Gɔ̃mèjèje be Xoma 13
13
1Eye Abràm jo lè Ejiptè yì Nègev, e ye, èsrɔ̃a ku ènu kè kpata lè e sia. Lɔt lè ku do è.
Abràm ku Lɔt
2Abràm ɖo àdɔ̀kùnuwo lè èlãha gomè, lè klòsalò ku sìka gomè. 3E yì sò Nègev, gbɔ̃jɛ̃ lè èmɔ̃a ji kaka va ɖo Betɛ̀l, kaka va ɖo tèpe kè e nɔ̀ sã lè Betɛ̀l ku Aì dòmèa. 4Ekè e va ɖo fikè e li vɔsakpe ɖoa, Abràm pò mlã Tɔhonɔ̀ be nyikɔ.
5Lɔt, kè kplɔ̀ Abràm do a, cã ɖo ègbɔ ku àlɛ̃wo, ènyìwo ku gòxɔwo cã. 6Ànyigbã a mu gbà sù ne woabe hiãhiãwo ɖodu ò, ɖo woabe àdɔ̀kùnuwo sùgbɔ kaka be wo mu gbà teŋu nɔ̀ èdu ò. 7Àjrè ɖe va jè Abràm be èlãha ji-kpɔtɔwo ku Lɔt be èlãha ji-kpɔtɔwo dòmè, wàlɛbɛ kè Kanàntɔwo ku Perizìtɔwo lè ànyigbã ji xoxoa, 8eye Abràm gblɔ̃ na Lɔt be: “Àjrè mu gbà nɔ̀ ènyè ku èwò dòmè ò, lè àpe èlãha-ji-kpɔtɔ kudo tɔ̀ wòawo dòmè ò: nɔ̀viwo ye mi nyi. 9Ànyigbã kpata mu lè ŋùkɔ̀ na wò ò a? Eŋuã klã jo lè ŋuti nyè. Ne wò sɔ èvègo a, mù la yì àpùgo; ne àpùgo ye à, mù la yì èvègo.”
10Lɔt kɔ ŋùkumè yì ji, kpɔ Yɔrdàn be àgowo kpata ji: funua do àmà, ɖo èsì lè ànyigbã kpata mè. Keŋu gbɔ̀xue Tɔhonɔ̀ la crɔ̃ Sodɔ̀m ku Gòmɔràa, ànyigbã a va kaka Soà, sìgbè Tɔhonɔ̀ be àbɔ mè nène, sìgbè Ejiptè be ànyigbã nène. 11Lɔt cã Yɔrdàn be àgo a kpata na ye ɖokoe eye e sò àxue ɖo èwèzɛ̃pe. Wo mã lè woa nɔ̀nɔwo ŋuti, 12Abràm ci Kanàn nyigbã ji eye Lɔt lè Yɔrdàn be àgo be èdùwo mè. Àmè kèa sò àxue kaka va ɖo Sodɔ̀m. 13Èdù kè mè tɔwo nyi àmè bàɖà eye wo wɔ̀nà èvuɛ̃ ɖo Tɔhonɔ̀ ŋuti.
14Tɔhonɔ̀ gblɔ̃ na Abràm, kè Lɔt klã lè e ŋuti vɔ̀a be: “Kɔ ŋùkumè yì ji eye so àfi kè wò lèa, kpɔ èvègo, àpùgo, èwèzɛ̃pe ku èwèɖoxɔ̀pe. 15Ɛ̃ɛ, ànyigbã kè kpata wò le kpɔa, mù sɔ na wò ku àpo jìjimè kaka sɔ yì. 16Mù la na àpo jìjimè la jì ɖo e ji sìgbè ànyigbã be hũhũ nène, kaka na be ne wo la teŋu hlɛ̃ ànyigbã be hũhũa, eŋuã wo la hlɛ̃ àpo jìjimè cã. 17Sitè, gbà zɔ̃ lè ànyigbã ji, ne wòa kpɔ yebe kèkemè ku yebe dìdimè, ɖo mù sɔ na wò.”
18Abràm so ku yebe gòxɔwo eye be sò àxue ɖo Namirè be lokòtiawo dòmè lè Hebrɔ̀n; e li vɔsakpe ɖèka ɖo funu na Tɔhonɔ̀.
Поточний вибір:
Gɔ̃mèjèje be Xoma 13: GEN
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Mina Bible © Bible Society of Togo, 2014.