Hanana Enjil 1
1
Bag. 1.
1Koyallo were dasum. Wide were artigodon dasum. 2Wide were arti ter esum. In were koyallo artigodon dasum. 3Haja male tekked awtakkisum. Tenna masirgon haja wekkon awtakkikomnum awbulloton. 4Tedder ayar dasum. In ayarkon zolina nur ter esum. In nurkon dulumar adawen. 5Dulumagon tekki gebladti monsum.
6Zol wer dasum. Artinaiton ishinbusum. Tenn erigon Hanay esan. 7In tasum shehadanai, nurki shehedetirri an, tekked male amnew an. 8Ter nurna kid ter ekomnum. Ama nurki shehedetirri an tasum.
9Nur alendi zol nutingi alamir talgi adawen. Ter alamir esum. 10Wide alamgon tekked awtakkisum. Wide alam tekki iyirarki monsum. 11Tendichinai tasum. Tendichigon tekki gebladti monsan. 12Ama tekki geblel malegi gudragi tidirsum, artina tonianw an, tenn eriged amneligi, 13zoli gewirton uskitakkimeneligi, wala jitana hawaged, wala zol werna hawaged, ama artindiged.
14Wide weregon jitayansum. Annā barergon kutesum. Argon tenna dulkanegi nalsun, dulkane tod habberdi galigki, timbabnaiton nimaged wide aleged eyebungon. 15Hana tekki shehedetirsum wide uwe wesum: „In ter teran ai tenna jihar wekosim: Ann aharro bital ann owolgi arsum, ann owolloton esinged. 16Wide tenn eyegrarroton ar male arsun nima wekki niman dogor. 17Mine sheria Museged tasum. Ama nimagon wide alegon Yesu komisbulged tasum. 18Artigi wekkon nalkomnum. Tod habitod, tenna ogirro darel, ter aminsum.
19Ingon Hanana shehada ter esum, Yahudichi Urushalimirton fegiri werigon Lawindichi werigongi ishindangad, tekki isigw an: „Er ni terre?“ 20Bokkirmen wala gubmen giresum: „Ai anna kidir komisbul terminim.“ 21Wide isigsan: „Won er minde? Eliya terre er?“ Ter wesum: „Ai ter terminim.“ „Won nebire er?“ 22Wide rudesum: „Ilah an.“ Widegon wetirsan: „Er ni terre? Argi ishineligi rudetidirrunna joro. Mingi er ennewertigredagin?“ 23Ter wesum: „Ai halar aüwelna hisi teran: Artina darubki allew an, nebi Eshaya wesin nawre.“ 24Ishinbuligon Farisichirton esan. 25Tekki isig wide wetirsan: „Won er ma akidigrin?, er on komisbul termenkin, wala Eliya termenkin, wala nebi wermenkin.“ 26Hana widegir wetidirsum: „Ai essiged akidirrin. Ama inna seler wer kute tebin, tekki iri aïyirmendun. 27In teran ann aharro bital. Aigon annewertir hugebumnim tenna taragana digittichigi kusarki.“
28In bainid wetakkisum Betanir, essi Urdunin jerked, Hana akidirsinn agarro.
29Ugros owittir Hana Yesugi tekk abidi talebungi nalos wesum: 30„In ter teran artina kati, zolina zenbigi asokel. In ter teran ai tenna jihar wekosim: ‚Ann aharro ogij wer bitan. Ann owolgi arsum, ann owolloton esinged.’ Aigon tekki iyirkomnim. 31Ama Israelgi amintirri an tasim, essiged kidirri an.“ 32Hanagon shehede wesum: „Ai annewertir nalsim newertigi, mine nawre simerton tendogor shugur tegsingi. 33Aigon tekki iyirkomnim. Ama aigi ishinel, essiged kidir an, man aigi wedensum: ‚Tendogor newerti shugur teginna tirti, in ter teran newerti gadisebulged bikidiril.’ 34Aigon annewertir nalsim. Wide shehedegongendi in artina tod ter engi.“
35Ugros owittirgon Hanagon tenna hiran owigon man agarro tebsan. 36Yesugi talebungon nalos wesum: „Ahan indo artina katigi.“ 37Hiran owingari ter abainingi gijred Yesugi tebaesan. 38Yesu dire urwir, nalsum tekki tebaedarangi. Wetidirsum: „Mingi iri abirigrun?“ Ingu wesan: „Wo rabi“ — ingon „wo arif“ ane teran — „sayer er agin?“ 39Tirgi wetidirsum: „Targi nalwe.“ Targon nalsan ter agsinn agarki. Wide tekkodon welesesan man ugroski. Man wattigon saa dimnitti ter esum.
40Andrawus, Siman Butrusna timbes, owingarirton wer ter esum, Hanagi gijred Yesugi tabaelelirton. 41In elsum koyalgi timbes Simangi. Wide wetirsum: „Ari Mesihki elsun“ — ingon komisbulm ane teran. 42Yesunai tekkodon attasum. Yesu tekki ururgi wide wesum: „Er Siman, Yunana tod, teran. Er Kefay an buwetakkin“ — Rumiged Butrus ane teran. Butruskon Nobiged kulum ane teran.
43Tenn owittin ugroski Yesu birigsum Jelilgir belarki. Teddo Filibuski elsum. Wide tekki wetirsum: „Aigi tebae.“ 44Filibuskon Betsaïdarton esum, Andrawus wide Butrusna medinerton. 45Filibus elsum Natanaelgi. Wide wetirsum: „Ar elsun Muse tenna jihar bajsingi sherian tur, wide nebichigon, Yesu, Yusifna tod, Nasirandigi.“ 46Natanael wetirsum: „Er iyirna Nasirarton haja libab wer bitangi?“ 47Filibus tekki wetirsum: „Targi nal.“ Yesu uru nalsum Natanael tekk abidi talebungi. Wide tendogogir wesum: „Ahan Israeldi alendi wekki, tedder mili wer damenin.“ 48Natanael tekki wetirsum: „Sayerton er aigi aïyirin?“ Yesu rudetirsum: „Ekki elgon Filibus uwemeningon, er tinna togor dangon, ai ekki nalsim.“ 49Natanael rude wetirsum: „Wo rabi, er artina tod teran. Er Israelna or teran.“ 50Yesu rudetir wesum: „Er in wereged amnelna, ai ekki tinna togor nalsim aneged? Inin aharro inin dogor dulgi binalkanin.“ 51Wide wetirsum: „Aleged aleged irgi wetidirrin: Elekenton ir simegi kusbungon binallun, wide artina malaikarigi kujka shugurrangon zolna toddogor.“
Поточний вибір:
Hanana Enjil 1: XNZ1912
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the British and Foreign Bible Society in 1912.
