Luk̆a 4

Yeso Çolis İʒaden

1Yeso Şuriʒ̆k̆ondate opşa, Yordanişi Ğalişen goiktu. Şuriʒ̆k̆ondak gza oʒ̆iru, çolişa mendaxtu. 2Jureneçi ndğas İblisik doʒadu. Hem ndğalepes mutu var ç̆k̆omu. Uk̆açxeti amşkorinu.

3İblisik Yesos, “Ğormotişi skiri rena, geçinadvi do ham kva kovali divas”-ya uʒ̆u.

4Yesokti İblisis haşo uʒ̆u, “Xvala kovalite k̆oçi var skidun-ya nç̆arun.”

5Uk̆ule İblisik Yeso ar mağali svaşa keionu do ar oraşeni kianaşi mteli mapobape koʒ̆iru. 6E do Yesos, “Mteli kianaşi mapoba si komekça do hemu k̆ala na mulun zenginobati. Hantepe çkimda menoçemi ren, mati miti minon hemus komepçam. 7Ma secde domoğodana mteli skani ivasen”-ya.

8Yesokti İblisis haşo uʒ̆u: “ ‘Mance Ğormoti skanis secde oğodare do xvala hemus uxezmet̆are’-ya nç̆arun.”

9İblisik Yeruşalimişa mendionu, Oxvameşi otvaşa keionu do haşo uʒ̆u: “Ğormotiş skiri rena, hakşen meʒ̆uk̆ap̆i!”-ya. 10“Hemuşeni ki, haşo nç̆arun:

‘Ğormotik melaikepes geçinadvasen

Hentepek si kçvanoren.

11K̆uçxes kva mot megağet̆as!-ya do

Si eʒ̆akaçeri gogionanoren.’ ”

12Yesok hemus haşo uʒ̆u: “ ‘Mance Ğormoti skani mot ʒadum!’-ya do mçinadves.”

13İblisik Yeso moğordinuşeni k̆at̆a gza doʒaduşk̆ule, ar oraşeni naşku do hekole igzalu.

Yesok Galileas Ovaizus Gyoç̆k̆ams

14Yeso, Şuriʒ̆k̆ondaşi mencelite moʒ̆opxeri Galileaşa goiktu. Hemuşi ambai k̆at̆a k̆ele kignu. 15Hekoni sinagogepes ovaizus kogyoç̆k̆u. İrik hea omʒkvamt̆u.

16Yeso, na irdu noğa, Nazaretişa goiktu. Sap̆at̆oni Ndğas adeti na rt̆usteri sinagogişa mendaxtu. Ʒ̆k̆onda nç̆arape ok̆itxuşeni keiselu. 17Hemus İsaya ambayocişi nobuci komeçes. Nobuci gonʒ̆k̆u do ham nenape na nç̆arun sva koz̆iru:

18“Manceşi şuri ma emodgin

Mancek ma goşomionu, fuk̆arapes k̆ai ambai meçamuşeni.

Ç̆operepe na oxişkvanoren,

Utolepes toli na az̆iranoren ognapinuşeni,

Eʒ̆azerepe na moişletinanoren,

19Do Manceşi k̆aoboni ʒ̆ana

Ognapinuşeni momoşku.”

20Yesok, nobuci dok̆oru do sinagogişi meteles komeçu do kodoxedu, sinagogis na ren irik hemus oʒ̆k̆et̆u.

21Yesok hentepes “Handğa, na ognit ham nç̆arape mtini divu”-ya uʒ̆u. 22Sinagogis na ren mtelik Yeso omʒkvamt̆es. Yesoşi ham mskva nenape dido moʒ̆ondes do gak̆virdes. “Haya Yosifiş skiri va reni?”-ya tkves.

23Hentepes haşo uʒ̆u: “Ma mcveşi ar notkvame gomoşinaten: ‘Ç̆e xekimi, ipti ti skani ok̆ai!’ Kafarnaumis na vi hea kobognit, hek na vidort̆un hak, dobadona skanisti vi!

24Mtinala muşi giʒ̆umert: Çkarti ambayoci, dobadona muşis var ik̆abulen. 25Xolo mtinala muşi giʒ̆umert, İliaşi oras sum do gverdi ʒ̆ana mç̆ima var mç̆imu. Mteli dobadona mşkorineri doskidu. Hem oras İsrailis dido oxorca şira kodoskidu. 26İlia ham milletepeşeni var, Sidonis, Sarept̆a na coxons noğas na skidun ar şira oxorcaşeni moxtu. 27Do Elisai ambayocişi oras İsrailis msursuyarepe opşut̆es. Mara hantepeşen miti var iʒ̆imindanu, ar Suriuri Naimanişen met̆a.”

28Sinagogis na rt̆espek haya ognesşi dido guri muxtes. 29Eiseles do Yeso, noğa mutepeşişen gale kogamoşkves. Yeso dolot̆k̆oçuşeni noğa mutepeşi na gedgin rak̆anişi k̆unʒ̆ulişa mendiones. 30Mara Yeso hentepeşi oşkendaşen kogoşaxtu do igzalu.

Yesok Xeʒala do Mencelite İp̆aramitams

31Uk̆açxe Yeso, Galileaşi ar noğa na ren Kafarnaumişa kogextu. Sap̆at̆oni Ndğas sinagogis xalk̆is doguramt̆u. 32Xeʒalate na doguramt̆uşeni xalk̆i gak̆virdu. 33Sinagogis, pinti Şeit̆anişi şuri na meşuxen ar k̆oçi kort̆u. K̆oçik zori xomate haşo becğu: 34“Ç̆e Nazareturi Yeso, si çkuni k̆ala mu zori giğun? Çkuni yeç̆k̆odinuşeni moxtii? Si min ore, ma komiçkin. Si Ğormotişi ʒ̆k̆onda re!”-ya uʒ̆u.

35E do Yesok ç̆ink̆as duperxu do haşo uʒ̆u: “Dostibi! K̆oçişen kogamaxti!” Ç̆ink̆ak irişi ʒ̆oxle k̆oçi kogyoç̆k̆idu, çkvati var elaçu k̆oçis do hemuşen kogamaxtu.

36Mteli gak̆virdes do artikartis “Hamus muperi nena uğun! Menceli do xeʒalate pinti şurepes emri meçams do hentepeti gamulunan”-ya do ok̆itkves. 37Hemk̆elepes Yesoşi ambaepek k̆at̆a svas kogoxtu.

Yesok Zabunepe Ok̆aams

38Yeso sinagogişen kogamaxtu do Simonişi oxorişa igzalu. Simonişi damtire zabuni rt̆u. Çeçxuri omç̆ut̆u. Oxorcas uşvelas-ya do Yesos axveʒ̆es. 39Yeso oxorcaşi tiş dudi k̆ala dodgitu do çeçxuris duperxuşk̆ule çeçxuri daçodu. Oxorca dik̆au do manişa keiselu, hentepes oxezmet̆us kogyoç̆k̆u.

40Lumcut̆uşi, çkva do çkva zabunepe Yesos komuones. Yesokti hentepes xe gusu do mteli dok̆au. 41Dido zabunepeşenti ç̆ink̆apek “Si Ğormotişi skiri re!”-ya do becğineri kogamaxtes. Mara Yesok ç̆ink̆apes duperxu, hentepes mutu var otkvapamt̆u. Hemuşeni ki, ç̆ink̆apes hea Xrist̆e na ren kuçkit̆es.

42Ç̆umanişe, Yeso kogamaxtu do ar uk̆oçeli svaşa mendaxtu. Mteli milletikti hea gorumt̆u. Na ren svaşa moxtesşk̆ule, soti mot ulut̆as-ya do mokaçines.

43Yesok hentepes, “Ğormotişi Mapobaşeni k̆ai ambai mteli noğapes ognapinu minon, ma hamuşeni momoncğonu”-ya uʒ̆u.

44E do, Yesok Yudeaşi sinagogepes ovaizus naonu.

Поточний вибір:

Luk̆a 4: LZZ

Позначайте

Поділитись

Копіювати