Matteyo 13

Etarriamai ono Ayani Hinyomo

(Mar 4:1-9; Luk 8:4-8)

1To oloŋ nyia, olo nyia Yesu allet ta haji, ette itoŋo ilotifor tafar enne ittokon ittiyeniere. 2#Luk 5:1-3Okudak nyia eluluŋ waati enne ittok inyi many adahiniere inyi atagol, ette itoŋo itua honyi, buo eluluŋ waati owotia ilotifor. 3Ittiyenio nyia inyi isi erre arriai te etarriamata.

“Olo nyia obo aromoni iyehina enyomo himma. 4Ninyia oyere inyi enyomo itua mana, ofodoŋonie nyia omuk ihiji ikoi, ette aheny ikukubuna isi. 5Ofodoŋonie nyia omuk ihiji moruoi, amaji anna ahaharaŋi aboro. Ania, ette isi isuruna kokuak, nyio, ahaharaŋi aboro diya. 6Ati ninyia anok oloŋ, osuak inyi ayyalaŋa himma nyio, hobeŋi nyia isi ihum irriomonia aadde, ette isi iyohojoro. 7Ofodoŋonie nyia omuk itua hikua, ette eekua ibolori, ette itabunara isi. 8Ati imohi nyia enyomo hunnomuk iboro hunno oyiji 'to, ette isuaru emma esiha abotie, buo omuk atomuana ille, buo fe omuk atomuana hunihoi.”

9Attati Yesu itisidonia jiojio, “Itaniŋiete alla awoni ayyaha jihatai.”

Nyio Ittiyenio Yesu te Etarriamata

(Mar 4:10-12; Luk 8:9-10)

10Attati lejifak ihutonia jio Yesu, ette ifiyo inyi jiojio, “Nyio ikiana iyye jio aati te etarriamata?”

11Itarraŋ nyia Yesu jio, “Isiarani jihatai olofioro huno amijana hirre huno Olobie ettedou hunno otimoi, ati obiaŋara jihosi. 12#Mat 25:29; Mar 4:25; Luk 8:18; 19:26Nyio, atulo ollo owon 'to iko erre, ofonihini adi jihonyi buo inyi ette iwanan iko erre agalihini; buo atulo ollo obeŋ obo ariŋ jihonyi, iduhuni adi addi jihonyi ara duadi bu ariŋ ollo odiha ollo owon 'to jihonyi. 13Inyi enne ekianari ni jihosi te etarriamata jio, oŋida isi omijie, buo obeŋi igonyuni; buo fe itayirie, buo obeŋi itaniŋuni buo fe obeŋi omijani. 14#Isaya 6:9-10 (LXX)Tesi, itasiruni adi ekenita Isaya, ekianani Hollum, hunno ojiori 'to jiojio,

‘Itayiriete adi itai, itayiriete, buo ibiaŋata imijana

imijiete adi itai, imijiete, buo ibiaŋata igonyuna.

15Nyio, oddiŋi ossi hosi,

buo fe isi ottuhi ayyaha hosi;

buo fe imuti oŋite hosi.

Ŋaduo oŋite hosi igonyuni,

ŋaduo ayyaha hosi itaniŋie

ŋaduo ossi hosi amijani

ojio Hollum, ette isi iyito ajihoŋ

ette ni itaŋida isi.’

16 # Luk 10:23-24 “Ati jihatai, osiru itai amiji! Omijie oŋite hatai buo fe ayyaha hatai itaniŋie. 17Ahode, eramak ni itai jio, awahi nyia ekianak Hollum iko aati Hollum bebe igonyuna erre hunne igonyuna itai hunia, ati ittallihi nyia isi. Awahi nyia buo fe isi itaniŋuna erre hunne itaniŋuna itai, ati ittallihi nyia isi.

Iramak Yesu ojio Etarriamai ono Ayani Hinyomo Anyio

(Mar 4:13-20; Luk 8:11-15)

18“Itaniŋuna atibuo, buo fe iyiyenuna anyio enne ikiana etarriamai ono ayani hinyomo. 19Aati hulle itayirai 'to ekiana ono Nolobie, buo obeŋi omijani, arai isi ihuo enyomo hunno ofodoŋoroi 'to ihiji ikoi. Ottu olorroho ette ikuararu ariŋ ninyia oyehini ituajin hosi. 20Enyomo hunno ofodoŋonie 'to ihiji moruoi, arai ihuo aati hulle ifuotuni 'to ekiana ta amuno hètaniŋuni do. 21Ati obeŋ inyi ihum idioro itajia hosi, buo fe obeŋ itoŋo diya fur. Ojiori ettigemita kuyya ehawwata ofuonni te eram ono ekiana ono Hollum, teya teya, ette isi ihara. 22Enyomo hunno oyehini ihiji hikua, arai ihuo aati hulle itaniŋuni 'to ekiana. Ati obunarai isi te ehawwata hutta fau buo amuno ono esamiti, ania, obiaŋarik isi oŋijarik. 23Ati, enyomo hunne imohi 'to iboro hunno oyiji 'to arai isi ihuo aati hulle itaniŋuni 'to ekiana, ette imijana ojio anyio, ette isi ŋijana aaŋer, omuk esiha abotie, buo omuk atomuana ille, buo fe omuk atomuana hunihoi.”

Etarriamai ono Alabali

24Inyiak Yesu iramana jihosi obo etarriamai jiojio, “Ara Olobie ono Hollum ihua ana: Oyehi nyia obo atulo enyomo hunno oyiji imana honyi. 25Ati ninyia ajotoroi aati 'daŋ, ottu nyia obo amiottononi, ette iyehina alabali ihiji himma ette leten addi. 26Ninyia isuruni emma, itterie ossi hosi abuturi, attati alabali leyo. 27Ofuonni nyia egiamak honyi, ette jiaran jihonyi, ‘Lettok, oyiji nyia bu enyomo hunyia iyehi iyye, ottu ati alabali ana tai?’ 28Itarraŋ nyia inyi jiojio, ‘Obo amiottononi elle ihan 'to ariŋ ania.’ Buo isi ette ifiyo inyi jio, ‘Iwak iyye hohoi efuo irutoro alabali addi?’ 29Itarraŋ nyia inyi isi jiojio, ‘Obeŋ. Nyio, elle irutuna itai alabali, ŋadi irutuna iko emma. 30Ijiara alabali obolori arabotie iko emma 'daŋ many iholoŋ dioŋo. Attati ni iramana adioŋok oŋida orutuni alabali do addi, ette ititir isi, attati isuahina ihima; buo odioŋoni emma imugu hoŋ.’”

Etarriamai ono Aŋerio Cahai

(Mar 4:30-32; Luk 13:18-19)

31Inyiak Yesu iramana isi obo etarriamai onno ojio jio, “Ara Nolobie ettedou ihua ana: iduhu nyia obo atulo aŋerio cahai ette idulana imana honyi. 32Inyi aŋerio alla agalik 'to 'daŋ ta amutari, ati obolo ayyani honyi agalik 'daŋ. Alla abolo ayyani honyi, ofuonni aheny ette iduhonia asik hosi itanata honyi.”

Etarriamai ono Olobou

(Luk 13:20-21)

33Inyiak Yesu iramana isi obo etarriamai onno ojio jio, “Ara Nolobie ettedou ihua ana: iduhu nyia obo aŋotte olobou, ette icaŋana ihifua hunno oremehini ahiriehien hunihoi many odohuniere inyi 'daŋ dou.”

Ittiyenio Yesu te Etarriamata

(Mar 4:33-34)

34Iramio nyia Yesu erre huna 'daŋ jio eluluŋi waati te etarriamata. Obeŋ nyia inyi ikiana obo ariŋ arari fe te etarriamai. 35#Afureta 78:2 Ihanio nyia inyi ihuo nyia itasiruniere ekiana ninyia ojio ekianani Hollum jio,

“Ekiana adi ni jihosi te etarriamata;

Eramak adi ni jihosi erre hunno hobeŋi omijani many tetteri fau.”

Iramak Yesu ojio Etarriamai ono Alabali Anyio

36Ninyia abusaru Yesu eluluŋ waati ette ijiŋana ihaji, ette lejifak honyi ikiana jihonyi jiojio, “Iramak hohoi awoyo hiram ono alabali otto tua mana.”

37Itarraŋ nyia Yesu jiojio, “Lia ollo oyehi 'to enyomo hunno oyiji 'to inyi Lonyi Tulo. 38Amana inyi afau ana, buo enyomo hunno oyiji 'to isi aati hutto Lobie, buo alabali inyi aati hulo Olorroho. 39Buo amiottononi ollo oyehi 'to alabali inyi Sittan. Adioŋo inyi esidi ono aati hulo ahana, buo adioŋok isi ajilohien. 40Ihuo anna aharanyunierek alabali ette isuahina ihima, ara adi buo fe ihuo nyia isidi ono aati hulo ahana. 41Ifak adi Lonyi Tulo ajilohien honyi iyari addi to Lobie honyi arrohojak 'daŋ iko esusuak waati iyyauniere, 42ette ibironia isi ihima onno onok 'to bebe. Diya oyyooi adi isi buo fe oŋurutai aala hosi ta adiaha. 43Attati aati hulo Hollum faŋan Ilobie Monyosi ihuo oloŋ. Itayiriete yo, alla awoni ayyaha jihatai!

Etarriamai ono Anyahuo hunne Idimani

44“Ara Nolobie ettedou ihua ana. Onyurak nyia obo atulo anyahuo idimani itua obo amana, ette inyiak inuhana. Omuno nyia inyi bebe, ette leten itinyiaŋara erre honyi 'daŋ, ette icaharu inyiaŋuniere amana ania.

Etarriamai ono Asihirati

45“Ara buo fe Nolobie ettedou ihua ana. Ottittifiaru nyia obo apoconi asihira hunne ilamani 'to. 46Ninyia anyurak inyi obo enne ilaman 'to bebe, olo nyia inyi ette itinyiaŋana erre honyi 'daŋ inyiaŋuniere asihirati ania.

Etarriamai ono Aboi

47“Ara buo fe Nolobie ettedou ihuo ana. Oruaŋani nyia omuk ayafohok aboi hosi itua tafar enne ittokon, ette inefuna aham afacani gele gele. 48Ninyia ifut aboi, ipihuni nyia isi inyi ilotifor, ette itoŋo ifau, ette ihuhuronia aham hunno oyiji 'to itua afee, buo iruoŋori hunno orrohoji 'to addi. 49Ottu adi inyi irahan ihuo nyia jio esidi waati hula ahana. Ofuoi adi ajilohien igigialara addi arrohojak jio ayijok, 50ette ibironia isi ihima onno onok 'to bebe. Diya, oyyooi adi isi buo oŋurutai aala hosi.”

Ettiyenio Aŋejuk iko Amaruani

51Ifiyo nyia Yesu isi jiojio, “Itaniŋuna itai erre hunia?”

Buo isi ette itarraŋ ojio, “Aafe.”

52Attati inyi jiaran jihosi jio, “Itahutak ania jio, obo ettiyanani Ifahita elle ittiyanani Olobie ettedou, oso inyi ihuo amonye haŋ elle iduhu 'to erre aŋejuho iko erre amaruahi totua mugu honyi.”

Ehara Waati Nasaret Yesu

(Mar 6:1-6; Luk 4:16-30)

53Ninyia latuhok Yesu ekiana etarriamata hunia, idiaharu nyia inyi amaji ania, 54ette icaharu ibore gala hosi. Ittiyenio nyia inyi ihaji emojit, many illilliharik aati hunyia itaniŋuni 'to inyi, ette jiaran, “Orumak inyi olofioro hunia iko eduariti hunia 'daŋ ajia? 55Obiaŋara soho lonyi ahololoni olo? Obiaŋara soho honyonyi Maria? Obiaŋara soho illarak honyi bo Yakobo iko Yosefu buo Simone iko Yuda? 56Obeŋi soho haniyarak honyi 'daŋ amanyai dini? Onyurak inyi erre huna 'daŋ ajia?” 57#Yoa 4:44Ania ette isi ihara inyi.

Attati Yesu jiaran jihosi jio, “Imasik 'daŋ, abaŋi aati ekianani Hollum arari fe aati hutto bore gala hosi iko hutta haŋ hosi hama.” 58Ittallik inyi ihanio eduariti arriai diya, nyio, obeŋ nyia eruk owon jihosi.

Поточний вибір:

Matteyo 13: EA2003

Позначайте

Поділитись

Копіювати