ̃́ óò lo mia búnù‐búnùzɛ̀ bèkɛ̀ ɓoò. 6Káà lo gèlè yé lɛ ka ká kɔ̀ɛ́ɛ vĩ maà, ɛ̃́ɛ̃́ káà lo gèlè yé lɛ ka ká gbèĩa, làṹ maà. Kɛɛ yékɛ̀ ka zò é mɛ̀ ka mɔ̀. Ƃii lɛ wɔ̃́ nì e kília mɔ̀ ó kɛ. Kɛɛ wɔ̃́ séĩ́ léĩ́‐tópìè wá nɛ́ à ká. 7Wè gbɛɛ̀ gbɛɛ gèe‐mìà óò lo gèlè gɔ̃ɔ̀ o kíe ká. Ɛ́ɛ̃́ sɛ́lɛ́ gbɛɛ̀ gbɛɛ lɛ́ɛ̀ lo gèlè dàà e kíe là. Lɔ̀ɔ lɛ́ɛ̀ lo dàà. Kpóṹ là lɛ́ɛ̀ lo kɛɛ̀ kã́pìà, áà lò gìè lɛ̀ gbɛɛ̀ gbɛɛ mɔ̀. 8Wɔ̃́ nyɔ́ɔ̀ɔ è lo kɛɛ̀ ɓea, o séĩ́ o gbɛ̃̀‐pìè lɛ́ e kília.
9“Yé aà kɛ kília, óò lo ka kṹũ̀, tó o ka nɔ mia lɛ̀ɛ ó ka sã̀ dɔ, tó wáà ka zɛ̀. Ka lɔ̀ lɛ́ɛ̀ lo nyɛɛ̀ sɛ́lɛ́ séĩ́‐séĩ́ yí‐mìà mɔ̀ m mɔ́ɔ̀ wɔ̃̀ mɔ̀. 10Yé aà kɛ kília, mia búnùzɛ̀ óò lo góò zía mɔ̀. Óò lo o kíe nì lé góò mia lɛ̀ɛ, tó o kíe nì lɔ̀ áà nyɛ̀ o mɔ̀. 11Mia búnùzɛ̀ lɛ́ ò o dìè si Wálà là dɔ̀‐lé‐là‐mìà, lɛ́ o wá mɔṹ à káa, óò lo kɛɛ̀ ɓe. Ɛ́ɛ̃́ óò lo mia búnùzɛ̀ bèkɛ̀ ɓoò. 12Lɔ̀‐kɛ̀à‐mɔ̀ lɛ́ e mia búnùzɛ̀ yía wɔ̃̀ wũ lɛ́ɛ̀ lo gaà, ɓii kɛ‐pɛ̀ yɔɔ kɛɛ̀ là lɛ kpɔ́pìàa mɔ́ɔ̀ wɔ̃̀ mɔ̀. 13Kɛɛ mi lɛ́ è lo e zò dɔɔ̀ gágà é ɓɔ à líé‐nyɛpìàa, lɛ́ɛ̀ lo laà. 14Óò lo wɔ̃́ làṹ yiè e ké, lɛ́ à gbɛ̃̀ɛ̃̀ lɛ Wálà là tò‐mia‐là mɔ̀ɔ, gèeè lòũ̀ ká sɛ́lɛ́ séĩ́ yí, kɛ é kɛ kélá ká sɛ́lɛ́ séĩ́‐séĩ́ yí‐mìà wɛlɛ mɔ̀. Yé aà kɛ kília, wɔ̃́ léĩ́‐tó‐lùò áà nù gbaa.
Tɔ̃́ɛ̃́ yé lɛ yɔɔ kpó‐kpó ɓoa
(Máà 13.14-23; Lúù 21.20-24)
15“Káà lo ka tɔ̃́ɛ̃́ yé lɛ yɔɔ kpó‐kpó ɓo, lɛ́ dɔ̀‐Wálà‐lé‐là‐mì Dànyá e wɔ̃́ gèe é gbɛ̃̀á mɔ̀ɔ, gɛ̃̀ɛ̃̀ dɔ̀á Wálà là lɛ̀ púlúa mɔ̀.” (Mi lɛ́ è wɔ̃́ e kéa lónia, è à yí ma.) 16“Lúó e kília káa, mia lɛ́ o Zùdíàa, ò wɛ̀lɛ̀ ó ló tɔ̃̀ũ̀ wĩĩ́ píé. 17Mi lɛ́ è lo kɛɛ̀ e píé ká là lɛ̀ía, yé aà gbɛ̃̀ tã́ã̀a, yékɛ̀ é ló kɛɛ é là pɔɔ̀ lɛ́ lɛ à píé kɛ́ìa dò nɔ́ɔ fé sí. 18Mi lɛ́ lɛ e píé nyɛ́nɛ̀ĩ̀a, yékɛ̀ é yɛ́ e zí, é ló là sɔ síì. 19É ké nìé. Loà lɛ́ o gí lɛ o mɔ̀ɔò, e bɛ̀i, o yé lɛ́ o nyɔ́ dɔpìà nɛ́ léaò, lɛ́ɛ̀ lo kɛɛ̀ dóo yéĩ̀zɛ̀ o mɔ̀ lúó e kília ká. 20Kà sɛ̀nɛ ɓo yékɛ̀ ka zì wàà kà lo à ɓoòa, ká ɓo lɛ̀ɛ‐yíí‐pɛ̃́, e bɛ̀i, fĩ́ĩ́‐dɔ‐lùò ká. 21Ƃii wɔ̃́ nyɔ́ɔ̀ɔ lɛ́ è lo kɛɛ̀ lúó e kília káa, lɛ́ɛ̀ lo kɛɛ̀ wɛlɛ yɔɔ zɛ̀, é dieá wɔ̃́ yɔɔ lɛ́ e yàá mɔ́ kɛɛ̀ ká kpóṹ là zèe gã̀‐gbɛ̃̀pìà é ɓɔá pɛ́nɛɛ mɔ̀ɔ là. Ɛ́ɛ̃́ yé aà kɛ kília, mia òó ló wɔ̃́ nyɔ́ɔ̀ɔ sùua gɛ̃̀ɛ̃̀ gbaa. 22Kɛɛ Wálà aà lúóa là ɓo gbaa. È kɛ̀á lɛ̀ɛ́ gbaa kɛ kília, mi dò nɔ́ɔ fé lɛ̀ɛ́ gɔ̃̀ laà. Kɛɛ mia lɛ́ e o sía mɔ́ɔ̀ wɔ̃̀ mɔ̀ɔ, Wálà lɛ́ɛ̀ lo à mɔ́ɔ̀ lúó e kília là ɓoò.
23“Lúó e kília káa, yé mi dò aà gèe ka lɛ̀ɛ, ‘Kà lɛ̀ gɛ̃̀, Kɛ́lɛ̀ìa gɛ̃̀ e ké,’ ɛ̃́ɛ̃́ aà gèe, ‘Ye gɛ̃̀ e yía,’ yékɛ̀ ká gɛ̃̀ wánà ká. 24Ƃii mia lɛ́ ò o dìè si Kɛ́lɛ̀ì, ɛ̃́ɛ̃́ o yé ò o dìè si Wálà là dɔ̀‐lé‐là‐mìà, lɛ́ o wá mɔṹ à káa, óò lo kɛɛ̀ ɓe. Óò lo lé‐pa‐wɔ̃̀ kpó‐kpó, ɛ̃́ɛ̃́ à kpàlézɛ̀ nì kɛɛ̀, kɛ ó mia lɛ́ Wálà aà o sía, bèkɛ̀ ɓo, yé bɛ̀i lɛ o mɔ̀ɔ ká. 25Ɛ̀ɛ̀, maà wɔ̃́ɔ gèe ka lɛ̀ɛ líé, kɛ é tĩã́ kɛɛ̀.
26“À mɔ́ɔ̀ wɔ̃̀ mɔ̀ɔ, yé waà gèe ka lɛ̀ɛ, ‘Kà lɛ̀ gɛ̃̀, lɛ yɛ̀í làa,’ yékɛ̀ ká ló yi. Ɛ́ɛ̃́ ó gèeá ka lɛ̀ɛ, ‘Kà lɛ̀ gɛ̃̀, lɛ ká‐yí‐kà wì e bĩ̀ĩ̀pìàa,’ yékɛ̀ ká gɛ̃̀ wánà ká. 27Ƃii zi lɛ́ lɛ̀í‐kɛ‐gɛ́lɛ́ é kɛ̀á nyɛ́nɛ́ wɛ̀lɛ̀pìà áà lò lɛ̀ fɔ̀nɔ̀á sí nyɛ́nɛ́ dàpìàa, zi nɔ́ doóa lɛ́ Mi Gbe nu‐kɔ̀ è lo kɛɛ̀áa.
28“Lɛ̀ nɔ́ɔ fé lɛ́ pɛ bílí lɛ yía, lɛ́ kɔ̀a vɔ̀ ò kpũ̀ũ‐kpũ̀ũ kũ yía.
Mi Gbe lɛ nupìà
(Máà 13.24-27; Lúù 21.25-28)
29“Yé wɔ̃́ nyɔ́ɔ̀ɔ lɛ́ è lo kɛɛ̀ lúó e kília káa, aà die nɔ́ kéa, nyɛ́nɛ́ lɛ́ɛ̀ lo e zì lɛ̀‐fɔ̀nɔ‐kɔ̀ gíniì, ɛ̃́ɛ̃́ mɛnɛ lɛ̀ɛ́ ló ɓíì gbaa. Sĩ̀ã́ã̀ŋèlè vɔ̀ óò lo góò lɛ̀í, ɛ̃́ɛ̃́ yíkɛ̀ gáàa nì yé o lɛ̀í‐kii yí píéa, óò lo wɛ̀lɛ̀ o wɔ̀lɔ̀‐mɔ̀ píé. 30Yé aà kɛ kília, Mi Gbe gɔ̃̀á lɛ́ɛ̀ lo kɛɛ̀ lɛ̀í‐kii yí. Ɛ́ɛ̃́ wè gbɛɛ̀ gbɛɛ gèe‐mìà lɛ́ o tã́ã̀ zèea, óò lo gbóó ɓoò, ɛ̃́ɛ̃́ óò lo Mi Gbe gɛ̃̀ɛ̃̀, áà nù lɛ̀í‐kii là lɛ̀í yíkɛ̀ gáàa ká, ɛ̃́ɛ̃́ lɛ̀‐fɔ̀nɔ‐kɔ̀ kpànazɛ̀ yí. 31Túlú gbùò wéè lɛ́ɛ̀ lo dɔɔ̀, ɛ̃́ɛ̃́ lɛ́ɛ̀ lo Wálà là vɔ‐mìà vɔɔ̀ kpóũ là kɔ̀ pɔ̃́ũ̀ yììsɛ là, kɛɛ ó Wálà là míá aà o sía pá o kíe mɔ̀. É kã́ nyɛ́nɛ́ wɛ̀lɛ̀‐pìè wà à dà‐pìè mɔ̀ɔ, míáa óò lo góò o fĩ̀ã̀ lɛ̀ séĩ́ mɔ̀.
Féè‐yìlì e pɛ zɔ̃̀ɔ̃̀ mia lɛ̀ɛ
(Máà 13.28-31; Lúù 21.29-33)
32“Tó féè‐yìlì é pɛ zɔ̃̀ɔ̃̀ ka lɛ̀ɛ. Yé à kɔ̀ mɔ̀ aà kɛ lɔ́ɔ́‐lɔ̀ɔ̀, áà e dèĩ̀a, káà à yí dɔ kélɛ̀ lɛ̀ɛ‐yíí‐pɛ̃́ lɛ nupìà kɔ̀ɛ́. 33Zi nɔ́ doóa káa, yé kaà wɔ̃́ e kéa séĩ́ gɛ̃̀ áà kɛ̀ɛ, káà lo à yí dɔɔ̀ kélɛ̀ lúóa aà ɓɔ ka ká kɔ̀ɛ́ nɔ́ fɔ̃̀nyɔ̀ɔ̀ le. 34Wánà‐wɔ̃̀ lɛ́ m̀ gèe ka lɛ̀ɛ ɓɛ. Míá o ɓe yà kɔa ɓoa yía, o séĩ́ o gaà lɛ̀ɛ́ ló kɛɛ̀ à ká, kɛɛ wɔ̃́ nì e kéa séĩ́ é tĩã́ kɛɛ̀. 35Lɛ̀í wà tã́ã̀ zèe o nyɛ‐pɛ̀ ká. Kɛɛ m lé‐wè lɛ̀ɛ́ ló nyɛɛ̀.
Mi gbɛɛ lɛ̀ɛ́ lúóa dɔ
(Máà 13.32-37; Lúù 17.26-30, 34-36)
36“Kɛɛ mi nɔ́ɔ fé lɛ̀ɛ́ lúó ɛ̃́ɛ̃́ lɛ̀‐kpɛ̀iì è lo nuù kília dɔ. Wálà là vɔ‐mìà lɛ́ o lɛ̀ía, ɛ̃́ɛ̃́ ma à Gbe, é kɛ bɛ̃̀ɛ̃ ko káa, kòó à dɔ. M Dàa doó lɛ́ nɔ́ è à dɔɔ. 37Mi Gbe nu‐lùò lɛ́ɛ̀ lo kɛɛ̀ lɛ̀ Nóà kɛ̀‐à‐yí lùò lɛ́ ɓe. 38Lúó lɛ́ e kília ká, kɛ yíí paàa é tĩã́ nuùa, mia o kɛ pɛ ɓèlèpìà wáà pɛ mì, ɛ̃́ɛ̃́ gɔ̃à wà loà nì wáà o kíe sì, é ló é ɓɔá lúó kpó‐kpó lɛ́ Nóà e lóá gɔɔ yía mɔ̀. 39Kɛɛ òó gbaa wɔ̃́ lɛ́ e kɛ kɛpìàa yí dɔ, é tóá kíli yíí paàa é nu, é o séĩ́ o sí, é ló o ká. Zía lɛ́ è lo kɛɛ̀á yé Mi Gbe aà nua káa. 40Lúó e kília káa, gɔ̃à pèèlɛ óò lo kɛɛ̀ yɛɓo kɛpìà nyɛ́nɛ̀ĩ̀. Óò lo mi doó síì, tó mi doó‐mìa bɛ̃̀ɛ̃ e là tó ɓo yí. 41Loà pèèlɛ óò lo kɛɛ̀ pɛ zɔ̃pìà lɛ̀ lɛ́ ò pɛ zɔ̃ yía mɔ̀. Óò lo mi doó síì, tó mi doó‐mìa bɛ̃̀ɛ̃ e là tó ɓo yí. 42Yé lɛ kília, kà ka yɛ́lɛ́ kɛ ka dìè píé. Ƃii lúó lɛ́ ka Dàa‐mì è lo nuù à káa, káà à dɔ. 43Kɛɛ kà à yí dɔ kélɛ̀, è kɛ̀á ká dàa‐mì lɛ́ɛ̀ kã̀ã‐mì nu‐lùò dɔɔ, áá e nyìɛ kɛɛ̀ là káa mɔ̀. Lɛ̀ɛ́ gɔ̃̀ à tóò kɛ kã̀ã‐mì é là káa lé wí. 44À mɔ́ɔ̀ wɔ̃̀ mɔ̀ɔ, lɛ ka bɛ̃̀ɛ̃ ka mɔ̀ ka pɛ̀ kɛɛ̀ é kɛá teele. Ƃii Mi Gbe lɛ nupìà lúó lɛ́ ye wá ka gé é nuáa ká.
Yɛɓo‐kɛ‐mì zò‐dɔ̀à‐mɔ̀ zɛ̀ wà à yé mi ìí bɛ̀i i zò dɔɔ̀ à mɔ̀ɔ
(Lúù 12.41-48)
45“Yé lɛ kília, dé e mɔṹ yɛɓo‐kɛ‐mì gíkã́ã̀a zɛ̀, lɛ́ ò bɛ̀i à mɔ̀ ó o zò dɔ à mɔ̀ɔ ká? À ye lɛ́ à dàa‐mì aà yɛɓo‐kɛ‐mìà séĩ́ lɛ́ o à píé kɛ́ìa, kpɔ́ à kɔ̀ là, kɛ é wà léɓèlè nɔ o lɛ̀ɛ à nɔ̀‐o‐lɛ̀ɛ lùò káa. 46Yé yɛɓo‐kɛ‐mì e kília dàa‐mì aà nu à gɛ̃̀ɛ̃̀ à kɛpìà kília, zò géli lɛ yɛɓo‐kɛ‐mì e kília kɛ̀lɛ̀. 47Wánà kpó‐kpó káa, ḿm̀ à gèe ka lɛ̀ɛ, pɛ séĩ́ lɛ́ e o dàa‐mì e kília kɛ̀lɛ̀ɛ, lɛ́ɛ̀ lo à kpɔ́ɔ̀ là yɛɓo‐kɛ‐mì e kília kɔ̀ là. 48Kɛɛ é kɛ̀á lɛ yɛɓo‐kɛ‐mì yɔɔ káa, lɛ́ɛ̀ lo à gèeè e dìè lɛ̀ɛ kélɛ̀, ‘M dàa‐mì lɛ̀ɛ́ ló nuù pɛ́lɛ̀,’ 49tó áà gbɛ̃̀ áà e bɛ́ĩ̀ yɛɓo‐kɛ‐mìà mɛ̀, tó wà yɔ‐mi‐mìà wáà pɛ ɓèlè, ɛ̃́ɛ̃́ wáà pɛ mì e kíe là. 50Yé aà kɛ kília, à dàa‐mì lɛ́ɛ̀ lo yɛ́ɛ̀ e zí lúó lɛ́ à nyìɛ wá à ká à gɛ̀nɛ̀, ɛ̃́ɛ̃́ lɛ̀‐kpɛ̀iì lɛ́ lɛ̀ɛ́ à yí dɔ, lɛ́ɛ̀ lo nuù à káa ká. 51À dàa‐mì, lɛ́ɛ̀ lo à kpuú kã́ã̀ kélé kélé, tó e wɔ̃́ lɛ́ è lo kɛɛ̀ mia lɛ́ ò o dìè wɛlɛ lia káa, tó e à zì kɛ. Lɛ́ɛ̀ lo gbóó ɓoò, tó áà e sɔ̃́ɔ̃́ là ɓèlè yi.
Поточний вибір:
Máfìù 24: MNT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Mann New Testament © Bible Society in Liberia, 1978.
