Juan 6
6
Pichqa waranqa runakunaman mikuchisqanmanta
(Mt 14.13-21; Mr 6.30-44; Lc 9.10-17)
1Chaymantam Galilea qochapa waklawninman Jesús rirqa, chay qochapa huknin sutinmi karqa Tiberias. 2Chaymi achkallaña runakuna qatirqaku, onqoqkuna sanoyachisqanta qawasqankurayku. 3Jesusñataqmi moqoman seqaruspan discipulonkunawan tiyaykurqa. 4Ñam judiokunapa Pascua fiestan hichpamuchkarqaña. 5Achkallaña runakuna qatimusqanta qawarispanmi Felipeta nirqa:
¿Maymantataq kaynaña runapaqqa mikuyta rantimusun? nispa.
6Chaynataqa nirqa Felipeta pruebananpaqmi, Jesusqa ñam yacharqaña ima ruwaytapas. 7Chaymi Jesusta Felipe nirqa:
Iskay pachak jornalpa chanin tantapas manachá haypanmanchu sapakama asninkallaña mikuptinkupas, nispa.
8Jesuspa huknin discipulonmi karqa Simón Pedropa wawqen Andrés. Paymi nirqa:
9Kaypim huk warma kachkan, paypam kachkan iskay challwawan cebadamanta pichqa tantankuna. Chaywanpas, ¿imaynataq chayllaqa kaynaña runamanqa haypanman? nispa.
10Jesusñataqmi nirqa:
Llapa runakunata tiyachiychik, nispa.
Chaypim sumaqllaña pastokuna karqa, hinaptinmi chaypi tiyachirqaku. Llapallan tiyaqkunam karqa yaqa pichqa waranqa qarikuna. 11Jesusñataqmi tantata hapiykuspan Diosman graciasta qorqa, hinaspam discipulonkunaman qoykurqa tiyaqkunaman aypumunankupaq; hina chaynallatam challwakunatapas aypuchirqa, chaymi saksanankukama mikurqaku. 12Saksaruptinkum discipulonkunata Jesús nirqa:
Puchuqkunata hoqariychik ama usu-nanpaq, nispa.
13Chay pichqa cebada tantamanta puchuqkunatam huñurqaku chunka iskayniyuq canasta huntata. 14Jesuspa milagro ruwasqanta qawaykuspankum llapa runakuna nirqaku:
Payqa cheqaptapunim kay pachaman hamuq profeta kasqa, nispanku.
15Jesusñataqmi musyakururqa hapiruspanku rey kananpaq churaruy munasqankuta, chaymi orqoman sapallan pasakurqa.
Yakupa hawanta Jesús purisqanmanta
(Mt 14.22-27; Mr 6.45-52)
16Inti seqaykuruptinmi Jesuspa discipulonkuna lamar qochaman urayka-murqaku. 17Hinaspam barcaman qespispanku lamar qocha chimpayta qallarirqaku Capernaúm llaqtaman chayanankupaq. Ñam tutayaramurqaña, Jesusmi ichaqa paykunapa kasqanman mana hamurqaraqchu. 18Sinchita wayramusqanraykum lamar qochapa olankuna hoqarikamuyta qallaykurqa. 19Yaqa soqta kilómetro nisqataña richkaspankum, Jesusta rikururqaku yaku hawantakama paykuna lawman hamuchkaqta, hinaspam mancharikurqaku. 20Jesusmi ichaqa nirqa: “Ñoqam kani, ama manchakuychikchu”, nispa.
21Chaymi kusikuymanta paykuna barcaman qespichirqaku, hinaspam chaylla maymi risqankuman chayarurqaku.
Jesusta runakuna maskasqankumanta
22Paqarinnintintam lamar qochapa waklawninpi kaq runakuna yacharurqaku huk barcallaña chaypi kasqanta, paykunaqa rikurqakum Jesusqa discipulonkunawan kuska barcapi mana chimpasqanta. 23Chaymanmi Tiberias llaqtamanta barcakuna chayaramurqa, chaypim Jesús graciasta qospa tantata runakunaman mikuchirqa. 24Chaymi runakunaqa Jesusta chaynataq disci-pulonkunatapas manaña chaypi tarispanku, maskamunankupaq barcakunaman qespispanku Capernaúm llaqtaman rirqaku.
Kawsay qokuq tantamanta
25Chimparuspankum Jesusta lamar qochapa waklaw patanpi tarirurqaku, hinaspam nirqaku:
Yachachikuq, ¿haykapitaq kayman hamurqanki? nispanku.
26Chaymi Jesusñataq nirqa:
Cheqaptapunim nikichik, qamkunaqa saksanaykichikkama tantata mikusqaykichikraykum maskawachkankichik, manam milagrokuna qawasqaykichikraykuchu. 27Amayá llamkaychikqa tukuruqlla mikuyraykuchu, aswanqa wiñay kawsay qokuq mikuypaqyá llamkaychikqa. Chay mikuytaqa runapa Churinmi qosunkichik, paytam Dios Tayta chaypaq akllarqa, nispa.
28Chaymi runakuna nirqaku:
¿Imatataq ruwasaqku Diospa munasqanta ruwanaykupaq? nispanku.
29Jesusñataqmi nirqa:
Diospa munasqan ruwayqa paypa kachamusqanpi iñiymi, nispa.
30Hinaptinmi nirqaku:
¿Ima milagrotataq qowankiku chayta qawaspa qanman iñinaykupaq? ¿Imatataq ruwayta atiwaq? 31#Ex 16.4, 15.#Sal 78.24.Ñawpaq taytaykuqa “maná” sutiyuq tantatam chunniqpi mikurqaku. Chuya Qellqam nin: “Diosmi hanaq pachamanta tantata qomurqa”, nispa.
32Chaymi Jesusñataq nirqa:
Cheqaptapunim nikichik, manam Moiseschu hanaq pachamanta hamuq tantataqa qosurqankichik, aswanqa Taytaymi hanaq pachamanta cheqap tantataqa qosuchkankichik. 33Diospa qosqan tantanqa hanaq pachamanta uraykamuqmi, chay tantaqa runakunamanmi kawsayta qon, nispa.
34Hinaptinmi chay runakunañataq nirqaku:
Señor, tukuy tiempoyá chay tantata qowayku, nispanku.
35Chaymi Jesusñataq nirqa:
Ñoqam kani kawsay qokuq tanta, pipas ñoqaman hamuqqa manam hay-kapipas yarqachikunqachu, pipas ñoqa-pi iñiqqa manataqmi haykapipas yakuna-yachikunqachu. 36Ichaqa nisqaypi hina riku-wachkaspaykichikpas, manam creenkichikchu. 37Taytapa qowasqankunaqa llapallanmi ñoqaman hamunqa, ñoqaman hamuqtaqa manam qarqonichu. 38Hanaq pachamantaqa hamurqani manam kikiy-pa munasqayta ruwanaypaqchu, aswanqa kachamuwaqniypa munasqanta ruwanaypaqmi. 39Kachamuwaqniypa munasqanqa kaymi: Paypa qowasqanta mana mayqannintapas chinkachispay tukupay punchawpi kawsarichiyniymi. 40Taytapa munasqanqa kaymi: Diospa Churinta rikuspa payman iñiqqa wiñay kawsayniyuqñam, chayna iñiqtaqa tukupay punchawpim kawsarichimusaq, nispa.
41“Ñoqam kani hanaq pachamanta uraykamuq tanta” nispa Jesuspa nisqanmantam llapa judiokuna paypa contranpi kaynata rimapakurqaku:
42¿Manachum kay Jesusqa Joseypa churin? Tayta-mamantapas reqsinchikmi, ¿imaynamá hanaq pachamantam uraykamurqani nichkanqa? nispanku.
43Chaymi Jesusñataq nirqa:
Amañayá wachachachaychikchu. 44Manam pipas ñoqamanqa hamunmanchu kachamuwaqniy Taytay mana pusamuptinqa, chay hamuqtaqa tuku-pay punchawpim kawsarichisaq. 45#Is 54.13.Pro-fetakunapa qellqasqan libropim nichkan: “Diosmi yachachin llapallanta”, nispa. Chaynaqa, pipas Taytayta uyarispa paymanta yachaqkunaqa ñoqamanmi hamunqaku.
46Taytataqa manam pipas rikurqachu, aswanqa Diosmanta hamuqllam, payllam Taytataqa rikurqa. 47Cheqaptapunim nikichik, pipas ñoqapi iñiqqa wiñay kawsayniyuqñam. 48Ñoqam kani kawsay qokuq tanta. 49Ñawpaq taytaykichikkunam “maná” sutiyuq tantata chunniqpi mikurqaku, chaywanpas wañururqakum. 50Ichaqa kaymi hanaq pachamanta hamuq tanta, pipas paymanta mikuqqa manam wañunqachu. 51Ñoqam kani hanaq pachamanta hamuq kawsay qokuq tanta, pipas chay tantata mikuqqa wiñaypaqmi kawsanqa. Ñoqapa qosqay tantaqa aychaymi, chaytaqa llapa runakuna kawsananpaqmi qosaq.
52Chaynata niruptinmi llapa judiokuna kikinkupura kaynata atipanakurqaku:
¿Imaynataq kayqa aychantaqa qowach-wan mikunanchikpaqqa? nispanku.
53Jesusñataqmi nirqa:
Cheqaptapunim nikichik, runapa Churinpa aychanta mana mikuspaykichikqa chaynataq yawarniytapas mana tomaspaykichikqa manam kawsankichikchu. 54Pipas aychayta mikuspa yawarniyta tomaqqa wiñay kawsayniyuqmi, ñoqañataqmi tukupay punchawpi kawsarichimusaq. 55Aychayqa cheqap mikuymi, yawarniypas cheqap tomaymi. 56Aychay mikuqqa hinaspa yawarniy tomaqqa ñoqapim kachkan, ñoqañataqmi paypi. 57Imaynam kachamuwaqniy Taytay kawsan, ñoqapas paypim kawsani, chaynam aychay mikuqpas ñoqapi kawsanqa. 58Kaymi hanaq pachamanta hamuq tantaqa. Ñawpaq taytaykichikkunaqa “maná” sutiyuq mikuyta mikuchkaspankupas wañurqakum, pipas kay tantamanta mikuqmi ichaqa wiñaypaq kawsanqa, nispa.
59Kaykunataqa rimarirqa Capernaúm llaqtapi kaq sinagogapi yachachispanmi.
Wiñay kawsaymanta
60Chayta uyariykuspankum qatiqninkunamanta achkaq nirqaku:
Kay nisqankunaqa mana aguantay atinam. ¿Pitaq kayta chaskinman? nispanku.
61Jesusñataqmi rimapakusqankuta musyaruspan paykunata nirqa:
¿Kay nisqaykunawanchu hukmanyarunkichik? 62¿Imaniwaqchiktaq runapa Churinta ñawpaq kasqanman wichariqta rikuspaykichikqa? 63Espiritum kawsay qokuqqa, aychaqa manam imapaqpas valenchu. Kay rimapayasqaykunaqa espiritum hinaspa kawsay qokuqmi. 64Ichaqa qamkuna ukupim mana creeqkuna kachkanraq, nispa.
Jesusqa chaykunata nirqa, pikunam mana iñisqanta chaynataq pim traicionananta qallariyninmantapuni yachaspanmi. 65Jesusqa nirqataqmi:
Chayraykum nirqaykichik, manam pipas ñoqamanqa hamunmanchu Dios Tayta mana pusamuptinqa, nispa.
66Chaymantapunim achkaq qatiqninkuna qepaman kutikuspanku manaña Jesuswan purirqakuñachu. 67Chaymi chunka iskayniyuq discipulonkunata Jesús nirqa:
¿Qamkunapas pasakuytachu munankichik? nispa.
68 #
Mt 16.16; Mr 8.29; Lc 9.20. Hinaptinmi Simón Pedroñataq nirqa:
Señor, ¿pimantaq risaqku? Qampa rimasqaykiqa wiñay kawsay qokuqmi. 69Ñoqaykuqa ñam creenikuña, yachanikutaqmi kawsaq Diospa Churin kasqaykitapas, nispa.
70Chaymi Jesusñataq nirqa:
¿Manachum ñoqaqa chunka iskayniyuqta akllarqaykichik? Ichaqa huknikichikmi diablo, nispa.
71Chaynataqa nirqa Simonpa churin Judas Iscariotemantam. Paymi chunka iskayniyuq discipulokunapa huknin kachkaspapas traicionanan karqa.
Поточний вибір:
Juan 6: RCQ12
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
