Mark 5

Yěsû a parə̀ a ŋònə̀ nɨ à pənə nɨ ɨ̀zhyə̂

(Mat 8.28-34; Luk 8.26-39)

1Yěsû pobə ɨ̀zùŋə̀ ndzùmə̀ ɨ̀pe lə̀ twuumə̀ atəŋə Galìlyə̂ ndèrə̀ a àlaʼà Gerasà. 2Nkwùə̀ nɨ Yěsû à lə̀ furə̀nə amwuə àkànwuʼə, ŋònə̀ ɨ̀tse nɨ à lə̀ pənə nɨ àzhwùə̀ tɨ̀pòŋə̀ à lə̀ furə̀ a alyiʼə nɨ mɨ̀shyə̀ pənə ghu ntô mbwùumə̀ e, 3ŋònə̀ ẅèrə wə̀ à lə̀ pə nchyə̂ àtwuə̀ mɨ̀shyə̀, mbə ẅùə̀ nɨ mbə̀ʼə ka pɨ korə̀ e a ye nɨ mɨnkɨrə, mbaa pə nɨ mɨ̀tsaŋə̀ 4pɨ lə̀ mə nkorə̀ mɨ̀kwùə̀ ɨ̀me pobə mbô ɨ̀me la nkwùə̀ ɨ̀tsùmə̀. À lə̀ mə ndiitə̀ mɨ̀tsaŋə̀ nɨ mɨ̀tɨ̀ŋnə̀ nkɨ mmə nshantə̀ pɨ̀kɨ̀pùʼù nɨ pɨ lə̀ chyânə a mɨ̀kwùə̀ ze. Ka ŋònə̀ ɨ̀tse a lə̀ pə e nɨ mɨ̀tɨ̀ŋnə̀ nɨ mɨ tsàarə̀nə ɨ̀me a nɨ ghɨ̀rə̀ lo â ponə̀ nnwuunə̀. 5A lə̀ mə ngyìinə̀ amwuə mɨ̀shyə̀ pobə pɨ̀kòŋə̀ amwuə ɨ̀twuʼə̀ ghobə njyə̂, ngyìi ngwàtə̀ mbɨ̀ŋmə̀ e nɨ mɨ̀ghòorə. 6Nkwùə̀ nɨ à lə̀ zəənə̀nə a Yěsû a ntyə̌ sàa, a lə̀ kɨ̀ɨrə̀ ntô nkunə̀ aŋunə mɨ̀kẅìʼtə ɨ̀me a mbyə̀ ze. 7À lə̀ kyiinə̀ nɨ ngyə̀ ntɨ̀ŋnə̀ nshwəŋə̀ lo, “Wə̀ tàʼà ghɨ̀rə̀ lə ɨla nɨ mɨ̀ŋə̀, Yěsû, Moonə̀ Nẅùə̀ Àkoʼntsirə̀? M̀buʼù mbô ambo ghò aŋunə nɨ̀linə̀ nɨ Nẅùə̀ lo kò wə̀ ŋâ o a gha nɨ ngəʼə̀!” 8Mbə̀ʼnə Yěsû à shwəŋə̀ mə ambo ze lo, “Àzhwùə̀ tɨ̀pòŋə̀, furə̀ amwuə ŋònə̀ wə̀!”

9Yěsû a zùŋə̀ mbyiitə̀ e lo, “Nɨ̀linə̀ ɨ̀tsô la ɨ̀wə̌?” A kẅùə̀ lo, “Nɨ̀linə̀ ɨ̀tsâ la Legion; ntiinə pəə pə pɨ̀noʼnə.” 10Lenəla, a puʼù mbô ambo Yěsû tyiʼə̀ tɨsɨŋnə lo kò a fuukə̀ e a ghobə amwuə pàa àlaʼà ghu. 11Àpùŋə̀ pə̀kuŋə a lə̀ mə ndzɨghə̀ a mbɨ̀ŋmə̀ kòŋə̀ a alyiʼə ghu. 12Ɨ̀zhwùə̀ tɨ̀pòŋə̀ pa lə̀ puʼù mbô ambo Yěsû mmə nshwəŋə̀ lo, “Tsàa a wəə a tɨ̀tɨ̀rə̀ pə̀kuŋə pyə̀; ntyiʼə̀ pəə kwuunə̀ amwuə pobə.” 13Yěsû à lə̀ zùŋə̀ ŋŋâ ɨ̀sàanə̀ ambo pobə, pobə furə̀ nkwuunə̀ amwuə pə̀kuŋə pa. Àpùŋə̀ pə̀kuŋə zə a lə̀ pə tsaʼa pə̀kuŋə nkaamə̀ ɨpaa. Pobə lə̀ kɨ̀ɨrə̀ nshwuʼə̀ a nguŋə nchyə, mbɨgrə̀ nkẅìntə̀ amwuə atəŋə nchyə za nkwɨkə̀ amwuə.

14Pànə̀ nɨ pɨ lə̀ mənə mbyabə̀ pə̀kuŋə pə lə̀ kɨ̀ɨrə̀ ntyiʼə̀ nsìimə̀ ntwuumə̀ ẅèrə wə̀ amwuə mbòmpə àlaʼà ghobə àlaʼà. Pànə̀ lə̀ tyiʼə̀ nfurə̀ ndèrə̀ lo zəənə̀ ànwùə̀ nɨ a lə̀ furə̀nə. 15Nkwùə̀ nɨ pobə lə̀ tônə ambo Yěsû, pobə lə̀ zəənə̀ a ŋònə̀ wa nɨ ɨ̀zhwùə̀ tɨ̀pòŋə̀ lə̀ pənə amwuə ze la, à nwuunə̀ mmàʼà ɨtsəʼə ɨ̀pe, mbə nɨ àzhìʼtə̀ e tyiʼə̀ àtsùmə̀, ka ànwùə̀ àtse a mə ngɨ̀rə̀ e a ye. Lenəla, pobə tyiʼə̀ mbə nɨ àkẅàrə̀ 16Pànə̀ nɨ pɨ lə̀ zəənə̀nə ànwùə̀ zèrə zə lə̀ tyiʼə̀ nshwəŋə̀ pə̀ənə̀ nɨ ànwùə̀ nɨ a ghɨ̀rə̀nə a ŋònə̀ nɨ à lə̀ pənə nɨ ɨ̀zhwùə̀ tɨ̀pòŋə̀, farə ànwùə̀ nɨ a lə̀ ghɨ̀rə̀nə pə̀kuŋə pa. 17Pobə lə̀ pìʼnə̀ a nɨ puʼù mbô ambo Yěsû lo â myàʼtə̀ a pàa àlaʼà ɨ̀ghobə. 18Tsaʼnə Yěsû à lə̀ mənə nkwuunə̀ amwuə àkànwuʼə lo lèrə̀ e la, ŋònə̀ wa nɨ à lə̀ pənə nɨ ɨ̀zhwùə̀ tɨ̀pòŋə̀ à lə̀ puʼù mbô nshwəŋə̀ ambo ze lo â lòo e pobə ze lèrə̀. 19La Yěsû a twuunə̀ nshwəŋə̀ ambo ze lo, “Lèrə̀ a ɨmwuə alyiʼə ngə̀ ntsirə̀ ngẅàrə̀ o ntiitə̀ a ghobə nɨ ànwùə̀ nɨ Ndòʼnə̀mbyə̂ à ghɨ̀rə̀nə ambo ghò farə amwuə ndwuumə̀ nɨ à koorə̀nə mɨ̀lɨŋə̀ ɨ̀mô.”

20Lenəla, ŋònə̀ wa à lə̀ furə̀ ntyiʼə̀ mbìʼnə̀ a nɨ chwìitə̀ ànwùə̀ nɨ Yěsû à ghɨ̀rə̀nə aŋunə ze ambo pə̀ənə̀ amwuə mɨ̀mbòmpə mɨ ɨ̀laʼà ma nɨ̀ghumə̀. Pànə̀ pɨ̀tsùmə̀ nɨ pobə lə̀ zuʼnə lə̀ yerə̀.

Yěsû a parə̀ a mə̀ngyə̌ nkɨ nzhwuumə̀ a mômə̀ngyə̌ aŋunə nɨ̀wɨghə̀

(Mat 9.18-26; Luk 8.40-56)

21Yěsû à lə̀ kẅirə̀ ntwuumə̀ atəŋə za mbə amwuə zhyə̀ ndzìnə, àpùŋə̀ pə̀ənə̀ a tô nshwatə̀ nkamnə̀ e nkwùə̀ nɨ a pənə a nɨ̀pwùnə atəŋə za. 22Lenəla, àtwuə̀ ndâ àshwatə̀ pɨ̀Jew yètse a lə̀ pə ghu, nɨ̀linə̀ ɨ̀tse pə Jarùsə̀. Tsaʼnə à lə̀ zəənə̀nə a Yěsû la, à lə̀ kunə̀ a mɨ̀kwùə̀ ze, 23mbuʼù mbô ambo ze lo, “Mɨlyiʼə moonə̀ mə̀ ghu mə̀ngyə̌ à wə̀ ngòonə̀ tə ntyiʼə̀ a ntswùə̀ nɨ̀wɨghə̀. Tô nnùŋə̀ mbô ɨ̀mô aŋunə ze mbə̀ʼə â fiitə̀ mbə ghù ntɨ̀ŋnə̀.”

24Tsaʼnə à lə̀ shwəŋə̀nə a lenə la, Yěsû à lə̀ pìʼnə̀ a nɨ lèrə̀ pobə ze. Àpùŋə̀ pə̀ənə̀ a mə ndzùŋə̀ e ngyìinə̀ ndzintə̀ e amwuə pɨ̀pàa pɨ̀tsùmə̀.

25Mə̀ngyə̌ ɨ̀tse à lə̀ pə amwuə àpùŋə̀ pə̀ənə̀ za nɨ à lə̀ mənə ndzəənə̀ nkwùə̀ e njyə̂ ɨ̀tsùmə̀ aŋunə nguʼu ntsòbə̀ ɨpaa. 26Nkɨ pə la nɨ à zəənə̀ mə ngəʼə̀ yɨ̀noʼnə ndèrə̀ ambo ngàŋə mɨfuə, ntsə̀ŋə̀ àzwuumə̀ àtsùmə̀ nɨ à lə̀ pənə nɨ zèrə la ka fiitə̀ e, nɨ̀ghòonə̀ a kɨ mmə ndèrə̀ e pə nɨ mbyə̀. 27Nkwùə̀ nɨ à lə̀ zuʼnə ànwùə̀ mbə̀ʼə Yěsû, à lə̀ tyiʼə̀ ndzùŋə̀ e a ndzùmə̀ ze amwuə àpùŋə̀ pànə̀ za, ntsàa àpô mbètə̀ atsəʼə e. 28A lə̀ kɨ pètə̀ la, mmə nkwàŋə̀ amwuə ntɨŋmə̀ e lo, “Ntə mbə lə mbètə̀ atsəʼə Yěsû yi mbɨ fiitə̀.”

29Tyiʼə̀ tsaʼnə à lə̀ pètə̀nə, nkwùə̀ e za ɨ lə̀ ləənə̀, a zùŋə̀ ndzuʼù amwuə mbɨ̀ŋmə̀ e lo nɨ̀ghòonə̀ e wa a fiitə̀. 30Yěsû à lə̀ zùŋə̀ ndzuʼù lo mɨ̀tɨ̀ŋnə̀ furə̀ amwuə ze mbə̀ŋə̀ mbyiitə̀ ambo àpùŋə̀ pànə̀ za lo, “Atsəʼə mə̀ la a pètə̀ ɨ̀wə̌?”

31Ɨ̀zùŋə̀ ndzùmə̀ ɨ̀pe kẅùə̀ lo, “Wə̀ zəənə̀ àpùŋə̀ pə̀ənə̀ a pə a ndzùmə̀ ghò ndzùunə̀, wə̀ chi mbyiitə̀ lo, ‘A ghò à pètə̀ ɨ̀wə̌?’”

32Yěsû a chi nnaŋə̀ pànə̀ pa lo zəənə̀ a ŋònə̀ nɨ à pètə̀nə e. 33Tsaʼnə mə̀ngyə̌ wa a lə̀ zhyə̂nə ànwùə̀ nɨ à ghɨ̀rə̀ mə aŋunə ze, a lə̀ zùŋə̀ nfurə̀ mmə ngyìinə̀ ngwùrə̀ nɨ àkẅàrə̀ ntô a mbyə̀ ze, nkunə̀ a mɨ̀kwùə̀ ze, nshwəŋə̀ ànwùə̀ àtsùmə̀ ambo ze. 34Yěsû a tyiʼə̀ nshwəŋə̀ ambo ze lo, “Moonə̀ mə̀ ghu mə̀ngyə̌ àpyiimə̀ ntɨŋmə̀ o a ghɨ̀rə̀ wə̀ tɨ̀ŋnə̀, lèrə̀ àporə̀porə̀, nɨ̀ghòonə̀ o wa â fiitə̀.”

35Tsaʼnə à lə̀ pirə̀nə mmə nshwəŋnə̀, pànə̀ pɨ̀tse lə̀ furə̀ a ndâ Jarùsə̀ (àtwuə̀ àshwatə̀ pɨ̀Jew) ntô nshwəŋə̀ ambo ze lo, “Moonə̀ o wa à kwɨghə̀ mə. Wə̀ chi ntyiʼə̀ ŋŋâ ngəʼə̀ ambo ɨ̀nèrə̀ ɨ̀nwùə̀ wə̀ ntii àkə?”

36Yěsû a wâ ànwùə̀ ghu, nshwəŋə̀ ambo àtwuə̀ àshwatə̀ pɨ̀Jew za lo, “Kò wə̀ pô; kɨ mbə pə nɨ àpyiimə̀ ntɨŋmə̀.” 37Nkwùə̀ nɨ à lə̀ shwəŋə̀ a lenə la, ndòo mmə ndèrə̀ a ndâ gha, ndàʼnə̀ lo kò ŋònə̀ ɨ̀tse a zùŋə̀ e a ye ndàŋə̀ e Pità nɨ Jemə̀ nɨ momaa e, Jònə. 38Nkwùə̀ nɨ pobə lə̀ kwuunə̀nə amwuə ɨmwuə alyiʼə àtwuə̀ àshwatə̀ pɨ̀Jew za, Yěsû a zəənə̀ tsaʼnə pànə̀ pənə ngyìi nɨ ɨ̀tɨ̀ŋnə̀. 39Lenəla, Yěsû a lə̀ kwuunə̀ a ndâ, mbyiitə̀ ambo pobə lo, “Ɨlyiʼə zòrə̀ lə aŋunə àkə? Nɨ̀ yìi àkə? Ka moonə̀ wə̀ a kwɨghə̀ e, à lyə̂ lyə̂nə.”

40Pànə̀ pa tyiʼə̀ ngẅìi a ghobə a ye ẅìinə. A kantə̀ a ghobə ntsàa a àpyìinə ntyiʼə̀ ndòo a tǎ pɨ moonə̀ nɨ mǎ pɨ moonə̀ ngɨ̀rə̀ pobə pɨ pobə nɨ ɨ̀zùŋə̀ ndzùmə̀ ɨ̀pe pa ɨtarə nkwuunə̀ ndèrə̀ a alyiʼə nɨ moonə̀ wa à nwùunə̀nə. 41Tsaʼnə a lə̀ kwuunə̀nə la, à lə̀ ẅìimə̀ àpô moonə̀ wa nshwəŋə̀ ambo ze lo, “Talitha koum” zhyə̀ nɨ ɨ̀sùmə pənə lo, “Mɨlyiʼə mômə̀ngyə̌, nshwəŋə̀ ambo ghò lo, ‘Lòo a ɨ̀shyə̂.’”

42Mômə̀ngyə̌ wa a lə̀ zùŋə̀ ndòo a ɨ̀shyə̂ mbìʼnə̀ a nɨ yìinə̀. (A lə̀ pə moonə̀ nguʼu ntsòbə̀ ɨpaa). Tsaʼnə a lə̀ lòonə la, pànə̀ pɨ̀tsùmə̀ lə̀ yerə̀ ka mɨ̀zùŋə 43Yěsû a tyiʼə̀ nkwàtə̀ a ghobə nshwəŋə̀ lo kò pobə ghɨ̀rə̀ ŋònə̀ ɨ̀tse a zhyə̂. A lə̀ kɨ nshwəŋə̀ ambo pobə lo pobə tàʼà àzwuumə̀ ŋŋâ nɨ ze â zɨghə̀.

Поточний вибір:

Mark 5: pny

Позначайте

Поділитись

Копіювати