Matyù 21

Yěsû kwuunə̀ Yèrusalèmə̀ tsaʼa ɨ̀fò

1Tsaʼnə pobə lə̀ tyiʼnə mmə mbaatə̀ Yèrusalèmə̀, pobə lə̀ kwuunə̀ alyiʼə nɨ pɨ lə̀ mənə nfuŋə̀ nɨ Bethphage nɨ a lə̀ pənə aŋunə Mbarə̀ Olìvə̀. Yěsû à lə̀ tsàa ɨ̀zùŋə̀ ndzùmə̀ ɨ̀pe ɨpaa, 2nshwəŋə̀ ambo pobə lo, “Nɨ̀ lèrə̀ amwuə àlaʼà zə̀ a mbyə̀ pɨghə, tyìʼə̀ tsaʼnə nɨ̀ kwuunə̀nə, nɨ̌ zəənə̀ ndzàkɨshyə̀ nɨ pɨ tɨ̀ŋnə̀nə ghu pobə moonə̀ e a nɨ̀pwùnə ze. Nɨ̀ kyàa a mèrə ndòo ntô ambo mɨ̀ŋə̀. 3Ŋònə̀ ɨ̀tse a pəla nshwəŋə̀ ànwùə̀ àtse ambo pɨghə, nɨ̀ shwəŋə̀ ambo ze lo Ndòʼnə̀mbyə̂ à tàʼà a mèrə, ǎ zùŋə̀ tsàa a mèrə tyìʼə̀ nkwùə̀ ghu.”

4Ànwùə̀ zə̀ a lə̀ lòo alyiʼə a nɨ lẅenə̀ mɨ̀nwùə̀ nɨ pɨ lə̀ shwəŋə̀nə ndàŋə̀ a ndzùmə̀ ngàŋə̀ ntwuumə̀ Nẅùə̀.

5À lə̀ shwəŋə̀ lo, “Nɨ̀ shwəŋə̀ ambo Ɨ̀poonə̀ pɨ Zayònə̀ lo,

Zəənə̀, ɨ̀fò o à wə̀ ntô ambo pɨghə ndaa ndaa nkoʼò àtwuə̀ ndzàkɨshyə̀,

a pə tyìʼə̀ moonə̀ ndzàkɨshyə̀.”

6Ɨ̀zùŋə̀ ndzùmə̀ Yěsû lə̀ ghə̀ ngɨ̀rə̀ tsaʼnə Yěsû à lə̀ tiitə̀nə ghobə 7Pobə lə̀ lòo a ndzàkɨshyə̀ ghu ntô ghobə moonə̀ e, nnùŋə̀ ɨtsəʼə ɨ̀pobə aŋunə ẅèrə, Yěsû a tyiʼə̀ nnwuunə̀ aŋunə. 8Pànə̀ pɨ̀noʼnə lə̀ shànkə̀ ɨtsəʼə ɨ̀pobə amwuə àlàŋə, pɨ̀tse tserə̀ mɨ̀fàa mɨ̀tɨ̀ghə nshànkə̀ amwuə àlàŋə. 9Ɨ̀pùŋə̀ pə̀ənə̀ nɨ pɨ lə̀ lèrə̀nə a mbyə̀ ze nɨ pyə̀ nɨ pɨ lə̀ mənə ndzùŋə̀ e lə̀ pə nkyiinə̀ lo, “Hòsanà ambo Moonə̀ Dàfirə̀! Mborə̀ ɨ̀ chyə̂ ambo ẅùə̀ wa nɨ à wa ntô aŋunə nɨ̀linə̀ nɨ Ndòʼnə̀mbyə̂! Hòsanà ambo Nẅùə̀ Àkoʼntsirə̀.”

10Nkwùə̀ nɨ Yěsû à lə̀ kwuunə̀nə a Yèrusalèmə̀, àlaʼà àtsùmə̀ a lə̀ nə̀ʼnə̀ mbyiitə̀ lo, “Lə̌ ɨ̀wə̌?”

11Àpùŋə̀ pə̀ənə̀ ghu a kẅùə̀ lo, “Lə̌ Yěsû ngàŋə̀ ntwuumə̀ Nẅùə̀ nɨ à furə̀nə a Nazarètə̀ amwuə Galìlyə̂.”

Yěsû a kwuunə̀ amwuə Ndâ Mɨ̀shwàʼà Nẅùə̀

12Yěsû à lə̀ ghə̀ nkwuunə̀ amwuə Ndâ Mɨ̀shwàʼà Nẅùə̀, nkantə̀ pànə̀ nɨ pɨ lə̀ mənə ndzwuunə̀ nkɨ mə nshwùunə̀ amwuə. Yěsû à lə̀ tinə̀ pɨ̀tepèrə̀ pɨ pànə̀ nɨ pobə lə̀ mənə nkyopə̀ nkabə̀ ghobə ɨləŋə pànə̀ nɨ pobə mənə nshwùunə̀ ɨ̀lwuʼə̀ mbə̀ŋə̀ àtùŋətuŋə̀. 13Nshwəŋə̀ ambo pobə lo, “Pɨ ŋwàʼnə̀ amwuə àŋwàʼnə̀ Nẅùə̀ lo, ‘Ndâ mə̀ ghǎ pə la ndâ àchàʼtə̀ Nẅùə̀,’ la nɨ̀ wə̀ mbə̀ŋə̀ a zèrə aŋunə ‘ntoʼò pɨ̀zə̀ərə̀.’”

14Pɨ̀fə̀ pobə pɨ̀koŋə̀ a ɨ̀shyə̂ lə̀ tô ambo ze amwuə Ndâ Mɨ̀shwàʼà Nẅùə̀, a parə̀ a ghobə. 15La tsaʼnə pɨ̀fò màʼà Nẅùə̀ pobə pɨ̀nèrə̀ mbòomə lə̀ zəənə̀nə mɨ̀nwùə̀ mɨ kə̀ʼnə̀nə nɨ à lə̀ ghɨ̀rə̀nə mbwuutə̀ aŋunə àghòbə nɨ pobə lə̀ mənə nkyiinə̀ lo, “Hòsanà ambo moonə̀ Dàfirə̀,” la mbə nɨ àzaŋə̀ loŋə.

16Pobə lə̀ tyiʼə̀ mbyiitə̀ a Yěsû lo, “Wə̀ zuʼù ànwùə̀ zə̀ nɨ àghòbə a zə nshwəŋə̀ lanə?”

Yěsû a kẅùə̀ lo, “Ee. Nɨ̀ pirə̀ mə wɨghə tɨ fuŋə̀ amwuə àŋwàʼnə̀ Nẅùə̀ lo,

‘Nɨ̀ nèrə̀ mə àghòbə pobə ɨ̀poonə̀ pɨ porə̀ tsaʼnə pobə tə ngyetə̀ a Nẅùə̀ ɨ̀shìʼnə̀?’”

17Yěsû à lə̀ myàʼtə̀ a ghobə nfurə̀ àpyìinə amwuə àlaʼà, ndèrə̀ a Betanì ndyə̂ ghu.

Yěsû a chyâ ndòonə̀ aŋunə àtɨ̀ghə figə̀

18A tyiʼə̀ mbə a ngẅùʼə ngẅùʼə tsaʼnə Yěsû à lə̀ pənə amwuə àlàŋə e mmə kẅiirə̀ nkwə̂ amwuə àlaʼà la, njyə̀ ɨ̀ lə̀ mə ndzaŋə̀ e. 19A zəənə̀ àtɨ̀ghə figə̀ a nɨ̀pwùnə àlàŋə, ndèrə̀ aŋunə zèrə la ka zəənə̀ e àzwuumə̀ ndàŋə̀ e mɨfuə. Lenəla, a shwəŋə̀ ambo àtɨ̀ghə ghu lo, “Ka wə̀ pə laʼa chi zumə̀ o mɨ̀ntàamə!” Tsaʼnə à lə̀ shwəŋə̀nə a lenə la, àtɨ̀ghə ghu a zùŋə̀ mbobə̀ e.

20Nkwùə̀ nɨ ɨ̀zùŋə̀ ndzùmə̀ Yěsû lə̀ zəənə̀nə a zə ànwùə̀, a lə̀ kə̀ʼnə̀ a ghobə, pobə tyiʼə̀ mbyiitə̀ lo, “A ghɨ̀rə̀ àkə àtɨ̀ghə figə̀ zə a faʼa ndzùŋə̀ mbobə̀ tyìʼə̀ lə?”

21Yěsû a kẅùə̀ lo, “Ǹtiitə̀ a wɨghə nɨ nkǔŋə nkuŋə lo nɨ̀ tə twuʼtə̀ àpyiimə̀ ka pə a wɨghə nɨ mɨnkə, nɨ̀ ghɨ̀rə̀ a wɨghə la ndàʼà ànwùə̀ nɨ pɨ lə̀ ghɨ̀rə̀nə aŋunə àtɨ̀ghə figə̀ zə̀ apə̀. Nɨ̀ chyə̂ shwəŋə̀ ambo mbarə̀ zə̀ lo, ‘Lòo a nɨ̀ghə̂ ngə̀ mmàʼà ɨ̀pɨ̀ŋmə̀ o amwuə nchyə̂ ghu nɨŋnə̀nə’, ɨ kɨ ngɨ̀rə̀ a lenə. 22Nɨ̀ tə mbə nɨ àpyiimə̀, nɨ̀ kẅiirə̀ àzwuumə̀ àtsùmə̀ nɨ nɨ̀ pyiitə̀nə a zèrə amwuə àchàʼtə̀ Nẅùə̀.”

Pɨ pyiitə̀ a Yěsû mbə̀ʼə ɨ̀tɨ̀ŋnə̀ e

23Yěsû à lə̀ kwuunə̀ a Ndâ Mɨ̀shwàʼà Nẅùə̀, pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà tô ambo ze tsaʼnə à lə̀ mənə nnèrə̀ pə̀ənə̀, mbyiitə̀ e lo, “Wə̀ ghɨ̀rə̀ mɨ̀nwùə̀ mə la nɨ mèrə mɨ̀tɨ̀ŋnə̀? Ɨ̀tɨ̀ŋnə̀ wə̀ à ŋâ ɨ̀wə̌ ambo ghò?”

24Yěsû a kẅùə̀ lo, “Mbɨ kɨ pyiitə̀ a wɨghə nɨ taʼà àpyiitə̀. Nɨ̀ pəla nkẅùə̀ mə̀ ǹkɨ ntiitə̀ a wɨghə nɨ alyiʼə nɨ ǹdòonə ɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mèrə mə ghu. 25Àkẅiirə̀ nchyə Jònə a lə̀ furə̀ la ɨghə? A lə̀ furə̀ la a nɨ̀pwuurə̀ kə̀ ambo pə̀ənə̀?”

Pobə tyiʼə̀ ntànkə̀ pobə nɨ pobə nshwəŋə̀ lo, “Pə̀ənə̀ tə nshwəŋə̀ lo a furə̀ a nɨ̀pwuurə̀, yi ǎ pyiitə̀ lo a ghɨ̀rə̀ àkə ka nɨ̀ lə̀ tyiʼə̀ mbyiimə̀ a wɨghə ànwùə̀ nɨ à lə̀ shwəŋə̀nə? 26La pə̀ənə̀ tə shwəŋə̀ lo a furə̀ ambo pànə̀ pɨ mɨsoŋə, pə̀ənə̀ pə nɨ àkẅàrə̀ aŋunə ànwùə̀ nɨ àpùŋə̀ pə̀ənə̀ zə̀ a pɨ ghɨ̀rə̀, ntiinə pobə pɨ̀tsùmə̀ lə̀ zhyə̂nə lo Jònə la ngàŋə̀ ntwuumə̀ Nẅùə̀.”

27Lenəla pobə lə̀ kẅùə̀ ambo Yěsû lo, “Ka pəə zhyə̂ wəə.”

Yěsû a shwəŋə̀ lo, “Ka mbə kɨ tiitə̀ mə̀ a wɨghə nɨ ŋònə̀ nɨ à ŋânə ɨ̀tɨ̀ŋnə̀ nɨ ngwə̀ ngɨ̀rə̀ mɨ̀nwùə̀ mə ghu.

Àshwəŋnə̀ nàanə nàanə mbə̀ʼə ɨ̀pômbyàŋnə̀ pɨpaa

28“Nɨ̀ kwàŋə̀ àzɨghə lo àkə? Ŋònə̀ ɨ̀tse à lə̀ pə ghu ntwuʼtə̀ ɨ̀pômbyàŋnə̀ ɨ̀pe pɨpaa. À lə̀ lèrə̀ ambo ghù ntsàambyə̀ nshwəŋə̀ lo, ‘Moonə̀ mə̀, lèrə̀ ngə̀ nfàʼà sìnə̀ amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù.’ 29A shwəŋə̀ lo, ‘Ka mbə lèrə̀ mə̀.’ La nchi nkẅebə̀ ntɨŋmə̀ e ndèrə̀. 30Tǎ ɨghobə a kɨ ndèrə̀ ambo ẅùə̀ moonə̀ nkɨ nshwəŋə̀ tyìʼə̀ ànwùə̀ ghu, a kẅùə̀ lo, ‘Mbɨ ghɨ̀rə̀ tǎ,’ la ka lèrə̀ e. 31Amwuə ɨ̀poonə̀ pə̀ pɨpaa, moonə̀ nɨ à lə̀ fàʼnə àzwuumə̀ nɨ tǎ ɨghobə à tàʼnə a lə̀ pə ẅèrə?”

Pobə kẅùə̀ lo, “Ghù ntsàambyə̀.”

Yěsû a shwəŋə̀ ambo pobə lo, “Ǹshwəŋə̀ a wɨghə tyìʼə̀ nkǔŋə nkuŋə lo pɨ̀nkẅiirə̀ pɨ̀taghə̀ pobə ɨ̀kwàrə̀ ghǎ kwuunə̀ amwuə ànwùə̀ Nɨ̀fò Nẅùə̀ waʼà wɨghə. 32Mbə̀ʼnə Jònə à lə̀ tô ambo pɨghə a nɨ nèrə̀ a wɨghə nɨ àlàŋə təəmə̀nə, ka nɨ̀ pyiimə̀ a wɨghə ànwùə̀ nɨ à lə̀ mənə nshwəŋə̀, la pɨ̀nkẅiirə̀ pɨ̀taghə̀ pobə ɨ̀kwàrə̀ pyiimə̀ ànwùə̀ nɨ à lə̀ mənə nshwəŋə̀. La nɨ̀ zəənə̀ farə zəənə̀nə, la ka myàʼtə̀ wɨghə a tɨ̀pòŋə̀ ɨwɨghə pyiimə̀ e.

Àshwəŋnə̀ nàanə nàanə mbə̀ʼə ŋònə̀ nɨ à lə̀ tə̂nə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù

33“Nɨ̀ zhwiʼtə̀ àshwəŋnə̀ nàanə nàanə àtse: Ngàŋə̀ alyiʼə ɨ̀shyə̂ ɨ̀tse à lə̀ pə ghu nɨ à lə̀ pyə̀nə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù e. À lə̀ korə̀ nkaʼà nkamnə̀ a ẅèrə, ntuŋə̀ alyiʼə nɨ pɨ pa nkyiimə̀ mɨ̀ntàamə mə ghu nkɨ mboomə̀ alyiʼə nɨ̀nwuunə̀ mbyabə̀ ɨ̀swùumə. Lenəla, à lə̀ ŋâ ɨ̀swùumə ghu a àpyìinə ambo pə̀ənə̀ ndèrə̀ e a àkarə̀ amwuə yètse àlaʼà. 34Tsaʼnə nkwùə̀ a nɨ kabə̀ mɨ̀ntàamə mɨ mɨ̀lùʼù ɨ̀ lə̀ kùʼnə̀nə la, à lə̀ tsàa ngàŋə àfàʼà ɨ̀ze lo pobə̂ ghə̀ nkẅiirə̀ ɨ̀me mɨ̀ntàamə ambo pànə̀ nɨ pobə lə̀ lòonə ɨ̀swùumə ghu.

35“Pànə̀ pa lə̀ kô ngàŋə àfàʼà ɨ̀ze za, nkəʼə̀ a taʼà, nzhwuutə̀ a ẅùə̀, ntumpə̀ a taʼà nɨ mɨ̀ghòorə. 36À lə̀ chi ntsàa a ngàŋə àfàʼà ɨ̀tse ambo pobə nɨ lə̀ noʼnə ntsàarə̀ a pɨ̀ntsàambyə̀ la pobə kɨ ngɨ̀rə̀ tyìʼə̀ tsaʼnə pobə lə̀ ghɨ̀rə̀nə aŋunə pyə̀ pànə̀ la. 37À lə̀ lẅùutə̀ ntsàa moonə̀ e ambo pobə, nshwəŋə̀ lo, ‘Pobə̌ ghuʼtə̀ a moonə̀ mə̀.’

38“La tsaʼnə pànə̀ pa lə̀ zəənə̀nə a moonə̀ e la, pobə lə̀ shwəŋə̀ amwuə pobə lo, ‘Lə̌ ɨ̀ndzɨ̀ghə̀ ndâ e, nɨ̀ tô pə̀ənə̀ zhwuutə̀ e ndòo ɨ̀swùumə ẅèrə wə̀.’ 39Lenəla pobə lə̀ lòo moonə̀ e wa mmàʼà e a àpyìinə, nzhwuutə̀ e.

40“Lenəla, nkwùə̀ nɨ ngàŋə̀ alyiʼə ɨ̀shyə̂ ǎ tô, ǎ ghɨ̀rə̀ ɨla ambo pànə̀ pə̀?”

41Pobə kẅùə̀ ambo ze lo, “À ghǎ zhwuutə̀ pɨ̀tɨ̀ŋnə̀ pɨ̀ngòŋə̀ pə̀ nɨ nɨ̀wɨghə̀ ghù ndzaŋə̀nə, ŋŋâ ɨ̀swùumə e ambo pànə̀ pɨ̀nyaanə nɨ pɨ̌ ŋâ ɨ̀me mɨ̀ntàamə amwuə nkwùə̀ nɨ ɨ̀ kùʼnə̀nə.”

42Yěsû a shwəŋə̀ ambo pobə lo, “Nɨ̀ pirə̀ a wɨghə tɨ fuŋə̀ alyiʼə àŋwàʼnə̀ Nẅùə̀ nɨ a shwəŋə̀nə lo,

‘Nɨ̀ghòorə nɨ ɨ̀mboomə̀ mɨ̀ndâ à lə̀ waʼnə la

nɨ pə̀ŋə̀ ntyiʼə̀ nɨ̀ghòorə nɨ̀lẅuə̀ nɨ ndâ;

la lə lə̀ ghɨ̀rə̀ Ndòʼnə̀mbyə̂,

a kɨ mbə tyìʼə̀ ànwùə̀ yerə̀nə yerə̀nə ambo pəə.’

43“Ǹshwəŋə̀ a wɨghə lo, pɨ ghǎ kẅiirə̀ alyiʼə Nɨ̀fò Nẅùə̀ ambo pɨghə ŋŋâ ambo pànə̀ nɨ pobə̌ zumə̀ mɨ̀ntàamə mɨ̀shìʼnə̀. 44Ŋònə̀ nɨ à ghǎ kunə̀ aŋunə nɨ̀ghòorə tsə̀ à ghǎ piʼtə̀, la ẅùə̀ nɨ nɨ̀ghòorə tsə̀ ghǎ kunə̀ aŋunə ze, nɨ ghǎ ghòʼò e.”

45Nkwùə̀ nɨ pɨ̀fò màʼà Nẅùə̀ pobə pɨ̀nèrə̀ mbòomə lə̀ zuʼnə nɨkerə nɨ Yěsû tsɨ̀ nàanə nàanə tsə̀ la, pobə lə̀ zhyə̂ lo à wə̀ nshwəŋnə̀ la mbə̀ʼə pobə. 46Lenəla pobə lə̀ tyiʼə̀ ntàʼà àlàŋə a nɨ kô e la mmə mbô àpùŋə̀ pə̀ənə̀ za ntiinə pànə̀ pɨ̀ghu lə̀ pyiimə̀nə lo Yěsû la ngàŋə̀ ntwuumə̀ Nẅùə̀.

Поточний вибір:

Matyù 21: pny

Позначайте

Поділитись

Копіювати