Génesis 19
19
Sodomatawan Gomorrata Dios Yaya ushakätsinqan
1Patsa qoyaykaptinnam#19.1 Wakin runakunaqa patsa tsakaykaptinnam niyan. Sodomaman chäyarqan puntarnin aywaq ishkan angelkuna. Lotnam tsay markaman yaykuna punkuchö jamaraykarqan. Tsay angelkunata rikaykurmi Lotqa saslla puntankunaman qonqurikuykurqan urkunpis patsaman töpanqanyaq. 2Tsaymi paykunata nirqan: <<Taytakuna, patsatsiyänaqpaq wajïman aku aywashun. Tsaychö chakikikunata mayllakur shütaskirnam waray alliq päsakuyanki>>.
Tsaynö niptinnam paykuna niyarqan: <<Pächi, taytay. Waqtallachöpis waräkuyäshaqmi>>.
3Peru tsaynö mana munayaptinpis wajinman patsakuyänanpaq Lot yapay yapay rugaptinmi wajinman aywayarqan. Wajinman chaykatsirnam levadürannaq tantata ruratsir alli mikuykunata mikuyänanpaq Lot kusinatsirqan.
4Lotpa wajinchö manaraq puñuyaptinmi Sodoma markachö jövinpita qallaykur hasta awkinkunayaq Lotpa wajinta tumat kunchawaskiyarqan. 5Tsaymi Lotman qayaykachar niyarqan: <<¿Maychötan kaykäyan wajikiman patsakamuq runakuna? ¡Jina höra violayänäpaq qarqamuy!>>
6Tsaynö niyaptinmi wajinpita Lot yarquskir punkunta alli wichqarkur 7tsay runakunata nirqan: <<Taytakuna, rugayällaqmi. Qorpalläkunata ama penqakuypaq mana allita ruraykuyällaytsu. 8Qorpäkunapa rantin ishkay warmi tsurïkunata jipimushaq imaykatapis munayanqaykinö rurayänaykipaq. Tsurïkunaqa manaraqmi ni pï ollquwanpis puñuyashqaraqtsu. Wajïman chämuq runakunataqa ama ni imatapis ruraykuyällaytsu>>.
9Tsaynö Lot niptinmi runakuna niyarqan: <<¡Qamqa washata witiy! ¿Juklä runa kaykarku mandayämayta munanki? ¡Kananmi sïqa paykunata rurayta munayanqäpitapis mas peor rurayäshayki!>>
Tsaynö nirmi Lotta maqarnin kunjatakuskir wajipa punkunta amiq aywayarqan.
10Peru qorpankunanam ruripita lamkaykamur waji rurinman Lotta sutaykurnin punkuta wichqaskayämurqan. 11Tsaypitam waqtachö runakunatawan jövinkunata y awkinkunatapis qaprayaskatsiyarqan. Tsaynö karmi waji punkuta ashiykarlla pishipaskiyarqan.
12Tsaynam qorpankuna Lotta niyarqan: <<¿Kay markachö mas aylluykikuna kanku? Aylluykikuna kaptinqa warmitawan ollqutapis y mashayki kayänanpaq kaq jövinkunatapis pusharkur kay markapita karuman aywakuy. 13Atskaqmi Dios Yayaman quëjakuyashqa kay markachö runakuna alläpa jutsasapa kayanqanta. Tsaynö jutsasapa kayaptinmi noqakunata Dios Yaya kachayämashqa kay markata jankat ushakätsiyänäpaq>>.
14Tsaynö niyaptinnam mashan kananpaq kaq jövinkunaman aywaykur Lot nirqan: <<¡Kay markapita sas llapantsik aywakushun! ¡Dios Yayam kay markata ushakätsinanpaq kaykan!>>
Tsaynö niptinpis Lot brömapanqanta yarparmi creyiyarqantsu.
15Patsa waraykaptinnam Lotta angelkuna niyarqan: <<Kay markata ushakätsiyaptï mana wañunaykipaq sas aywakuy warmikitawan ishkan tsurikikunata pushakurkur>>.
16Lot mana sas yarquptinmi angelkuna paytawan warminta y tsurinkunatapis makipita jancharkur markapita jorquyarqan. Tsaynöpam Dios Yaya llakiparninkuna jorqurqan tsay markachö mana ushakäyänanpaq.#2Ped. 2.7. 17Tsay markapita karuchöna kaykäyaptinmi jukaq ángel nirqan: <<Mana wañuyänaykipaq cörrilla qeshpir aywakuyay. Ama qepaman tikrayämunkitsu ni pampachöpis ama ichïyankitsu. Jirkaman chäyanqaykiyaq qeshpir aywakuyanki>>.
18Peru Lotnam nirqan: <<¡Taytaykuna, ichikllata shuyaykayällämay! 19Qamkunaqa alli runakuna karmi llakipäyämar mana wañuyänäpaq jipiyämashkanki. Kay markata sas ushakätsirqa jirkaman manaraq char lätaykachaykaqllatach ushakätsiyämanqa. 20Taytakuna, taqay cerca taksha markaman chanqäyaq shuyaykuyällay. Taqay takshalla markataqa ama ushakaykatsiyällaytsu>>.
21Tsaynam ángel nirqan: <<Mañakamanqaykita wiyaykaqmi. Taqay taksha markataqa mañakamanqaykinömi mana ushakätsishaqtsu. 22Peru tsaynö kaptinpis saslla tsay markaman qeshpir aywakuy. Tsay taksha markaman manaraq chäyaptikiqa imatapis manaraqmi rurashaqraqtsu>>.
Tsaynöpam tsay markapa shutin churarqan Zoarta#19.22 Zoar ninanqa takshalla ninanmi..
23Patsa waraskiptinnam Zoarman Lot charqan. 24Chaykuptinnam azufritawan nina lunyaykaqta Dios Yaya tamyatsimurqan Sodoma y Gomorra markakunaman. 25Tsay täkuyanqan pampa markakunachö runakunatawan wätakunata y llapan imaykatapis jankatmi nina rupar usharqan.#Mat. 10.15; 11.23-24; Luc. 10.12; 17.29; 2Ped. 2.6; Jud. 7. 26Peru Lotpa warminnam#Luc. 17.32. qeshpiykanqanchö qepaman rikaskir kachi rumiman tikraskirqan.
27Tsaypa waränin alliqnam Dios Yayawan parlanqan kaqman Abraham aywarqan. 28Tsaypitam rikarqan Sodoma y Gomorra markakunapita imayka jornupitanöraq qoshni shäriykaqta. 29Tsaynömi Dios Yaya ushakätsirqan Lot täkunqan pampachö markakunata. Tsaynö ushakätsirpis Abraham rugakushqa kaptinmi Lotta salvarqan.
Lotpa warmi tsurinkuna imanöpa wawayuq kayanqan
30Tsaypitanam Zoarllachö täkuyta Lot alläpa mantsakurqan. Tsaymi ishkan warmi tsurinkunawan jallqaman aywakur machayllachö täkuyarqan. 31Tsaychömi mayor kaq tsurin ñañanta nirqan: <<Taytantsikqa awkinnam. Kaychöqa manam ollqu kantsu noqantsikwan churakänapaq. 32Tsaymi taytantsikta macharkatsir paywan puñushun noqantsikchö tsurin yurir aylluntsik mana ushakänanpaq>>.
33Tsaynö willanakuyanqan paqasmi taytanta vïnuwan machätsiyarqan. Tsaynam mayor kaq jipash taytanwan puñurqan. Taytannam machashqa kar musyarqantsu ni imay höra tsurin yaykunqanta ni yarqunqantapis.
34Waränin junaqnam mayor kaq jipash qepan kaq ñañanta nirqan: <<Qanyan paqasmi taytantsikwan puñushkä. Kanan paqas qamna puñunaykipaq yapay machätsishun. Tsaynöpam taytantsikpa castankuna ushakäyanqatsu>>.
35Tsaynö nirmi tsay paqas taytanta yapay upyatsiyarqan. Tsaymi qepa kaq jipashna taytanwan puñurqan. Alläpa machashqa karmi taytanqa musyarqantsu imay höra tsurin yaykunqanta ni yarqunqantapis.
36Tsaynöpam Lotpa ishkan tsurinkuna taytankunallapata qeshyaq kayarqan. 37Mayor kaq jipashnam ollqu wamrata qeshyakurqan. Tsay wamrapam shutin karqan Moab. Paypita miraqkunam moabita runakuna kayan. 38Qepa kaq jipashpis ollqutam qeshyakurqan. Tsay wamrapa shutinnam karqan Ben-ammi. Ben-ammipitam amonita runakuna kayan.
Поточний вибір:
Génesis 19: qxn
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2011, Wycliffe Bible Translators, Inc. All rights reserved.