Lucas 4
4
Jesusta Diablo tentasqanmanta
(Mt 4.1-11; Mr 1.12-13)
1Jesusmi Jordán mayumanta Chuya Espiritupa huntasqan kutimuchkarqa, hinaptinmi Chuya Espíritu purunman aparurqa. 2Chaypim tawa chunka punchaw kamurqa, hinaptinmi diabloñataq tentarqa. Jesusqa manam chay punchawkunapiqa imatapas mikurqachu, chayraykum yarqarachikurqa. 3Chaymi diabloñataq nirqa:
Diospa Churin kaspaykiqa kay rumitayá kamachiy tantayarunanpaq, nispa.
4 #
Dt 8.3. Hinaptinmi Jesús nirqa:
Qellqasqam kachkan: “Runaqa manam tantallawanchu kawsanqa”, nispa.
5Chaymantam diabloqa alto orqoman pusaruspan, huk ñawi qemchiykuyllapi, kay pachapi llapallan nacionkunata qawachispan 6nirqa:
Kay pachapi munaychakuykunatawan suma-sumaq kaynintam qosqayki. Chaykunaqa ñoqaman qosqam karqa, chayraykum pimanpas munasqayman qosaq. 7Kaykunam qampaq kanqa sichum qonqorakuykuspa yupaychawaptikiqa, nispa.
8 #
Dt 6.13. Chaymi Jesusñataq nirqa:
Qellqasqam kachkan: “Señor Dios-llaykitam yupaychankiqa, payllatataqmi servinkipas” nispa.
9Chaymantam Jerusalenman pusaruspan templopa hawanpi sayaykachispan nirqa:
Diospa Churin kaspaykiqa kaymanta pawaykuy. 10#Sal 91.11.Chuya Qellqam nin:
“Diosmi angelninkunata waqaychasunaykipaq kamachimunqa,
11 #
Sal 91.12. Paykunam makinkupi chaskiykusunki
rumiman mana takakunaykipaq”, nispa.
12 #
Dt 6.16. Jesusñataqmi nirqa:
Qellqasqam kachkan: “Señor Diosni-kitaqa amam pruebaman churankichu”, nispa.
13Chaymi diabloqa mañana imawanpas wichichiyta atispan huk punchawkama asurikurqa.
Jesuspa Galilea lawkunapi willakusqanmanta
(Mt 4.12-17; Mr 1.14-15)
14Chuya Espiritupa huntaykusqanmi Jesusqa Galilea lawman kutirqa, chaymi muyuriqnin llaqtakunapipas anchallataña paymanta rimarqaku. 15Huñunakunanku sinagogakunapi yachachiptinmi llapa runakunañataq hatuncharqaku.
Nazaret llaqtapi Jesuspa yachachisqanmanta
(Mt 13.53-58; Mr 6.1-6)
16Yachasqan Nazaret llaqtaman Jesús kutiruspanmi samana punchawpi costumbrenman hina sinagogaman yaykuykurqa. Qellqata leenanpaq sayariykuptinmi, 17profeta Isaiaspa libronta qoykuptinku kichaykuspan leerqa:
18 #
Is 61.1-2. “Tayta Diospa Espiritunmi ñoqapi kachkan,
Tayta Diosmi sapaqchawaspan kamachiwarqa,
wakchakunaman allin noticiata willakamunaypaq,
llakisqa sonqoyuqkunata sanoyachimunaypaq,
presokuna kacharisqa kanankupaq willamunaypaq,
ñawsakunata ñawinta kichamunaypaq,
ñakarichisqakunata libramunaypaq,
19Tayta Diospa kuyapayakuynin watamanta willakamunaypaq”, nispa.
20Chaymantam Jesusqa librota wichqaykuspan sinagogapi yanapakuqman haywaykuspan tiyaykurqa. Llapa runakuna qawarayaptinkum 21paykunata nirqa:
Kunanmi kay leesqay qellqa cumplikurun, nispa.
22Jesusmanta allinta rimaspankum sumaqllaña yachachikuyninkunata uyarispanku admirasqallaña karqaku, hinaspam ninakurqaku:
¿Payqa manachum Joseypa churin? nispanku.
23Hinaptinmi Jesusñataq nirqa:
Ichapas nisqankupi hina niwankichikmanpas: “Yaw médico, kikikiraq hampikuruy, Capernaúm llaqtapi ruwasqaykita hinayá kay llaqtaykipipas ruway”, nispaykichik.
24 #
Jn 4.44. Cheqaptapunim nikichik, manam mayqan profetapas llaqtanpiqa allin chaskisqachu. 25#1~R 17.1.Profeta Eliaspa punchawninkunapim kimsa wata parten mana para kasqanrayku hatun muchuy karqa. Chay watakunapi Israel nacionpi achkallaña viudakuna kachkaptinpas, 26#1~R 17.8-16.manam paykunamanchu Eliasqa kachasqa karqa, aswanqa Sidón law Sarepta llaqtapi yachaq viudallamanmi. 27#2~R 5.1-14.Profeta Eliseopa tiemponpi achkallaña leprawan onqoqkuna Israel nacionpi kachkaptinpas, manam paykunachu sanoyachisqaqa karqaku, aswanqa Siria nacionmanta kaq Naamanllam, nispa.
28Chayta uyariruspankum sinagogapi huñunasqa runakuna llumpayta piñakururqaku, 29hinaspam hatarispanku llaqtapa hawa lawninpi qaqa patankama Jesusta aysarurqaku chaymanta tanqaykunankupaq. 30Jesusmi ichaqa paykunapa chawpintakama lloqsiruspan pasakurqa.
Demonioyuq runata Jesús sanoyachisqanmanta
(Mr 1.21-28)
31Galilea lawpi Capernaúm llaqtaman chayaruspanmi, llapa runakunaman samana punchawpi yachachirqa. 32#Mt 7.28-29.Chaymi atiywan rimasqanta uyarispanku llapa runakuna admirakurqaku.
33Sinagogapim kachkarqa demoniopa huntasqa runa, paymi kallpawan qaparispan nirqa:
34¡Nazaret llaqtayuq Jesús! ¿Imata-taq ñoqaykuwan munanki? ¿Tuñichiwa-naykikupaqchu hamurqanki? Ñoqaqa yachanim pim kasqaykita, qamqa Diospa Churinmi kanki, nispa.
35Jesusñataqmi demoniota qaqchaspan nirqa:
¡Upallay hinaspa kay runamanta lloqsiy! nispa.
Hinaptinmi demonioñataq chay runata llapa runakunapa chawpinman wikutiruspan mana imanaspalla lloqsirurqa. 36Runakunañataqmi mancharikuspanku ninakurqaku:
¿Ima rimaytaq kayqa? ¡Kay runaqa atiywanmi llapa demoniokunatapas lloqsinanpaq kamachin, hinaptinmi lloqsinku! nispanku.
37Chaymi Capernaumpa muyuriqnin llaqtakunapipas Jesusmanta anchallaña rimariy cheqerirqa.
Pedropa suegranta Jesús sanoyachisqanmanta
(Mt 8.14-15; Mr 1.29-31)
38Jesusmi sinagogamanta lloqsiruspan Simonpa wasinman rirqa. Simonpa suegranñataqmi llumpay calenturawan kachkarqa, chaymi Jesusta paypaq valekurqa. 39Hinaptinmi Jesusñataq onqoqman asuykuspan calenturata qaqcharuptin chaypunilla tanirurqa. Chaymi Pedropa suegranqa utqayman hatarispan paykunata servirqa.
Achka onqoqkunata Jesús sanoyachisqanmanta
(Mt 8.16-17; Mr 1.32-34)
40Inti seqaykuchkaptinmi, tukuy rikchaq onqoyniyuqkunata Jesusman pusamurqaku, hinaptinmi sapakamaman makinta churaykuspan sanoyachirqa. 41Achkaqmantam demoniokunapas qaparillawanña lloqsirqaku:
¡Qamqa Diospa Churinmi kanki! nispanku.
Jesusmi ichaqa demoniokunata qaqchaspan rimanankuta mana munarqachu; demoniokunaqa yacharqakum payqa Cristo kasqanta.
Galilea lawpi willakustin Jesús purisqanmanta
(Mr 1.35-39)
42Achikyaramuptinmi Jesusqa chunniqman pasakurqa, hinaptinmi runakuna maskaspanku tarirurqaku, chaymi hinapi qepananpaq harkayta munaptinku 43paykunata Jesús nirqa:
Diospa munaychakuyninmanta allin noticiatam wakin llaqtakunapipas willakamunay, chaypaqmi ñoqataqa kachamuwarqa, nispa.
44Chaynatam Jesusqa sinagogakunapi willakustin purirqa.
Поточний вибір:
Lucas 4: RCQ12
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
