Matayo 1

Akare a Jeso

(Luka 3:23-38)

1Uu ndio mulolongo wa akare a Jeso. Jeso Kʼirisito wakala ni mutʼu wa mudzungu wa Daudi, na Daudi naye wakala ni wa mudzungu wa Burahemu.

2Burahemu wakala ni abaye Isaka,

Isaka wakala ni abaye Jakobo,

na Jakobo naye wakala ni abaye Juda na nduguze.

3Juda wakala ni abaye Peresi na Zera, (na ao ameyao wakala ni Tamari);

Peresi wakala ni abaye Hezironi,

Hezironi wakala ni abaye Aramu,

4Aramu wakala ni abaye Aminadabu,

na Aminadabu wakala ni abaye Nashoni.

Nashoni wakala ni abaye Salimoni.

5Salimoni wakala ni abaye Boazi, (na ameye Boazi wakala ni Rahabu).

Boazi wakala ni abaye Obedi, (na ameye Obedi wakala ni Rutu).

Obedi wakala ni abaye Jese,

6 # 2 Afal 24:14, 15; 2 Mgu 36:10; Jer 27:20 na Jese naye wakala ni abaye mufalume Daudi.

Daudi wakala ni abaye Selemani, (na ameye Selemani pho mwanzo wakala ni mukaza mufadzi Uriya).

7Selemani wakala ni abaye Rehoboamu,

na Rehoboamu wakala ni abaye Abija.

Abija wakala ni abaye Asafu,

8Asafu wakala ni abaye Jehoshafati,

Jehoshafati wakala ni abaye Joramu,

Joramu wakala ni abaye Uziya,

9Uziya wakala ni abaye Jotamu,

Jotamu wakala ni abaye Ahazi,

na Ahazi naye wakala ni abaye Hezekiya.

10Hezekiya wakala ni abaye Manase,

Manase wakala ni abaye Aamoni,

na Aamoni wakala ni abaye Josiya.

11Josiya naye wakala ni abaye Jekonia na nduguze,

na ao ávyalwa ukati urio Ayahudi ákala anahwalwa mateka kuphirikwa itsʼi ya Babeli.

12Ayahudi ariphohwalwa mateka hata ko Babeli,

Jekonia wakwendavyala mwana aihiwaye Shealitiyeli,

na Shealitiyeli achimuvyala Zerubabeli.

Zerubabeli ariphokula, watsamira Judea,

13na kuko achendamuvyala Abihudi,

Abihudi achimuvyala Eliakimu,

na Eliakimu naye achimuvyala Azori.

14Azori achimuvyala Sadoki,

Sadoki achimuvyala Akimu,

na Akimu achimuvyala Eliyudi.

15Eliyudi achimuvyala Eleyazari,

Eleyazari achimuvyala Matani,

na Matani naye achimuvyala Jakobo.

16Jakobo ndiyekala ni abaye Jesefu,

na Jesefu ndiye mulumengwa wa Maryamu ameye Jeso aihiwaye Kʼirisito.

17Ndo kuna vivyazi kumi na vine ulaa Burahemu hata Daudi, kumi na vine vinjine kulaa Daudi hata ukati urio Ayahudi áhwalwa mateka hata Babeli, na kuna vivyazi kumi na vine kahiri kulaa ukati Ayahudi ariphohwalwa mateka, hata ukati yiye Kʼirisito ariphovyalwa.

Jeso arivyoinjizwa na kuvyalwa

(Luka 2:1-7)

18 # Luk 1:27 Vivi ndivyo Jeso Kʼirisito arivyoinjizwa: Ameye Maryamu wakala unalolwa ni Jesefu, ela phokala kʼaadzangwe kuhwalana, Maryamu achidziona una tʼumbo, na tʼumbo yiyo yainjiziswa ni widimi wa Roho wa Mulungu. 19Jesefu wendengwa wa Maryamu, wakala ni mutʼu ahendaye haki. Kwa vivyo, ariphomuuhuka wendewe una tʼumbo, kʼahenzere kumutiya waibu jamani, hata yiye waamula kumutsamula, ela chisiri. 20Jesefu ariphoamula vivyo, malaika wa Bwana wamulairira ndosoni na achimwamba, “Jesefu mutʼu wa mudzungu wa Daudi, tsʼihende chisoi kumuhwala wendeo Maryamu, mana, tʼumbo ariyo nayo bee yainjiziswa ni widimi wa Roho wa Mulungu. 21#Luk 1:31Yiye undavyala mwanalume, nawe undamuhatsʼa Jeso. Undamuhatsʼa dzina riro kwakukala, yiye undaativya atʼue kwa kwausira madambi gao.”

22Gago gosi gálairira kwa hata gachimize garatʼu maneno ga Bwana Mulungu gogombwa ni mugomviwe kukala, 23#Isa 7:14“Musichana ariye kʼadzangwe kumanya mulume undainjiza, na avyale mwanalume, na mwana yiye undahatsʼwa ‘Manueli’ (yaani, Mulungu u phamwenga naswi).” 24Ndo Jesefu aripholamuka, wahenda garatʼu gokala udzambwa ni yiye malaika wa Bwana. Yiye wamuhwala Maryamu, 25#Luk 2:21ela kʼalalire naye kamare hata Maryamu achidzivugula mwanawe mwanalume. Na Jesefu achimuhatsʼa Jeso.

Поточний вибір:

Matayo 1: CHIDUR

Позначайте

Поділитись

Копіювати