GENESIS 4
4
Wawqen Abelta Cain wañurachisqanmanta
1Adanmi warmin Evawan puñurqa hinaptinmi wiksayakuspa wachakurqa #Hebreo simipi Cain ninanqa “tarikusqa” ninanmi.Cain sutiyoq wawanta chaymi Eva nirqa:
—Tayta Diospa munasqanman hinam tarikuruni qari wawata —nispa.
2Chaymantañataqmi Cainpa wawqen Abelta wachakurqa. Abelqa ovejakuna michiqmi karqa, Cainñataqmi karqa chakrapi llamkaq.
3Chaymi tiempopa risqanman hina chakranpi tarpusqan kawsaykunata Cain apamurqa Tayta Diosman ofrenda qonanpaq. 4Abelpas apamurqataqmi piwin ovejankunamanta wiran kaq animalta hinaptinmi Abelta Tayta Dios chaskirqa chaynataq ofrendantapas. 5Caintam ichaqa mana chaskirqachu nitaq ofrendantapas chaymi Cain sinchita piñakururqa uyanpas hukmanyarunankama. 6Hinaptinmi Cainta Tayta Dios nirqa:
—¿Imanasqataq piñakurunki? ¿Imanasqataq uyaykipas hukmanyarun? 7Allinta ruraspaqa ¿manachum chaskisqa kawaq? Mana allinta ruraptikim ichaqa hucha purun animal hina punkullapiña kachkan vencerusunaykipaq. Chaywanpas qamqariki munaychakuwaqmi huchataqa —nispa.
8Cainmi wawqen Abelta nirqa:
—Hakuchik purikuq —nispa.
Hinaptinmi chakrapi kachkaptinku wawqen Abelta Cain maqaspa wañurachirqa. 9Hinaptinmi Cainta Tayta Dios nirqa:
—¿Maypitaq wawqeki Abel kachkan? —nispa.
Chaymi payñataq nirqa:
—¡Manam yachanichu! ¿Wawqey waqaychaqchu ñoqaqa kani? —nispa.
10Chaymi Tayta Dios nirqa:
—¿Imatataq kayta rurarunki? Allpaman chaqchusqayki wawqekipa yawarninmi acusasuchkanki qayllaypi. 11Wawqekipa yawarnin allpaman chaqchusqaykiraykum kaymanta qarqosqa kanki hinaspa ñakasqa kanki. 12Llamkaptikipas allpaqa manañam cosechata qosunkiñachu, kay pachapiqa pakan-pakan purikuqllañam kanki —nispa.
13Chaymi Tayta Diosta Cain nirqa:
—Mana allin rurasqaymanta castigoqa ancha hatunmi, manam aguantaymanchu. 14Kunanmi kaymanta qarqowanki, qayllaykimantapas pakakusaqchá, hinaspachá kay pachapiqa pakan-pakan purikuqllaña kasaq, pipas tariqniychá wañurachiwanqa —nispa.
15Ichaqa Tayta Diosmi nirqa:
—Pipas wañuchisuqnikiqa qanchis kutikama castigasqam kanqa —nispa.
Chaymi Tayta Dios churarqa Caiman señalta pi tarispapas mana wañuchinanpaq. 16Cainmi Tayta Diospa qayllanmanta lloqsirqa hinaspam Nod allpapi yacharqa, chay Nodqa karqa intipa qespimunan law Edenpa waklawninpim.
Cainpa mirayninkunamanta
17Cainmi warminwan puñurqa chaymi warminqa wiksayakuspa wachakurqa Enocta. Cainmi huk llaqtata hatarichirqa hinaspam churin Enocpa sutinwan suticharqa. 18Enocpa churinmi karqa Irad, Iradpa churinmi Mehujael, Mehujaelpañataqmi churin Metusael, Metusaelpañataqmi Lamec. 19Lamecmi casarakurqa iskay warmikunawan, hukninmi karqa Ada, hukninñataqmi Zila. 20Ada kaqmi wachakurqa Jabalta chaymi paypa mirayninkuna karpapi yachaspa animalkuna uywaq karqaku. 21Jabalpa wawqenñataqmi karqa Jubal, paypa mirayninkunam yacharqaku arpatawan qena tocayta. 22Zilapas wachakurqam Tubal-cainta, paypa mirayninkunam karqa cobremanta, fierromanta herramientakuna ruraq. Tubal-cainpa paninñataqmi karqa Naama.
23Lamecmi warminkunata nirqa:
Adawan Zila uyariwaychik.
Warmiykuna, nisqaytayá uyariwaychik.
Huk qaritam wañurachini heridawaptin,
huk warmatañataqmi wañurachini maqawanptin.
24Sichu Cainmanta qanchis kutita vengakuptinqa
ñoqamantaqa qanchis chunka qanchisniyoq kutikamam vengakunqa.
Adanpa kimsa kaq churinmanta
25Adanmi yapamanta warminwan puñurqa hinaptinmi pay wachakururqa qari wawanta, paytam suticharqa #Hebreo simipi Set ninanqa “Paymi qowarqa” ninanmi.Setwan chaymi Eva nirqa:
—Cainpa wañuchisqan Abelpa rantinpim Dios qoykuwan huk qari wawatawan —nispa.
26Chaymantam Setpapas qari churin nacemurqa, paytam Enoswan suticharqa. Chay tiempokunamantam Tayta Diospa sutinpi mañakuyta qallaykurqaku.
Поточний вибір:
GENESIS 4: QUEAYA87
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть