Génesis 18
18
Abrahamta Dios Yaya watukanqan
1Mamre runapa chakran encina jachakuna kaqchö täkuykaptinmi Abrahamta Dios Yaya yuripurqan. Pullan junaq alläpa achachaptin carpan punkuchö llantukurnin jamaykarmi 2rikachakunqanchö kimsa runakuna ichiraykaqta Abraham rikaskirqan. Tsaymi chaskiqninkuna#Heb. 13.2. saslla aywar urkunpis patsaman töpanqanyaq puntankunaman qonqurikuykur 3nirqan: <<Taytakuna, päsakuyänayki kaptinpis jamaykushunraq. Ama aywaräkuyällaytsu. 4Yakuta apatsimushaq chakikikunata mayllakuyänaykipaq. Kay jacha chakillanchöpis jamaykulläshun. 5Wamaqllata kaypa päsar chaykäyämuptikiqa imallatapis kusinakaskatsimushaqraq mikurkur shütashqana päsayänaykipaq>>.
Tsay runakunanam niyarqan: <<Taytay, allim kallanqa>>.
6Tsaypitanam carpanman aywarnin Abraham yaykuskir Sarata nirqan: <<Saslla ishkay chunka (20) kïlu mas allin kaq jarinapita tantata ruraskamuy>>.
7Tsaynam Abrahampis saslla wäkankuna kaqpa aywar wera kaq mallwa töruta achkuskir apamurnin serviqninta entregarqan. Tsay serviqninnam saslla pishtaskirnin mikuyta rurarqan. 8Tsaynam Abrahamqa mantequïllata, lichita y kusinatsinqan aytsata apar servirqan. Paykuna mikuyaptinmi alcäbu kaykarqan imallatapis wanayänanta.
9Mikur ushaskirnam Abrahamta tapuyarqan: <<¿Maychötan warmiki Sara kaykan?>>
Abrahamnam nirqan: <<Carpa rurinchömi kaykan>>.
10Tsaypitanam jukaq nirqan: <<Watan yapay watukaqniki kutimunäpaqmi warmiki Saraqa ollqu wawayuqna kanqa>>.#Rom. 9.9.
Abrahamta tsaynö parlapanqantam punku waqtallanpita Sara wiyapaykarqan. 11Abraham awkinna kaptinmi Sarapis chakwanna karqan. Chakwanna kaptinmi costumbri yawarninpis asïpaqna pärashqa karqan. 12Tsayta wiyarmi Sara asikurnin kikillanchö yarparqan: <<Chakwanna kaykarqa y ollqüpis awkinna kaykaptinqa ¿imanötaqshi wawayuq käman?>>
13Peru Dios Yayanam Abrahamta nirqan: <<Sara ¿imanirtan asikun? Chakwanna kaykarpis wawayuq kananpaq kanqanta ¿manaku creyin? 14Noqapaqqa manam ni imapis ajatsu. Watan yapay watukaqniki kutimunäpaqmi Saraqa ollqu wawayuqna kanqa>>.#Jer. 32.27; Luc. 1.37; Rom. 9.9.
15Tsayta wiyaykurmi Sara mantsakar nirqan: <<Noqaqa manam asikullarqütsu>>.
Tsaynö niptinmi Dios Yaya nirqan: <<Musyämi asikunqaykita>>.
Sodoma markapaq Dios Yayata Abraham mañakunqan
16Tsaypita sharkurnam qorpankuna#18.16 Tsay kimsa qorpakunaqa manam runakunatsu kayarqan, sinöqa ishkay angelkunawan Dios Yayam. Tsayta musyanaykipaq liyinki Gén. 18.17; 19.1. Sodoma markapa päsayarqan. Abrahampis paykunata compañarmi karuyaqraq aywarqan. 17Abrahamwan aywaykarmi Dios Yaya yarparqan: <<¿Abrahamta musyatsïmantsuraq imata yarpaykanqätapis? 18Paypita miraqkunam maytsikaman mirar poderösu jatun nación kayanqa. Tsaynöllam pay rayku kay patsachö llapan casta runakunapis bendicionnïta chaskiyanqa. 19Paymi tsurinta y paypita miraqkunatapis yachatsinqa munanqänö imaypis kawakuyänanpaq. Tsaypaqmi payta akrashkä. Tsaynö ruraptinmi Abrahamta llapan äninqäta cumplishaq>>.
20Tsaynö yarparmi Abrahamta Dios Yaya nirqan: <<Sodomachö y Gomorrachö täkuq runakunapaqmi maytsay runakunapis parlayan alläpa jutsa ruraq kayanqanta. 21Tsaymi kanan aywaykä runakuna niyanqannö alläpa jutsayuq o mana jutsayuq kayanqanta musyanäpaq>>.
22 Dios Yayawan Abraham parlanqanyaqnam ishkay kaq qorpankuna Sodomaman puntayarqan. 23Dios Yayaman Abraham mas witiykurmi tapuparqan: <<Jutsasapa runakunata ushakätsirqa ¿jutsannaq runakunatapis ushakätsinkillaku? 24Tsay jatun markachöqa maypischi pitsqa chunkallapis (50) jutsannaq kayanman. Tsaynö pitsqa chunka jutsannaq kaykäyaptinpis ¿tsay markata mana llakipaypatsuraq ushakätsinki? 25Taytay, jutsannaq runakunatawan jutsasapakunata ama ushakaykatsillaytsu. Kay patsachö llapan runakunapa mandakuq jueznin kaykarqa ¿manatsuraq justiciata ruraykunkiman?>>
26Tsaynö Abraham rugaptinmi Dios Yaya nirqan: <<Sodoma markachö pitsqa chunkalla jutsannaq runakunata tarirqa paykuna rayku perdonarmi tsay markata ushakätsishaqtsu>>.
27Tsaynam Abraham nirqan: <<Taytay, yapay tapuptiq ama piñakullaytsu. Noqaqa polvunö y uchpanöllam kä. 28Jutsannaq runakunaqa maypischi pitsqallapis faltan pitsqa chunka kayänanpaq. ¿Tsayllana faltaykaptinpis ushakätsinkitsuraq tsay markata?>>
Tsaynö rugaptinnam Dios Yaya nirqan: <<Jutsannaq runakunata chusku chunka pitsqallatapis (45) tarirqa manam ushakätsishaqtsu>>.
29Abrahamnam yapay tapurqan: <<Maypischi chusku chunka (40) jutsannaq runakunallapis tsaychö kaykäyan>>.
Tsaynö niptinnam Dios Yaya nirqan: <<Chusku chunka jutsannaq runakunallatapis tarirqa manam ushakätsishaqtsu>>.
30Abrahamnam yapay rugar nirqan: <<Taytay, rugaykullaqmi. Yapay yapay tapupaptiq ama piñakuykullaytsu. Maypischi kimsa chunka runakunallapis (30) jutsannaq kaykäyan>>.
Tsaynö niptinnam Dios Yaya nirqan: <<Kimsa chunka jutsannaq runakunallatapis tarirqa manam tsay markata ushakätsishaqtsu>>.
31Abraham yapay tapur nirqan: <<Taytay, yapay yapay tapupaptiq ama piñakuykullaytsu. Ishkay chunka (20) jutsannaq runakunata tarirqa ¿ushakätsinkillaku?>>
Tsaynam Dios Yaya nirqan: <<Ishkay chunkallatapis jutsannaqkunata tarirqa tsay markata manam ushakätsishaqtsu>>.
32Yapaymi Abraham tapurqan: <<Taytay, yapay yapay tapupaptiq ama piñakuykullaytsu. Kananllanam piñatsirniki tapukuykulläshayki. Chunkalla jutsannaq runakunata tarirqa ¿imatatan ruranki?>>
Tsaynam Dios Yaya nirqan: <<Tsay markachö chunka jutsannaq runakunallatapis tarirqa manam ushakätsishaqtsu>>.
33Tsaynö Abrahamwan parlayta ushaskirmi Dios Yaya aywakurqan. Abrahamnam täkunqanman kutikurqan.
Поточний вибір:
Génesis 18: qxn
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2011, Wycliffe Bible Translators, Inc. All rights reserved.