Lucas 11
11
Diosta imaynam mañakunamanta
(Mt 6.9-15; 7.7-11)
1Huk sitiopim Jesús mañakuchkarqa, chaymi tukuykuptin huknin discipulon nirqa:
Señor, imaynam Bautizaq Juanpas discipulonkunata yachachisqanta hinayá qampas Diosta imaynam mañakuyta yachachiwayku, nispa.
2Chaymi Jesusñataq nirqa:
Diosta mañakuspaqa kaynatam ninkichik:
Hanaq pachapi kaq Taytayku,
sutiki hatunchasqa kachun,
munaychakuyniki hamuchun,
munasqayki ruwasqa kachun,
kay pachapi chaynataq hanaq pachapipas.
3Sapa punchawyá tantaykuta qowayku.
4Huchaykutayá pampachawayku,
imaynam ñoqaykupas mana allin ruwawaqniykuta pampachasqaykuta hina.
Amayá tentacionmanqa kachaykuwaykuchu,
mana allinmantayá hurqoykuwayku, nispa.
5Jesusqa nirqataqmi:
Sichum hukkaqnikichikpa amistadnikichik kanman, hinaptinñataq chawpi tutataña rispaykichik kaynata ruegakuwaqchik: “Vecino, ama hina kaspayá kimsa tantaykita aynikuykuway, 6Amistadniymi chayaramuwan, chaymi mikuykachinaypaq mana imallaypas kanchu”, nispaykichik. 7Hinaptin payñataq ukumanta nimusunkichikman: ¡Ama churmichawaychu! Punkuytapas wichqaramuniñam, ñoqapas chaynataq warmaykunapas puñuchkanikuñam manam hatarimuymanñachu, nispa. 8Ichaqa nikichikmi, amistadnikichik kasqanrayku manaña qosunaykichikpaq hatarimuyta munachkaspapas, mana penqaypi kananraykum hatarimuspan tukuy ima mañakusqaykichikta qoykusunkichik. 9Nikichikmi: Mañakuspaqa chaskinkichikmi, maskaspaqa tarin-kichikmi, qayakuptikichikqa kichaykamusunkichikmi. 10Chaynaqa, pipas mañakuqqa chaskinmi, maskaqqa tarinmi, qayakuqtaqa kichaykamunqam.
11¿Ima taytataq qamkunamanta tantata churikichik mañakusuptikichik rumita qoykuwaqchik? ¿Challwata mañakusuptikichikñataq maqta uruta qoykuwaqchik? 12¿Otaq runtuta mañakuptin atoq-atoqta qoykuwaqchik? 13Sichum qamkuna mana allin runakuna kachkaspa churikichikman allin kaqkunata qochkaptikichikqa, ¿mana-chum hanaq pachapi kaq Taytaykichikqa Chuya Espiritunta mañakuptikichikqa qoykusunkichikman? nispa.
Jesuspa contranpi rimasqankumanta
(Mt 12.22-30; Mr 3.20-27)
14Huk kutipim mana rimachikuq demoniota Jesús qarqochkarqa, chaymi chay demoniota qarqoruptin mana rimaq runaqa rimarqaña. Chayta rikuykuspankum llapa runakuna admirasqallaña karqaku. 15#Mt 9.34; 10.25.Ichaqa wakinmi nirqaku:
Kay runaqa demoniokunataqa qarqon demoniokuna kamachiq Beelzebupa atiyninwanmi, nispanku.
16 #
Mt 12.38; 16.1; Mr 8.11. Wakinñataqmi Jesusta imawanpas wichichiypi rispanku, hanaq pachamanta milagrota ruwananpaq mañarqaku. 17Ichaqa Jesusmi paykunapa piensasqanta yachaspan nirqa:
Ima nacionpas kikillanpura rakinasqa kaspaqa purmarunqam, huk ayllupas kikillanpura rakinasqa kaspaqa chinkarunqam. 18Sichum Satanás kikinpa contranpi kaptinqa, ¿imaynataq munaychakuyninqa takyanman? Chaynataqa nikichik “kay runaqa demoniokunataqa qarqon Beelzebupa atiyninwanmi” nisqaykichikraykum. 19Sichum nisqaykichikpi hina, demoniokunata Beelzebupa atiyninwan ñoqa qarqoptiyqa ¿pipa atiyninwantaq churikichikkunaqa demoniokunata qarqonku? Chaynaqa, paykunam juzgasunkichik. 20Sichum demoniokunata Diospa atiyninwan qarqoptiyqa, Diospa munaychakuyninmi chayaramusunkichik.
21Allin armasqa, kallpasapa runa wasinpi kapuqninkunata waqaychaptinqa, tukuy imankunapas hawkam kanqa. 22Sichum paymanta aswan kallpasapa runa hamuruspanqa, venceruspanmi armankunatapas qechuruspan tukuy imankunatapas munasqanta ruwarunqa.
23 #
Mr 9.40. Pipas mana ñoqawan kaqqa contraypim kachkan. Ñoqawan kuska mana huñuqñataqmi usuchichkan.
Runaman demonio kutiykusqanmanta
(Mt 12.43-45)
24Runamanta demonio lloqsiruspanqa, chunniq chaki allpakunapim samaykuyta maskastin purin, mana tarispanñataqmi nin: “Lloqsimusqay wasiyman kutikusaq”, nispan. 25Chayaruspanñataqmi sumaq pichasqata hinaspa allichasqata tariykun. 26Hinaspanmi kutirispan kikinmantapas aswan mana allin qanchis espiritukunataraq pusaramurqa, chay runaman usturuspan yachakunankupaq. Chaynapim chay runaqa ñawpaq kasqanmantapas aswan mana allinña rikurirun, nispa.
Cheqap kusikuymanta
27Chaynata Jesús rimachkaptinmi, runakunapa chawpinmanta huk warmi qaparimurqa:
¡Mayna kusisqaraq wachakusuqniki hinaspa ñuñusuqniki warmiqa! nispa.
28Chaymi Jesusñataq nirqa:
Aswan kusisqaqa Diospa palabranta uyarispa kasukuqkunam, nispa.
Milagrota ruwananpaq runakunapa mañakusqanmanta
(Mt 12.38-42; Mr 8.12)
29 #
Mt 16.4; Mr 8.12. Jesuspa muyuriqninman llapa runakuna huñunakaramuptinmi paykunata nirqa:
Kay miraykunaqa mana allin runa-kunam, milagro ruwanaytaraqmi maña-kunkupas. Ichaqa manam ruwasqachu kanqa, qawaspaqa qawachisaq Jonasta imam pasasqallantam. 30#Jon 3.4.Imaynam Nínive llaqtapi runakunapaq Jonás señal hina karqa, chaynam runapa Churinpas kunan tiempo miraykunapaq señal kanqa. 31#1~R 10.1-10; 2~Cr 9.1-12.Sur lawpi reinapas juicio punchawpim kay miraykunapa contranpi hatarimunqa, hinaspam paykunata condenanqa. Payqa karu-karu llaqtamantaraqmi hamurqa rey Salomonpa yachaynin uyariq. Kaypiqa tarikun Salomonmantapas aswan masraqmi. 32#Jon 3.5.Nínive llaqtapi runakunapas juicio punchawpi kawsarimuspam kay miraykunata condenanqaku. Paykunaqa Jonaspa willakusqanwanmi huchankumanta wanakurqaku, kaypiqa tarikun Jonasmantapas aswan masraqmi.
Ñawinchikqa achkiy hina kasqanmanta
(Mt 5.15; 6.22-23)
33 #
Mt 5.15; Mr 4.21; Lc 8.16. Mecherotaqa manam pakarunapaqchu ratachina, nitaqmi cajonpa ukunman churarunapaqchu, aswanqa altoman churanapaqmi, chaynapi wasiman yaykuqkunata achkinanpaq. 34Ñawiqa cuerpopa achkiyninmi. Sichum ñawiki allin kaptinqa cuerpoykipas achkipa huntasqanmi kachkan. Ñawiki mana allin kaptinmi ichaqa cuerpoykipas tutayaypi kachkan. 35Chaynaqa, cuidakuyá, qampi achkiy ama tutayarunanpaq. 36Sichum cuerpoyki achkiypa huntasqan kaspan mana imaniraqllapas tutayayniyuq kaptinqa, tukuy imatam sutillata rikunki imaynam mecherowan rikusqaykita hina.
Fariseokunata Jesús qaqchasqanmanta
(Mt 23.1-36; Mr 12.38-40; Lc 20.45-47)
37Rimayta Jesús tukuruptillanmi, huk fariseoñataq wasinman convidarqa mikuykamunanpaq, chaymi rispan mikunanpaq tiyaykurqa. 38Ichaqa paykunapa costumbrenman hina makinta Jesús mana mayllakuptinmi chay fariseoqa hukmanyasqallaña qawarayarqa. 39Chaymi Jesusñataq nirqa:
Yaw fariseokuna, qamkunaqa vasotawan platotapas hawallantam mayllankichik, ukuykichikmi ichaqa suwakuywan hinaspa mana allin ruwaywan huntasqa kachkan. 40¡Mana yachayniyuqkuna! ¿Manachum hawanta ruwaqqa ukuntapas ruwarqa? 41Kapusuqnikichikmantayá limosnatapas qoychik, chaynapi tukuy imapas limpio kapusunaykichikpaq.
42 #
Lv 27.30. ¡Ay, imaynaraq kankichik! Llapa fariseokuna qamkunaqa hierbabuenamanta, rudamanta hinaspa tukuy rikchaq yuyukunamantam diezmota qonkichik. Allin ruwaytawan Diosta kuyaytam ichaqa qonqarunkichik. Kaytayá ruwaychik diezmo qoytapas ama qonqaspa.
43¡Ay, imaynaraq kankichik! Llapa fariseokuna qamkunaqa sinagogakunapipas ñawpaqllapi tiyaytaraqmi munankichik, plazakunapipas hatun respetowan rimaykusunaykichiktam munankichik.
44¡Ay, imaynaraq kankichik! Qamkunaqa mana rikuriq sepulturakuna hinam kachkankichik, chayraykum runakunapas mana yachaspa hawanta purinku, nispa.
45Hinaptinmi Diospa leynin yacha-chiqkunamanta hukkaqnin nirqa:
Yachachikuq, chaynata rimaspaykiqa ñoqaykutapas insultawachkankikum, nispa.
46Chaymi Jesusñataq nirqa:
Diospa leynin yachachiqkuna, ¡qamkunapas imaynaraq kankichik! Qam-kunaqa runakunamanmi mana apay atinanku llasaq qepita qepirachinki-chik, qamkunam ichaqa mana llap-chayllapas-llapchaykunkichikchu.
47¡Ay, imaynaraq kankichik! Qamku-naqa ñawpaq taytaykichikkunapa wa-ñuchisqan profetakunapa sepulturankunatam hatarichinkichik. 48Chaykunata ruwaspaqa ñawpaq taytaykichikkunapa imam ruwasqantam allinmi nichkankichik, paykunam wañuchirqaku qamkunañataqmi sepulturanta hatarichinkichik.
49Chayraykum Diosqa yachayninpi nir-qaña: “Profetakunatawan apostolkunatam kachasaq, wakintam wañuchinqa-ku wakintañataqmi qatikachanqaku”, nispa. 50Chayraykum kay miraykunamanta cuentata Dios mañanqa, kay pachapa qallariyninmantapuni llapa profetakunapa yawarnin chaqchusqankumanta, 51#Gn 4.8.#2~Cr 24.20-21.Abelpa wañusqanmanta qallaykuspa Zacariaskama, Zacariastam altarmanta santuarioman rinapi wañurachirqaku. Chayraykum nikichik, paykunapa wañusqanmantam kunan miraykunata cuentata Dios mañanqa.
52¡Ay, imaynaraq kankichik! Diospa leynin yachachiqkuna, qamkunaqa yachaypa llaventam hapikurunkichik, manam yaykuyta munankichikchu, nitaqmi hukkuna yaykukunantapas munankichikchu, nispa.
53Chaymanta Jesús lloqsiruptinmi, Diospa leynin yachachiqkunawan fariseokuna llumpayta piñakuruspanku tukuy rikchaq tapukuykunawanña hapirqaku, 54rimas-qanpi imapipas pantaruptinqa chay rimasqallanwan wichirachispa acusanankupaq.
Поточний вибір:
Lucas 11: RCQ12
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
