Lucas 18
18
Juezmantawan viudamanta
1Mana pisipaspa Diosta tukuy tiempo mañakunamanta yacha-chispanmi kay rikchanachiyta Jesús nirqa:
2Huk llaqtapim karqa Diosta mana manchakuq hinaspa runakunatapas mana respetaq juez. 3Chay llaqtapitaqmi huk viudapas yacharqa, paymi chay juezman rispan cheqniqnin runawan quejanakusqanta allichaykapunanpaq mañakurqa. 4Chay juezmi ichaqa unayña mana atiendeyta munarqachu. Chaymantam kaynata tantearurqa: “Diosta mana manchakuchkaspaypas chaynataq runakunata mana respetachkaspaypas, 5ichaqa kay viuda hamupayawasqanraykuyá quejanta allichaykusaq, yanqañataq kutitikramuspan umayta nanachiwanman”, nispa.
6Chaymantam Jesús nirqa: Chaynatam kay mana allin juez nirqa. 7Chaynaqa, ¿manachum Tayta Diospas tuta punchaw qayakuqnin churinkunata nanachikunman? ¿Yaqachu suyachikunman? 8Cheqaptapunim nikichik, payqa chayllam nanaykachikunqa. Ichaqa runapa Churin hamuspan, ¿yaqachu iñiyta kay pachapi tarinqaraq? nispa.
Fariseopawan impuesto cobraqpa mañakuyninmanta
9Allinpaq hapikuspanku runamasinkuta usuchiqkunamanmi kay rikchanachiyta Jesús nirqa:
10Iskay runakunam Diosta mañakunankupaq temploman rirqaku. Hukninmi karqa fariseo, hukninñataq impuesto cobraq. 11Chay fariseom sayaykuspan kaynata mañakurqa: “Graciastam qoyki Diosnilláy. Ñoqaqa manam wakin runakuna hina suwachu, mana allin ruwaqchu, waqllikuqchu, nitaqmi kay impuesto cobraq runa hinachu kani. 12Semanapim iskay kutita ayunani, lliw ganasqaymantapas diezmoytam qoyki”, nispa. 13Impuesto cobraqñataqmi qepallapi sayaruspan cielotapas mana qawarispan qasqonta takakuspan nirqa: “Diosnilláy kuyapayariykullaway, huchasapam kallani”, nispa. 14#Mt 23.12; Lc 14.11.Chaynaqa, nikichikmi, kay impuesto cobraqmi huchanmanta pampachasqaña wasinman kutikurqa, fariseoñataqmi mana pampachasqachu karqa. Pipas hatunchakuqqa uchuychasqam kanqa, uchuychakuqñataqmi hatunchasqa, nispa.
Wawakunata Jesús bendecisqanmanta
(Mt 19.13-15; Mr 10.13-16)
15Bendeciykunanpaqmi Jesusman wawakunata pusamurqaku. Chayta qawaykuspankum discipulonkunañataq pusamuqkunata qaqcharqaku. 16Chaymi Jesusñataq paykunata qayaykuspan nirqa:
Ama wawakuna ñoqaman hamunanta harkakuychikchu. Kay wawakuna hina kaqkunapaqmi Diospa munaychakuyninqa. 17Cheqaptam nikichik, pipas wawakuna hina Diospa munaychakuyninta mana chaskiqqa, manapunim chaymanqa yaykunqachu, nispa.
Apu runapa Jesuswan rimasqanmanta
(Mt 19.16-30; Mr 10.17-31)
18Hukkaqnin kamachikuqmi Jesusta tapurqa:
Allin yachachikuq, ¿imatataq ruwasaq wiñay kawsayta haypanaypaq? nispa.
19Chaymi Jesusñataq nirqa:
¿Imanasqataq “allin yachachikuq” niwanki? Allinqa chullallam, payqa Diosmi. 20#Ex 20.14; Dt 5.18.#Ex 20.13; Dt 5.17.#Ex 20.15; Dt 5.19.#Ex 20.16; Dt 5.20.#Ex 20.12; Dt 5.16.Qamqa yachankim kamachikuykunataqa: “Amam waqllikunkichu, amam wañuchinkichu, amam suwakunkichu, amam pimantapas llullataqa rimankichu, taytaykitawan mamaykitam kasukunki”, nispa.
21Hinaptinmi chay runañataq nirqa:
Chaykunataqa warma kasqaymantaraqmi ruwayman churaq kani, nispa.
22Chayta uyarispanmi Jesusñataq nirqa:
Chaywanpas kayraqmi ruwanayki kachkan, rispayki tukuy kapuqnikita rantikaramuy hinaspa chay qollqeta wakchakunaman qoykamuy, chaynapim hanaq pachapi kapuqniyuq kanki, hinaspayá qatiway, nispa.
23Chayta uyariruspanmi chay runañataq apullaña kasqanrayku llumpayta llakikururqa. 24Jesusñataqmi ancha llakisqata qawarispan nirqa:
¡Mayna sasatam apukunaqa Diospa munaychakuyninman yaykunqa! 25Apu runa Diospa munaychakuyninman yaykunanmantaqa, camelloraqcha yaqapas agujapa rinrinta usturunman, nispa.
26Uyariqninkunañataqmi nirqaku:
Hinaptinqa ¿pitaq salvasqa kaytaqa atinman? nispanku.
27Chaymi Jesusñataq nirqa:
Runakunapa mana ruway atisqanpas Diospaqqa atinallanmi, nispa.
28Hinaptinmi Pedroñataq nirqa:
Señor, ñoqaykuqa tukuy imaykutapas saqespam qatichkaykiku, nispa.
29Jesusñataqmi nirqa:
Cheqaptapunim nikichik, pipas Diospa munaychakuyninrayku wasinta, warminta, wawqe-paninkunata, turi-ñañankunata, tayta-mamanta, churinkunata saqeqqa, 30kay pachapim aswantaraq chaskinqa, hamuq kawsaypiñataqmi wiñay kawsayta chaskinqa, nispa.
Wañunanmanta kimsa kutikamaña Jesuspa rimarisqanmanta
(Mt 20.17-19; Mr 10.32-34)
31Chunka iskayniyuq discipulonkunata huklawman sapaqchaykuspanmi Jesús nirqa:
Jerusalén llaqtamanmi richkanchik, chaypim runapa Churinmanta profetakunapa tukuy ima qellqasqanku cumplikunqa. 32Diosta mana reqsiqkunaman entregaykuptinkum burlakuspanku kaminqaku hinaspa toqanqaku. 33Azoteruspankum wañurachinqaku, ichaqa kimsa punchawmanmi kawsarimunqa, nispa.
34Discipulonkunam ichaqa mana imayrikuqtapas entienderqakuchu, chay rimasqankunaqa pakasqa hina kasqanrayku.
Huk ñawsata Jesús sanoyachisqanmanta
(Mt 20.29-34; Mr 10.46-52)
35Jericó llaqtaman Jesús hichpay-kuchkaptinmi, ñanpa patanpi limosnata mañakuspan huk ñawsa tiyachkarqa. 36Achkallaña runakuna pasasqanta uyarispanmi, imam pasakusqanmanta tapukurqa. 37Chaymi Nazaretmanta kaq Jesuspa chayninta pasasqanta willaykurqaku. 38Hinaptinmi payñataq qaparirqa:
¡Davidpa churin Jesús, llakipayariykullaway! nispa.
39Jesuspa ñawpaqninta riqkunañataqmi upallananpaq qaqcharqaku; paymi ichaqa aswanraq qaparispan nirqa:
¡Davidpa churin Jesús, llakipayariykullaway! nispa.
40Chaymi Jesusñataq sayaykuspan qayllanman apamunankupaq kamachirqa. Aparamuptinkum tapurqa:
41¿Imatataq qampaq ruwanayta munanki? nispa.
Chaymi ñawsañataq nirqa:
Señor, qawarikuytam munallani, nispa.
42Jesusñataqmi nirqa:
Qawarikuy. Iñisqaykiraykum sanoyarunki, nispa.
43Chaymi chaylla qawarikuruspan Diosta yupaychastin Jesusta qatikurqa. Llapa runakunapas chayta rikuykuspankum Diosta yupaycharqaku.
Поточний вибір:
Lucas 18: RCQ12
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
