Ioane 1
1
1Kowahoro ta’ui nouowa wade aioa wia Wade Iehovamu naibaha emidio wia Wade nou Iehovari. 2Nouri Wade, kowahoro ta’ui nouowa Iehovamu naibaha emidio. 3Nana auwoha nouro naibaha idodiaiwa wia kidodiai nana ata ia biahai, na’u nou himia kidodiai nanari. 4Kiiro noumu emidio wia nouri kiiro nouvia oubi pidari. 5Wia Pida duriiwa naibaha imeivia ina duriiro nou umo biahai. 6Na’u dubu naibaha o’uro Iehovaro otiodoiro, nou painari Ioane. 7Nouri dubu nou keauri mere aibo naibaha o’uro, nou naibaha o’u Pida imapoiwai; ina nouri oubi auwohao aiwaimo‐iraromodioi nou himia wade’i noudo. 8Nouvia nou Pida biahai, na’u nou naibaha o’uro imapoiwai. 9Nouri nou naiheha Pidari, nouro batibatito naibaha o’uro wia oubi auwoha imeiviai. 10Nou batibatiwa emidiotuti wia batibati nouro idodiaiwa wia batibatio nou umo biahai. 11Nou himia oubio nou naibaha o’uro, ina nou himia oubio nou aubuaimo biahai. 12Wia nouri oubio nou naibaha aubuaumo, nou himia paina kararomodio oubi, nouro neido pupuo imaati Iehova mere oitimoi. 13Nei sawiudo irotutimo biahai, naiba tama niro nana noudo biahai, naiba dubu niro nana noudo biahai, Iehova nou himiaudori rirotutidumo. 14Wia nouri wade goho aibo tau oiti, nou imomu aiemidio (wia nou himia moari na’i imoo tau neauriumo nouri moari na’i Iehova morio kahomai mere nou aibori.) Niainiai kiwabatuti na’i wia naiheha na’i nou ramu nou aiapee. 15Ioane nouido emapoiwa wia wade nouri iaotuti: Nouri dubu moro opu nou nomowouro, nouro mo opuito notiodoiro mabu nouri nou opuitori. 16Imo auwoha tau niviaumo niainiai kiwabatuti na’i ina ata niainiai kiwabatuti na’i, nou kapee na’i noudo. 17Mabu nouri Mosero wade modobo bubu tau emaati, wia Iesu Keriso niainiai kiwabatuti na’i wia naiheha na’i, nouro imoido naibaha iwouro. 18Hiwio auwoha dubu ataro Iehova emeauri biahai ina nouri morio kahomai Mere Iehova bodorowa emidiotuti nouro nou aiowaduuti.
19Wia nouri nou Ioane kiao wade’i nou ta’uwa Iudaia oubio kohena oubira, Levi oubira, nouido naibaha itiodoumo Ierusalemaudo nouido atodoimoi, Ro botiri? 20Ina nou naibaha obodoi, nouro aratio biahai, nouro naibaha obodoi: Mo Keriso biahai. 21Ina neiio nouido naibaha atodoumo: Ina ro botiri, Ina ro Eliara? Wia nou naiba iaowa; Biahai. Ina ro nouri peroveta dubura? Wia nou naibaha imowameai; Biahai. 22Ina neiio nouido naibaha iaowaumo; Ro botiri? Imoido taroro, mabu nouri imo kitiodoi oubi neido wade owaiwaimoi, ro himia, touna wade rarodai? 23Nou naiba iaowa; Moro na’u dubu waderi, nou burubatiwa niauwoidiodai, Pai‐dubuido nave gamooiha tadodiaimo, naiba Isaia, nouri peroveta dubu, nou aro. 24Nouri kitiodoi oubii nei Parisea oubiri. 25Wia neiio nouido atodoumo nouido naiba iaowaumo, Ina ro Keriso biahai wia Isaia biahai, wia nouri peroveta‐dubu biahai ina roro babatiso teiri rimowaidio. 26Ioane neido imowameai naiba iaowa, Moro oboito babatiso nimowaidio wia na’u dubu rio turi gorowa rotoi, rio umo biahai nou. 27Nouri dubu moro opu nou nomowouro mo nouro opuito notiodoiro, ina mo mea biahai nou himia douboi kono ivi omopiwoi. 28Nouri nana Betaniawa tau idodiai Ioridana ata hapuowa, nouri batiwa Ioanero babatiso nimowaidio.
29Dudueido Ioanero Iesu naibaha eauri nouido o’uro, nou naiba iaowa: Taaurimo Iehova mamoe. Nouro uba uba kidia batibatiudo auwoha aiwaitatedioi. 30Nouri nou dubui opuito moro rioido nou naro; Nouri dubu moro opu nou nomowouro mo nouro opuito notiodoiro: mabu nouri nou opuitori. 31Wia mo umo biahai nou; moro oboito babatiso imowaidioi no’uro, ina nouri nou Isaraela oubido aiwaiwaeviai. 32Wia Ioane nouri kemapoi wade nouro naibaha iao: Moro aineauri Tana Urio, badu aibo, toboroudo oruoro wia nou nou ohuwa emidio. 33Wia mo umo biahai nou, wia nouro mo ainotiodoiro oboito babatiso iwaiidioi, nouro moido naibaha iaowa; Nouri dubu roro nou reauri Tana‐urio nouro roruo nou ohuwa remidio, nouri duburo Tana‐urioito babatiso aiwaiwaidioi. 34Wia moro tau neauri wia mo pupuo wade tau naro; nouri Iehova Mereri.
35Wia dudueido ata, Ioane naibaha otoa nou himia kitomudio mere neewamu. 36Wia Iesu orohowa nouro naibaha eauri, naiba iaowa, Taauritoi nouri Iehova Mamoeri. 37Wia kitomudio mere neewa nou kiao wade naibaha orovidioudo wia Iesu dooudo neiti naibaha orobodoudo. 38Wia Iesu naibaha iremeteai neiti naibaha iviamama nou dooudo idaorobodoudo wia nou neitido naiba iaowa: Touna romohodudo rieiti? Neiti nouido naibaha aroudo, Rabbi, (nouri wade kowaeviari Auwo‐dubu), Ro tobatiwa remidiodai? 39Wia nou neiti naibaha iama’uotimama, Ta’udo ina rieiti aireauridaidudo. Nouri neiti naibaha o’udo, wia nou kemidio batii nouowa neitio naibaha oweaudo, wia hiwio nouri neiti noumu naibaha emidioudo, nouri nou ta’uwa hiwio kahoiia tariwai. 40Na’u dubu neiti Ioane kiao wade irovidioudo wia nou do’oudo orobodoudo, nou paina Anederea, Simona, paina ata Pita, nou niamari. 41Nou himia namu Simona, nouro opuito owea, nouido naiba iaowa, Imoo Messaia tau noweaumo (nouri wade kowaeviari Keriso). 42Wia Iesuido nouro nou naibaha owou. Ina nou ta’uwa Iesuro nou naibaha eauri, nou naiba iaowa: Rovia Simona, Iona mereri; roro aiwai dodoi Pita, nouri wade kowaeviari, Akabu.
43Wia dooudo hiwio’i Iesu Galileaito ohuo niroi, wia Pilipo nouro naibaha owea wia Iesu nouido naiba iaowa: Mo dooudo ta’uro. 44Wia Pilipo Betesaida mereri, Anederea wia Pita neibi himia oopori. 45Pilipo Nataniela naibaha owea, nouido naiba iowa, Imo tau noweadumo dubu nouri Mose bubu‐bukawa titi nou iati naiba peroveta oubi kiatii. Nouvia Iesuri, Nasareta duburi, Iosepa mereri. 46Wia Nataniela nouido naiba iaowa: Teiri mea nana Nasaretaudo arorohoumo? Pilipo nouido naiba iaowa: Ta’uro ta’auri. 47Iesuro Nataniela nouido ko’uwa naibaha eauriwa wia nouro nou naibaha owaduo: Ta’aurimo Isaraela naiheha dubu nouri, kiromohuwodio nana, noumu ia biahai. 48Nataniela nouido naiba iaowa: Mo umo roro tou ta’uwa oiti? Iesuro naiba omowameai nouido naiba iaowa: Opuito Piliporo ro nou ama’uoti moro nouwa neauri, ro suke nua mabuwa emidio. 49Nataniela naibaha omowameai, nouido naiba iaowa: Rabbi rovia Iehova Mereri, Rovia Isaraela Pai‐duburi. 50Iesuro naiba omowameai nouido naiba iaowa: Roro araromodio mabu nouri mo roido nou naro, moro ro suke nua mabuwa nou neauri? Doo auwo auwo nana roro aiwaiauri, nou aibo biahai. 51Wia nouro nouido naiba iaowa: Naiheha, naiheha mo roido ainaro, Toboro araeraiwa roro aiwa‐auri wia Iehova gururu oubi orovioruriomowa wia oroworuodiomowa Oubiha‐mere nou ohuwa.
Поточний вибір:
Ioane 1: KXW1941
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the British and Foreign Bible Society in 1941.
